Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

FA'ATURA I TE TURE

I tēnei tai hou, i te Henua ènana nei, u òko hae ìa te avetekao tahiti « fa’atura i te ture ». Enā à te ponatekao hei pao ma he èo ènana.

 

Te ponatekao « ture », mea òa te tomoìaòto o te èo ènana. E koàka hoì te ìte io he kāputuèo a te èpikopo Dordillon.

E tautini èhua to hua ponatekao « ture ». Me i òto mai o te ponatekao èo hepereo « Torah », oia hoì « hakakoìa, haatuhukaìa ». O te « Torah » te ikoa o te « Tekao Ònohuu » i tukuìa e te Etua ia Moite i ùka o te tuaivi Tinai. Ma hope mai, u kaveìa nātoa e te poì hepereo ma òto o te « Àraka o te Piimau ». Ua kaò ananu hua taetae Etua a 2600 èhua i tēnei. I hua tai, u vāvahi te Hakaìki nui o te tau ati Peretia, o Napukotonoto te ikoa, i te « Hiero », te Haèpure nui o Taromona i Ierutaremi ; enā te Àraka i òto.

U kaveìa mai i Tahiti hua ponatekao « ture » e te tau òrometua porotetane i tihe mai înei i te èhua 1797 ma ùka o te ihepe, o « Duff » te ikoa. I muì iho, u haamevahaìa ma puke motu o Motutini farani.

I ùka o te tapa hāmani 137 o te kāputuèo a te tau tuhuka èo tahiti, e koàka ia tātou te mou haaviviniìa o hua ponatekao « fa’atura » : honorer, respecter.

Me koè te ponatekao « honorer » io te kāputuèo a te èpikopo Dordillon, ia tiòhi tātou i te ponatekao « respecter » io he tapa hāmani 176-II, e tatau tātou : pakaihi, pāvea/pavea, kāòha.

I tēnei tai hou, u moenahu oti te ponatekao « pavea/pāvea » ; a mou i tēnei to mua ìteìa o au i òto o te kāputuèo a Mgr Dordillon ; aòè i òkoìa e au atu nei.

E koàka atii te haahana i te ponatekao « aotahi », u tata èka te haaviviniìa me « pakaihi ».

Me i te â nei, a titii tātou i te ponatekao « fa’atura », a peàu mai hoì tātou : « A pakaihi tātou i te ture ! A aotahi tātou i te ture ! A pāvea/pavea tātou i te ture ! ».

 

Patuìa e Jacques Iakopo Pelleau i te èhua 2015 .
U haatoitoiìa te patuhei vāàna i te tau aahiìa a te Haè tuhuka èo ènana i te 20/08/2022.

A pīòmi i înei no te tatau i tēnei hātika tekao ma he èo farani !

 

 

 

 

Comments est propulsé par CComment