TOMINIKA TEKAU MA TOÙ O TE AVA MA TE ÈHUA
TATAUÌA O TE HĀMANI O TE MĀÀMA 9, 13-18
13 O ai te ènana te i ìte i te tau maakau o te Etua ?
O ai te ènana te i vivini i te makimaki o te Etua ?
14 He maakau poto te kaituto o te tau ènana ;
he koekoe pepee to tātou.
15 U haavekeìa hoì to tātou kuhane e te nino mate vave.
U haaveke tēnei kahu èpo kaaea i te koekoe māàma.
16 He mea hana nui no te haavivini i te tau mēmau o te henua nei
no te ìte meitaì i te tau mea tata èka po me tātou.
O ai òa te i ìte i te tau mea te io he àki ?
17 E te Hatu e, anoa u te e pōpahi mai i to Òe Kuhane Meitaì,
o ai òa te i ìte i to Òe makimaki ?
Me io Òe anaiho te māàma, e te Hatu e.
18 Ma èià, u haatoitoiìa te vaanui
o te tau ènana noho aa io te ao nei.
Ma èià, ua ìte te tau ènana i te hakatu e haaèka ia Òe.
Ma io to òe māàma, u pohupohuè âtou.
TARAMO 90(89), 3-4, 5-6, 12-13, 14.17abc
E te Hatu e, i tēia tai, i tēia tai ènana,
o Òe anaiho to mātou vahi maù. 90, 1
3 U haahua Òe i te ènana io he èpo, to īa tumu.
U peàu hoì : « E hua te ènana io he èpo kaaea. »
4 No Òe e aha tautini èhua ? E tahi â anaè.
E tahi â pao vave, me he ava poto i te pō.
5 Ua puhi Òe : ua kaò te ènana me he ata moemoeā.
E aha te ènana ? He èitā e huìkē vave.
6 U pupuà īa me he pua i te pōpōuì,
I te ahiahi, ua òì me he èitā moô.
12 A hakaìte mai i te nuiìa o to mātou tau â.
A tahi nei a ùmihi mau mātou i te māàma.
13 E te Hatu e, a òomi ponihoo i to Òe pekē.
Umoì te haatevee i uē i to Òe tau tāvini.
14 I te pōpōuì, a haaèka mai to Òe hakāòha ia mātou :
E pao ai to mātou tau â me he koìka me te hīmene.
17 I ùka o mātou te moû o te Hatu, to mātou Etua.
A haamau te Etua i te hana o to mātou îìma.
TATAUÌA O TE HĀMANI IA FIREMONE 9-17
9 O au nei o Pauro, te kooūa Pauro ;
i tēnei, io he haèhumu au nei mēìa ia Ietu Kirito.
10 E ape nei au ia òe i uē i tu ù tama,
te tama ta ù i hānau i òto o te haèhumu, Onehimo te ikoa.
11 Òmua, he ènana avai noa no òe, aòè hoì e hana īa.
I tēnei, he ènana tohe i te hana no te toko mai.
E toko hoì īa me ia òe.
12 Io òe e pōpahi nei au ia īa
e aha à ua ìò īa me to ù iho hōupo.
13 To ù hīa, e noho īa ma to ù kaokao,
etià, ma to òe ikoa, e tāvini mai ia ù,
te io he haèhumu mēìa i te ÈVANERIO.
14 Atià, aòè au i makimaki e hana i tītahi hana
aòè e haakoakoa oti ia òe.
Na òe ta òe hoì te vaièiìa. Aòè e viitoi tītahi ia òe.
15 Ua hee ùanei Onehimo memao me io òe no te ava poto,
etià e tutuki hakaùa òe me īa no te ava paona koè.
16 A apuu ia īa, aòè me tītahi tueni haamōèhuìa,
atià me he teina tāhia nui no òe.
Ua ìò īa e teina toitoi no au nei.
Tōtahi atu, a ìò he teina tiàtohu no òe
i mua o te Etua, i mua o to te ao nei.
17 No èià, me he mea u maakau òe he hoa tāua,
a apuu mai ia Onehimo me he mea ia ù anaiho.
ALLELUIA ALLELUIA
cf.Ta.119,135
E te Hatu e, a matavaièi mai ia ù to Òe tāvini.
A hakako mai i to Òe makimaki.
ÈVANERIO O IETU KIRITO VĀÀNA E RUKA 14, 25-33
I tēia mou pō,
25 ua ūtaì te haètoa nui ia Ietu. E hāìu aa, u peàu ia âtou :
26 « Me he mea e tihe te ènana io ù, atià aòè īa e haataetae ia ù
ma ùka atu o to īa motua me to īa kui,
ta īa vehine, ta īa tau tama,
to īa tau teina, to īa tau tuehine,
to īa pohuèìa anaiho,
aòè e koàka ia īa e ìò he kouâ no ù.
27 Te ènana u te e amo i to īa peka, e ūtaì koè ia ù,
aòè e koàka i hua ènana e ìò he kouâ no ù.
28 O ai hoì me i vāveka o ôtou, te i hano e haatū i te haè mōuka,
aha u te e kaapee īa òmua no te tatau
e hia moni e hei no te haapao meitaì i te hana ?
29 Me he mea u te e kaapee hua ènana no te tatau i te moni,
e kānea īa i te tūàka me tītahi hope,
atià aòè e koàka ia īa te haapao i te hana.
E kakata hoì te poì te i ìte, e peàpeàu aa :
30 « Eīa te ènana te i tīmata e haatū i te haè.
Aòè e koàka ia īa te haapao i te hana. »
31 O ai òa te hakaìki e hano e nahu i te tōua me te hakaìki kē,
aha aòè īa e kaapee òmua no te kaituto pēhea
me to īa ònohuu tautini kape e tōtōua atu īa
me te hakaìki kē e tihe tōtōua mai me te tekau tautini kape.
32 Me he mea u te e koàka ia īa, i te ava u memao te hakaìki kē,
ua pahi īa i te keèe no te haakoè i te tōua.
33 Hua mea anaiho i vāveka o ôtou nui,
me he mea u te e paekē te ènana me io to īa tau taetae paotū,
aòè e koàka ia īa e ìò he kouâ no ù. »
Comments est propulsé par CComment