Le site de partage de la langue marquisienne
Te tohua niutavavā hou mea àva atu àva mai i te èo ènana
The new site for sharing the Marquesan language

Vue de la plage Vainaho et du Fort Collet, Taiohae, Nuku Hiva. René Gillotin, 1844.

TE TAU KOÌKA KATORIKO - ÈO NUKU HIVA

TE TAU  KOÌKA - ÈO KĒKĒ ÀÒ

 

TE TAU KOÌKA

(L'ordre suit le calendrier de l'année liturgique qui commence au 1er dimanche de l'Avent)

8 décembre                Maria Imakurata Peàto

24-25 décembre         Noël

2 février                     Te Ùtuna ia Ietu

19 mars                     Ioteve Peàto

25 mars                     Te Haaènanaìa o Ietu

28 avril                      Petero Kanere Peàto

24 juin                       Ioane Papetita Peàto

29 juin                       Petero me Pauro Peàto

6 août                        Te Haahuìkēìa o Ietu

15 août                      Te Hāpaiìa o Maria Peàto

14 septembre             Te Peka Kāìèa

1er octobre                 Teretia Peàto no Ietu Poìti

1er novembre              Te Huaa Peàto

2 novembre                Te Huaa mamate

9 novembre                Te Haamaakau i te haèpure Katetara

 

MOU PUREMETA

 No te Haamevaha i te Evanerio

 No te ape i te tau perepitero

Te Pure no te hua i te Etua

 

TE KOÌKA O MARIA IMAKURATA - 8 NO MEI

TATAUÌA O TE HĀMANI A MOITE PEÀUÌA TENETE   3, 9-15.19-20

9       U vevaò te Hatu Etua ia Atamo me te peàu :

        « I hea òe ? » U haahua Atamo me te peàu :

10      « Ua òko au ia Òe io he pāpua.

        U haametaù au. U kahu koè au. U haapupuni au. »

11      U peàu te Hatu Etua :

        « Na ai i haaìte atu ia òe i te mea u kahu koè ?

        U haatapu au i te kai i te puku o tītahi tumu âkau.

        Ua kai òe ? »

12      U peàu Atamo : « Te vehine ta Òe i vaièi mai,

        o īa te i tuku mai i te puku. Ua kai au. »

13      U peàu te Hatu Etua i te vehine : « E aha ta òe ? »

        U peàu te vehine : « U haatukee mai te puhihenua. »

14      U peàu te Hatu Etua i te puhihenua :

        « Mēìa i ta òe hana, a ìno òe i vāveka

        o te tau ànimara me te tau mēmau pohuè io he èitā.

        A totoo òe i àò te .

        O te èpo ta òe , paotū te tau â o to òe pohuè.

15      E tōtōua atu tōtōua mai òe me te vehine ;

        e tōtōua to òe huaa me to te vehine ati i ùka .

        E tekahi i to òe upoko to te vehine ati.

        E kakahu òe i to īa tuke vaevae. »

        U peàu te Hatu Etua ia Atamo :

19      « Na to òe hānia e koàka mai i te .

        He èpo òe. E hua òe io he èpo. »

20      O Eva te ikoa ta Atamo i apa i te vehine :

        O te Pohoè te haavivini o tēia ikoa.

        O Eva hoì te kui o te tau ènana pohuè.

 

TARAMO  98 (97), 1, 2-3b, 3c-4a.6

No Òe, e Maria Virikine e, ua hana te Hatu i te hana mahaò nui.   cf. Ruka.1, 49

 
1     A hīmene i te Hatu i te hīmene hou.

      U mahaò to Īa tau hana.

      Na te mana o to Īa ìma peàto nui,

      U tuàki Īa i te mea haapākeka.

 

2     U haaìte te Hatu i to Īa haapohuèìa.

      U haapupuà i to Īa toitoi io te poì èteni.

3    U haamaakau Īa i to Īa kāòha hakahae koè,

      No te ati o Iraene, to Īa mataèinaa.

 

4     A hahi i te Hatu, e te Henua viipū.

      A haatani i te , a ùtu te pahu,

6     A òkoìa te kitā, te , te pūtoka.

      A hahi ôtou i te Hakāìki nui, te Hatu.

 

TATAUÌA O TE HĀMANI A PAURO PEÀTO I TO EFETIA  1, 3-6.11-12

3       A haameitaììa te Etua me te Motua

        o to tātou Hatu, Ietu Kirito.

        Io he àki, i òto o te Kirito,

        u haameitaì hoì te Etua ia tātou

        ma te haapī mai me te taetae kuhane.

4       Òmua naoti, ma mua o to Īa pēpena i te ao nei,

        ua vae te Etua ia tātou i òto o te Kirito,

        etià e peàto, teka koè tātou i to Īa ,

        e pohuè ana i òto o te kāòha.

5       Ma mua o te pēpena, mēìa i to Īa vaièi anamai,

        ua vae te Etua ia tātou, na Īa ta Īa anaè,

        etià e ìò tātou he tau tama no Īa

        ma io Ietu Kirito.

6       A hahiìa te Etua no to Īa karatia mahaò,

        ta Īa i vaièi mai ia tātou,

        i òto o to Īa Tama tāhia.

11      I òto o te Kirito, ua vae te Etua

        te i haatee i te tau mea hakatahi vāàna i to Īa makimaki,

        ua vae hoì te Etua ia mātou, te tau ati Iuta,

        etià e ìò mātou he mataèinaa no Īa.

12      O īa te tumu e hahi me te haakāìè mātou i te Etua,

        mātou te mataèinaa e tataì ana i te Kirito,

        ma mua o to Īa tihe mai.

 

ALLELUIA ALLELUIA        cf.Rk.1 28.42

Kāòha Òe e Maria, i te karatia, me Òe hoì te Hakāìki. U kāìèìa Òe i vāveka o te tau vehine    

 

EVANERIO O IETU KIRITO VĀÀNA E RUKA     1, 26-38

        I tēia mou ,

26      u pōpahi te Etua i te anera Kapiriere

        io te pāpuahaè o te Henua Karirea, o Natareti te ikoa,

27      io tītahi pahoè virikine, tuia me te vāhana,

        o Ioteve te ikoa, no te ati Tavite.

        O Maria te ikoa o te virikine.

28      Ua uu te anera i òto o to īa haè me te peàu :

        « Kāòha òe, i te karatia, me òe te Hatu. »

29      Ia òko Maria i hua tekao, u emièe īa e kaituto ana

        e aha òa te hakatu o hua kāòha mai ?

30      U peàu te anera ia īa :

         « Umoì òe e haametaù, e Maria e.

        U koàka mai hoì òe i te karatia io te Etua.

31      Enā e tupu òe i te tama ; e hānau òe i te tamaòa.

        E apa òe i to Īa ikoa : o Ietu.

32      E òko nui Īa. E vevaòìa te Tama a te Tiketike Nui.

        E haaìò te Hatu Etua ia Īa i te nohoka hakāìki o Tavite.

33      O Īa te hakāìki o te ati o Iakopo no te tau tai ananu.

        He pāona koè to Īa hakāìkiìa. »

34      U peàu Maria i te anera :

        « E pēhea tenā ? Aòè au e noho me te vāhana. »

35      U haahua te anera me te peàu ia īa :

        « E iho mai te Kuhane Meitaì i ùka o òe.

        E vāhīìa òe e te ao tapu o te Tiketike Nui.

        No èià, e peàto te tama.

        E peàuìa he Tama a te Etua.

36      Eīa tītahi : o Eritapeta, kui teina no òe,

        ua tupu īa i te tama e aha a e uehine īa.

        O te meàma e ono i tēnei no tēia i peàuìa e vehine mahoi.

37      Aòè he mea aòè e koàka i te Etua. »

38      A tahi a peàu Maria :

        « E pahikaèo au o te Hatu.

        A tae to òe hīa, ta òe i haki nei. »

        U titii te anera ia Maria.


 

NO TE OÌOÌ O TE KOÌKA NOERE

TATAUÌA O TE PEROHETA ITAIA     62, 1-5

1       I ia Ierutaremi, aòè au e mutu.

        I ia Tiona, aòè e mutu to ù haha,

        tihe e ìteìa to īa toitoi me he pupuà o te ata ,

        e keàpa to īa hakatu me he àma pūkohe i te .

2       E ìte te tau mataèinaa i to òe toitoi,

        e ìte te tau hakāìki i to òe kāìè.

        E apa te Hatu ia òe i te ikoa hou ta Īa i ìte.

3       E ìò òe me he paèkuà io te ìma o te Etua,

        me he heipua kekaa io te ìma o te Hatu,

        U te e vevaò hakaùa ìa òe « Tāhia titii » ;

        aòè to òe henua e vevaòìa « Fenua ataha ».

4       Atià, e apaìa to òe ikoa « Makui » ;

        e apaìa to òe henua « Tu ù hoa mātiri ».

        Na te mea, e haataetae te Hatu ia òe.

        E ìò te Hatu me he vāhana no to òe henua.

5       Me he mea e noho te mahaì me te vehine hou,

        atii e noho me òe te tuhuka i hakatū ia òe.

        Me he mea o te vehine mātiri hou te koakoa o ta īa vāhana,

        atii e haaèka òe i to òe Hatu Etua.

 

TARAMO  89 (88), 20ab.21, 27-28, 29-30

E te Etua e, io Òe anaiho te Tekao e aahi atu io te pohuè ètereno.

 

20      E te Hatu e, òmua u peàu Òe i to Òe tau hoa,

        Io he moemoeā, u hakaìte atu Òe ia âtou :

21      « U koàka ia Ù te tāvini, o Tavite te ikoa.

        U paù Au ia īa me he kao tapu. »

 

27      E peàu mai īa : « O òe tu ù Etua, tu ù Motua.

        O òe tu ù motu keâ, tu ù haapohuè. »

28      E haaìò Au ia īa he tama hāmua no Ù,

        Te tiketike nui o te tau hakāìki ia ôtoa.

 

29      I ùka o īa, e noho mau to Ù kāòha, hakahae koè.

        Me īa tu Ù Piimau no te tau tai hakatahi.

30      E hakatū Au i to īa viviniìa pāona koè.

        E mau to īa hakāìkiìa ma te tau tai ananu.

 

TATAUÌA O TE HĀMANI HANA A TE TAU ÀPOTORO     13, 16-17.22-25

16     

         E ana Pauro, u i te ìma me te peàu pēènei à :

        « E to Iraene atii me ôtou, e te tau ènana pakaihi i te Etua,

        a hakaòko mai.

17      O te Etua o tēnei mataèinaa, te Etua o Iraene

        ua vae i to tātou tau tupuna.

        U haanui Īa i te mataèinaa oi noho âtou i te Henua Ekipito.

        Ma te mana o to Īa ìma, u haauu i vaho ia âtou.

22      I muì iho u titii te Etua ia Tauro

        me te vae ia Tavite he hakāìki no âtou.

        U haameitaì te Etua ia īa e peàu ana :

        « U koàka ia ù Tavite, tama a Iete,

        o īa te ènana vāàna i to ù hīa, te i aotahi atu i to ù makimaki. »

23      Me i òto o to īa ati, u haatupu te Etua

        ia Ietu, te Haapohuè o Iraene.

24      Òmua atu o to Īa tiheìa,

        u hakaìte Ioane i te mataèinaa Iraene i te papatema

        no te hāìu i te koekoe me te hopo i te mikeo.

25      I te pāona o ta īa hana peroheta, u peàu Ioane :

        « Aòè o au tēia ta ôtou i mamaakau pu nei.

        Enā e tihe ai tītahi ma muì o au :

        aòè e hei ia ù te vevete i to īa aihū. »

 

ALLELUIA ALLELUIA

Oìoì e hikaìa te mikeo io te aomāàma nei. Oìoì e vivini te Haapohuè i te henua.

 

EVANERIO O IETU KIRITO VĀÀNA E MATEO     1, 1-25

(Tatau poto 1,18-25)

1       Te hāmani matatatau o Ietu Kirito,

        te tama a Tavite, te tama a Aparahamo.

 2       U hānau ta Aparahamo o Itaako.

        U hānau ta Itaako o Iakopo.

        U hānau ta Iakopo o Iuta me to īa tau teina.

3       U hānau ta Iuta o Farete me Fara no òto o Tamara.

        U hānau ta Farete o Eteroma.

        U hānau ta Eteroma o Arama.

4       U hānau ta Arama o Aminatape.

        U hānau ta Aminatape o Naatona.

        U hānau ta Naatona o Taremone.

5       U hānau ta Taremone o Poaha no òto o Rahapa.

        U hānau ta Poaha o Opete no òto o Ruta.

        U hānau ta Opete o Iete.

6       U hānau ta Iete o Tavite te hakāìki.

        U hānau ta Tavite o Taromona no òto o te vehine a Uria.

7       U hānau ta Taromona o Ropoama.

        U hānau ta Ropoama o Apia.

        U hānau ta Apia o Ata.

8       U hānau ta Ata o Iehotafa.

        U hānau ta Iehotafa o Iorama.

        U hānau ta Iorama o Otia.

9       U hānau ta Otia o Iotane.

        U hānau ta Iotane o Akata.

        U hānau ta Akata o Etekiata.

10      U hānau ta Etekiata o Manate.

        U hānau ta Manate o Amona.

        U hānau ta Amona o Iotia.

11      U hānau ta Iotia o Iekoniata me to īa tau teina,

        i te ava o te mōèhuìa io he henua Papironia.

12      Ma muì o te ava i te mōèhuìa io he henua Papironia,

        u hānau ta Iekoniata o Taratiere.

        U hānau ta Taratiere o Toropapere.

13      U hānau ta Toropapere o Apiuta.

        U hānau ta Apiuta o Eriakimi.

        U hānau ta Eriakimi o Atore.

14      U hānau ta Atore o Tatoka.

        U hānau ta Tatoka o Akimi.

        U hānau ta Akimi o Eriuta.

15      U hānau ta Eriuta o Ereatara.

        U hānau ta Ereatara o Matana.

        U hānau ta Matana o Iakopo.

16      U hānau ta Iakopo o Ioteve te vāhana a Maria.

        mei òto o īa i hānauìa ai o Ietu te i peàuìa te Kirito.

17      No èià e tatauìa

            ònohuu ma tai me io Aparahamo tihe atu io Tavite,

            ònohuu ma tai me io Tavite

            tihe atu i te ava o te mōèhuìa i te henua Papironia,

            ònohuu ma tai kē mei te mōèhuìa i Papironia

            tihe atu i te Kirito.

 18      O īa na te hāmani matatatau o Ietu Kirito.

        O īa nei te hānauìa o Ietu Kirito.

        U tuia te kui o Ietu, o Maria to īa ikoa,

        me tītahi vāhana, o Ioteve te ikoa.

        Ma mua to âua nohoìa, u kōpū tama Maria

        na te mana o te Kuhane Meitaì.

19      He ènana toitoi noa Ioteve, ta īa vāhana.

        Aòè īa e makimaki e pōtoho pu ia Maria.

        No èià, u kaituto īa e titii ia īa ma te ìte koè.

        Ohia e auana atii Ioteve, ua ìte īa io he moemoeā

        i te anera o te Hatu te i peàu mai :

        « E Ioteve e, tama a Tavite, umoì òe e haametaù

        no te āpuu io to òe haè ia Maria, ta òe vehine.

        U kōpū tama hoì īa na te mana o te Kuhane Meitaì.

21      E hānau īa i te tamaòa. E apa òe i to īa ikoa o Ietu.

        O īa hoì ‘’ Te i haapohuè i to īa mataèinaa

        mei to âtou tau mikeo ‘’ ».

22      Ua pao tēia tau mea paotū no te haatiàtohu

        i te tekao o te Hatu i peàuìa e te peroheta, pēènei :

23      « Enā e kōpū tama te virikine. E hānau īa i te tamaòa.

        E apa âtou i to īa ikoa o Emanuera. »

        O īa hoì ma he èo ènana « O te Etua me tātou ».

24      Ua vaa Ioteve. U aotahi īa i ta te anera o te Hatu i peàu atu

        me to īa āpuu i ta īa vehine io to īa haè.

25      Atià, aòè Ioteve i too ia Maria tihe atu i te hānauìa o te tama.

        Ua apa Ioteve i to īa ikoa « O Ietu ».

 

TE KOÌKA NOERE

 

PURE META TŪMOE

 

TATAUÌA O TE PEROHETA ITAIA     9, 1-6

1       O te mataèinaa e taha ana io te ava pōtako,

        ua ìte i te tiheìa o te māàma pupuà nui.

        I ùka o te poì e noho aa io he vao maù nui, u pupuà te àma.

2       Na Òe, e te Etua e, i haanui i te èkaèka :

        me he koakoa o te ènana e kohi ana i te puku henua,  

        me he koakoa o te tau kape ia tuhaìa te tau taetae

        o te poì hika ma òto o te tōua.

3       Me he mea ta Òe i haahika i te poì Matiana,

        na Òe i hahati i te âkau te i òomi i te mataèinaa,

        atii te âkau a te vivini o te poì hana.

4       Ua èhu nui i te ahi to te tau kape aihū

        te i haakeuu i te papa henua,   

        atii me to âtou kahu i te toto.

5       U vaièiìa mai tītahi tama hou, e tamaòa i tukuìa mai.

        O te hakatu hakāìki i ùka o to īa pauhihi.

        U apaìa to Īa ikoa : « Tuhuka mahaò. Etua mana.

        Motua pāona koè. Hakāìki o te moû. »

6       No èià, e nekeìa to Īa mana :

        Aòè e pao te moû no Tavite me to Īa Patirēia.

        E mau Īa i òto o te tiàtohu me te toitoi, i tēnei, atii ananu.

        O īa na te hana kāòha ta te Hatu o te aomāàma i ia mātou.


 

TARAMO  96 (95), 1-2a, 2b-3, 11-12a, 12b-13a.c

I tēnei , ua hānau to tātou Haapohuè.  O Īa te Kirito te Hatu.                         cf... Rk. 2,11

 

1       A hīmene no te Hatu i te hīmene hou.

        A hīmene i te Hatu te henua viipū.

2       A hīmene no te Hatu, a hahi i to Īa ikoa.

 

        Ma tēia â, ma tēia â,

3       A haaoko nui i to Īa haapohuèìa,

        A hano a haki atu i te tau mataèinaa,

        I te tau ènana paotū to Īa tau hana mahaò.

 

11      A koakoa te àki i ùka nui.

        A èkaèka te henua ia ôtoa.

        A taaàu me te pokokina te moana.

12      A haakoìka, a keùe te tau tuaivi.

 

        A haka me te koakoa te maa tumu âkau,

        I te o te Hatu e taha mai.

13      E tihe te Hatu no te haavā i te henua.

        E toitoi, e tiàtohu to Īa haavāìa.

 

TATAUÌA O TE HĀMANI A PAURO PEÀTO IA TITO  2, 11-14

11     

        U hakaìteìa mai hoì te vaièiìa o te Etua.

        O īa te tumu e koàka i te tau ènana paotū

        te pohuè te io he àki.

12      Na hua karatia e hakako mai

        no te titii i te mea haapākeka i te Etua,

        te òomi i to tātou hīa kāìè ènana, te pohuè io te ao nei

        me te koekoe atenoho, koekoe toitoi, koekoe pure hae.

13      U hakapahi hua karatia ia tātou  

        no te tataì i te tataììa haakoakoa.

        O īa hoì te tiheìa me te kāìè o Ietu Kirito,

         to tātou Etua tiketike me te Haapohuè.

14      U ùtuna hēaka ìa hoì Ietu Kirito i uē ia tātou,

        mea hooi i to tātou mikeo me te haataìtaì,

        etià e ìò tātou to Īa mataèinaa,

        poì koekoe uo i te hana meitaì.

 

ALLELUIA ALLELUIA       cf. Rk. 2,10-11

Ua haki atu nei au ia ôtou i te Tekao Meitaì hou haakoakoa : I tēnei pō, u hānauìa te Haapohuè. O Īa te Kirito, te Hatu.


EVANERIO O IETU KIRITO VĀÀNA E RUKA     2, 1-14

1       I tēia mou pō, ua tihe te tekao me io Ketare Aukuto.

        U hakapahi īa i te tau ènana o te aomāàma viipū

        no te patu i to âtou ikoa.

2       O īa te patuìa ikoa to mua,

        i te ava ua Kirino he kuvenea o te henua Ihiria.

3       Ua hee atu te tau ènana paotū no to âtou ikoa patu

        io to âtou kākaavai me te pāpuahaè tumu.

4       O Ioteve mei Natareti o te Henua Karirea,

        ua hiti i te henua Iutea, io te pāpuahaè o Tavite,

        o Petereemi te ikoa.

        Ua tupu hoì Ioteve me io te ati me te huaahaè o Tavite.

5       Ua hano Ioteve i te ikoa patu me Maria ta īa vehine,

        he kōpū tama ta īa.

6       Ohia i èià âua, ua tihe te ava e hānau ai Maria.

7       U hānau Maria i ta īa tama, he tama hāmua.

         Ua vāhīìa me te èpa me te haamoe ia īa io he fatene,

        mēìa aòè he vahi e hei no âtou io he haè āpuu manihii.

8       Enā i te henua viipū mou ènana tiaki mutō.

        Ua noho âtou io he vahi èitā, e matavaa i te pō

        no te tiòhi meitaì i to âtou naho mutō.

9       U haatata mai io âtou te anera o te Hatu.

        U pupuà viipū o âtou i te kāìè o te Hatu,

        ua hemo âtou i te hopo nui.

10      U peàu te anera ia âtou :

        « Umoì ôtou e haametaù,

         na te mea u haki atu au ia ôtou

        i te Tekao Meitaì hou mai

        e haakoakoa nui i te mataèinaa ia ôtoa.

11      I tēnei pō, io te pāpua haè o Tavite, no ôtou,

        u hānauìa te Haapohuè. O īa te Kirito, te Hatu.

12      Eīa tītahi mea hakatu no ôtou :

        e koàka ia ôtou te tama hou,

        vāhīìa me te èpa, e moe ana i òto o te fatene. »

13      Enā pu anamai me te anera

        te nuiìa o te haètoa te io he àki, tini tini âtou,

        e hahi ana i te Etua me te peàu pēènei :

14      « Te kāìè i te Etua i ùka nui.

        Te moû io he henua i te ènana poì tāhia. »

 

TE KOÌKA NOERE

 

PURE META PŌPŌUÌ

 

TATAUÌA O TE PEROHETA ITAIA      62, 11-12

11      O īa nei te tekao ta te Hatu

        e haamevaha tihe atu i te kotina o te aomāàma, pēènei :

        « A peàu i te moî a Tiona :

        Enā e tihe mai te Haapohuè, e kave ana me Īa

        i te tau taetae o to Īa tuàkiìa ;

        viipū o Īa te tau taetae haakāìè ia Īa.

12      E apaìa ôtou i te ikoa hou pēènei :

        « Mataèinaa tapu. Poì hokoìa e te Hatu. »

        E apaìa òe iho :

        « Vaeìa e te Hatu. Pāpuahaè titii koè. »

 

TARAMO 97 (96) 1.6,11-12

Enā te àma haapupuà i te ènana, ua hānau te Haapohuè

 1       O te Hatu te hakāìki nui. A koakoa te henua.

        A haaèkaèka te tau motu tini, tini.

6       U haamevaha te papa henua i to Īa toitoi noa.

        Ua ìte me te mahaò te tau ènana i to Īa kāìè.

 

11      Enā te àma haapupuà i te ènana teka koè.

        Enā me te koakoa i vāvena o te poì haatià.

12      A koakoa ôtou, e te poì aotahi i te Hatu.

        A haahuaèkaèka i te ikoa o te Hatu Etua.

 

TATAUÌA O TE HĀMANI A PAURO PEÀTO IA TITO  3, 4-7

4      

        Atià u hakaìte mai te Etua, to tātou Haapohuè

        i to Īa vaièiìa me to Īa kāòha nui no te tau ènana.

5       Na Īa i haapohuè ia tātou, mēìa i to Īa hākāòha mai,

        aòè no te vaièi mai i te tuki o to tātou hana meitaì,

        i hanaìa na tātou ta tātou anaè.

        Ma te vai, u haahānau hakaùa te Etua ia tātou nei.

        I òto o te Kuhane Meitaì,

        u haahou Īa i to tātou hakatu pohuè.

6       Na te Etua i haaneke ma te nuiìa o hua Kuhane Meitaì

        i òto o tātou, ma te ikoa o Ietu Kirito to tātou Haapohuè,

7       Etià, ma to Īa karatia, e ìò tātou

        he tau ènana toitoi i mua o te Etua,

        no te koàka mai te pohuè ètereno ta tātou e tataì mau nei.

 

ALLELUIA ALLELUIA    Rk.2,14

Te kāìè i te Etua i ùka nui. Te moû io he henua i te ènana poì tāhia

 

EVANERIO O IETU KIRITO VĀÀNA E RUKA      2, 15-20

15      Ohia ua pae te tau anera me to âtou hua io he àki,

        u peàu atu peàu mai te tau ènana tiaki mutō,

        te hoa i te hoa :

        « A pau. A hihiti tātou i Petereemi mea ìte mata

        i te mea i haapaoìa vāàna ta te Hatu i hakaìte mai. »

16      U titihe haakoi te tau ènana tiaki mutō.

        U koàka mai ia âtou o Maria, o Ioteve

        me te tama hou e moe ana i òto o te fatene.

17      Īa ìte meitaì âtou, ua haki atu i te mea

        i peàuìa ia âtou i ùka o hua pōìti.

18      Ua i te mahaò te tau ènana paotū

        te i òko i te tekao o te tau ènana tiaki mutō.

19      O Maria à, u haamau io he koekoe i tenā tau mea paotū

        me te kaituto hae ia âtou.

20      Ua hua te tau ènana tiaki mutō.

        U haakāìè âtou me te hahi i te Etua

        no te tau mea paotū ta âtou i òko me te ìte,

        vāàna i te tekao i peàuìa ia âtou.

 

PURE META OATEA

 TATAUÌA O TE PEROHETA ITAIA      52, 7-10

7       Auē te mea kanahau,

        ia tiòhi atu i te keèe e tohuti ana nei ma he tuaivi

        no te hakaìte atu i te ava o te moû.

        Auē, te mea kanahau

        ia tiòhi atu i te keèe o te Tekao Meitaì hou mai,

        e hakaìte aa i te pohuè.

        E tihe nei īa no te peàu i te pāpuahaè tapu :

        « E hakāìki to òe Hatu Etua.

8       A òko ôtou i te èo o te poì tiaki.

        Ua taki to âtou vevaòìa. E tahi taa anaè : e taaàu koakoa.

        Ua ìte mata âtou i te Hatu e tihe nei i Tiona. »

9       A tatakahiti i te koakoa ôtou,

        e te toeka o Ierutaremi te i vāvahiìa.

        Na te mea u haakoè te Hatu i te uē o to Īa mataèinaa.

        Na Īa i haapohuè ia Ierutaremi.

10      U hakaìte mai te Hatu i te mana Etua o to Īa ìma

        i te tau mataèinaa èteni paotū.

        Me i tītahi kēkē tihe toitoi i tītahi kēkē o te henua,  

        e ìte âtou i te haapohuèìa o to tātou Etua.

 

TARAMO   98 (97), 1,2-3ab, 3c-4, 5-6

Ua ìte te henua viipū i te Haapohuè ta te Etua i tuku mai.      cf. .98,3

 1       A hīmene i te Hatu i te hīmene hou.

        U mahaò hoì to Īa tau hana.

        U tuàki Īa i te mea haapākeka,

        Na te mana o to Īa ìma peàto nui.

 

2       U hakaìte te Hatu i to Īa tuàkiìa,

        U haapupuà i to Īa toitoi i mua o te poì èteni.

3       U haamaakau te Hatu i to Īa kāòha hakahae koè

        I uē i te ati o Iraene, to Īa mataèinaa.

 

        Ua ìte te henua viipū i to te Etua tuàkiìa

4       A hahi i te Hatu, e te henua viipū,

        A hīmene, a haka, a haakoìka.

 

5       A haataki i te , a vānana i te Hatu,

        A ùtu te pahu, a òko nui te Hatu Etua.

6       A òkoìa te kitā, te pū hakahau, te pūtoka.

        A vānana i te Hatu, to ôtou Hakāìki.

 

TATAUÌA O TE HĀMANI I TO HEPEREO      1, 1-6

1       I te tai kākiu, ma io te tau peroheta,

        u tekao mai te Etua ma te tau pona kē, te tau pona kē,

        te tau hakatu kē, te tau hakatu kē.

2       I tēnei tau â pāona o te aomāàma,

        u tekao mai te Etua ma io tītahi Tama.

        U haaìò te Etua i hua Tama te Hatu o te tau mēmau ia ôtoa,

        ma io Īa, u pēpenaìa te tau aomāàma.

3       O tēnei Tama te ata tokihi i te kāìè o te Etua,

        te hakatu tiàtohu èka o te Etua Motua,

        e haamau ana i te aomāàma viipū ma te mana o to Īa tekao.

        Ia pao to Īa hooi i te tau mikeo,

        u tānoho Īa i te ìma oko o te Etua Tiketike,

        i ùka nui o te àki.

4       Ua tū Īa ma ùka o te tau anera paotū,

        mēìa ua apaìa te ikoa òko nui atu i te ikoa o te tau anera.

5       Aòè hoì i peàu te Etua i tītahi anera :

        « O Òe tu Ù Tama ; i tēnei â, u haahānau Au ia Òe. »

        U peàu hakaùa :

        « E ìò Au e Motua no Īa, o Īa nei tu Ù Tama. »

6       U peàu hakaùa te Etua

        i te ava u pōpahi Īa i te Hāmua io te ao nei :

        « A atoratio ia Īa te tau anera o te Etua paotū. »

 

ALLELUIA ALLELUIA

I tēnei â, u keàpa nui te māàma o te Etua. E te tau mataèinaa e, a mai no te atoratio atu i te Hatu !


TE TĪMATAÌA O TE EVANERIO O IETU KIRITO  VĀÀNA E IOANE           1, 1-18.  (1, 1-5.9-14.)

1       I te tumu te Tekao. Io te Etua te Tekao.

        He Etua te Tekao.

2       I te tumu anamai io te Etua te Tekao.

3       Ma io te Tekao te tau mea paotū i pēpenaìa.

        Umoì Īa, aòè he mea i pēpenaìa to te i pēpenaìa.

4       I òto o te Tekao te pohuè.

        He māàma no te tau ènana te pohuè.

5       U pupuà te māàma io he pōtako,

        u haapākeka koè ta te pōtako i te māàma.

 6       Ua ìteìa te ènana ta te Etua i pōpahi mai.

        O Ioane to īa ikoa.

7       Ua tihe īa no te haatiàtohu i te māàma,

        etià e haatià te tau ènana paotū.

8       Aòè o īa te māàma. U haatiàtohu īa i te māàma.

9       Enā te māàma tiàtohu mea tūìka i te tau ènana paotū,

        te i tihe mai i te ao nei.

10      Io te aomāàma te Tekao, na Īa i pēpena i te aomāàma :

        aòè to te ao nei i ìte ia Īa.

11      Ua tihe mai io to Īa toitoi. Aòè to Īa i āpuu mai.

12      I te poì hakatahi i āpuu ia Īa,

        ua tuku atu Īa i te mana no te haaìò he tau tama a te Etua.

        O īa te poì i haatià ia Īa.

13      O te poì koè na te toto,

        koè na te makimaki nino, koè na te makimaki ènana,

        atià à, na te makimaki o te Etua i hānauìa ai.

14      U haaènanaìa te Tekao me to Īa noho i vāveka o tātou.

        Ua ìte tātou i to Īa kāìè,

        he kāìè ta te Motua i vaièi atu i ta Īa Tama tootahi,

        pī i te karatia me te tiàtohu.

 15      U haatiàtohu Ioane ia Īa, e taaàu ana pēènei :

        « O īa nei te ènana ta ù i peàu atu :

        u meitaì aè ia ù te i tihe ai ma muì o au.

        Na te mea òmua atu Īa, èpo au nei.

16      Me io to Īa meitaì nui, u koàka mai ia tātou kotoa te taetae,

        te tau karatia ma hope o te karatia.

17      Ma io Moite, ua tuku mai te Etua i te Ture.

        Ma io Ietu Kirito, ua tihe mai te karatia me te tiàtohu.

18      Aòè te ènana e tahi i ìte i te Etua.

        Na te Tama tootahi, he Etua anaiho Īa, pii me te Motua,

        u hakaìteìa mai te Etua. »

_____________________________________________________

 

TE HUAAHAÈ MEITAÌ NO NATARETI

TATAUÌA O TE HĀMANI A MOITE PEÀUÌA TENETE    15, 1-6 ; 21,1-3

1       Ia pao tēia mea paotū, u tekao te Hatu Etua

        me Aparahamo ma te ìtea moemoeā.

        U peàu te Hatu Etua pēènei :

        « Umoì e haametaù, e Aparahamo e.

        O au te i pāpua ia òe. E haanui au i ta òe moni utu. »

2       U haahua Aparahamo :

        « E te Hatu Etua e, e aha ta òe e tuku mai ?

        Enā e kaò au tama koè. E ìò ta ù tau taetae i te huaahaè,

        ia Eriehere no Tamati tu ù tāvini haoè. »

3       U peàu Aparahamo : « Aòè òe i tuku mai i te tama.

        O te ènana kē mei to ù huaahaè, te hatu o ta ù tau taetae. »

4       A tahi a peàu te Hatu Etua pēènei à :

        « Aòè e ìò i hua ènana te hatu o ta òe tau taetae,

        atià o tītahi tama ta òe e hānau mai. »

5       U aahi te Hatu ia Aparahamo i vaho o to īa haè ka

        me to Īa peàu pēènei :

        « A tiòhi i te ata àki.

        A tatau i te nuiìa o te tau hetū, me koàka ia òe.

        Atii te nuiìa o to òe ati i ùka aè. »

6       U haatià Aparahamo i te Hatu Etua.

        Ma èià, u haaìòìa Aparahamo

        he ènana toitoi noa i mua o te Hatu Etua.

1       U haameitaì te Hatu Etua ia Tara, vāàna i to Īa tekao.

2       I te ava ta te Etua i peàu atu,

        u kōpū tama Tara me to īa hānau i te tamaòa

        no Aparahamo, e aha à u kooūa īa.

3       Ua apa Aparahamo i ta īa tama o Itaako,

         te tama hānauìa mei òto o Tara.

 

TARAMO  105 (104) 1-2, 3-4, 5-6, 8-9

 U haamaakau ananu   te Hatu i to Īa Piimau       105,8

 1       A haahuaèkaèka ôtou i te Hatu. A hahi i to Īa ikoa.

        A hakaìte i te tau mataèinaa i to Īa tau hana mana.

2       A haka, a hīmene no te haameitaì ia Īa.

        A vānana i te haakakai o to Īa tau hana mahaò.

 

3       A haakaìèìa ôtou iho mēìa he huaa no Īa ôtou.

        A koakoa te tau ènana e ùmihi nei i te Etua.

4       A ùmihi ôtou i te Hatu me to Īa mana,

        A hano mai paòpaò koè i to Īa kāòha.

 

5       A haamaakau ôtou i to Īa tau hana mahaò.

        Umoì e mahae i to Īa haatoitoi i te tekao.

6       Ôtou nui, e te ati o Aparahamo to Īa tāvini,

        Ôtou te tau tama o Iraene, ta Īa i vae,

 

8       U haamaakau ananu   te Hatu i to Īa Piimau,

        Tekao haatiàtohuìa no te tau tai tini tini :

9       He tekao peàuìa ia Aparahamo,

        Tekao haatiàtohuìa i uē ia Itaako.

 

TATAUÌA O TE HĀMANI I TO HEPEREO     11, 8.11-12.17-19

8           Mēìa i te haatià, u aotahi Aparahamo i te Etua te i vevaò ia īa.

        U titii Aparahamo i to īa henua no te hee i te henua kē.

        O īa te henua e ìò ia īa ma tītahi â.

        Ua hee hoì Aparahamo ìte koè i hea e hee atu ai.

11      Mēìa i te haatià, ua tupu Tara i te tama, e aha à e uehine īa.

        U maakau hoì Tara e haapao te Etua i te mea ta Īa i peàu.

12      Ma èià, mei òto mai o te ènana, e tahi anaè, kooūa ,

        mei mate nui īa, ua tupu te ati,

        nui atu i te tau hetū o te ata àki,

        nui atu i te one io te hiku o te tai.

17      I te ava u haaveke me te haamōtii te Etua ia Aparahamo,

        mēìa i to ia haatià, u ùtuna Aparahamo ia Itaako.

18      E aha à u peàu te Etua ia Aparahamo

        e haanui i to īa ati i ùka aè mei òto o Itaako,

        ua ao Aparahamo e ùtuna i ta īa ona tama, e tahi anaè.

19      U kaituto hoì Aparahamo e koàka i te Etua

        te haapohuè hakaùa i te poì mamate.

        No èià, ua hua ta īa tama ia Īa,

        me he mea u pohuè hakaùa mei vāveka o te poì mamate.

 

ALLELUIA ALLELUIA     Ta.118, 26.27

A meitaììa te tihe nei ma te ikoa o te Hatu, O te Etua, te Hatu, te i haapupuà mai.


EVANERIO O IETU KIRITO VĀÀNA E RUKA           2, 22-40

  Akoè à 2,22.39-40

22      Ia pao te mou â

        i haatoitoiìa e te Ture a Moite, no to âtou haataìtaììa,

        ua hiti Maria me Ioteve i Ierutaremi

        me to âua kave i te tama no te ùtuna io te Hatu.

23      Ua patuìa hoì i òto o te Ture a te Hatu, pēènei :

        O te tama hāmua, a haapeàtoìa, a ùtunaìa i te Hatu.

24      U makimaki te motua me te kui e ùtuna i te hēaka,

        manu kuku e ùa, akoè a e ùa manu tavaìè,

        vāàna i te Ture a te Hatu.

25      Enā i Ierutaremi te ènana, o Timeone te ikoa.

        He ènana toitoi me te ènana pure hae.

        U tataì īa i te ava e koè ai te uēuē o Iraene.

        O te Kuhane Meitaì i ùka o īa.

26      Na te Kuhane Meitaì i hakaìte ia īa i te mea

        aòè e mate nui īa ma mua e ìte mata i te Kirito o te Hatu.

27      Ua tihe Timeone io he Hiero.

        U aahiìa e te Kuhane Meitaì.

        I te ava toitoi, ua kave te motua me te kui i te pōìti Ietu,

        mea ùtuna vāàna i te i peàuìa e te Ture.

28      Ua too Timeone i te tama io to īa pūhāîìma.

        U haameitaì īa i te Etua me te peàu :

29      « I tēnei, e te Hatu e, a ao mai

        e pae me te moû to òe tāvini, vāàna i ta òe peàu mai.

30      Ua ìte mata hoì au i to Òe haapohuèìa,

31      i haaheiìa e Òe i mua o te tau mataèinaa paotū.

32      He àma no te haamāàma i te tau èteni.

        He kāìè o Iraene, to Òe mataèinaa. »

33      Ua pī i te mahaò te motua me te kui o te tama

        mēìa i te tekao peàuìa i ùka o Īa.

34      U haameitaì Timeone ia âua.

        Ma hope o to īa peàu ia Maria, te kui :

        « Enā te tama nei, ua vaeìa no te haahika me te hakatū

        i te nuiìa o te tau ènana Iraene.

        E ìò ai te tama me he hakatu ta te tau ènana e haapākeka.

35      O to òe kuhane anaiho e tīputaèeìa me te kohetā.

        Ma èià, e hakaìteìa

        te kaituto hakanā o te nuiìa o te tau ènana. »

36      Enā me te vehine peroheta, o Ana te ikoa.

        He moî a Fanuere, no te ati Atere. He pakahio oko nui.

        U mātiriìa : e hitu èhua to īa noho me te vāhana.

37      I muì iho, he vehine popī : e vaù ònohuu ma hā o īa èhua.

        O te Hiero to īa haè nohoka, e pakaihi ana i te Etua,

        mei te â mei te pō, ma te haaoke me te pure.

38      I hua ava toitoi, ua tihe īa me to īa hahi i te Etua.

        U tekao īa i ùka o te tama i te poì paotū

        te i tataì nei i te haapohuèìa o Ierutaremi.

39      Ia haapaoìa ta te ture a te Hatu i haatoitoi,

        ua hua âtou i te Henua Karirea,

        io to âtou kaavai o Natareti te ikoa.

40      O te pōìti à, u karaiha aè, karaiha aè Īa. Ua oko aè Īa.

        Ua pī i te māàma. I ùka o Īa te karatia o te Etua.

 

TE KOÌKA O MARIA PEÀTO TE KUI O TE ETUA

TATAUÌA O TE HĀMANI A MOITE PEAUTIA NŪMERA    6, 22-27

22      U peàu te Etua ia Moite :

23      « O īa nei te ponatekao ta Aarone e peàu ai,

        atii me to īa ati ma te tau tai i ùka aè,

        no te haameitaì i te tau tama o Iraene, pēènei à :

24      A haameitaì me te tiaki meitaì te Hatu Etua ia òe.

25      A matavaièi me te haakāòha mai te Hatu Etua ia òe.

26      A tiòhi meitaì te Hatu Etua i ùka o òe.

        A tuku atu ia òe i to Īa moû. »

27      O īa te hakatu e vevaòìa tu ù ikoa

        ma ùka o te tau tama Iraene.

        O au à, e haameitaì au ia âtou.

 

TARAMO  67 (66), 2b.3, 5abd, 7-8b

 A matavaièi mai te Hatu ia tātou, a haameitaì mai.

 2       A pupuà to Īa mata i ùka o tātou nei.

3       E ìteìa to Òe vaanui io te aomāàma viipū,

        To Òe haapohuèìa ma te tau henua paotū.

 

5       A koakoa te tau mataèinaa, a hīmene âtou.

        U vivini hoì Òe i te aomāàma me te toitoi.

        U haatee Òe i te tau mataèinaa ma he henua.

 

7       Ua hua te henua i to īa puku,

        U haameitaì mai te Etua ia tātou.

8       A pakaihi te henua viipū i to īa Hatu.

 

TATAUÌA O TE HĀMANI A PAURO PEÀTO I TO KARATA   4, 4-7

4       Ia tihe te ava i haahei tia e te Etua,

        na Īa i pahi i ta Īa iho Tama,

        te i hānau tia mei òto o te vehine, te i aotahi i te Ture a Moite,

5       mea haapohuè i te tau ènana aotahi ana i te Ture,

        me te haaìò ia tātou paotū he tau tama a te Etua.

6       Ohia he tau tama ôtou a te Etua,

        ua pahi Īa i te Kuhane Meitaì i òto o ôtou, te i taaàu nei :

        " E Apa, e tu ù Motua e."

7       O īa te tumu ua koè to òe hakatu o te ènana

        haamōèhuìa i te tau kuhane mana o te ao nei.

        Ua ìò òe he tama a te Etua. Anoa e tama òe,

        e àva atu hoì i te tau taetae

        ta te Etua i tapae no to Īa tau tama.

 

ALLELUIA ALLELUIA  cf. He.1,1-2

Òmua ika, u tekao mai te Etua ma te haha o to Īa tau peroheta.  I tēnei mou pō, u tekao te Etua me tātou ma to Īa Tama.

 

EVANERIO O IETU KIRITO VĀÀNA E RUKA     2, 16-21

        I tēia mou pō,

16      u titihe haakoi mai te tau ènana tiaki mutō.

        U koàka mai ia âtou o Maria, o Ioteve

        me te tama hou e moe ana i òto o te fatene.

17      Ia ìte meitaì âtou, ua haki atu i te mea

        i peàuìa ia âtou i ùka o hua pōìti.

18      Ua i te mahaò te tau ènana paotū

        te i òko i te tekao o te tau ènana tiaki mutō.

19      O Maria à, u haamau io he koekoe i tenā tau mea paotū

        me te kaituto hae ia âtou.

20      Ua hua te tau ènana tiaki mutō.

        U haakāìè âtou me te hahi i te Etua

        no te tau mea paotū ta âtou i òko me ta âtou i ìte,

        vāàna i te tekao i peàuìa ia âtou.

21      Ia pao e vau â, ua tihe te ava no te pātehe i te pōìti.

        U apaìa te ikoa o Ietu, vāàna i ta te anera i peàu

        ma mua atu i to Īa tupuìa.


_____________________________________________________

TOMINIKA E ÙA MA MUÌ O TE KOÌKA NOERE

TATAUÌA O TE HĀMANI A PENETIRA     24, 1-2 8-12

1       Ua hahi te Māàma ia īa iho.

        I vāveka ahau o to īa mataèinaa,

        to īa haatiketike i te aò o te Etua mana nui,

2       i vāveka o te mataèinaa o te Etua Tiketike : u tekao īa.

        I mua o te Mana Nui, u haakāìè īa.

8       U tekao mai te Etua te i kānea i te tau mēmau ia ôtoa.

        O te Etua te i pēpena mai, u peàu i hea te nohoka

        ta Īa i vae no ù. Pēènei :

        « A noho òe i vāveka o te tau tama a Iakopo.

        Enā to òe hope taetae i te henua o Iraene. »

9       I te tumu anamai o te aomāàma nei, òmua naoti,

        u pēpena te Etua ia ù.

        E tū mau au ma te tau tai a tihe ananu.

10      I òto o te vahi tapu, i te aò o te Etua,

        u tāvini au ma te haahuaèkaèka.

        I te tuaivi Tiona to ù vahi noho.

11      I Ierutaremi tu ù noho mau.

        U vivini au me te mana i te pāpuahaè tapu.

12      Ua vae au me to ù haatupu i to ù aka io te mataèinaa kaìèa,

te hope taetae ta te Etua i tapae no Īa,

i vāveka ahau o te motuhaka poì peàto.

 

TARAMO 147 (147B), 12-13, 14-15, 19-20

 U Haaènanaìa te Tekao me to Īa noho i vāveka o tātou.  In.1,14

12      A haakāìè i te Hatu, e Ierutaremi e.

        A hahi i to òe Etua, e Tiona e.

13      U haamau Īa i te tau katina o to òe haè.

        U haameitaì Īa i ta òe tau tama me te huaahaè.

 

14      U vaièi Īa i te moû io to òe henua viipū.

        U hākai haamaòna ia òe me te haraoa mōmona.

15      U pōpahi te Hatu i to Īa keèe i te henua viipū.

        Ma te haakoi, u mevaha to Īa tekao hou.

 

19      U hakaìte te Hatu i ta Īa tekao ia Iakopo.

        Ua haki i to Īa makimaki me te Ture ia Iraene.

20      I hea te mataèinaa ta te Etua i haataetae atu ?

        Aòè te henua kē i ìte i to te Etua makimaki.

 

TATAUÌA O TE HĀMANI A PAURO PEÀTO I TO EFETIA 1, 3-6 15-18

3      

        A haameitaììa te Etua

        me te Motua o to tātou Hatu, Ietu Kirito.

        Io he àki, i òto o te Kirito, u haameitaì hoì te Etua ia tātou,

        ma te haapī mai me te taetae kuhane.

4       Òmua naoti, ma mua to Īa pēpena i te ao nei,

        ua vae te Etua ia tātou i òto o te Kirito,

        etià e peàto, teka koè tātou i to Īa aò,

        e pohuè ana i òto o te kāòha.

5       Ma mua i te pēpena, mēìa i to Īa vaièi anamai,

        ua vae te Etua ia tātou, na Īa ta Īa anaè,

        etià e ìò tātou he tau tama no Īa, ma io Ietu Kirito.

6       A hahiìa te Etua, no to Īa karatia mahaò,

        ta Īa i vaièi mai ia tātou, i òto o to Īa Tama tāhia.

15      No èià, mei te ava ua ìte au i to ôtou haatià i te Hatu Ietu,

        to ôtou kāòha i te mataèinaa peàto o te Etua,

16      u haahuaèkaèka au mēìa ia ôtou,

        e haamaakau ana ia ôtou i òto o ta ù pure.

17      Na te Etua o to tātou Hatu Ietu Kirito,

        te Etua Motua o te kāìè nui io he àki,

        e vaièi mai i te Kuhane haamāàma ia ôtou,

        no te ìte ma te tiàtohu o ai te Etua.

18      Na te Etua e haapuàha i to ôtou koekoe

        ma te haavivini i te mea nei : E aha te taetae

        ta tātou e tataì nei mēìa u vevaò mai te Etua ?

        E aha te kāìè nui tapaeìa e te Etua no to Īa mataèinaa ?

 

ALLELUIA ALLELUIA      cf. .1 Tm.3,16

A hahiìa Òe, e Ietu Kirito e, te i hakaìteìa me te hakatu ènana, te i haaòko nui ìa i vāveka o te tau mataèinaa, A hahiìa Òe !


EVANERIO O IETU KIRITO VĀÀNA E IOANE     1, 1-18

         Akoè à 1, 1-5.9-14

 

1       I te tumu te Tekao. Io te Etua te Tekao.

2       He Etua te Tekao.

        I te tumu anamai io te Etua te Tekao.

3       Ma io te Tekao te tau mea paotū i pēpenaìa.

        Umoì Īa, aòè he mea i pēpenaìa to te i pēpenaìa.

4       I òto o te Tekao te pohuè.

        He māàma no te tau ènana te pohuè.

5       U pupuà te māàma io he pōtako,

        u haapākeka koè ta te pōtako i te māàma.

6       Ua ìteìa te ènana ta te Etua i pōpahi mai.

        O Ioane to īa ikoa.

7       Ua tihe īa no te haatiàtohu i te māàma,

        etià e haatià te tau ènana paotū.

8       Aòè o īa te māàma. U haatiàtohu īa i te māàma.

9       Enā te māàma tiàtohu mea tūìka i te tau ènana paotū,

        te i tihe mai i te ao nei.

10      Io te aomāàma te Tekao, na Īa i pēpena i te aomāàma :

        aòè to te ao nei i ìte ia Īa.

11      Ua tihe mai io to Īa toitoi. Aòè to Īa i āpuu mai.

12      I te poì hakatahi i āpuu ia Īa,

        ua tuku atu Īa i te mana no te haaìò he tau tama a te Etua.

        O īa te poì i haatià ia Īa.

13      O te poì koè na te toto,

        koè na te makimaki nino, koè na te makimaki ènana,

        atià à na te makimaki o te Etua i hānauìa ai.

14      U haaènanaìa te Tekao me to Īa noho i vāveka o tātou.

        Ua ìte tātou i to Īa kāìè,

        he kāìè ta te Motua i vaièi atu i ta Īa Tama tootahi,

        pī i te karatia me te tiàtohu.

15      U haatiàtohu Ioane ia Īa, e taaàu ana pēènei :

        « O īa nei te ènana ta ù i peàu atu :

        u meitaì aè ia ù te i tihe ai ma muì o au.

        Na te mea òmua atu Īa, epō au nei.

16      Me io to Īa meitaì nui, u koàka mai ia tātou kotoa te taetae,

        te tau karatia ma hope o te karatia.

17      Ma io Moite, ua tuku mai te Etua i te Ture.

        Ma io Ietu Kirito, ua tihe mai te karatia me te tiàtohu.

18      Aòè te ènana e tahi i ìte i te Etua.

        O te Tama tootahi, he Etua anaiho Īa, pii me te Motua,

        u hakaìteìa mai te Etua. »

__________________________________________

TE KOÌKA EPIFANIA

TATAUÌA O TE HĀMANI O TE PEROHETA ITAIA    60, 1-6

1       A maò, e Ierutaremi e. A pupuà.

        Ua tihe mai te àma no te haakeàpa ia òe.

        Ua vāhī te kāìè o te Etua ia òe.

2       A tiòhi atu. Ua pō pōtako te henua viipū.

        Io te vao maù nui ua noho te tau mataèinaa.

        Atià ua tū te Hatu. E pupuà nei to Īa kāìè i ùka o òe.

3       E haatata mai te tau mataèinaa io to òe māàma.

        E tataha mai te tau hakāìki io to òe ata .

4       A heau. A tiòhi matioka viipū o òe.

        E hākātahi mai âtou nui. E titihe nei âtou paotū.

        Ua tihe mai nei to òe tau tama mei te henua mamao.

        Ua hua mai to òe tau moî, e tautuaìa âtou.

5       I hua ava e ìte òe, e èkaèka nui òe.

        E ù to òe koekoe pī i te koakoa.

        E tihe ai io òe te tau taetae mei te henua mamao.

        E haapukeìa io òe te tau hāìna kē

        me io te tau mataèinaa o te aomāàma viipū.

6       E hihiti mai io òe te tau naho kamerō o te henua

        Matiana me te henua Efa.

        E titihe mai io òe te poì Hapa kave ana i to âtou  

        moni kiki me te mēmau kekaa.

        E hahi âtou me te haakāìè i te Hatu Etua.

 

TARAMO 72 (71), 1-2, 7-8, 10ab.11, 12-13

 E ìteìa to Òe haapohuè mai, e te Hatu e, e te tau henua me te tau mataèinaa paotū. cf.  72,11

        E te Etua e, a tuku i to Òe mana i te hakāìki.

        A tuku i to Òe toitoi i te tama o te hakāìki.

2       A vivini īa i to Òe mataèinaa vāàna i te toitoi.

        A āpuu īa me te toko i te poì veve e uēuē ana.

 

7       I hua tau â, e pupuà te hakatu pohuè vāàna i te toitoi,

        I te henua e puàha te moû ma te nuiìa o te tau meàma.

8       A vivini te hakāìki me io te tai tihe atu i te tai.

        Me io te kaavai tihe atu i te kotina o te henua.

 

10      Te hakāìki o te henua Tarati, o te tau motu

        E kave mai i te vaetukia me te taetae kāòha.

11      E moe haatona i mua o īa paotū te tau hakāìki.

        E tāvini no īa te tau henua me te tau mataèinaa.

 

12      E haapohuè īa i te ènana veve e vevaò ia īa,

        E toko īa i te poì oomiìa e te àì.

13      E āpuu īa i te ènana pōtako, matua avai noa.

        E tiòhi meitaì īa i ùka o te poì tupe noa.

 

TATAUÌA O TE HĀMANI A PAURO PEÀTO I TO EFETIA  3, 2-3a.5-6

         E tu ù tau tunane tuehine,

2       Ua òko hoì ôtou pēhea mēìa i to Īa vaièi

        ua tuku mai te Etua i te karatia no te hana i uē ia ôtou.

3       Ma òto o te hakiìa me io te Kuhane Meitaì,

        u hakaìte mai te Etua i to Īa makimaki hakanā.

5      I te tau tai tehito, aòè te tau ènana i ìte i hua makimaki hakanā.

       

        Atià i tēnei, ua hakiìa atu e te Kuhane Meitaì

        i te tau Àpotoro o te Etua me te tau peroheta, pēènei :

6       U koàka mai i te tau èteni te tau taetae kuhane,

        peàuìa òmua, hua mea anaiho me to te tau ati Iuta.

        O âtou nui me he tau mēmau o te Tino e tahi.

        Īa âtou, te poì èteni tūtaì me te tau ati Iuta,

        te taetae vaièiìa i òto o te Kirito Ietu.

        O īa hoì te tau puku o te Evanerio.

 

ALLELUIA ALLELUIA   cf. Mt.2,2

Ua ìte mātou i to Īa hetū. Ua tihe mātou no te atoratio i te Hatu.


EVANERIO O IETU KIRITO VĀÀNA E MATEO     2, 1-12

1       U hānauìa Ietu i te kaavai Petereemi o te henua Iutea,

        i te ava o Herote te hakāìki o hua henua.

        I hua mou â, u titihe mai i Ierutaremi, te mou Makoi

        me io te henua o te kēkē tiheìa òumati.

2       U peàu âtou :

     « I hea te hakāìki nui o te tau ati Iuta te i hānau i tēnei tau pō ? »

        Ua ìte hoì mātou i to īa hetū

        io he henua o te kēkē tiheìa òumati.

        Ua tihe mātou no te moe haatona i to īa aò. »

3       Ia òko te hakāìki Herote i hua tekao, u emièe īa,

        atii me to Ierutaremi ia ôtoa.

4       U haaputuputu mai īa i te tau tāuà nui paotū

        me te tau tuhuka tekao o te mataèinaa.

        Ua ūi atu Herote ia âtou :

        « I te vahi hea e hānau ai te Kirito ? »

5       U peàu âtou ia īa :

        « I Petereemi io te henua Iutea,

        vāàna i te mea i patuìa e te peroheta :

6       « O òe, e Petereemi o te henua Iutea e,

        aòè hoì òe he kaavai iti noa i te henua Iutea !

        Na te mea me io òe e tū ai te hakāìki,

        te tiaki meitaì o Iraene, to ù mataèinaa. »

7       Ma te tekao hakanā, u vevaò mai Herote i te tau Makoi

        me to īa ape ia âtou no te haavivini toitoi mai

         inehea i pupuà ai te hetū.

8       U pōpahi Herote ia âtou i Petereemi.

        U peàu ia âtou pēènei : « A hee atu ôtou.

        A ùmihi mamate i te tekao i ùka o hua tama hou.

        Me koàka ia ôtou te tekao, a haki mai ponihoo,

        etià e hee me au e pakaihi ia īa. »

9       U aotahi âtou i te hakāìki me to âtou tataha atu.

        Enā te hetū ta te tau Makoi i ìte òmua io te henua

        o te kēkē tiheìa òumati, u pupuà i mua o âtou

        tihe atu ua tau io te vahi i èià te tama hou.

10      E ìte ana i te hetū, u koakoa nui te tau Makoi.

11      Ua uu âtou i òto o te haè me to âtou ìte

        i te tama hou me Maria, to īa òna kui.

        U momoe haatona âtou i to īa aò.

        E too ana i to âtou taetae, u ùtuna i te vaetukia :

        te moni kiki, te èpau kekaa, te mira.

12      Ma òto o te hiamoe, u hakaìteìa i te tau Makoi,

        umoì âtou e hua io te hakāìki Herote.

        Ua hua hoì âtou i to âtou henua ma he vaanui kē.

 

 

TE KOÌKA O TE PAPATEMA O IETU

TATAUÌA O TE PEROHETA ITAIA                    55, 1-11

1       O īa nei te tekao o te Hatu Etua :

        Me mate ôtou i te paka vai ? A mai ! A inu !

        Me moni koè ôtou ? A hoko pu ! A kai !

        A inu i te vino, i te vaiū !

2       Umoì e haapao pu i to ôtou moni hana

        no te kai i te ìnaì haamaòna koè.

3       A hakaòko mai ! E maòna ôtou i te ìnaì mōmona.

        A hakaòko mai ! Mave mai ! E pohuè meitaì ôtou.

        E haatoitoi au me ôtou i te Piimau pāona koè.

        E ìò hoì ia ôtou te taetae a Tavite.

4       Ua haamau au ia īa he ènana no ù i vāveka o te tau mataèinaa,

        te aahi, te vivini o te tau ati.

5       O òe à, e vevaò òe i tītahi ati aòè òe i ìte ;

        e tihe mai io òe tītahi ati kē mēìa i to òe Hatu Etua,

        te Peàto nui o Iraene te i haakāìè ia òe.

6       A ùmihi ôtou i te Etua, o īa te ava e tutuki me Īa.

        I te ava nei, a pure ôtou i te Etua, u tataèka me ôtou.

7       A hua mai te ènana mākaka me io to īa vaanui hukaka !

        A titii te ènana ìno i to īa maakau pē !

        A hua io te Etua, te i hākāòha mai ia īa !

8       He mea kē hoì te makimaki o te Etua, mea kē to te tau ènana.

        He mea kē te hakatu o te Etua, mea kē to te tau ènana.

9       Atii te tiketike o te àki ma ùka o te henua,

        atii te hōhonu atu o te maakau o te Etua

        ma ùka o te maakau ènana.

10      Ia topa te ūa me te nive me io he àki,

        haakutaù âtou me te haatapavaù i te henua.

        U haatupu âtou i te èitā me te haahua i te puku

        no te hākai i te tau ènana me te tau manu e kai ana.

11      Atii hoì te tekao ta ù i hakaìte atu :

        E hana tēia tekao i te hana ta ù i makimaki.

        U te e hua io ù ta ù tekao puku koè.

 

HĪMENE : ITAIA  12, 2, 4b-e, 5b-6

 E tatakahiti ana ôtou me te koakoa, E kapu i te vai me io te punavai pohuè      12,3

 2       O te Hatu Etua tu ù Haapohuè.

        U haatià nei au, haametaù koè.

        O te Hatu Etua tu ù ìi. E hīmene au ia Īa.

        Io te Hatu te tumu o to ù pohuè.

 

4       I hua â, e haahuaèkaèka ana i te Hatu, e peàu ôtou :

        « A haki atu io te poì èteni i to Īa tau hana mana. »

        A hakaìte atu : he Tiketike to Īa ikoa.

 

5       Ua hana hoì te Hatu i te hana mahaò.

        U mevaha to Īa òko nui ma henua viipū.

6       E Tiona e, a èkaèka, a taaàu i te koakoa !

        U titike te Hatu Etua i vāveka o ôtou.

        O Īa te Peàto nui o Iraene.

 

TATAUÌA O TO MUA HĀMANI A IOANE ÀPOTORO    5, 1-6

1       O te ènana u haatià o Ietu te Kirito,

        u hānauìa me io te Etua.

        Anoa e kāòha te ènana i te Motua,

        u kāòha hoì i ta Īa tau tama.

2       Pēènei to tātou ìte u kāòha tātou i te tau tama a te Etua :

        a kāòha tātou i te Etua, a aotahi atu i to Īa tekao.

3       Na te mea o hua mea anaiho te kāòha i te Etua

        me te aotahi atu i to Īa tau tekao.

        Mea hana māeka te aotahi i te tekao a te Etua,

4       na te mea u tuàkiìa to te ao nei e te tau tama a te Etua.

5       Ma te haatià, u tuàki tātou i to te ao nei.

        Na ai i tuàki i te ao nei ?

        O te ènana e haatià o Ietu te Tama a te Etua.

6       O hua Ietu Kirito te i tihe me te vai me te toto,

        aòè me te vai anaè, atià me te vai me te toto.

        O te Kuhane te i haatiàtohu ia Ietu Kirito.

        O te Kuhane hoì te tiàtohu.


ALLELUIA ALLELUIA       cf.Mt.3,16-17 ; Ta.29,3

I tēnei â, u pepeùìa te àki, ua iho mai te Kuhane i ùka o Ietu, ua òkoìa te èo o te Motua : « O īa nei tu ù Tama tāhia. »


EVANERIO O IETU KIRITO VĀÀNA E MAREKO      1, 7-11

        I tēia mou pō,

7       u hakako Ioane i te tekao me to īa peàu :

        « Enā a tihe mai tītahi ma hope o au nei :

        he mana keî to īa, he mana iti to ù nei.

        Aòè e hei ia oha au pii to īa vaevae

        no te vevete i te aho o to īa aihū.

8       O au à, u papatema au ia ôtou me te vai,

        o īa e papatema ia ôtou i òto o te Kuhane Meitaì. »

9       I tēia mou pō, ua hee Ietu

        me io te pāpuahaè Natareti i te Henua Karirea.

        I òto o te vaitahe Ioritane,

        u koàka mai ia Īa te papatema ma io Ioane.

10      I te ava ua hiti Ietu mei òto o te vai,

        ua ìte anamai Īa i te ata àki e vahi ana me te pepeù.

        Me he manu tavaìè, ua iho mai te Kuhane Meitaì i ùka o Īa.

11      U pohā te èo me io he àki, pēènei :

          « O Òe tu ù Tama tāhia.

          Io Òe te tiàtohu o to ù kāòha. »

 

TE KOÌKA ÙTUNA IA IETU IO HE HIERO

2 no Ūaòa

TATAUÌA O TE PEROHETA MARAKIA     3, 1-4

1       O īa nei te tekao a te Etua.

        Enā e pahi au i to ù keeè

        no te kānea i te vaanui ma mua o toù tiheìa.

        Pu anamai e tihe te Hatu io to īa hiero,

        me he mea ta ôtou e tataì nei, e kōhoà nei.

2       Enā e tihe mai te keeè o te Piimau,

        vāàna i to ôtou hīa, u tataèka to Īa tiheìa.

        O īa nei ta te Etua i peàu.

3       O ai te ènata haametaù koè i te â o to īa tiheìa ?

        Me to īa hakaìte ia īa iho, o ai e tū i mua o īa ?

        U hakatu to īa â me he ahi tāpupu e haaveàveà i te piura.

        U hakatu to īa tiòhi mai me he puà haamāìta i te kahu èpo.

4       E haataìtaì īa i te tau tama a Revi,

        e haamāìa âtou me te haapupuà hakatu me te moni kiki.

        A tahi a ùtuna âtou i te Hatu i te ùtuna toitoi teka koè.

        E haaèka i te Hatu te ùtuna hēaka o te Henua Iutea,

        o Ierutaremi.

        Atii hoì i te tai tehito o to tātou tau tupuna.

 

TARAMO  24 (23) 7, 8, 9, 10

Kāìè nui te Tama o te Etua, kāìè nui to tātou Haapohuè.

 

7       E te tau avaputa e, a hapai i to ôtou paèkutu.

        A haahāteaìa ôtou, e te tau avaputa keùe koè.

        A tomo te Hakāìki pī i te kāìè.

 

8       O ai òa tēia Hakāìki pī i te kāìè ?

        O te Hatu te toa, te hoka nui.

        O te Hatu te hoka o te tōua.

 

9       E te tau avaputa e, a hapai i to ôtou paèkutu.

        A hapaiìa ôtou, e te tau avaputa keùe koè.

        A tomo te Hakāìki pī i te kāìè.

 

10      O ai òa tēia Hakāìki pī i te kāìè ?

        O īa nei te Hatu, te Etua o te aomāàma.

        O īa nei te Hakāìki pī i te kāìè.

 

TATAUÌA O TE HĀMANI I TO HEPEREO     2, 14-18

14      Ohia ua àva atu te tau ènana paotū me he tuàne tuehine

        e tahi hakatu anaiho o te kiko me te toto,

        atii me Ietu Kirito te i haaènanaìa ma te tiàtohu,

        ua àva mai Īa i hua hakatu.

        U makimaki te Kirito ma to Īa mateìa

        e haahika i tēia i mana hoì īa i ùka o te mateìa,

        o īa hoì te Tiaporo.

        Ma èià, u haapohuè te Kirito i te tau ènana

        oomiìa me he tau tueni, me he poì mōèhu,

        ma te òa o to âtou noho i te ao nei,

        mēìa i to âtou hopo nui i te mateìa.

16      Aòè hoì e toko te Kirito i te tau anera.

        O te tai i ùka aè o Aparahamo, o âtou ta te Kirito i toko.

17      No èià, ua hei nui no Īa te haaìò hakatu toitoi

        me to Īa tau tuàne tuehine,

        etià e tāvini Īa i te Etua me he Tāuà nui,

        koekoe hākāòha, teka koè,

        me te mana no te haakoè i te mikeo o te mataèinaa.

18      Na te mea ua tohe mau te Kirito,

        e aha à to Īa memae me te nuiìa o te kōhii haaveke,

        u koàka ia Īa te toko mai i te tau ènana e uēuē nei.

 

ALLELUIA. ALLELUIA     cf. Ruka 2, 32

« He àma no te haamāàma i te tau èteni. He kāìè o Iraene, to Òe mataèinaa. »

 

EVANERIO O IETU KIRITO VĀÀNA E RUKA     2, 22-40

Akoè à : 2, 22-32

22      Ia pao te mou â i haatoitoiìa e te Ture a Moite,

        no to âtou haataìtaììa,

        ua hiti Maria me Ioteve i Ierutaremi

        me to âua kave i te tama no te ùtuna i te Hatu.

23      Ua patuìa hoì i òto o te Ture a te Hatu, pēènei :

        O te tama hāmua a haapeàtoìa, a ùtunaìa i te Hatu.

24      U makimaki te motua me te kui e ùtuna i te hēaka,

        nā manu kuku e ùa, akoè a e ùa manu māìta,

        vāàna i te Ture a te Hatu.

25      Enā i Ierutaremi te ènana, o Timeone te ikoa.

        He ènana toitoi me te ènana pure hae.

        U tataì īa i te ava e koè ai te uēuē o Iraene.

        O te Kuhane Meitaì i ùka o īa.

26      Na te Kuhane Meitaì i hakaìte ia īa i te mea

        aòè īa e mate nui ma mua e ìtemata i te Kirito o te Hatu.

27      Ua tihe Timeone io he Hiero. U aahiìa e te Kuhane Meitaì

        i te ava toitoi ua kave te motua me te kui i te pōìti Ietu

        mea ùtuna vāàna i te i peàuìa e te Ture.

28      Ua too Timeone i te tama io to īa pūhāìima.

        U haameitaì īa i te Etua me te peàu :

29      « I tēnei, e te Hatu e, a ao mai

        e pae me te moû to Òe tāvini, vāàna i ta Òe i peàu mai.

30      Ua ìtemata hoì au i to Òe haapohuèìa,

31      i haaheiìa e Òe i mua o te tau mataèinaa paotū.

32      He àma no te haamāàma i te tau èteni.

        He kāìè o Iraene, to Òe mataèinaa. »

33      Ua pī i te mahaò te motua me te kui o te tama

        mēìa i te tekao i peàuìa i ùka o Īa.

34      U haameitaì Timeone ia âua.

        Ma hope, ua peàu ia Maria, te kui :

        « Enā te tama nei, ua vaeìa no te haahika me te hakatū

        i te nuiìa o te tau ènana o Iraene.

        E ìò ai te tama me he hakatu ta te tau ènana e haapākeka.

35      O to òe kuhane anaiho e tīputaèeìa me te kohetā.

        Ma èià, e haaìteìa te kaituto hakanā

        o te nuiìa o te tau ènana. »

36      Enā me te vehine peroheta, o Ana te ikoa.

        He moî a Fanuere, no te ati Atere. He pakahio oko nui.

        U mātiriìa : e hitu èhua to īa noho me te vāhana.

37      I muì iho, he vehine popī : e vaù ònohuu ma hā o īa èhua.

        O te Hiero to īa haè nohoìa, e pakaihi ana i te Etua,

        mei te â mei te pō, ma te haaoke me te pure.

38      I hua ava toitoi, ua tihe īa me to īa hahi i te Etua.

        U tekao īa i ùka o te tama i te poì paotū

        te i tataì nei i te haapohuèìa o Ierutaremi.

39      Ia haapaoìa ta te ture a te Hatu i haatoitoi,

        ua hua âtou i te Henua Karirea,

        io to âtou kaavai, o Natareti te ikoa.

40      O te pōìti à, u karaiha aè, karaiha aè Īa.

        Ua oko aè Īa. Ua pī i te māàma.

        I ùka o Īa te karatia o te Etua.


TE KOÌNA O IOTEVE PEÀTO

19 no Pohe

TATAUÌA O TE ÙA O TE HĀMANI O TAMUERA 7, 4-5a.12-14a.16

4     I tēia mou pō, u peàu te Hatu i te peroheta Natano :

5     « A taha atu io to ù tāvini o Tavite, te hakāìki.

      A peàu ia īa pēènei : O īa nei te tekao a te Hatu.

12    Ia pao to òe nohoìa io te ao nei,

      ia moe òe e tahi me to òe tau tupuna,

      e tuku au i to òe ati i ùka aè i tītahi tama, poupuna no òe.

      U haamau au i to īa hakāìkiìa.

13    Na īa e hakatū i to haè. Na ù e haamau i to īa nohoka hakāìki

      no te ava pāona koè.

14    E ìò au he motua no īa. E ìò īa he tama no ù.

16    To òe ati me to òe hakāìkiìa e mau ananu i mua o to ù mata.

      E mau to òe nohoka hakāìki no te tau tai a tihe ananu.

 

TARAMO 89 (88) 2-5, 27.29

 E te Etua e, tiàtohu nui ta Òe tekao, a meitaììa to Òe ikoa !

 

2       E te Hatu e, e hīmene ananu au i to Òe kāòha.

        Ma te tau tai hakatahi e haki atu au i to Òe tiàtohu.

3       U peàu au : e mau to Òe kāòha no te ava pāona koè.

        Me he mea u keùe koè te papa henua, atii to Òe tiàtohu.

 

4       U peàu te Hatu : u haatoitoi au i te Piimau me to ù tāvini.

        Ma tu ù ikoa, u haatiàtohu au ia Tavite i to ù Vaeìa :

5       E haaeke au me te haamau i to òe ati i ùka aè.

        E hakatū au i to òe nohoka hakāìki no te tau tai ananu.

 

27      E peàu mai īa : « O Òe tu ù Etua, tu ù Motua.

        O Òe tu ù Motukeâ, tu ù Haapohuè. »

 29      I ùka o īa e noho mau tu ù kāòha, hakahae koè.

        Me īa tu ù Piimau no te tau tai hakatahi.

 

TATAUÌA O TE HĀMANI A PAURO PEÀTO I TO ROMA  4, 13.16-18.22

        E tu ù tau tuàne tuehine,

13      U peàu te Etua ia Aparahamo, atii me to īa ati i ùka aè :

        « O te aomāàma viipū te hope taetae

        e ìò mai ia ôtou me io to ôtou tupuna. »

        Atià, o te toitoiìa vāàna i te haatià te tumu o hua tekao,

        aòè te aotahi i te Ture.

16      O īa te tumu ma te haatià, ua ìò ia tātou

        te taetae peàuìa e te Etua, etià e vaièiìa mai

        me he taetae kāòha, etià e mana ai te tekao a te Etua

        no te tai i ùka aè paotū o Aparahamo,

        me te tau ènana e aotahi ana i te Ture,

        me te tau ènana e haatià me he mea ta Aparahamo.

        O īa te motua kuhane o tātou kotoa.

17      Ua patuìa hoì io he Hāmani tapu :

        « U haaìò au ia òe e motua o te nuiìa o te tau mataèinaa. »

        O Aparahamo to tātou motua i te aò o te Etua ta īa i haatià,

        o te Etua te i haapohuè hakaùa i te huaa mamate,

        o te Etua pēpena i te mēmau ta tātou i mamaakau koè.

18      U haatià Aparahamo i te Etua me to īa tataì

        vāàna i te mea ta te Etua i peàu ia īa,

        e aha à he tumu koè to īa tataììa.

        Ma èià, ua ìò Aparahamo he motua tupuna

        o te mataèinaa nui, nui oko, me he mea i peàuìa :

        « Atii hoì to òe ati i ùka aè. »

22      O īa te tumu u haaìòìa Aparahamo he ènana toitoi

        i te aò o te Etua.


ALLELUIA ALLELUIA  Tar 84, 5

Mamau te ènana te i noho io to òe haè, oatea te pō, e hahi ana i to òe kāìè.

 

EVANERIO O IETU KIRITO VĀÀNA E MATEO

1, 16.18-21.24a

16      U hānau ta Iakopo o Ioteve te vāhana a Maria.

        Me i òto o īa i hānauìa ai o Ietu te i peàuìa te Kirito.

 18      O īa nei te hānauna o Ietu Kirito.

        U tuia te kui o Ietu, o Maria to īa ikoa,

        me tītahi vāhana, o Ioteve te ikoa.

        Ma mua o to âua nohoìa,

        u kōpū tama Maria na te mana o te Kuhane Meitaì.

19      He ènana toitoi noa Ioteve, ta īa vāhana.

        Aòè īa e makimaki e pōtoho pu ia Maria.

        No èià, u kaituto e titii ia īa ma te ìte koè.

20      Ohia e auana atii Ioteve, ua ìte īa io he moemoeā

        i te anera o te Hatu te i peàu mai :

        « E Ioteve e, tama a Tavite, umoì òe e haametaù

        no te āpuu io to òe haè ia Maria, ta òe vehine.

        U kōpū tama hoì īa na te mana o te Kuhane Meitaì.

21      E hānau īa i te tamaòa. E apa òe i to Īa ikoa o Ietu.

        O Īa hoì te i haapohuè i to Īa mataèinaa

        me io to âtou tau mikeo. »

24      Ua vaa Ioteve. U aotahi i ta te anera o te Hatu i peàu atu

        me to īa āpuu i ta īa vehine io to īa haè.

 

Akoè à

EVANERIO O IETU KIRITO VĀÀNA E RUKA     2, 41-51a

41      I tēia èhua, i tēia èhua, i te ava Koìka Pakate,

        ua hiti i Ierutaremi te motua me te kui o Ietu.

42      I te ava ua pao toitoi ònohuu ma ùa èhua to Ietu,

        ua hiti âtou i te koìka me he mea ua hani âtou.

43      Ia pao te mou â koìka, ua hua âtou.

        O te tama Ietu à, ua noho i Ierutaremi,

        ìte koè to Īa motua me te kui.

44      E auana ta âua enā te tama me te tau hoa,

        ua taha atu âtou, e tahi â te tahaìa.

        A tahi a hano âua e ùmihi ia Ietu

        i vāveka o te huaa me te tau hoa.

45      Aòè i koàka mai Ietu ia âua.

        I hua atu ai âua i Ierutaremi e ùmihi ana.

46      Ua pao e to ù â i te ùmihi,

        io he Hiero u koàka ia âua Ietu,

        e noho ana i vāveka o te tau tuhuka tekao,

        e hakaòko me te ūi atu ia âtou.

47      Ua pē i te mahaò te poì paotū e hakaòko ia Īa,

        e ìte ana i to Īa māàma me to Īa haahua atu i te tekao.

48      U emièe te motua me te kui i te ìteìa ia Ietu.

        U peàu to Īa kui :

        « E tu ù tama e, no te aha ta òe atii ia māua ?

        Eīa to òe motua me au nei pī i te uē, e ùmihi ana ia òe. »

49      U peàu Ietu ia âua : « No te aha i ùmihi ai ôùa ia ù ?

        Aha u te e ìte ôùa

        o ta ù hana tumu te tiòhi i ta to ù Motua ? »

50      Aòè âua i vivini i ta Ietu tekao ia âua.

51      Ua hee Ietu me âua i Natareti. U aotahi atu Īa ia âua.

 

TE KOÌKA HAAÈNANAÌA O IETU

25 no Pohe

TATAUÌA O TE PEROHETA ITAIA     7, 10-14 ; 8,10

10      U pōpahi te Etua ia Itaia, te peroheta,

        io te hakāìki, o Akata to īa ikoa.

        U peàu Itaia i te hakāìki pēènei :

11      « A ape òe i tītahi hakatu io te Hatu :

        e aha à te hakatu, me io te havaiki oti,

        me io te àki i ùka oti. »

12      U haahua te hakāìki : « Aòè.

        U te e haamōtii atu au i te Etua. »

13      A tahi a peàu Itaia, te peroheta :

        « A hakaòko mai, e te ati o Tavite.

        Aòè e àva ta ôtou haapaòpaò i te tau ènana ?

        E hano ôtou i tēnei e haapaòpaò i tu ù Etua ?

14      Na te Hatu iho e tuku atu ia ôtou i tītahi hakatu.

        U kōpū tama te vehine hou virikine, e hānau īa i te tamaòa.

8,10    U apaìa to Īa ikoa o Emanuera.

        O īa hoì ma he èo ènana : O te Etua me tātou.

 

TARAMO  40 (39) 7-8a, 8b-9, 10,11

Eīa e tihe au nei no te aotahi atu i ta òe tekao.

 

7       Aòè Òe e makimaki i te tau ùtuna hēaka.

        U pepeù Òe i tu ù puaìka, e te Etua e.

        Aòè Òe i āpuu mai i te hēaka pūovo i te ahi.

8       O īa te tumu o tu ù peàu atu : Eīa e tihe au nei.

 

        Ua patuìa no ù io he Hāmani tapu

9       Pēhea te haatae i to Òe makimaki.

        E tu ù Etua e, o īa nei tu ù hīa :

        Te aotahi atu i ta Òe tekao ma io he koekoe.

 

10      I mua o te motuhaka o to Òe mataèinaa,

        U hakaìte au i te mea toitoi vāàna e Òe.

        A haamaakau Òe u te e mutu to ù haha.

        E te Hatu e, ua ìte meitaì Òe.

 

11      U te e tomi au io tu ù koekoe i to Òe hākāòha mai.

        Ua haki au i to Òe toitoiìa me to Òe tiàtohu.

        U hakaìte au i te motuhaka o te mataèinaa

        I to Òe hākāòha mai me te vaièiìa.

 

TATAUÌA O TE HĀMANI I TO HEPEREO     10, 4-10

4       Mēìa u te e koàka i te toto o te piha,

        o te koimaa te hooi i te mikeo.

5       O īa te piò i te ava ua tihe te Kirito io te ao nei,

        u peàu ia pēènei : « E te Etua e, aòè Òe i makimaki

        i te ùtuna hēaka, akoè a i te tau ùtuna hakatu kē.

        Atià, u kānea Òe i te nino no ù.

6       Aòè Òe i āpuu i te hēaka pūovo i te ahi,

        i te ùtuna haatāvaè no te haakoè i te umu mikeo.

7       U peàu hoì au ia Òe : Eīa au nei.

        Ua tihe au no te haatae i to Òe makimaki, e te Etua e,

        vāàna i te mea i patuìa io he Hāmani tapu i ùka o au nei. »

8       To mua u peàu te Kirito :

        « Aòè Òe i makimaki i te ùtuna hēaka,

        u te e āpuu Òe i te ùtuna o te taetae kāòha,

        te hēaka pūovo i te ahi, te ùtuna haatāvaè i te umu mikeo. »

        O âtou paotū te tau ùtuna peàuìa e te Ture a Moite.

9       I muì iho, u peàu te Kirito :

        « Eīa au nei no te haatae i to Òe makimaki. »

        Ma èià, u haakoè te Kirito i to mua hakatu ùtuna hēaka

        no te haamana i te hakatu ùtuna hou.

10      U haapeàtoìa tātou, mēìa u aotahi Ietu Kirito

        i te makimaki o te Etua me to Īa ùtuna i to Īa iho nino,

        e tahi ùtuna anaè no te tau tai a tihe ananu.

 

ALLELUIA. ALLELUIA    cf. Ioane 1, 14

U haaènanaìa te Tekao me to Īa noho i vāveka o tātou. Ua ìte tātou i to Īa kāìè. A tihe mai, a atoratio ia Īa !

 

EVANERIO O IETU KIRITO VĀÀNA E RUKA     1, 26-38

        I tēia mou pō,

26      u pōpahi te Etua i te anera Kapiere

        io he pāpuahaè o te Henua Karirea, o Natareti te ikoa,

27      io tītahi pahoè virikine, tuia me te vāhana,

        o Ioteve te ikoa, no te ati Tavite.

        O Maria te ikoa o te virikine.

28      Ua uu te anera i òto o to īa haè me te peàu :

        « Kāòha òe, pī i te karatia, me òe te Hatu. »

29      Ia òko Maria i hua tekao, u emièe

        e kaituto ana e aha òa te hakatu o hua kāòha mai ?

30      U peàu te anera ia īa : « Umoì òe e haametaù, e Maria e.

        U koàka mai hoì ia òe te karatia io te Etua.

31      Enā e tupu òe i te tama, e hānau òe i te tamaòa.

        E apa òe i to Īa ikoa : o Ietu.

32      E òko nui Īa. E vevaòìa te tama a te Tiketike Nui.

        E haaìò te Hatu Etua ia Īa i te nohoka hakāìki o Tavite.

33      O Īa te hakāìki o te ati o Iakopo no te tau tai ananu.

        He pāona koè to īa hakāìkiìa. »

34      U peàu Maria i te anera : « E pēhea tenā ?

        Aòè au i noho me te vāhana. »

35      U haahua te anera me te peàu ia īa :

        « E iho mai te Kuhane Meitaì ma ùka o òe.

        E vāhīìa òe e te ao tapu o te Tiketike Nui.

        No èià, e peàto te tama : e peàuìa tama a te Etua.

36      Eīa tītahi : O Eritapeta e kui teina no òe,

        ua tupu īa i te tama e aha à u pakahio īa.

        A ono meàma i tēnei no tēia i peàuìa e vehine mahoi.

37      Aòè he mea aòè e koàka i te Etua. »

38      A tahi a peàu Maria :

        « O au nei te pahikaèo o te Hatu.

        A tae to òe hīa, ta òe i haki nei. »

        Me te titii te anera ia Maria.


TE KOÌNA O PETERO KANERE

28 no Nāpeka.

TATAUÌA O TO MUA HĀMANI I TO KORINETIA  9, 16-19.22-23

        E tu ù tau tuàne tuehine,

16      E aha à e hakako au i te Evanerio, u te e haakaìè pu au.

        Ua tukuìa mai hua hana e te Etua.

        Aòè e koàka ia ù te haakoè.

        He mea ìno au nei no to ù hakaìte koè i te Evanerio.

17      Anoa ua hana au i hua hana na ù ta ù anaè,

        e aha e koàka mai hoì ia ù te tuki meitaì ?

        Atià, u te e hana au i tēnei hana na ù ta ù.

        O te Etua te i vae mai no te hana.

18      No èià e aha te tuki i koàka mai ia ù ?

        O īa nei : te koakoa o te hakako pu i te Evanerio.

        Aòè au i hano i te tuki e hei ia ù

        no te hakaìte atu i te Evanerio.

19      Ua hana au na ù ta ù. U te e tueni au i tītahi ènana kē.

        Atià, u haaìò ia ù iho he tueni o te tau ènana paotū,

        vāàna e hua mai i te Hatu te nuiìa o te tau ènana.

 22      U haaìò au he ènana haatià iti, hakatu me te poì haatià iti,

        vāàna te haahua mai a te Etua i te poì haatià iti.

        U haaìò au hakatu me te tau ènana kē, ènana kē paotū,

        vāàna e hua mai tahipito io te Hatu.

23      O ta ù tau hana paotū i hanaìa i uē i te Evanerio,

        etià e àva atu au i to te Evanerio tau taetae.


TARAMO  96 (95) 1-2a, 2b-3, 7-8a, 9-10a

A hano a haki atu i te tau mataèinaa, i te tau ènana paotū to Īa tau hana mahaò.

 

1       A hīmene no te Hatu i te hīmene hou.

        A hīmene i te Hatu te henua viipū.

2       A hīmene no te Hatu, a hahi i to Īa ikoa.

 

3       A haaòko nui i to Īa haapohuèìa,

        A hano a haki atu i te tau mataèinaa,

        I te tau ènana paotū i to Īa tau hana mahaò.

 

7       E te tau mataèinaa e, a hua io te Hatu,

        A hua io te Hatu me te kāìè me te mana.

8       A haakaìè i te ikoa o te Hatu.

 

9       A atoratio i te Hatu, pōnionio i te peàto nui.

        A pakaihi i te Hatu me te emièe te henua viipū.,

10      A hakaìte atu i te tau èteni : o te Hatu te Hakāìki.

 

ALLELUIA. ALLELUIA     Tar. 117, 1

A hahi i te Hatu, e te tau mataèinaa paotū. A haakaìè i te Etua, e te tau henua ia ôtoa.

 

EVANERIO O IETU KIRITO VĀÀNA E MATEO     28, 16-20

        I tēia mou pō,

16      ua hiti te tīònohuu ma tahi kouâ i te Henua Karirea,

        i ùka o te tuaivi ta Ietu i peàu atu ia âtou.

17      Ia ìtemata âtou ia Ietu, u momoe haatona âtou nui,

        âtou te i haatià koè òmua.

18      U haatata mai Ietu me âtou. U peàu Īa pēènei à :

        « Ua tukuìa mai te mana ia ôtoa,

        io he àki atii io he henua.

19      A tataha atu ôtou.

        A haaìò i te tau mataèinaa paotū he tau kouâ,

        e papatema ana ia âtou i te ikoa

        o te Motua me te Tama me te Kuhane Meitaì.

20      A hakako ia âtou no te aotahi i te tau mea paotū

        ta ù i peàu ia ôtou.

        Enā e noho au me ôtou ma te tau â paotū,

        tihe atu i te paoìa o te ao nei. »

 

 KOÌKA O IOANE PAPETITA

23 no Tūhua me Takeo i te ahiahi

TATAUÌA O TE PEROHETA IEREMIA     1, 4-10

4       U tekao mai te Hatu me to Īa peàu pēènei :

        « Ua ìte au ia òe ma mua o to ù kānea ia òe

        i òto o te kōpū o to òe kui.

5       U haapeàto au ia òe ma mua o to òe hānauìa.

        Ua vae au ia òe no te hana peroheta

        i vāveka o te tau mataèinaa.

6       U haahua au : « E te Hatu tu ù Etua e. E tōìki au.

        Aòè au i have i te tekao. »

7       U peàu hakaùa te Hatu : « Umoì e peàu : he tōìki au nei.

        Enā e hee òe io te tau ènana vāàna e to ù pōpahi ia òe.

        E peàu atu òe i te tau mea paotū ta ù e hakaìte ia òe.

8       Āua òe e haametaù ia âtou.

        O au nei me òe. E toko au ia òe. »

9       I muì iho, u hohoà te Hatu i to Īa ìma

        me te haatukia i tu ù kiikutu, e peàu ana :

        « E tuku au i tu ù tekao i òto o to òe haha.

10      A haamaakau òe : i tēnei â, ua tuku atu au ia òe

        i te mana no te vivini i te tau mataèinaa

        me te tau henua, no te takitumu me te haahika,

        no te vāvahi me te haakoè, no te hakatū me te nanu.

 

TARAMO   71 (70), 5-6b, 7-8, 15ab.17, 19.6c

U pāpua mai òe me i te â o to ù hānauìa,  Ua vae mai me i òto te kōpū o tu ù kui.

 

5       E te Hatu tu ù Etua e, o òe tu ù tataììa,

        To ù toko me i te ava o to ù nino hou.

6       U pāpua mai òe me i te â o to ù hānauìa,

        Ua vae mai me i òto o te kōpū o tu ù kui.

 

7       He mea nui te tau ènana e mahaò ia ù,

        Mēìa o òe to ù ìi, to ù pātoko.

8       Paotū te â, u pohā to ù èo

        No te haamevaha i to òe kāìè.

 

15      I tēia â, i tēia â, u hakaìte tu ù haha

        I to òe tau hana toitoi, e hana haapohuè.

17      E te Etua e, i te ava tōìki au, u haamāàma mai òe.

        Tihe i tēnei, u haamevaha au i to òe hana mahaò.

 

19      E te Etua e, u tiketike me he àki to òe toitoi,

        O òe te i hana i te tau hana mana nui.

        E tu ù Etua e, o ai e hakatu me òe ?

6c      Paotū te â, e hahi au ia òe.

 

TATAUÌA O TO MUA HĀMANI A PETERO PEÀTO  1, 8-12a

        E tu ù tau tuàne tuehine,

8       u kāòha ôtou ia Ietu, e aha à aòè i ìtemata.

        U haatià ôtou ia Īa e aha à, i tēnei, aòè ôtou i ìtemata.

        Ua pī i te koakoa to ôtou koekoe, u te e àva te ponatekao

        no te haavivini i te tumu o hua koakoa me io he àki mai.

9       Na te mea, u haapohuè te Etua ia ôtou.

        O īa hoì te mea i koàka mai ma to ôtou haatià ia Ietu Kirito.

10      O īa na te haapohuèìa ta te tau peroheta ua hano

        e haavivini me te haapuàha no te hakaìte i te karatia

        ta te Etua e vaièi ia ôtou.

11      U haamāàma te Kuhane Meitaì i hua tau peroheta,

        e haki ana ia âtou i te mea e memae te Kirito,

        ma mua o to Īa haakaìèìa.

        U makimaki hoì te tau peroheta e ìte ahea e tihe mai,

        pēhea e pao ai hua tau mea paotū.

12      U haavivini te Etua ia âtou aòè hua tekao

        no to âtou iho meitaì, atià i uē ia ôtou.

        O âtou te tau peroheta te tau tāvini o te tekao.

        I te ava u hakako te tau keeè o te Èvanerio ia ôtou,

        u haamāàmaìa âtou e te Kuhane Meitaì

        te i pahiìa me io he àki.

        O te tau anera iho te i kōhoà e ìte i te tumu

        o hua Tekao Meitaì.

 

ALLELUIA. ALLELUIA      Ioane 1, 7 ; Ruka 1, 17

« Ua tihe īa no te haatiàtohu i te Māàma, E haapei īa no te Hatu i te mataèinaa koekoe aotahi atu. »

EVANERIO O IETU KIRITO VĀÀNA E RUKA     1, 5-17

5       I te ava o Herote, te hakāìki o te Henua Iutea,

        enā e tahi tāuà no te ati Apia, o Takaria te ikoa.

        O ta īa vehine no te ati Aarone, o Eritapeta te ikoa.

6       He mau ènana toitoi noa âua tokoùa i te aò o te Etua.

        U aotahi atu âua, teka koè, i te tau tekao paotū

        me te tau ture a te Hatu.

7       Aòè a âua tama, na te mea he vehine mahoi Eritapeta,

        mēìa u kooūa, u pakahio âua.

8       I te â i haatoitoiìa no to īa papatāuà,

        ua hana Takaria i to īa hana tāuà, i te aò o te Etua.

9       Vaana i te ture o te haatāuà, ua vaeìa Takaria ma te haakai

        no te tomo i òto o te ahu tapu o te Hatu

        me te ùtuna i te auahi mira.

10      I vaho, u putuputuìa te mataèinaa paotū pure ana

        i te ava e ùtunaìa te auahi mira.

11      U hakaìte hoì te anera o te Hatu ia Takaria.

        Ua tū te anera i te ìma oko o te hātaa o te èpau kekaa.

12      Ia ìte Takaria i te anera, u pukina īa, ua hemo i te haametaù.

13      Atià, u peàu te anera ia īa :

        « Umoì òe e haametaù, e Takaria e,

        ua òkoìa hoì to òe pure.

        O Eritapeta, ta òe vehine, e hānau i te tamaòa.

        E apa òe i to īa ikoa : o Ioane.

14      E koakoa, e èkaèka òe. E haakoakoa to īa hānauìa

        i te nuiìa o te tau ènana.

15      E òko nui hoì īa i mua o te Etua.

        Aòè īa e inu i te uaina akoè a i te namu.

        E pī īa i te Kuhane Meitaì

        me i te ava i òto o te kōpū o to īa kui.

16      E haahua īa i te nuiìa o te tau tama Iraene

        io te Hatu, to âtou Etua.

17      E taha īa i mua o te Hatu me te kuhane me te mana o Eria,

        no te haatutuki i te tau motua me ta âtou tau tama,

        no te haahua i te poì pūtuì io he vaanui o te toitoiìa.

        E haapei īa no te Hatu i te mataèinaa koekoe aotahi atu. »


NO TE Â KOÌKA 24 NO TŪHUA ME TAKEO

TATAUÌA O TE HĀMANI A TE PEROHETA ITAIA      49, 1-6

1       A hakaòko mai ôtou, e te tau motu me io te vahi mamao.

        A āpuu i to ù tekao, e te tau mataèinaa o te henua kē.

2       I te ava enā au i òto o te kōpū o to ù kui,

        u vevaò mai te Hatu Etua ma to ù iho ikoa.

        Na te Hatu i haaìò i to ù èo me he kohetā koi oko.

        Ua toko mai te Hatu me te mana o to Īa ìma.

        O au ta Īa pana haataetaeìa, e mau ana io he kato kohetā.

3       U peàu mai te Hatu : « E te mataèinaa Iraene,

        o òe tu ù tāvini. Io òe tu ù kāìè. »

4       Atià, u kaituto au : « U haapaòpaò pu ia ù iho.

        He tupepaka to ù hana.

        E aha te mea i koàka mai ma to ù hana nui ? »

        Atià, i mua o te Hatu, ua tū mau to ù hana toitoi.

        Io te Etua te tuki o tu ù hana meitaì.

5       I tēnei, u pohā te èo o te Hatu Etua

        te i kānea ia ù i òto o te kōpū o to ù kui, etià e tāvini au no Īa,

        me to ù haahua i te meitaì i te ati Iakopo,

        e haakātahi mai i te mataèinaa Iraene.

        U haataetae te Etua ia ù. O te Etua tu ù ii.

6       O īa nei ta te Etua i peàu mai : " O òe tu ù tāvini

        no te haahua i te meitaì i te tau ati o Iakopo,

        no te haakātahi mai i te toeka o te mataèinaa Iraene.

        Tōtahi atu e haaìò au ia òe te māàma o te poì èteni,

        etià e nekeìa to ù haapohuè

        tihe atu i te kotina paoìa o te henua. »


TARAMO  139 (138) 1-2.3b, 13-14b, 14c-15b

Haahuaèkaèka au i tu ù Etua, mēìa i te nuiìa o to Īa tau hana mahaò.    139, 24

 

1       E te Hatu e, u tiòhi matioka mai, ua ìte òe,

2       Ua ìte òe ia ù e moe ana, e tū ana.

        Me i te vahi mamao, ua vivini òe i to ù maakau paotū.

3       I mua o òe, u tahakahaka to ù tau vaanui kotoa.

 

13      O òe te i pēpena i to ù koekoe me te ate.

        U kānea òe ia ù i òto o te kōpū o to ù kui.

14      Ua hahi au ia òe no te hana mahaò,

        Te hana mahaò nui o to ù nino me te kuhane.

 

15        O òe anaiho te i ìte ia ù i òto o to ù kui.

        I te ava u punanā au i èià, u haanukuìa to ù tau ivi,

        Me he mea e tupu te kākano io he tuaèpo.

 

TATAUÌA O TE HĀMANI HANA A TE TAU ÀPOTORO  13, 22-26

        I Anitiokia, i òto o te tinakoka,

        u peàu Pauro i te tau ati Iuta pēènei :

22      U titii te Etua ia Tauro

        me te vae ia Tavite he hakāìki no âtou.

        U haameitaì te Etua ia īa e peàu ana :

        « U koàka ia ù Tavite, te tama a Iete,

        o īa te ènana vāàna i to ù hīa,

        te i aotahi atu i to ù makimaki. »

23      Me i òto o to īa ati, u haatupu te Etua ia Ietu,

        te Haapohuè o Iraene.

24      Òmua atu o to Īa tiheìa, u hakaìte Ioane

        i te mataèinaa Iraene i te papatema

        no te hāìu i te koekoe me te hopo i te mikeo.

25      I te paoìa o to īa hana peroheta, u peàu Ioane :

        « Aòè au tēia ta ôtou i mamaakau pu nei.

        Enā e tihe mai tītahi ma muì o au :

        aòè e hei ia ù te vevete i to īa aihū. »

26      E tu ù tau tuàne tuehine,

        ôtou te tau tama o te ati o Aparahamo,

        ôtou i putuputu mai nei, e te tau ènana pakaihi i te Etua,

        io ôtou te pahiìa i hua tekao haapohuè.

 

ALLELUIA. ALLELUIA              Ruka .1, 76

O òe, e te pōìti e, e vevaòìa òe : Te peroheta o te Tiketike nui. E taha atu òe i mua o te Hatu no te kānea i to Īa vaanui.

EVANERIO O IETU KIRITO VĀÀNA E RUKA     1, 57-66.80

57      Ua tihe te ava e hānau ai Eritapeta.

        U hānau īa i te tamaòa.

58      Ua òko to īa huaa me te poì tata me īa

        pēhea u hākāòha te Hatu ia īa. U koakoa âtou me īa.

59      Ma te pō vaù, ua tihe âtou no te pātehe i te tama.

        U makimaki âtou e apa ia īa

        i te ikoa o Takaria, te ikoa o to īa motua.

60      A tahi a pohā te èo o te kui me te peàu :

        « Umoì. O Ioane te ikoa. » Ua pē âtou nui i te mahaò.

61      U peàu âtou : « Aòè e tahi o to òe huaa me tēnei ikoa. »

62      U pekahi âtou i te motua no te ìte o ai te ikoa i makimaki īa.

63      Ua hano īa i te keâ patu hāmani me to īa patu i ùka :

        « O Ioane to īa ikoa. »

64      U pepeù anamai te haha o Takaria, u veveteìa to īa èo.

        U tekao īa me te haameitaì i te Etua.

65      Ua hemo i te haametaù te poì paotū tata me âtou.

        U mevaha te òko o tenā tau mea

        viipū o te tau tuaivi o te Henua Iutea.

66      O te tau ènana paotū te i òko i hua tau tekao,

        u haamau io he koekoe, e peàu ana :

        « Ma tītahi â, e aha òa te pōìti nei ?

        Me īa hoì te mana o te Hatu. »

 80      O te pōìti à, u karaiha aè, karaiha aè te nino,

        u māàma aè, māàma aè i òto o te Kuhane.

        I te henua ataha to īa nohoìa

        tihe i te ava o to īa hakaìteìa i vāveka o Iraene.


TE KOÌKA O NA ÀPOTORO PETERO ME PAURO

28 no Tūhua me Takeo i te ahiahi

TATAUÌA O TE HĀMANI HANA A TE TAU ÀPOTORO   3, 1-10

1       Ua hiti Petero me Ioane io te Hiero no te pure

        i te hora e to ù i te ahiahi.

2       I hua ava toitoi, ua kaveìa i èià e tahi ènana

        vaekoki me i to īa hānauìa.

        I tēia â, i tēia â, e kaveìa hua ènana vaekoki

        io te avāputa o te Hiero, te Ava Puta Kanahau te ikoa.

        U kaiape te vaekoki i te poì e tomo io he Hiero.

3       Ia ìte hua ènana ia Petero me Ioane

        e hano aa e uu i òto o te Hiero,

        u kaiape ia âua no te koàka mai te moni.

4       A tahi a tiòhi mau Petero me Ioane ia īa.

        U peàu Petero pēènei : « A tiòhi mai òe ia māua. »

5       U tiòhi matioka hua ènana ia âua

        na te mea u tataì īa e ìò mai e tahi mēmau.

6       U peàu Petero ia īa : « Te moni kiki,

        akoè a te moni māìta, aòè he mea ta ù.

        Atià, o te mea ta ù e tuku atu au ia òe :

        Ma te ikoa o Ietu no Natareti, a tū ! A taha atu ! »

7       E too ana ia īa ma te ìma oko, u hapai aè.

        U heòheò anamai te vaevae me te può vaevae

        o hua ènana. U keepao me te maò atu. Ua taha īa.

8       Ua uu īa me âua i òto o te Hiero,

        e taha ana, e keepao ana me te hahi i te Etua.

9       Ua ìte te tau ènana paotū ia īa

        e taha ana me te hahi ana i te Etua.

10      He ènana òko nui hoì : o īa te i kaiape paotū te â,

        e noho ana i te Ava Puta Kanahau o te Hiero.

        O te tau ènana paotū, ua hemo i te haametaù me te mahaò

        mēìa i to īa huìkēìa.

 

TARAMO   19 (18a), 2-3,4-5ab

Ua tihe to âtou tekao i te kotina o te henua.

 

2       A hahi atu te àki i te kāìè o te Etua.

        A vānana te papahenua i to te Etua hana pēpena.

3       U peàu atu peàu mai te â i te â i to Īa âkakai.

        U haamevaha te pō i te pō i te tumu o hua hana.

 

4       Aòè te haahitipona no te hakaìte mai.

        Aòè te takiìa èo e òkoìa.

5       Atià, u mevaha te tekao o tēia tau keeè,

        Ua tihe to âtou tekao i te kotina o te henua.

 

TATAUÌA O TE HĀMANI A PAURO PEÀTO I TO KARATA 1, 11-20

11      A ìte meitaì ôtou, e tu ù tau tuàne tuehine,

        aòè he maakau ènana te tumu o te Èvanerio

        ta ù i hakako ia ôtou.

12      Aòè tītahi ènana i tuku mai i hua Èvanerio,

        akoè a i hakako mai. Koè nui.

        O īa te māàma ta Ietu Kirito anaiho i haki mai ia ù.

13      Ua òko hoì ôtou i to ù hakatu pohuè òmua atu,

        i te ava u tāvini au i te Etua vāàna i te haatià o te tau ati Iuta.

        Mēìa i to ù haahaa oko ki i te Èkaretia o te Etua,

        u haamakaka au i te poì haatià, e hano e haahika ia âtou.

14      Ua ūo atu to ù koekoe i to tu ù tau hoa,

        no te aotahi i te ture ati Iuta,

        mēìa i to ù haataetae atu i to tahipito

        i te tekao i tukuìa mai e to mātou tau tupuna.

15      Atià, ma mua u hānauìa au, ua vae te Etua ia ù

        me to īa vevaò mai ma to Īa karatia, no te tāvini ia Īa.

16      I te â u vaièi mai te Etua no te ìte i ta Īa Tama,

        etià e haamevaha au i te Tekao Meitaì o hua Tama

        i vāveka o te tau mataèinaa èteni,

17      aòè i ape au i te ènana e tahi e aha te hana e hana atu.

        U te e hiti au i Ierutaremi no te tutuki me te tau Àpotoro.

        Na ù ta ù anaè, ua hee au i te henua Arapia,

        ma hope iho i te pāpuahaè Tamati.

18      E to ù èhua i muì iho, ua hiti au i Ierutaremi

        no te haatutuki me Petero.

        Ua noho au me īa, ma te òa ònohuu ma ìma â.

19      Aòè au i ìte i tītahi Àpotoro kē.

        O Iakopo anaiho, te teina o te Hatu.

20      O te tekao ta ù e patu nei, he tekao tiàtohu.

        Ua ìte te Etua, aòè au e tīvava.

 

ALLELUIA. ALLELUIA     cf. Ioane 21, 17

U haahua atu Petero ia Ietu Pohuè : « E te Hatu e, aòè he mea hakanā no Òe. Ua ìte Òe i to ù kāòha ia Òe. »

EVANERIO O IETU KIRITO VĀÀNA E IOANE     21, 15-19

15      I tēia mou pō ma hope o te Tūhakaùaìa o Ietu,

        ia pao te kaina, u peàu Ietu ia Timone Petero :

        « E Timone e, tama a Iona,

        aha ua nui atu to òe kāòha ia ù, i to âtou nei kāòha mai ? »

        Ua hua atu Timone ia Ietu :

        « E te Hatu e, ua ìte òe i to ù kāòha ia òe. »

        U peàu Ietu ia īa : « A hākai òe i to ù tau punua mutō. »

16      Ua ūi hakaùa Ietu ia īa :

        « E Timone, tama na Iona, aha u kāòha òe ia ù ? »

        U hua atu Timone ia Ietu :

        « E te Hatu e, ua ìte òe i to ù kāòha ia òe. »

        U peàu Ietu ia īa : « A tiaki i to ù naho mutō. »

17      Ua ūi Ietu ia Timone, o te to ù o te uitina :

        « E Timone e, tama a Iona, aha u kāòha òe ia ù ? »

        O Petero à, u mamae te koekoe mēìa i te to ù o te uiìa

        « Aha u kāòha òe ia ù ? »

        Ua hua atu īa : « E te Hatu e, aòè he mea hakanā no òe.

        Ua ìte òe i to ù kāòha ia òe. »

        U peàu Ietu ia īa : « A tiaki i to ù naho mutō. »

18      He tekao tiàtohu ta ù nei ia òe :

        I te ava nino hou to òe, ua taka i to òe kooi,

        ua hee na òe ta òe vāàna i to òe makimaki.

        Atià, i te ava e kooūa òe, e hapai òe i nā îìma

        etià a takakooi tītahi ènana ia òe

        no te aahi i te vahi aòè e makimaki òe. »

19      U peàu Ietu i hua tekao mea hakaìte i te hakatu o te mateìa

        e mate ai Petero no te haakaìè i te Etua.

        Ia pao hua tekao, u peàu Ietu : « A utaì mai ! »

 

 NO TE Â KOÌKA 29 NO TŪHUA ME TAKEO

TATAUÌA O TE HĀMANI HANA A TE TAU ÀPOTORO    12, 1-11

1       I tēia mou pō, ua hano te Hakāìki Herote

        e mākaka i tahipito me io te Èkaretia.

2       U kukumi me te kohetā ia Iakopo, te tuakana o Ioane.

3       Ia ìte Herote u koakoa te tau ati Iuta,

        u peàu no te humu ia Petero.

        O īa te ava koìka haraoa haapupuhi koè, te Koìka Pakate hoì.

4       Ia popokiìa Petero me te kave atu io he haèhumu,

        u peàu Herote no te tiaki me nā pūpū e hā,

        tokohā kape tiaki ma tēia pūpū,

        tokohā kape tiaki ma tēia pūpū.

        U makimaki Herote e haavā ia Petero

        i mua o te mataèinaa, ma hope o te Koìka Pakate.

5       I òto o te haèhumu Petero,

        ua nui te pure o te Èkaretia io te Etua ma te hakaea koè.

6       I te pō ma mua e haavā Herote ia īa, u hiamoe Petero

        i vāveka o nā kape tokoùa, humuìa me nā tuitui e ùa.

        I mua o te avāputa, ua tū te mou kape tiaki.

7       Ua tihe anamai te anera o te Hatu.

        Ua pī nui te haè humu i te māàma.

        U hakavaa te anera ia Petero ma te haatukia i to īa kaokao.

        U peàu ia īa : « A tū ponihoo òe ! »

        U tihekatuitui me io nā îìma o Petero.

8       U peàu atu te anera : « A taka i to òe takakooi,

        a oka i to òe aihū. » Ua hana atii Petero.

        U peàu hakaùa te anera :

        « A uhi i to òe kahu pu. A utaì ma muì o au. »

9       Ua uu i vaho o Petero ma hope o te anera.

        Aòè īa e vivini i te tiàtohu o te hana o te anera.

        U maakau ia e moemoeā ta īa.

10      Atii, ua tihe âua ma tahi kēkē o to mua pūpū kape tiaki ;

        i muì iho, ma tītahi kēkē o te ùa o te pūpū,

        me te tihe o âua i mua o te avāputa puhipuhi

        ma èià te hee io he vaanui o te pāpuahaè.

        U pepeù pu anamai te avāputa i mua o âua.

        Ia tihe i vaho, ua taha atu âua io he vaanui.

        U avai anamai te anera ia Petero.

11      A tahi a māàma Petero me to īa peàu :

        « I tēnei, ua ìte au i te Tiàtohu : u pōpahi te Hatu

        i to īa anera no te haapohuè ia ù

        me i nā îìma o Herote me te tau mea paotū

        ta te poì ati Iuta e makimaki e hana i ùka o au. »

 

TARAMO  34 (33) 2-3,4-5,6-7,8-9

Ua haakoè Īa i to ù tau pūpūkina ia ôtoa.    cf.34, 5

 

2       E haameitaì au i te Hatu ma te tau â paotū.

        E hahi au i te Hatu i te tau vahi ia ôtoa.

3       Io te Hatu anaè to ù haakaìè.

        A òko mai te poì veve, a koakoa me âtou.

 

4       A haatiketike ôtou me au nei i te Hatu.

        A haakaìè tātou nātoa i to Īa ikoa.

5       Ia ùmihi au i te Hatu, u tiòhi mai Īa.

        U haakoè Īa i to ù tau pūpūkina ia ôtoa.

 

6       O te ènana e heau io te Hatu, e pupuà īa :

        He moû, hakaìka koè to īa mata.

7       Ia taaàu te ènana veve, u hakaòko te Hatu,

        Me to Īa haapohuè me io te mea haametaù mai.

 

8        Ua noho te anera o te Hatu ma to tātou kaokao

        No te haapohuè i te ènana e pakaihi ia Īa.

9       A mai. A ìte me ôtou i te vaièiìa o te Hatu.

        Mamau te ènana ia ìò te Etua to īa pātoko.

 

TATAUÌA TE ÙA O TE HĀMANI IA TIMOTEO  4, 6-8.17-18

6       O au à, u ùtunaìa au me he hēaka.

        Ua tihe mai te ava o to ù paekē.

7       Tihe i te paoìa, u tōua au no te tekao tiàtohu.

        U tohuti au, ua pao meitaì to ù tīkakai.

        Ua tohe mau no te haki atu i te haatià.

8       O īa nei te mea e toe :

        ia koàka mai te heipaè kāìè ta te Hatu e tuku mai

        i te  o to Īa Tiheìa, o Īa hoì te Haavā toitoi noa.

        Aòè e tukuìa ia ù anaiho, atii me i te tau ènana paotū

        te i tataì me te kāòha i te  o to Īa Tiheìa.

16      U titii te tau ènana paotū ia ù : aòè e toko mai tītahi.

17      Ua toko mai te Hatu. U vaièi mai i te ìi hou

        etià e koàka ia ù te hakaìte atu i te Tekao

        me te haamevaha i mua o te tau èteni ia ôtoa.

        U haapohuè hoì te Hatu ia ù me io te niho o te reone.

18      E haapohuè mai te Hatu me io te tau ìno paotū

        me to Īa aahi mai ia ù tihe io to Īa Patirēia o te àki.

        Te kāìè ia Īa no te tau tai a tihe ananu. Amene !


ALLELUIA. ALLELUIA    cf. Mt 16, 18

I ùka o te haatià o Petero, e hakatū Ietu i to Īa Èkaretia. Aòè e hikaìa i te mana o te Havaiki pē.


EVANERIO O IETU KIRITO VĀÀNA E MATEO     16, 13-19

        I tēia mou pō,

13      ua tihe Ietu i te Henua Ketare Firipo.

        Ua ūi atu Īa i te tau kouâ pēènei :

        « O ai òa te Tama a te ènana,

        vāàna i te mea i peàuìa e te tau ènana ? »

14      U haahua âtou : « Ta tahipito o Ioane Papetita.

        Ta tahipito o Eria. Ta tahipito o Ieremia,

        akoè a tītahi me i vāveka o tau peroheta. »

15      U peàu atu Ietu : « No ôtou à, o ai au nei ? »

16      U pohā te èo o Timone Petero me te haahua atu :

        « O òe te Kirito, te Tama a te Etua pohuè. »

17      U haahua Ietu me te peàu : « Mamau òe e Timone e,

        tama a Iona, na te mea aòè na te ènana i haamāàma ia òe ;

        atià, na tu ù Motua te io he àki e hakaìte mai.

18      U peàu au ia òe : O Keâ to òe ikoa.

        (Hua mea anaiho me Petero)

        Ma ùka o hua papakeâ, e hakatū au i to ù Èkaretia.

        Aòè e hikaìa e te mana o te Havaiki pē.

19      E tuku atu au ia òe i te kirī o te Patirēia o te àki.

        O te tau mea paotū ta òe e haamau io he henua,

        e haamauìa io he àki.

        O te tau mea paotū ta òe e vevete io he henua,

        e veveteìa io he àki. »


TE KOÌKA HAAHUÌKĒÌA O IETU

6 no Ehuō

TATAUÌA O TE HĀMANI A TANIERE      7, 9-10.13-14

9       O au nei o Taniere.

        I te pō, ua ìte au me he ìte moemoeā i te mea nei :

        ua kaveìa me te tāpapa i te mou nohoka.

        Ua tū e tahi kooūa i òto o te Nohoka Kāìè.

        U māìta me he nive to īa kahu.

        Ua hika me he huu mutō to īa upoko.

10      Ua putuputu i mua o īa te haètoa nui,

        tautini, tini, tini tau ènana.

        Ua tihe anamai mou ènana haavā

        me to âtou tīmata te haatoitoi i te tekao.

        U pepeùìa te tau hāmani.

 13      E tiòhi ana, ua ìte au i te hakatu ènana

        e iho ana i òto o te ao, me io he àki mai :

        he Tama a te ènana. Ua taha īa io te kooūa.

        U aahiìa me te haatata mai i mua o te Nohoka Kāìè.

14      Ua tukuìa i hua Tama a te ènana

        i te mana, te kāìè, te hakāìkiìa.

        Na Īa te vivini i te tau mataèinaa ia ôtoa,

        te tau henua paotū, te nuiìa o te tau ènana,

        èo kē, èo kē to âtou.

        E mau pāona koè to īa hakāìkitina.

        E vivini īa no te tau tai a tihe ananu.


TARAMO  97 (96), 1-2, 4-5ac, 6.9

Kāìè nui me te mahaò i to òe Nohoka tiketike, e te Hatu e.

 

1       O te Hatu te hakāìki nui. A koakoa te henua !

        A haaèkaèka te tau motu tini, tini.

2       Ua vāhīìa te Hatu me te kohu me te ao tapu ;

        O te toitoi me te tiàtohu nā pou o to īa Nohoka.

 

4       Ia topa to īa tau uià, e haapupuà i te ao nei,

        Ua ìte me te emièe te henua viipū.

5       Ua èhu te tuaivi me he ota manu tikauè,

        I mua o te Hatu, te vivini o te Henua.

 

6       U haamevaha te papahenua i to īa toitoi noa.

        Ua ìte me te mahaò te tau ènana i to īa kāìè.

9       E te Hatu e, o òe te Tiketike nui.

        U vivini òe i te henua ia ôtoa.

        U tiketike atu òe i te tau anera paotū.

 

TATAUÌA TE ÙA O TE HĀMANI A PETERO PEÀTO   1, 16-19

16      E tu ù tau tuàne tuehine, u hakaìte au ia ôtou i te mana

        me te Huaìa mai o to tātou Hatu Ietu Kirito,

        aòè vāàna i te haakakai te i kaituto pu ìa e te tau ènana.

        O au iho te ènana ìtemata me te mahaò i hua Hakāìki nui.

17      O te Etua Motua te i hahi me te haameitaì ia Īa

        i te ava ua tihe mai io Īa, me io te Tiketike nui o te àki,

        tītahi èo te i peàu pēènei :

        « O īa nei tu ù Tama tāhia. Io Īa to ù èka. »

18      Ua òko mātou i hua èo e iho ana me io he àki

        i te ava ua noho mātou me Īa i ùka o te tuaivi tapu.

19      Ma èià, he tiàtohu nui no mātou te tekao peroheta.

        He mea hei no ôtou e tiòhi mau i hua tekao

        te i pupuà me he àma i te pō pōtano, epō e tū ai te òumati.

        A tahi a keàpa te àma o te Kirito i òto o to ôtou koekoe

        me he mea e keàpa te hetū oatea i te pōpōuì mākehukehu.

 

ALLELUIA  cf. Ta. 99, 9 ; 35,10

A haakaìè i te Hatu, to tātou Etua. A moe haatona i mua o to Īa tuaivi tapu. Mēìa i to òe māàma, ua ìte mātou i te àma.

EVANERIO O IETU KIRITO VĀÀNA E MATEO     17, 1-9

1       I tēia mou pō, ua too Ietu me Īa

        o Petero, o Iakopo, me Ioane, to īa teina.

        U aahi atu ia âtou i ùka o te tuaivi tiketike io he vahi kē.

2       U huìkēìa Ietu i mua o âtou.

        U pōnionio to Īa mata me he òumati.

        U keàpa to Īa kahu me he àma.

3       Enā, ua ìte nā kouâ ia Moite me Eria

        e tekatekao ana me Ietu.

4       U pohā te èo o Petero me to īa peàu atu ia Ietu :

        « E te Hatu e, he mea meitaì no tātou înei.

        Ia makimaki òe e hakatū au înei e toù haè ka :

        e tahi no òe, e tahi no Moite, e tahi no Eria. »

5       E tekao ana Petero, ua tomiìa âtou e te ao pupuà.

        U pohā te èo me io te ao pupuà te i peàu :

        « O īa nei ta ù Tama tāhia. Io Īa te tiàtohu o to ù kāòha.

        A hakaòko ôtou ia Īa. »

6       Ia òko âtou i hua èo,

        ua moe haatona te tau kouâ i àò te aò.

        Ua pē âtou i te haametaù.

7       Atià, u haatata mai Ietu. U haatukia ia âtou me te peàu :

        « A tū ôtou ! Umoì e haametaù. »

8       E heau ana, ua ìte âtou ia Ietu anaiho, tootahi Īa.

9       E iho ana âtou me i ùka o te tuaivi,

        u peàu Ietu ia âtou pēènei :

        « Umoì ôtou e haki atu i te ènana e tahi

        i te ponatekao i ùka o te mea ua ìte ôtou,

        tihe atu i te Tūhakaùaìa o te Tama a te ènana

        me i vāveka o te poì mamate. »

 

No te èhua B

 EVANERIO O IETU KIRITO VĀÀNA E MAREKO     9, 2-10

2       I tēia mou pō, ua too Ietu me Īa

        o Petero, o Iakopo me Ioane.

        U aahi atu ia âtou i ùka o te tuaivi tiketike,

        i te vahi kē, o âtou anaè.

3       U haahuìkēìa Ietu i mua o âtou.

        U pōnionio to Īa kahu : u māìta oko.

        Aòè e koàka i te ènana te haamāìta atii i te kahu.

4       Ua ìte âtou ia Eria me Moite e tekatekao ana me Ietu.

5       U pohā te èo o Petero me to īa peàu ia Ietu :

        « E Rapi e, mea meitaì a noho tātou înei.

        A hakatū tātou e toù haè ka : e tahi no òe,

        e tahi no Moite, e tahi no Eria. »

6       Aòè hoì i ìte Petero e aha to te peàu atu,

        na te mea ua hemo âtou i te haametaù.

7       A tahi a iho mai te ao te i tomi ia âtou.

        U pohā mai te èo me i òto o te ao e peàu ana :

        « O īa nei tu ù Tama tāhia. A hakaòko ôtou ia Īa. »

8       E tiòhi anamai âtou viipū, aòè te ènana i ìteìa.

        O Ietu tootahi me âtou.

9       E iho ana âtou me i ùka he tuaivi, u oonaki Ietu ia âtou

        umoì e haki atu i te mea ta âtou i ìte,

        tihe i te â e tū ai hakaùa te Tama a te ènana

        me i vāveka o te huaa mamate.

10      Aòè âtou i haki atu. Atià, u peapeàu te hoa i te hoa :

        e aha oti te tūhakaùaìa me i vāveka o te huaa mamate.

 

No te èhua C

EVANERIO O IETU KIRITO VĀÀNA E RUKA     9, 28b-36

28      I tēia mou pō,

        ua too Ietu me Īa o Petero, o Ioane, o Iakopo

        me to Īa hiti i ùka o te tuaivi no te pure.

29      E pure ana Ietu, ua huìkē te hakatu o to Īa mata ;

        ua ìò to Īa kahu he māìta pōnionio.

30      Enā tokoùa ènana e tekatekao ana me Īa :

        o Moite, o Eria, âua tokoùa.

31      U hakaìteìa âua i òto o te kāìè ;

        u tekao atu tekao mai âua me Ietu

        i ùka o to Īa taha atu me i te ao nei

        te i haapao Īa i Ierutaremi.

32      U matakau Petero atii me to īa nā hoa.

        Atià, e matavaa ana âtou, ua ìte i te kāìè o Ietu.

        Ua ìte âtou me i nā ènana tokoùa ma to Īa kaokao.

33      Ohia e hano hua nā ènana e pae me io Ietu,

        u peàu Petero ia Ietu :

        « E Tuhuna e, he mea kanahau no tātou înei.

        A hakatū tātou e toù haè ka : e tahi no òe,

        e tahi no Moite, e tahi no Eria. »

        Aòè i ìte Petero e aha ta īa e peàu atu.

34      E tekao ana atii, ua tihe mai te ao me te tomi ia âtou.

35      U pohā te èo me io he àki mai, e peàu ana pēènei :

        « O īa nei ta ù Tama, te i vaeìa e au.

        A hakaòko ôtou ia Īa. »

36      I te ava i koè ai te èo, ua tū Ietu tootahi anaè.

        O te tau kouâ te i ìte i hua mea nei, ua mutu âtou.

        Aòè âtou i haki atu i te ènana e tahi i te mea ta âtou i ìte.

 

 

TE KOÌKA HĀPAIÌA O MARIA PEÀTO

i te 14 no Ehuō i te ahiahi

TATAUÌA O TO MUA HĀMANI PARARIPO   15, 3-4.15-16 ; 16,1-2

        I muì iho o te paùìa o te hakāìki Tavite,

3       u haaputuputu īa i te mataèinaa Iraene i Ierutaremi

        no te haahiti i te Àraka o te Etua

        tihe atu io te vahi i kāneaìa e Tavite.

4       U haaputu īa i te huaa tamaòa a Aarone,

        te tau tāuà hoì, me te huaa tamaòa a Revi, te tau Revite.

15      A tahi a amo pateka me nā âkau òoa te tau Revite

        i te Àraka o te Etua

        me he mea ta Moite i peàu vāàna o te tekao o te Hatu Etua.

16      U peàu Tavite i te tau vivini Revite ia tuhaìa

        te hana i to âtou tuàne, te poì hīmene

        me ta âtou mēmau, te kitā, te pū me te pahu

        etià e haataki okooko âtou me te haaèkaèka.

 16,1    Ua aahi âtou i te Àraka o te Etua me te tuku atu

        i vāveka o te haè ka te i hakatūìa no īa e Tavite.

        A tahi a ùtunaìa i te aò o te Etua

        te tau hēaka pūovo i te ahi me te tau hēaka no te kai.

2       Ia pao ta Tavite te ùtuna atu i hua hēaka pūovo i te ahi

        me hua hēaka kai,

        u haameitaì īa i te mataèinaa ma te ikoa o te Hatu Etua.

 

TARAMO   132 (131)   7-8, 9-10, 13-14

 Ua āpuu te Hatu io to īa kāìè i te kui te i haahānau ia Īa.

 

7       « A pau. A tomo tātou io te haè o te Etua.

        A moe haatona i mua o to īa Nohoka kāìè ! »

8       E te Hatu e, a hiti io to òe vahi hakaea.

        A mai, o òe me te Àraka o to òe ìi.

 

9       E tāpīìa to òe tau tāuà me te toitoiìa,

        E taaàu to òe tau tāvini i te hīmene koakoa.

10      I uē ia Tavite, to òe pahikaèo,

        Umoì e titii i te hakāìki ta òe i vae.

 

13      Ua vae te Hatu i te tuaivi Tiona,

        O īa te vahi e hei ta īa i makimaki.

14      « Înei e hakaea au ma te tau tai ananu.

        Ua vae au i hua tuaivi no te noho mau. »

 

TATAUÌA O TO MUA HĀMANI I TO KORINETIA   15, 54-57

        E tu ù tau tuàne tuehine,

54      ia tihe hua ava o te pohuè mau ananu,

        ia haahuìkēìa te mēmau mate vave

        no te haaìò he mēmau te i mate koè,

        u haatoitoiìa te tekao o te Hāmani tapu te i peàu pēènei :

        « U tuàki te pohuè. Ua kaò te mateìa.

55      E te mateìa e, i hea to òe mana ?

        E te mateìa e, i hea to òe taa tekeo ? »

56      O te mikeo te taa tekeo o te mateìa ;

        O te Ture te ìi o te mikeo.

57      A haahuaèkaèka tātou i te Etua.

        Na Īa hoì i vaièi mai no te tuàki i te mateìa

        i òto o to tātou Hatu Ietu Kirito.

 

ALLELUIA. ALLELUIA    cf. Rk. 1, 19

Mamau òe e Maria Virikine, te kui o te Etua,  te i āpuu i te tekao me te kaituto atu ma he koekoe.

EVANERIO O IETU KIRITO VĀÀNA E RUKA     11, 27-28

        I tēia mou pō,

27      e peàu ana Ietu i hua tekao, u taaàu te vehine

        i vāveka ahau o te haètoa me te peàu ia Īa :

        « Mamau te kōpū te i kave ia òe me te ū i omoìa e òe ! »

28      Atià, u peàu Ietu : « Mamau atu te tau ènana

        e hakaòko i te tekao a te Etua me te aotahi atu. »


 TE Â KOÌKA 15 NO EHUŌ

TATAUÌA O TE HĀMANI APOKARUPO  11, 19a ; 12,1-6a.10ab

19      A tahi a pepeùìa te Hiero o te Etua io he àki.

        I òto, ua ìteìa te Àraka o te Piimau.

12, 1   Ua ìteìa tītahi hakatu mahaò nui io he àki pēènei :

        O te Vehine i vāhīìa me te òumati,

        ma àò o to īa vaevae te meàma,

        ònohuu ma ùa hetū me he heipaè i ùka o to īa upoko.

2       E vehine kōpū tama, e uē ana

        me he mea u haatotohi i te tama.

3       Ua ìteìa tītahi mea hakatu kē io he àki :

        e tarakone uàuà me he ahi,

        e hitu upoko to īa me nā kere ònohuu,

        me te paèkaha ma ùka o nā upoko o īa e hitu.

4       Me to īa veò, ua toi i te pāio e toù o te tau hetū

        me te haatopa ia âtou io he henua.

        Ua tū hua tarakone i te aò o te vehine

        e haatotohi ana i te tama,

        e hano e kai i to īa tama hānau iho.

5       U hānau hua vehine i te tamaòa.

        O īa te i vivini i te aomāàma me te tokotoko puhipuhi.

        U hapaiìa hua tama i ùka o te àki

        io te Etua me to īa Nohoka kāìè.

6       Ua hiki hua vehine i te henua ataha

        i te vahi i kāneaìa e te Etua no īa.

 10      Ua òko au i tītahi èo oko nui io he àki e peàu aa :

        « Eīa e haapohuè te Etua i to Īa mataèinaa.

        U tuàki te Etua.  O īa nei to Īa Patirēia.

        O īa nei me te hakāìkiìa o to īa Kirito. »


TARAMO  45 (44)   11-12a, 12b-13, 14-15a, 15b-16

Mamau òe, e Maria, io te nohoka kāìè o to òe Tama.

 

11      E tu ù moî e, a tiòhi mau, a pepeù i to puaìka.

        A māhaè i to òe mataèinaa me te haè motua.

12      E hinenaò te hakāìki ia òe, te kuà o te pootu.

 

        O īa to òe Hatu. A oha i to Īa aò.

13      E keitani pu ia òe te mataèinaa Tira,

        E hano haaèka ia òe me to âtou vaetukia.

 

14      O īa nei te vehine haatepēiù, tū ana me te kāìè,

        Uhiìa me te kahu naenae keàpa i te moni kiki.

15      U pupuà to īa pootu e taha ana io te Hakāìki.

 

        E tū ma to īa kaokao te mou pahoè, to īa tau hoa.

16      Ua tomo âtou io he haè o te Hakāìki

        Ma òto o te koìka me te hīmene haakoakoa.

 

TATAUÌA O TO MUA HĀMANI I TO KORINETIA 15, 20-27a

        E tu ù tau tuàne tuehine,

20      he mea kē : tiàtohu nui, ua tū hakaùa te Kirito

        me i vāveka o te huaa mamate.

        O īa te ènana to mua

        te i pohuè hakaùa me i vāveka o te poì mamate paotū.

21      Ua tihe mai te mateìa ma te ènana e tahi.

        Ma te ènana e tahi, e tihe hoì

        me te pohuè hakaùa me io te mateìa.

22      Me he mea e mamate te tau ènana paotū

        mēìa i to âtou haakē me Atamo,

        atii e popohuè hakaùa te tau ènana paotū

        mēìa i to âtou haatahi me te Kirito.

23      Atià, e pohuè hakaùa titikitahi te tau ènana

        vāàna i to âtou ava : òmua ika te Kirito,

        o īa te hāmua i vāveka o te huaa mamate paotū.

        Ma muì iho, te tau ènana e kē ana me te Kirito,

        i te ava o to Īa hua mai me te kāìè.

24      E haahika te Kirito i te mana o te tau anera e vivini nei

        e aha à to âtou ikoa kē, ikoa kē.

        A tahi, a pao ai ònaòna te tau tai ia ôtoa

        i te ava e tuku atu te Kirito

        i te hakāìkiìa i te Etua Motua.

25      E vivini hoì te Kirito i te aomāàma nei

        tihe atu e haahika te Etua i te tau mana haapākeka ia Īa

        me te òomi ia âtou ma àò o te vaevae o te Kirito.

26      O te mateìa te mana pāona e haahikaìa.

27      Ua patuìa hoì : « Ua tuku te Etua

        i te tau mēmau ia ôtoa ma àò o to Īa vaevae. »

 

ALLELUIA. ALLELUIA

Ua tomo Maria i òto o te kāìè o te Etua. A tatakahiti me te koakoa te tau anera ia ôtoa.

EVANERIO O IETU KIRITO VĀÀNA E RUKA     1, 39-56

        I tēia mou pō, ua taha atu Maria me te hiti haakoi i uta,

        io te tuaivi, io tītahi pāpuahaè o te Henua Iutea.

40      Ua uu i òto o te haè o Takaria

        me to īa kāòha atu ia Eritapeta.

41      I te ava ua òko Eritapeta i te kāòha mai o Maria,

        ua ù te tama i òto o to īa kōpū,

        ua pī Eritapeta i te Kuhane Meitaì.

42      U taaàu īa me he èo oko e peàu ana :

        « U kaìèìa òe i vāveka o te tau vehine.

        U kaìèìa me te tama me i òto o to òe kōpū.

43      E pēhea ua tihe io ù nei te kui o to ù Hatu ?

44      Na te mea, ia taki to òe kāòha mai i to ù puaìka,

        ua ù i te koakoa te tama i òto o to ù kōpū.

45      Mamau hoì te vehine i haatià e pao ai

        te mea i hakiìa atu ia īa ma te ikoa o te Hatu. »

46      A tahi a peàu Maria pēènei :

        « U haatiketike tu ù kuhane i te Hatu.

47      Ua ù i te koakoa tu ù koekoe io te Etua Haapohuè.

48      U tiòhi mai i to īa pahikaèo haapāpaku.

        Mamau òe, e peàu mai te tau tai ènana paotū.

        I uē ia ù, ua hana i te hana mahaò te Mana nui.

        O Peàto to Īa ikoa.

50      I tēia tai, i tēia tai, e mau à to Īa hākāòha,

        I uē i te tau ènana e pakaihi ia Īa.

51      U hakaìte mai i te ìi o to Īa mana

        ma te haatavavā i te poì kāìè pu.

52      U haaiho Īa i te poì me io he nohoka kāìè

        me te haatiketike i te poì iti noa.

53      U haatapavaù Īa i te tau ènana mate i te oke.

        U titii i te poì me te taetae, kiko koè nā îìma.

54      Ua toko te Hatu ia Iraene, to īa tāvini,

        e haamaakau ana i to Īa hākāòha nui

55      vāàna i to Īa tekao i to tātou tau tupuna,

        i uē ia Aparahamo me to īa ati i ùka aè,

        no te tau tai a tihe ananu. »

56      Ua noho Maria me Eritapeta, e toù meàma uanei.

        I muì iho, ua hua io to īa haè.


TE KOÌKA O TE PEKA KĀÌÈA

14 no Māhinaihea

TATAUÌA O TE HĀMANI A MOITE PEÀUÌA NŪMERA 21, 4-9

4       I te henua ataha, e hee ana te mataèinaa Iraene,

        u kōhumuhumu âtou i te Etua, atii me ia Moite.

5       U peapeàu âtou pēènei :

        « Umaha te haahiti ia mātou me i te Henua Ekipito ?

        No te haamate ia mātou i te henua ataha, haraoa koè,

        vai koè ? Ua mātou i tēnei kai mōmona koè. »

6       U haatihe te Etua i vāveka o te mataèinaa

        i te tau puhihenua tekeo me he ahi.

        E mea memae oko ia kakahu âtou.

        He mea nui te poì i mamate me i vāveka o to Iraene.

7       U haatata mai te mataèinaa io Moite me to âtou peàu :

        « U mikeo mātou ma te kōhumuhumu i te Etua, atii ia òe.

        A pure òe io te Etua

        etià e haamamao Īa i tenā tau puhihenua. »

8       U vevaò Moite i te Hatu Etua i uē i te mataèinaa.

        U haahua te Hatu ia īa :

        « A kānea òe i te ata o te puhihenua.

        A tauèva ma ùka o tītahi poo âkau.

        Ia kakahuìa te ènana e te puhihenua,

        a tiòhi atu īa i hua puhihenua.

        E pohuè anamai. »

9       U kānea Moite i tītahi puhihenua

        me te piura te i haataheìa io he ahi.

        U tauèvaìa io he poo âkau.

        Ia kakahuìa tītahi ènana, u pohuè anamai

        mēìa i to īa tiòhi atu i hua puhihenua.


TARAMO   78 (77), 3-4ac, 34-35, 36-37,38ab.39

E te Hatu e, u haapohuè Òe ia mātou ma to Òe Peka.

 

3       Ua òko tātou, u haamau ma he koekoe

        I ta to tātou tau tupuna i peàu mai.

4       Na tātou e hakaìte atu i te tau tai i ùka aè.

        I to te Hatu tau hana mahaò,

 

34      I te ava u kukumi te Etua ia âtou,

        Ua ùmihi âtou ia Īa ma te hua i te Meitaì,

35      E haamaakau ana i te Etua to âtou motukeâ,

        Te Etua Tiketike, to âtou Haapohuè.

 

36      Atià, he tekao tīvava to âtou tekao haha.

        Ua taki to âtou èo haatukee hae io te Etua.

37      U mamao me io te Etua to âtou koekoe e ùa

        E titii ana i te Piimau i haatoitoiìa me âtou.

 

38      O te Etua à, u hākāòha mai ia âtou,

        U haakoè i te piò, aòè e haahika atu.

39      U maakau te Etua he mea mate vave âtou,

        Me he puhi metaki, ua pao to âtou tau â.

 

TATAUÌA O TE HĀMANI A PAURO PEÀTO I TO FIRIPO  2, 6-11

6       Ma òto o te kōava Etua hoì te Kirito Ietu.

        E aha à, aòè i haamau kaikino Īa i te haahakatu me te Etua.

7       He mea kē : u haakoè ia Īa iho,

        ua too i te kōava pahikaèo, a ìò haahakatu me te tau ènana.

8       E haaènana to Īa ia tiòhi atu,

        u haapāpaku iho ma te aotahi atu i te hīa o to Īa Motua

        tihe i te mateìa, te mateìa hoì o te peka.

9       O īa te tumu i haatiketike anaè ai te Etua ia Īa

        me te apa atu i te ikoa ma ùka o te ikoa ia ôtoa.

10      Etià, ia taki iho te ikoa o Ietu,

        e noho muò paotū, to te àki, to te henua, to te havaiki.

11      A haki anamai te èo paotū :

        He Etua o Ietu Kirito,

        ma òto o te kāìè o te Etua Motua.

 

ALLELUIA ALLELUIA

E te Kirito e, e atoratio me te haameitaì nei mātou ia Òe, mēìa u haapohuè Òe ia mātou ma to Òe peka.

EVANERIO O IETU KIRITO VĀÀNA E IOANE     3, 13-17

13      Aòè e tahi ènana i hiti io he àki.

        O te Tama a te ènana anaè te i iho mai me io he àki,

        te i noho nei io he àki.

14      I te henua ataha, u hapai Moite

        i te ata nenie o te puhihenua.

15      Atii anaiho e hapaiìa te Tama a te ènana,

        etià e koàka mai i te ènana haatià ia Īa

        te pohuè ètereno.

16      Mēìa i te nuiìa o to īa kāòha i to te ao nei,

        ua tuku te Etua i to Īa Tama tootahi,

        etià aòè e mate ai te ènana i haatià i hua Tama,

        e koàka hoì ia īa te pohuè ètereno.

17      U te e pahi te Etua i to Īa Tama i te ao nei

        no te hakatio i te tau ènana,

        atià no te haapohuè ia âtou.


TE KOÌKA O TERETIA A IETU POÌTI

1a   no Oaoamanu

TATAUÌA O TE PEROHETA ITAIA     66, 10-14c

10      A koakoa ôtou me Ierutaremi.

        A èkaèka ôtou mēìa ia Ierutaremi.

        O ôtou paotū e haataetae ia īa.

        A koakoa nui ôtou te i uē mēìa i to īa mateìa.

11      A àva atu ôtou i te kaiìamau o to īa pohuè haaèkaèka.

        A haamaòna ôtou, a inu ôtou tihe i te kūìa,

        me io te nuiìa o to īa kāìè.

12      O īa nei ta te Etua i peàu :

        « E aahi mai au i Ierutaremi i te moû me he vaitahe.

        I Ierutaremi, me he taitoko,

        e haapuke au i te tau taetae o te tau mataèinaa.

        E ìò ôtou me he tau tama hou hopuìa,

        te tau tama tāhia haataetaeìa io he pūhāîìma.

13      Me he mea e haakoè te kui i te uē o ta īa tama,

        atii tēnei e haakoè au i to ôtou uē i òto o Ierutaremi.

14      E ìtemata ôtou : e pī ôtou i te koakoa.

        Mēìa i te koakoa, e haahouìa to ôtou nino

        me he èitā tupu hou. E haapuàha te Hatu i to Īa mana nui

        i mua o to Īa tau tāvini.

 

TARAMO   131 (130)   1-3

 A āpuu i tu ù kuhane, pii me Òe, e te Etua e, i òto o te moû.

 

1       E te Hatu e, u te e kāìè pu to ù koekoe.

        Aòè e hakatu tu ù mata me to te hakāìki.

 

        Aòè e hano au i te māàma hōhonu.

        U te e kōhoà au i te hana mahaò.

 

2       U òomi au i te tau hīa pē o te nino.

        U atenoho tu ù kuhane me te moû.

 

        U hakatu au me te tama hou

        E moe ana io he pūhāîìma o to īa kui.

 

3       E te mataèinaa Iraene, a tataì òe i te Hatu,

        I tēnei atii ma te tau tai a tihe ananu.

 

TATAUÌA O TE HĀMANI A PAURO PEÀTO I TO ROMA 8, 14-17

14      O te tau ènana paotū i haateeìa e te Kuhane o te Etua,

        ua ìò âtou he tau tama a te Etua.

15      Aòè hoì i koàka ia ôtou te Kuhane

        hakatu me to te poì haamōèhuìa

        no te aotahi atu me te koekoe haametaù.

        Atià, u koàka ia ôtou te Kuhane

        te i haaìò ia ôtou he tau tama.

        I òto o hua Kuhane, u taaàu tātou : « E Apa. E te Motua e. »

16      U haatahi te Kuhane o te Etua me to tātou kuhane

        no te haatiàtohu he tau tama tātou a te Etua.

17      Anoa he tau tama tātou, na tātou hoì

        te taetae tapaeìa e te Etua no ta Īa tau tama.

        E àva tātou i hua tau taetae me te Kirito,

        anoa e memae tātou i te memae kātahi me te Kirito,

        etià e haakāìèìa tātou kātahi me Īa.


ALLELUIA. ALLELUIA   cf. Mt. 11,25

U haameitaììa te Etua, to tātou Motua, te Hatu o te àki me te henua, o Īa te i hakaìte atu i te tau mea hakanā o te Patirēia i te poì iti noa.

EVANERIO O IETU KIRITO VĀÀNA E MATEO      18, 1-5

1       I hua ava, u haatata mai te tau kouâ me Ietu.

        U peàu âtou pēènei : « O ai òa te ènana tiketike atu

        io te Patirēia o te àki ? »

2       E vevaò ana Ietu i te pōìti,

        u hakatū ia īa i vāveka ahau o âtou me te peàu :

3       « Ma te tiàtohu to ù peàu ia ôtou :

        anoa aòè ôtou e haahuìkē i to ôtou koekoe

        no te ìò hakatu me he tau tōìki,

        u te e tomo ôtou io te Patirēia o te àki.

4       O te ènana e haapāpaku me he mea a te pōìti nei,

        o īa na te i tiketike atu io te Patirēia o te àki.

5       O te ènana e āpuu ma to ù ikoa i te tōìki hakatu me tēnei,

        u āpuu hua ènana ia ù anaiho. »

 

 

 TE KOÌKA O TE HUAA PEÀTO

1a no Âvea

TATAUÌA O TE HĀMANI APOKARUPO     7, 2-4.9-14

2       Ua ìte au i te anera e hiti ana me i te kēkē tiheìa òumati.

        Ua kave īa i te mēmau no te òomi i te hakatu o te Etua pohuè.

3       U taaàu oko ki īa i nā anera tokohā te i pōpahiìa

        me te mana no te haapē i te henua me te tai.

        U peàu te anera pēènei : « Umoì e vāvahi ôtou

        i te henua, i te tai me te tau tumu âkau.

        To mua e òomi tātou i te hakatu i ùka o te àe

        o te tau tāvini o to tātou Etua. »

4       Ua òko au i te nuiìa o te tau ènana te i òomiìa :

        hānere e ùa tekau ma hā tautini âtou nui.

        Ònohuu ma ùa tautini hoì me io te ònohuu ma ùa

        ati kē, ati kē o te mataèinaa Iraene.

9       I muì iho, ua ìte au i te haètoa ènana nui oko, nui oko.

        Aòè e koàka i te ènana te tatau tokohia âtou

        me io te tau mataèinaa kē, te tau ati kē,

        te tau henua kē, te tau èo kē, èo kē.

        Ua tū âtou i te aò o te Nohoka kāìè me te Arenio.

        Ua uhiìa âtou me te kahu māìta

        me te makamaka èitā io to âtou îìma.

10      U hīmene âtou me te èo oko, pēènei :

        « A pohuè to tātou Etua

        te tū nei i ùka o te Nohoka kāìè. A pohuè te Arenio ! »

11      O te tau anera paotū i putuputuìa viipū pu

        o te Nohoka kāìè, o te tau Kōkooūa me nā Ànimara e hā,

        ua moe haatona i àò te aò no te atoratio i te Etua.

12      U peàu âtou : « Amene. I to tātou Etua, te hahi, te kāìè,

        te māàma, te haahuaèkaèka, te mana me te ìi,

        ma te tau tai a tihe ananu. Amene. »

13      A tahi a pohā te èo o tītahi Kooūa te i peàu mai :

        « O ai te haètoa nei uhiìa me te kahu māìta ?

        Me i hea mai âtou ? »

14      U hua atu au ia īa : « E te hakāìki e. O òe te i ìte. »

        U peàu mai :

        « Ua tihe mai âtou me io te tōua haamemae nui oko.

        U hooi âtou me te haataìtaì i to âtou kahu,

        i òto o te toto o te Arenio. »

 

TARAMO  24 (23)   1-6

O īa nei te mataèinaa keî te i ìmi ia Òe.

 

1       Na te Etua te aomāàma me to īa taetae paotū,

        Te henua me te tau ènana e noho nei i òto.

2       Na Īa i hakatū i te henua me io te tau vai.

        Na Īa i haamau keue koè ma ùka o te tai.

 

3       O ai te ènana e hiti i ùka o te tuaivi o te Hatu ?

        O ai e koàka te noho io he vahi tapu ?

4       Te ènana koekoe taìtaì me te îìma piò koè.

        Te ènana u vevaò teka koè i te ikoa o te Hatu.

 

5       Me io te Hatu, e ìò mai to īa meitaì.

        Me io te Etua, e ìò mai to īa toitoiìa.

6       Eīa nei te mataèinaa ùmihi i te Hatu.

        O īa te poì e ìmi nei i te mata o te Etua.


TATAUÌA O TO MUA HĀMANI A IOANE PEÀTO  1 In 3, 1-3

1       A kaituto me te mahaò

        i te nuiìa o to te Etua kāòha ia tātou.

        Ua ao Īa e apaìa tātou he tau tama na Īa.

        Ua ìò hoì tātou he tau tama tiàtohu na Īa.

        O īa te piò aòè to te ao nei e āpuu ia tātou.

        Pēhea te koàka ? Aòè âtou i ìte i te Etua.

2       E tu ù tau hoa tāhia e, i tēnei he tama tātou a te Etua.

        E aha to tātou hakatu ma tītahi â ? U te e ìte meitaì tātou.

        E tahi mea tiàtohu anaiho :

        i te ava e hakaìte Ietu Kirito ia Īa iho,

        e ìò tātou hakatu me Īa,

        na te mea, he mata he mata, e ìte ai tātou ia Īa.

3       O te ènana e tataì ana i hua hakatu pohuè,

        e haataìtaì ia īa iho,

        e tutu hoì īa me to Ietu Kirito taìtaììa.

 

ALLELUIA ALLELUIA   cf. Mt 11, 28

A tihe mai io ù, ôtou nui te i paòpaò hae mēìa i te toko o te amoka. Na ù e haaàkaàka.

EVANERIO O IETU KIRITO VĀÀNA E MATEO    5, 1-12a

        I tēia mou pō,

1       ia ìte Ietu i te haètoa nui,

        ua hiti i ùka o te tuaivi.

        U kaapee Īa.

        U haatata mai to Īa tau kouâ.

2       U pohā te èo o Ietu. U hakako ia âtou.

         U peàu Īa pēènei :

3       Mamau te poì koekoe veve : no âtou te Patirēia o te àki.

4       Mamau te poì koekoe moû :

              e ìò ia âtou te Henua peàuìa e te Etua.

5       Mamau te poì e uēuē nei : e haakoèìa ai to âtou uē.

6       Mamau te poì e ūo to âtou kōhoà me te aotahi atu

              i te makimaki o te Etua :

              e vaièiìa mai ia âtou vāàna i to âtou kōhoà.

7       Mamau te poì koekoe hākāòha atu : e hākāòhaìa mai.

8       Mamau te poì koekoe taìtaì : e ìte âtou i te Etua.

9       Mamau te poì haaneke i te moû :

              e peàuìa âtou he tau tama a te Etua.

10      Mamau te poì e mākakaìa mēìa i to âtou aotahi atu

              i te makimaki o te Etua :

              no âtou te Patirēia o te àki.

11      Mamau ôtou me haapēìa, me mākakaìa,

        me potoho pu ìa mēìa he kouâ ôtou no ù.

12      A koakoa, a èkaèka ôtou.

        E nui ai to ôtou tuki meitaì i òto o te àki. »

 


TE KOÌKA O TE HUAAMAMATE

2 no Âvea

TATAUÌA O TE HĀMANI PEÀU TIA TE MĀÀMA   3,1-6.9

1       Io te ìma o te Etua te kuhane o te tau ènana toitoi.

        Aòè e haahika ia âtou te tau kōfii o te ao nei.

2       U mamaakau te tau ènana pōtano :

        He poì kaò pu âtou i Havaiki.

3       O to âtou kaòìa te tuki pē haauēuē.

        Atià, ua moe io he moû te tau ènana toitoi.

4       U kaituto te poì pōtano i ùka o âtou te tuki pē.

        Atià, u tataì âtou i te pohuè hou e mau ananu.

5       No te ava poto, u òomiìa âtou e te tau kōfii.

        U toitoi âtou i mua o te Hatu te i haaveke mai.

6       U haataìtaììa te monikiki i òto o te ahi.

        U haatiàtohu te memae i te koekoe toitoi.

        U āpuu te Etua ia âtou me he hēaka haatāvaè.

        Enā te puke taetae tapaeìa e te Hatu no âtou.

9       O te Hatu Etua to âtou Hakāìki nui.

        E vivini te ènana haatià i te tekao tiàtohu.

        E haapii me te Hatu te poì haataetae ia Īa.

        E vaièi te Hatu ia âtou i te karatia me te kāòha.

 

TARAMO  27 (26)

O te Hatu tu ù māàma me tu ù pātoko te i tiaki i tu ù pohuè. Tiàtohu, e hakaìte mai i to Īa meitaì, te Hatu pohuè.   cf. .27, 1        


1       O te Hatu tu ù māàma, tu ù pātoko.

        O ai òa e haametaù mai ?

        O te Hatu te i tiaki i tu ù pohuè.

        O ai òa e haapūkina mai ?

 

4       I mua o te Etua, e tahi hīa anaè to ù,

        E tahi mea ta ù e ape io Īa :

        O te noho io te haè o te Hatu

        Ma te tau â paotū o to ù pohuèìa,

 

7       E te Hatu e, a hakaòko mai, e vevaò au ia òe.

        A hākāòha mai, a haahua mai i te tekao.

8       O to Òe mata hoì e ùmihi nei au.

        Umoì e punanā i to Òe mata ia ù.

 

13      Tiàtohu nui, e ìte au i te meitaì o te Hatu,

        I te ao nei, i vāveka o te tau ènana pohupohuè.

14      A tataì i te Hatu. Oho te ìi.

 

TATAUÌA O TE HĀMANI A PAURO PEÀTO I TO ROMA   8,31-39

31      E tu ù tau tuàne tuehine, o īa nei te tekao pāona :

        anoa me tātou te Etua, o ai e tuàki mai ?

32      Aòè i kaikino te Etua i ta Īa iho Tama :

         ua tuku mai ia Īa no tātou paotū.

        Pēhea ta te Etua e kaikino ai i tītahi mea ?

        E vaièi mai hoì Īa i te tau mea paotū.

33      O ai e potoho pu i te tau ènana ta te Etua i vae ?

        O te Etua anaiho te i haatoitoi ia âtou.

        O ai te ènana e hakatio ia tātou ?

34      U vevaò i uē ia tātou Ietu Kirito te i mate ai,

        tōtahi atu te i tū hakaùa mai, te i noho i te ìma oko o te Etua.

35      Na ai e haapaekē ia tātou me io to te Kirito kāòha mai ?

        Te tau kōhii haauē mai ? Te kuhane koè ? Te hana mākaka ?

        Te oke ? Te àì ? Te haametaù ? Te kohetā ?

36      Me he mea u patuìa : « E te Hatu e, i tēia â, tēia â,

        mēìa i to òe ikoa, e kukumi te poì mākaka ia mātou,

        ua tutu mātou me he tau mutō tiaki epō to âtou tinaiìa. »

37      Atià, e tuàki tātou i te tau mea haapākeka paotū.

        Ua toko hoì ia tātou Ietu Kirito te i kāòha mai.

38      O to ù haatià mau tēnei :

        u te e haapaekē ia tātou me io te Kirito te mēmau e tahi,

        e aha à e pohuè tātou, e mate ai tātou,

        aòè te tau anera, te tau hakāìki anera,

        aòè te tau mea o tēnei mou â, akoè a o te ava e tihe ai,

39      aòè te tau mana hakanā e viitoi mai,

        aòè te tau mēmau me i ùka o te àki,

        akoè a me i havaiki, aòè te tau mea kē pēpenaìa

        e haapaekē ia tātou me io te kāòha,

        ta te Etua i hakaìte mai i òto o Ietu Kirito to mātou Hatu.

 

ALLELUIA ALLELUIA

Me mate nui tātou haatahi me te Kirito, e pohuè hakaùa tātou haatahi me Īa. Me amo tātou i te memae me te Kirito, e àva atu tātou i to Īa kāìè.

EVANERIO O IETU KIRITO VĀÀNA E RUKA     24, 13-26

13      I te â to mua o te âtapu, ma hope o te mateìa o Ietu,

        ua hee nā kouâ tokoùa o Ietu

        io te pāpuahaè, o Emau te ikoa.

        E ùa hora nehe te tahaìa ma he vaevae me i Ierutaremi.

14      U tekatekao âua no tenā tau mea paotū i paoìa.

15      Ohia u tekao atu tekao mai âua,

        u haatata mai Ietu iho me to Īa taha atu me âua.

16      E aha à u tiòhi âua ia Īa, enā te mea haapākeka

        oi ìte âua o Īa Ietu.

17      U peàu Ietu ia âua : « E aha te tumu

        o to ôùa tekao atu tekao mai, e taha ana ôùa ? »

        U hakaea âua, e kekehu nui te mata.

18      U haahua tītahi, o Kereopata te ikoa, me te peàu ia Ietu :

        « O òe anaè i vāveka o te tau ènana e noho nei i Ierutaremi,

        aòè i ìte i te mea i paoìa i tēnei mou pō. »

19      U peàu Ietu : « E aha òa ? »

        U peàu âua ia Īa : « Te tekao i ùka o Ietu no Natareti.

        Ua tū Īa me he peroheta mana ma te hana, ma te tekao,

        i mua o te Etua me te mataèinaa paotū.

20      Pēhea i haaìòìa no te haamate nui me te pāokapeka atu

        e to mātou tau tāuà nui me te tau hakāìki.

21      O mātou à, u tataì mātou

         e haapohuè Īa i te mataèinaa Iraene.

        Tōtahi atu, o īa nei te toù o te pō

        me i te ava i paoìa tēia mea.

22      Atià à, u haaemièe mai te mou vehine kē me mātou.

        I te pōpōuì tika, ua hee âtou io te ana tūpāpaù.

23      Aòè i koàka ia âtou to Īa nino.

        Ua hua me to âtou peàu mai : ua ìte âua i nā anera

        te i peàu ia âtou u pohuè Ietu.

24      Ua hee i te ana tūpāpaù tahipito me i vāveka o mātou.

        Ua ìte âtou i te mea i peàuìa e te tau vehine.

        O Ietu à, aòè âtou i ìte ia Īa. »

25      U peàu Ietu ia âua : « E te poì pōtano !

        E te koekoe tevee i te haatià i te mea paotū

        ta te tau peroheta i peàu atu.

26      Aòè à tēia memae e memae ai te Kirito

        no te tomo io to Īa kāìè ? »


TE KOÌKA HUAAMAMATE   2

TATAUÌA O TE HĀMANI O IOPE     19, 1.23-27

1       Ua pohā te èo o Iope me to īa peàu pēènei :

23      E too ta ù e patuìa to ù tau ponatekao nei

        i ùka o te motukeâ me te toki puhipuhi,

24      e taaiìa âtou i òto o te keâ,

        no te tau tai ènana pāona koè.

25      Ua ìte au u pohuè to ù Vevaò.

        I te ava paoìa o te aomāàma nei,

        e maò Īa i ùka o te èpoèhu o te tau nino tūpāpaù.

26      Ia vaa au, e tū au nei me to ù nino.

        E ìte au he mata he mata i te Etua.

27      O au iho, e ìte au i te Etua.

        E tiòhi matioka au ia Īa me to Īa āpuu mai. »

 

TARAMO 130 (129),

U tataì tu ù kuhane i te Hatu.  He mea tiàtohu to Īa tekao ia ù.      130, 5

 

1       Me i te peteò tu ù taaàu atu,

        E te Hatu e, a òko mai i to ù èo.

2       A hakaòko meitaì to Òe puaìka

        I te takiìa o to ù pure.

 

3       Me haamau Òe i te mikeo,

        E te Hatu e, na ai te tū aè ?

4       Io Òe te tukuìa o te mikeo.

        Ua hopo au, e tataì ana ia Òe.

 

6       Tiàtohu atu, e tataì to ù kuhane i te Hatu,

        I te ènana tiaki, vaa i te pō,

        I tataì i te maùteiao.

7       E to Iraene, a tataì òe i te Hatu.

 

        Ohia io te Hatu te kāòha,

        Te haapohuèìa hou ananu.

8       E hoko hakaùa te Hatu ia Iraene

        Me i te nuiìa o te tau mikeo.

 

TATAUÌA O TO MUA HĀMANI I TO TETARONIKA   4,13-18

13      E tu ù tau tuàne tuehine,

        u makimaki mātou e ìte ôtou ma te tiàtohu

        e aha te hakatu o te tau ènana te i mamate,

        etià umoì e kuhane koè ôtou,

        me he mea ta te poì u te e tataì i te Etua.

14      U haatià tātou i te mea ua mate Ietu, ua tū hakaùa Īa.

        Atii hoì, u haatià tātou i te mea e ìò hua mea anaiho

        no te tau ènana te i moe haatià ana ia Ietu.

        Na te Etua e haatahi ia âtou me te Hatu Ietu.

15      U hakako mātou ia ôtou vāàna i to te Hatu tekao :

        O tātou te i pohuè i te ava o te Huaìa o te Hatu,

        u te e tutuki tātou me Īa ma mua o te huaa mamate.

16      E òkoìa te èo. E taaàu te Hakāìki anera.

        E taki te pū o te Etua.

        E iho mai me io he àki te Hatu anaiho.

        E tū pohuè hakaùa te tau ènana te i mamate,

        haatià ana i te Kirito.

        O âtou to mua e pohuè hakaùa.

17      I muì iho, tātou te i pohuè nei,

        e hapaiìa tātou me âtou nātoa, i òto o te ao,

        no te haatutuki me te Hatu io he ata àki.

        Ma èià, e haapii tātou me te Hatu no te tau tai ananu.

18      A haamau io he koekoe i hua tekao ta ù i peàu nei.

        A haaoho i te ìi te hoa i te hoa !

 

ALLELUIA ALLELUIA

A meitaììa te Etua Motua hākāòha nui. O Īa to tātou toko, ia haauēuē mai te nuiìa o te kōhii.

EVANERIO O IETU KIRITO VĀÀNA E IOANE    11, 32-40

        I tēia mou pō, ua mate nui o Rataro, te hoa o Ietu.

32      Ua ìte Maria ia Ietu, ua hika īa pii o nā vaevae o Īa.

        U peàu pēènei : « E te Hatu e,

        anoa înei òe, aòè i mate nui tu ù tuàne. »

33      Ia ìte Ietu i to īa uē me te uēuēìa

        o te tau ati Iuta ma te kaokao o Maria,

        u emièe Īa, u mehea to Īa koekoe.

34      U peàu : « Ua tomiìa i hea ? »

        I peàu ai âtou : « E te Hatu e, a mai. A tiòhi ! »

35      U mateteka Ietu.

36      U peàu te tau ati Iuta : « A tiòhi i te nui o to Īa kāòha. »

37      Atià, u peàu tahipito : « U haatāhakahaka i te kikomata

        o te ènana matapō. No te aha u te e koàka ia Īa

        te haapākeka i te mateìa o Rataro ? »

38      U emièe hakaùa Ietu me to Īa tihe i te taha o te tomiìa.

        He ana io he motukeâ. Ua pāìa te ana me te keâ.

39      U peàu Ietu : « A huì atu i te keâ ! »

        Ua hua Marata, te tuehine o te tūpāpaù :

        « E te Hatu e, u piàu. O te hā tēnei o te â me i te tomiìa. »

40      U peàu Ietu : « Aòè à to ù i peàu ia òe,

        me haatià òe ia ù, e ìte òe i te kāìè o te Etua ? »


TE KOÌKA HUAA MAMATE   3

TATAUÌA O TE PEROHETA ITAIA     25, 6-9

 

6       Ia tihe te â, na te Hatu Etua o te aomāàma

        e kānea i te kaiìamau ma ùka o to Īa tuaivi

        no te tau mataèinaa ia ôtoa.

        E tuha Īa i te kiko kerehi, te vino mānini,

        te ìnaì mōmona, te vino oko nui.

7       E taki te Etua i te kahu uē,

        e uhi Īa i te tau ènana ia ôtoa.

        E haakoè Īa i te kahu tomiìa tūpāpaù

        e vāhī ana i te tau mataèinaa paotū.

8       E haahika pao te Etua i te mateìa.

        E haamaha te Etua i te vaimata o te tau ènana uēuē.

        E haakoè te Etua i te mea haamee

        i to Īa mataèinaa ma nā henua viipū.

        O īa hoì to Īa tekao.

9       Ia tihe te â, e peàuìa pēènei :

        « O īa to tātou Etua.

        U tataì tātou ia Īa : u haapohuè mai.

        O Īa te Hatu. U haatià tātou ia Īa.

        A èkaèka, a koakoa tātou.

        O te Hatu te i haapohuè mai. »

 

TARAMO   25 (24)

 E te Hatu e, i òto o to ù uēuē, u vevaò au ia Òe.

 

6       E te Hatu e, a haamaakau i to Òe uē,

        Me i kiu mai to Òe kāòha te i noho mau.

7       A haamāhaè i te tau tekateka o to ù houìa,

        Umoì e titii atu ia ù nei : a haamaakau mai.

 

17      Kuhane koè au, ua pī to ù koekoe i te uēuē.

        A haakoè i te àì e òomi mai.

18      Ua ìte òe i to ù paòpaò me te memae.

        A tuku i te nuiìa o to ù tau mikeo.

 

20      A pāpua mai, a haapohuè mai.

        Io Òe to ù vahi maù. Umoì au e hakaìka.

21      Enā te Toitoi me te Tiàtohu ma to ù kaokao.

        O au hoì te ènana e tataì nei i te Hatu.

 

TATAUÌA O TE HĀMANI APOKARUPO     21, 1-6

 

1        I muì iho, ua ìte au i te àki hou me te henua hou.

          Ua koè nui to mua àki me te henua. Ua koè me te tai.

2        Ua ìte au e iho ana me io he àki, me i te aò o te Etua,

          te pāpuahaè tapu, o Ierutaremi hou.

          Ua tāpīìa me te kahu naenae,

          tutu me he vehine hou no to īa koìka mātiri.

3        Ua òko au i te èo oko te tihe mai me io he Nohoka kāìè.

          U peàu pēènei :

          « O īa nei te haè o te Etua i vāveka o te tau ènana.

          E noho te Etua i vāveka o âtou.

          E ìò âtou te mataèinaa o te Etua.

4        E haamaha te Etua i to âtou vaimata,

          e haakoè Īa i te mateìa, i te uēuē me te memae paotū.

          Ua kaò hoì te aomāàma pēpenaìa òmua. »

5        U peàu Te Etua e tū ana io he Nohoka kāìè :

          « Enā e haahou au i te tau mēmau paotū. »

          U peàu Īa hakaùa : « A patu òe.

          He tekao tiàtohu hoì, tekao hakahae koè hua tekao. »

6        U peàu Īa hakaùa : « Ua pao. O au te Tumu me te Hiku.

          O au te Tīmataìa me te Paoìa.

          E vaièi au i te vaipuna i te tau ènana paka i te vai. »

 

ALLELUIA ALLELUIA      cf. Io 3,16

Mēìa i to Īa kāòha i te ao nei, u pōpahi te Etua i ta Īa Tama tootahi, etià e koàka mai i te ènana e haatià ia Īa te pohuè ètereno.

 

EVANERIO O IETU KIRITO VĀÀNA E MAREKO 15, 33 -- 16, 6

33      Ua topa te pō pōtako ma ùka o te tiàtohu o te henua

        me i te ava oatea nui tihe atu te hora e toù ahiahi.

34      I te hora e toù, u taaàu Ietu me te èo oko :

        « E tu ù Etua e. E tu ù Etua e.

        Umaha Òe i titii ai ia ù ? »

37      Atià o Ietu, e taaàu ana me te èo oko,

        ua tuku atu i te ao paoìa.

38      A tahi a tuiva ma vāveka me i ùka tihe i àò nui

        te tapa tauèvaìa io he Hiero.

39      O te keneturione e noho ana i te aò o Ietu,

         ia ìtemata i te hakatu o to Īa mateìa, u peàu :

       « Tiàtohu nui, o te ènana nei te Tama a te Etua. »

 16,1    Ma hope mai o te Tāpati, o Maria Matarena,

        o Maria, te kui o Iakopo, o Tarome, ua hoko mai âtou

        i te mēmau kekaa no te paù i te nino tūpāpaù o Ietu.

2       I te pōpōuì tika makehukehu, i te â to mua o te hepetoma,

        ua tihe âtou io te ana tūpāpaù. He ata ùa.

3       U peapeàu atu peapeàu mai âtou :

        « Na ai e huì atu i te keâ me i te avāputa o te ana ? »

4       Atià, e heau ana, ua ìte âtou

        ua huììa hua keâ : he keâ kaùoo.

5       Ua uu âtou i òto o te ana tūpāpaù.

        Ua ìte âtou e tahi mahaì, noho ana i te vahi ìma oko,

        e kahu òa, e kahu māìta to īa.

        U emièe âtou me te haametaù.

6       U peàu hua mahaì ia âtou : « Umoì ôtou e haametaù.

        Ua ùmihi ôtou ia Ietu no Natareti te i pāokapekaìa.

        Ua tū hakaùa Īa. Aòè Īa i nei.

        O īa nei te vahi i tuku âtou ia Īa. »

 

TE KOÌKA HAAMAAKAU I TE PENETITIO I TE HAÈPURE KATETARA

9 no Âvea

TATAUÌA O TE PEROHETA EHEKIERE     47, 1-2.8-9.12

1       O au nei te peroheta Ehekiere.

        Ma òto o te moemoeā, ua ìte au nei i te ènana

        te i aahi ia ù io te avāputa o te Hiero.

        Enā e pihiti te punavai

        me i àò o te avāputa o te kēkē tiheìa o te òumati.

        O īa te kēkē hoì o hua avāputa.

        Ua tahe te vai i te kēkē ìma oko o te Hiero

        e hee ana i te kēkē metaki kanauu.

2       U haauu te ènana ia ù i vaho o te Hiero ma te avāputa

        o te kēkē metaki tiu me to īa aahi mai

        tihe i te avāputa o te kēkē tiheìa o te òumati.

        I èià, u pihiti te punavai i te ìma oko.

8       A tahi a peàu mai te ènana pēènei :

        « Ua tahe te vai i te kēkē tiheìa o te òumati,

        hee ana i te kaavai Ioritane ;

        me i èià, e tahe io te tai Paatai.

        U haataìtaì hua vai i te tai Paatai.

9       I te tau vahi paotū e tihe ai te vai,

        e meitaì te mēmau pohuè,

        e haanui aè te tau mēmau pohuè paotū.

        He mea nui te ika.

        E haataìtaì hoì hua vai i te tau mēmau e haakutaùìa.

        E pohuè meitaì paotū te mēmau i te vahi e tihe te vai.

12      Ma ùka o te ùa kēkē o te vaitahe, ua tupu te nuiìa

        o te tumu âkau me te tau puku kē, puku kē.

        Aòè e òì to âtou àu, aòè e pao to âtou puku.

        I tēia meàma, i tēia meàma, e tupu te tau puku hou.

        E tahe hoì te vai me io he Hiero.

        E kohiìa te puku no te kai.

        E kohiìa te àu no te kānea i te hāika

 

TARAMO  46 (45)

O īa nei te haè o te Etua i vāveka o te tau ènana.   Apo.21,3

 

2       O te Etua to ù vahi maù.

        O te Hatu te i toko ia tātou io he àì.

3       No èià, u te e haametaù tātou :

        E aha à e neue te henua, e te tuaivi io he tai,

        E pooìna te koùkoù tai, e tihe te tai toko,

 

5       U haatapavaù te vaitahe i te pāpuahaè o te Etua.

        O īa te nohoka tapu nui o te Tiketike.

6       U keue koè te haè i èià ua noho te Etua.

        I te atauà, e tiaki meitaì te Etua i to Īa haè.

 

8       Me tātou te Etua. O Īa te Hatu o te aomāàma.

        O Īa to tātou motukeâ, te Etua o Iakopo.

9       A mai, a tiòhi ôtou i te hana o te Etua.

10      U haakoè Īa i te tōtōua io he henua viipū.

 

TATAUÌA O TO MUA HĀMANI I TO KORINETIA   3, 9b-11.16-17

        E tu ù tau tuàne tuehine,

9       O ôtou te pāpua o te Etua, te Hiero tapu o te Etua.

10      Me he mea e hakatū te tuhuka i te haè,

        vāàna i te karatia ta te Etua i vaièi mai,

        ua haamau au i te keâ tumu ma ùka o te tuàka o te haè.

        Na te tau tuhuka kē te hakatū i te haè ma ùka o hua keâ.

        A tiòhi meitaì hoì âtou tikitahi i to âtou hana.

11      Enā te keâ tumu, e tahi anaè : o Ietu Kirito.

        Aòè e koàka i te tuhuka te haamau i te keâ tumu kē.

 16      Aha aòè ôtou i ìte ?

        O ôtou me he Hiero o te Etua.

        Ua noho te Kuhane o te Etua i òto o ôtou.

17      Anoa e vāvahi tītahi i te Hiero o te Etua,

        e haahika te Etua i hua ènana.

        Ua tapu hoì te Hiero o te Etua,

        o ôtou anaiho hua Hiero o te Etua.

 

ALLELUIA ALLELUIA  2 Para 7, 16

« Ua vae au i tēnei haè me tu ù haatapu ia īa ; io tēnei haè, e noho au no te tau tai ananu. » He tekao a te Hatu. 


EVANERIO O IETU KIRITO VĀÀNA E IOANE     2, 13-22

13      Ohia ua tata te koìka Pakate o te tau ati Iuta,

        ua hiti Ietu i Ierutaremi.

14      U koàka mai ia Īa i òto o te Hiero i te tau ènana hoko atu

        i te tau piha, te tau mutō me te tau manu pihō,

        atii me te tau ènana haahuìkē i te moni,

        e kaapee ana pii o to âtou hātaa hoko.

15      U kānea Ietu i te me te mou touà.

        Ua tute atu Īa i vaho o te Hiero ia âtou paotū,

        te tau mutō, te tau piha. U titii Īa ma ùka o te tuaèpo

        i te moni o te poì haahuìkē moni.

        U haatohuì Īa i to âtou hātaa.

16      U peàu Īa i te poì