TE KOÌKA O TE HUAAMAMATE
2 no ÂVEA
TATAUÌA O TE HĀMANI O TE MĀÀMA 3,1-6.9
1 Io te ìma o te Etua te kuhane o te tau ènana toitoi.
Aòè âtou e haahika e te tau kōhii o te ao nei.
2 U māmaakau te tau ènana pōtako :
He poì kaò pu âtou i havaiki.
3 O to âtou kaòìa te tuki pē haauēuē.
Atià, ua moe io he moû te tau ènana toitoi.
4 U kaituto te poì pōtako i ùka o âtou te tuki pē.
Atià, u tataì âtou i te pohuè hou e mau ananu.
5 No te ava poto, u òomiìa âtou e te tau kōhii.
U toitoi âtou i mua o te Hatu te i haaveke mai.
6 U haataìtaììa te monikiki i òto o te ahi.
U haatiàtohu te mamae i te koekoe toitoi.
U apuu te Etua ia âtou me he hēaka haatāvaè.
Enā te puke taetae tāpaeìa e te Hatu no âtou.
9 O te Hatu Etua to âtou Hakaìki nui.
E vivini te ènana haatià i te tekao tiàtohu.
E haapii me te Hatu te poì haataetae ia Īa.
E vaièi te Hatu ia âtou i te karatia me te kāòha.
TARAMO 27 (26)
O te Hatu tu ù māàma me tu ù pātoko te i tiaki i tu ù pohuè.
Tiàtohu, e hakaìte mai te Hatu pohuè i to Īa meitaì. 27, 1
1 O te Hatu tu ù māàma, tu ù pātoko.
O ai òa e haahaametaù mai ?
O te Hatu te i tiaki i tu ù pohuè.
Na ai òa e haapūkina mai ?
4 I mua o te Etua, e tahi hīa anaè to ù,
E tahi mea ta ù e ape io Īa :
Te noho io te haè o te Hatu
Ma te tau â paotū o to ù pohuèìa.
7 E te Hatu e, a hakaòko mai, e vevaò au ia òe.
A hakāòha mai, a haahua mai i te tekao.
8 O to Òe mata hoì e ùmihi nei au.
Umoì e hakanā i to Òe mata ia ù.
13 Tiàtohu nui, e ìte au i te meitaì o te Hatu,
I te ao nei, i vāveka o te tau ènana pohupohuè.
14 A tataì i te Hatu. A oho te ìi.
TATAUÌA O TE HĀMANI A PAURO PEÀTO I TO ROMA
8,31-39
31 E tu ù tau tuàne tuehine, oia nei te tekao paoìa :
Me he mea me tātou te Etua, o ai e tuàki mai ?
32 Aòè i kaikino te Etua i ta Īa iho Tama :
ua tuku mai ia Īa no tātou paotū.
Pēhea ta te Etua e kaikino ai i tītahi mea ?
E vaièi mai hoì Īa i te tau mea paotū.
33 O ai e pōtoho pu i te tau ènana ta te Etua i vae ?
O te Etua anaiho te i haatoitoi ia âtou.
O ai te ènana e hakatio ia tātou ?
34 U vevaò i uē ia tātou Ietu Kirito te i mate ai,
tōtahi atu te i tū hakaùa mai,
te i noho i te ìma oko o te Etua.
35 Na ai e haapaekē ia tātou
me io to te Kirito kāòha mai ?
Te tau kōhii haauē mai ? Te kuhane koè ?
Te hana mākaka ?
Te oke ? Te àì ? Te haametaù ? Te kohetā ?
36 Me he mea u patuìa : « E te Hatu e, i tēia â, tēia â,
mēìa i to Òe ikoa, e kukumi te poì mākaka ia mātou,
ua tūtū mātou me he tau mūtō tiaki
epō to âtou tīnaiìa. »
37 Atià, e tuàki tātou i te tau mea haapākeka paotū.
Ua toko hoì ia tātou Ietu Kirito te i kāòha mai.
38 O to ù haatià mau tēnei :
u te haapaekē ia tātou me io te Kirito
te mēmau e tahi,
e aha à e pohuè tātou, e mate ai tātou,
aòè te tau anera, te tau hakaìki anera,
aòè te tau mea o tēnei mou â,
akoè à o te ava e tihe ai,
39 aòè te tau mana hakanā e viitoi mai,
aòè te tau mēmau me i ùka o te àki,
akoè à me i havaiki, aòè te tau mea kē pēpenaìa
e haapaekē ia tātou me io te kāòha,
ta te Etua i hakaìte mai i òto o Ietu Kirito to mātou Hatu.
ALLELUIA. ALLELUIA
Me he mea e mate nui tātou
haatahi me te Kirito,
e pohuè hakaùa tātou haatahi me Īa.
Me he mea e amo tātou i te mamae me te Kirito,
e àva atu tātou i to Īa kāìè.
ÈVANERIO O IETU KIRITO VĀÀNA E RUKA 24, 13-26
13 I te â to mua o te âtapu, ma hope o te mateìa o Ietu,
ua hee nā kouâ tokoùa o Ietu
io te pāpuahaè, o Emau te ikoa.
E ùa hora oti te tahaìa
ma he vaevae me i Ierutaremi.
14 U tekatekao âua no tenā tau mea paotū i pao.
15 Ôhia u tekao atu tekao mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, enā te mea haapākeka
oi ìte âua o Īa Ietu.
17 U peàu Ietu ia âua : « E aha te tumu
o ta ôùa tekao atu tekao mai, e taha ana ôùa ? »
U hakaēa âua, e kekehu nui te mata.
18 U haahua tītahi, o Kereopata te ikoa,
me te peàu ia Ietu :
« O òe anaè i vāveka o te tau ènana e noho nei
i Ierutaremi,
aòè i ìte i te mea i pao i tēnei mou pō. »
19 U peàu Ietu : « E aha òa ? »
U peàu âua ia Īa : « Te tekao i ùka o Ietu no Natareti.
Ua tū Īa me he peroheta mana ma te hana, ma te tekao,
i mua o te Etua me te mataèinaa paotū.
20 Pēhea i haaìòìa no te haamate nui
me te pāokapeka atu
e to mātou tau tāuà nui me te tau hakaìki.
21 O mātou à, u tataì mātou
e haapohuè Īa i te mataèinaa Iraene.
Tōtahi atu, oia nei te toù o te pō
me i te ava i pao ai tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou io te ana tūpāpaù.
23 Aòè i koàka ia âtou to Īa nino.
Ua hua me to âtou peàu mai : ua ìte âua i nā anera
te i peàu ia âtou u pohuè Ietu.
24 Ua hee tahipito me i vāveka o mātou io te ana tūpāpaù.
Ua ìte âtou i te mea i peàuìa e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtako !
E te koekoe tevee i te haatià i te mea paotū
ta te tau peroheta i peàu atu.
26 Aòè à tēia mamae e mamae ai te Kirito
no te tomo io to Īa kāìè ? »
_________________________
TE KOÌKA HUAAMAMATE 2
TATAUÌA O TE HĀMANI A IOPE 19, 1.23-27
1 Ua pohā te èo o Iope me to īa peàu pēènei :
23 E too ta ù e patuìa ta ù tau ponatekao nei
i ùka o te motukeâ me te toki puhipuhi,
24 e taaiìa âtou i òto o te keâ
no te tau tai ènana paona koè.
25 Ua ìte au e pohuè to ù Vevao.
I te ava paoìa o te aomāàma nei,
e tū Īa i ùka o te èpoèhu o te tau nino tūpāpaù.
26 Ia vaa au, e tū au nei me to ù nino.
E ìte au mata he mata i te Etua.
27 O au iho, e ìte au i te Etua.
E tiòhi matiòka au ia Īa me to Īa apuu mai. »
TARAMO 130 (129),
U tataì tu ù kuhane i te Hatu.
He mea tiàtohu ta Īa tekao ia ù. 130, 5
1 Me i te peteò tu ù taaàu atu,
E te Hatu e, a òko mai i to ù èo.
2 A hakaòko meitaì to Òe puaìka,
I te takiìa o ta ù pure.
3 Me haamau Òe i te mīkeo,
E te Hatu e, na ai te tū aè ?
4 Io Òe te tukuìa o te mīkeo.
Ua hopo au, e tataì ana ia Òe.
6 Tiàtohu atu, e tataì to ù kuhane i te Hatu,
I te ènana tiaki, matavaa i te pō,
I tataì i te maùteiao.
7 E to Iraene, a tataì òe i te Hatu.
Ôhia io te Hatu te kāòha,
Te haapohuèìa hou ananu.
8 E hoko hakaùa te Hatu ia Iraene,
Me i te nuiìa o te mīkeo.
TATAUÌA O TO MUA HĀMANI A PAURO PEÀTO I TO TETARONIKA
4,13-18
13 E tu ù tau tuàne tuehine,
u makimaki mātou e ìte ôtou ma te tiàtohu
e aha te hakatu o te tau ènana te i mamate,
etià umoì ôtou e kuhane koè,
me he mea a te poì u te tataì i te Etua.
14 U haatià tātou i te mea ua mate Ietu, ua tū hakaùa Īa.
Atii hoì, u haatià tātou i te mea e ìò hua mea anaiho
no te tau ènana i moe e haatià aa ia Ietu.
Na te Etua e haatahi ia âtou me te Hatu Ietu.
15 U hakako mātou ia ôtou vāàna i tekao a te Hatu :
Tātou te i pohuè i te ava o te Huaìa o te Hatu,
u te tutuki me Īa ma mua o te huaa mamate.
16 E òkoìa te èo. E taaàu te Hakaìki anera.
E taki te pū o te Etua.
E iho mai me io he àki te Hatu anaiho.
E tū pohuè hakaùa te tau ènana i mamate,
haatià aa i te Kirito.
O âtou to mua e pohuè hakaùa.
17 I muì iho, tātou e pohuè nei,
e hapaiìa tātou me âtou nātoa, i òto o te ao,
no te haatutuki me te Hatu io he ataàki.
Ma èià, e haapii tātou me te Hatu no te tau tai ananu.
18 A haamau io he koekoe i hua tekao ta ù e peàu nei.
A haaoho i te ìi te hoa i te hoa !
ALLELUIA. ALLELUIA
A meitaììa te Etua Motua hakāòha nui.
O Īa to tātou toko ia haauēuē mai te nuiìa
o te kōhii.
ÈVANERIO O IETU KIRITO VĀÀNA E IOANE 11, 32-40
I tēia mou pō, ua mate nui o Rataro, te hoa o Ietu.
32 Ua ìte Maria ia Ietu, ua hika īa pii o nā vaevae o Īa.
U peàu pēènei : « E te Hatu e,
anoa i înei òe, aòè tu ù tuàne i mate nui. »
33 Ia ìte Ietu i to īa uē me te uēuē
o te tau ati Iuta ma te kaokao o Maria,
u emièe, u mehea to Īa koekoe.
34 U peàu : « Ua tomiìa i hea ? »
I peàu ai âtou : « E te Hatu e, a mai. A tiòhi ! »
35 U mateteka Ietu.
36 U peàu te tau ati Iuta : « A tiòhi i te nui o to Īa kāòha. »
37 Atià, u peàu tahipito : « U haatāhakahaka i te kikomata
o te ènana matapō. No te aha u te koàka ia Īa
te haapākeka i te mateìa o Rataro ? »
38 U emièe hakaùa Ietu me to Īa tihe
i te vahi o te tomiìa.
He ana io he motukeâ. Ua pāìa te ana me te keâ.
39 U peàu Ietu : « A huì atu i te keâ ! »
Ua hua Marata, te tuehine o te tūpāpaù :
« E te Hatu e, u piàu.
O te hā tēnei o te â me i te tomiìa. »
40 U peàu Ietu : « Aòè à au i peàu ia òe,
me haatià òe ia ù, e ìte òe i te kāìè o te Etua ? »
_________________________
TE KOÌKA HUAA MAMATE 3
TATAUÌA O TE HĀMANI A TE PEROHETA ITAIA 25, 6-9
6 Ia tihe te â, na te Hatu Etua o te aomāàma
e kānea i te kainamau ma ùka o to Īa tuaivi
no te tau mataèinaa ia ôtoa.
E tuha Īa i te kiko kerehi, te vino mānini,
te înaì mōmona, te vino oko nui.
7 E taki te Etua i te kahu uē,
e haauhi Īa i te tau ènana ia ôtoa.
E haakoè Īa i te kahu tomiìa tūpāpaù
e vāhī aa i te tau mataèinaa paotū.
8 E haahika pao te Etua i te mateìa.
E haamaha te Etua i te vaimata o te tau ènana uēuē.
E haakoè te Etua i te mea haamee
i to Īa mataèinaa ma nā henua vii pu.
Oia hoì ta Īa tekao.
9 Ia tihe i te â, e peàuìa pēènei :
« O Īa to tātou Etua.
U tataì tātou ia Īa : u haapohuè mai.
O Īa te Hatu. U haatià tātou ia Īa.
A èkaèka, a koakoa tātou.
Na te Hatu i haapohuè mai. »
TARAMO 25 (24)
E te Hatu e, i òto o to ù uēuē, u vevaò au ia Òe.
6 E te Hatu e, a haamaakau i to Òe uē,
Me i kiu mai to Òe kāòha te i noho mau.
7 A haatūhaè i te tau tekateka o to ù houìa,
Umoì e titii atu ia ù nei : a haamaakau mai.
17 Kuhane koè au, ua pī to ù koekoe i te uēuē.
A haakoè i te àì e òomi mai.
18 Ua ìte Òe i to ù paòpaò me te mamae.
A tuku i te nuiìa o to ù mīkeo.
20 A pāpua mai, a haapohuè mai.
Io Òe to ù vahi maù. Umoì au e hakaìka.
21 Enā te Toitoi me te Tiàtohu ma to ù kaokao.
O au hoì te ènana e tataì nei i te Hatu
TATAUÌA O TE HĀMANI APOKARUPO 21, 1-6
1 I muì iho, ua ìte au i te àki hou me te henua hou.
Ua koè nui to mua àki me te henua. Ua koè me te tai.
2 Ua ìte au e iho aa me io he àki, me i te aò o te Etua,
te pāpuahaè tapu, Ierutaremi hou.
Ua tāpīìa me te kahu kaèkaè,
tūtū me he vehine hou no to īa koìka mātiri.
3 Ua òko au i te èo oko te tihe mai
me io he Nohoka kāìè.
U peàu īa pēènei :
« Oia nei te haè o te Etua i vāveka o te tau ènana.
E noho te Etua i vāveka o âtou.
E ìò âtou he mataèinaa o te Etua.
4 E haamaha te Etua i to âtou vaimata,
e haakoè Īa i te mateìa, i te uēuē me te mamae paotū.
Ua kaò hoì te aomāàma pēpenaìa òmua. »
5 U peàu te Etua e tū aa io he Nohoka kāìè :
« Enā, e haahou au i te tau mēmau paotū. »
U peàu hakaùa Īa : « A patu òe.
He tekao tiàtohu hoì, tekao hakahae koè hua tekao. »
6 U peàu hakaùa : « Ua pao. O au te Tumu me te Hiku.
O au te Tīmataìa me te Paona.
E vaièi au i te vaipuna i te tau ènana paka i te vai. »
ALLELUIA. ALLELUIA Io 3,16
Mēìa i to Īa kāòha i te ao nei,
u pōpahi te Etua i ta Īa Tama tootahi,
etià e koàka mai
i te ènana e haatià ia Īa te pohuè ananu.
ÈVANERIO O IETU KIRITO VĀÀNA E MAREKO
15, 33 – 16, 6
33 Ua topa te pō pōtako ma ùka o te tiàtohu o te henua
me i te ava oatea nui tihe atu te hora e toù ahiahi.
34 I te hora e toù, u taaàu Ietu me te èo oko :
« E tu ù Etua e. E tu ù Etua e.
Umaha Òe i titii ai ia ù ? »
37 Atià Ietu, e taaàu aa me te èo oko,
ua tuku atu i te ao paoìa.
38 A tahi a tuivā ma vāveka me i ùka tihe i àò nui
te tapa tauèvaìa io he Hiero.
39 Te keneturione e noho aa i te aò o Ietu,
ia ìtemata i te hakatu o to Īa mateìa, u peàu :
« Tiàtohu nui, o te ènana nei te Tama a te Etua. »
16,1 Ma hope mai o te Tāpati, Maria Matarena,
Maria, te kui o Iakopo, me Tarome, ua hoko mai âtou
i te mēmau kakaa no te paù i te nino tūpāpaù o Ietu.
2 I te pōpōuì tika mākehukehu,
i te â to mua o te âtapu,
ua tihe âtou io te ana tūpāpaù. He atauà.
3 U peapeàu atu peapeàu mai âtou :
« Na ai e huì atu i te keâ me io te avaputa o te ana ? »
4 Atià, e heau aa, ua ìte âtou
ua huììa hua keâ : he keâ kaùoo.
5 Ua uu âtou i òto o te ana tūpāpaù.
Ua ìte âtou e tahi māhaì e noho aa i te kēkē ìma oko,
e kahu òa, e kahu tavaìè to īa.
U emièe âtou me te haametaù.
6 U peàu hua māhaì ia âtou : « Umoì ôtou e haametaù.
Ua ùmihi ôtou ia Ietu no Natareti te i pāokapekaìa.
Ua tū hakaùa Īa. Aòè Īa i înei.
Oia nei te vahi i tuku âtou ia Īa. »
Comments est propulsé par CComment