INFOS / MOU TEKAO HAKAÌTE

     04/08/2022 - Afin de mettre en conformité avec la graphie académique ses textes rédigés en langue marquisienne il y a plusieurs années, Jacques Iakopo Pelleau a entrepris la correction graphique de tous ses articles et de son lexique (Vocabulaire), ce qui prendra plusieurs semaines ; la date de normalisation est indiquée en fin d'article.

Le site de partage de la langue marquisienne
Te tohua niu tavavā hou mea àva atu àva mai i te èo ènana
The new site for sharing the Marquesan language

Vue de la plage Vainahō et du Fort Collet, Taiohaè, Nukuhiva. René Gillotin, 1844.

Tau pure no te â tapu ònohuu ma ìma o te Ava ma te èhua, èhua C (10/07/2022)

samaritain

« Atià, o te ènana Tamaria e vii ana i te henua, u haatata mai me hua ènana te i haamākakaìa. »

 

TOMINIKA ÒNOHUU MA ÌMA

(Â tapu 10 no Takuùa 2022)

TOMOÌA : I.2

               1
 Haahuaèkaèka tātou i te Etua Motua ;
 Na Īa i hao ia tātou
 Me io he mana o te Tiaporo ;
 Na Īa i haatomo ia tātou
 I òto o te Patirēia,
 O te Patirēia o to Īa Tama tāhia.

             Moumu

O te Kirito, te ata ìtea o te Etua ;
O te Kirito, te tumu
O te tau mēmau ia ôtoa.

3  O te Kirito, te upoko o te Èkaretia ;

    O te Kirito, te hāmua o te tau ènana
    I haoìa me io he mana o te mateìa ;

    Te vivini o Īa, te vivini o mea hakatahi.

 

TARAMO   19 (18) : He tiàtohu to Òe tekao, e te Hatu e ; na to Òe ture e haapohuè mai.  

Kio Vānana :     Oia nei te tekao hou ta te Etua i peàu mai :  O te ènana e kāòha i te Etua, a kāòha īa me to īa teina.

Pure a te poì haatià :   E te Hatu e, a òko mai ! E te Hatu e, a āpuu mai !

ÙTUNA : B.2

              1

A kave tātou nui

I to tātou ùtuna

I ùka o te hātaa

O tēnei haraoa.

He puku o te henua

I hana îìma ìa.

A ìò mai

Mea haraoa pohuè.

          2

A kave tātou nui

I to tātou ùtuna

I ùka o te hātaa

O tēnei vino.

He puku o te kāhui

I hana îìma ìa.

A ìò mai

Mea inu kuhane.

          3

Na hua ùtuna

I haakoàka mai

I te meitaì

O te ùtunaìa

Ètereno nui noa

Ta Ietu io he peka ;

E hēaka i èià,

He tauà nui.

Haamaakauìa :   Te Kāìè ia Òe, e te Hatu Ietu e te i mate nui, te pohuè ; A tihe mai, e Ietu ; a tihe mai, e Ietu.

KŌMŌNIŌ :   D.1

            1
E ùmihi nei au i to ù Hatu
Ma te tau vahi ia ôtoa.
O ta mātou e vevaò nei :
Ietu, a hee mai io mātou nei.

              2
E Ietu e, eīa Òe
Ma òto o te Eukaritia
O ta Òe i ùtuna no mātou
Io to Òe Motua.

                   3  U peàu mai Òe, e Ietu e, / O te i kai me te inu
                       I to ù nino me to ù toto, / E pohuè ananu to Īa.

   

Hīmene haahuaèkaèka : C.10

                     1
Ùtuna nei au i to ù pohuèìa
I òto to ìma, e tu ù Etua e.

Moumu
Hāìu mai to , a tiòhi mai to mata,
Tuku mai to kāòha i òto ia mātou.

2    Hohoà nei au i to ù îìma

      No te pure io Òe, e tu ù Etua e.

   

PAHIÌA :     V.15    Ave, Ave (bis), Ave Maria.

              1
E hahi mātou ia òe, e Maria e,
No to òe kāòha ia mātou nei,
Ta òe tau tama nei.

                     2
A tuku òe ia mātou nei i ta òe tama ;
A peàu atu i te kāòha
O to mātou houpo.

 

TOMINIKA ÒNOHUU MA ÌMA

TATAUÌA O TE HĀMANI A MOITE PEÀUÌA TEUTERO   30, 10-14

10      U peàu Moite i te mataèinaa Iraene pēènei :

        « A hakaòko òe i te èo o te Hatu to òe Etua

        me te aotahi atu i to Īa makimaki, to Īa tekao

        patuìa ma òto o te hāmani o te Ture.

11      A hua mai i te Hatu to òe Etua

        ma òto o te tiàtohu o to òe koekoe me te kuhane.

        E koàka ia òe te aotahi atu i te tekao ta ù i peàu i tēnei â.

        Umoì òe e maakau : Ua toko hua tekao. Na ai e aotahi atu ?

12      Aòè hoì e noho tenā Ture io he ataàki.

        Umoì òe e peàu :

        O ai te hiti io he àki no te ùmihi i hua Ture

        me te hakaìte mai etià e aotahi atu mātou ?

13      Aòè hoì e noho tenā Ture ma tītahi kēkē o te tai.

        Umoì òe e peàu :

        O ai e taha ma tītahi kēkē o te tai no te ùmihi i hua Ture

        me te hakaìte mai etià e aotahi mātou ?

14      Ua tata èka me òe hua tekao.

        Enā īa i òto o to òe haha, i òto o to òe koekoe,

        vāàna e aotahi atu òe. »

 

TARAMO   19 (18), 8, 9, 10, 11

 He tiàtohu to Òe tekao, e te Hatu e, na to Òe ture e haapohuè mai.           cf.In.17,17

 

8       U toitoi noa te ture o te Hatu,

        Na Īa e haahou i to tātou ìi.

        U tiàtohu te tekao o te Hatu,

        Te i haamāàma i te poì avai noa.

9       U toitoi te tekao o te Hatu,

        E haakoakoa âtou i te koekoe.

        U hōata te makimaki o te Hatu,

        E haakeàpa i te mata o te ènana.

 

10      U taìtaì te pakaihiìa o te Etua,

        E noho mau ananu to Īa tau puku.

        U toitoi te tekao paotū o te Hatu :

        He māàma âtou no te haavā i te ènana.

 

11      U taetae atu te makimaki o te Hatu

        I te puke moni kiki, te kuà o te moni kiki.

        He mānini atu te tekao o te Etua,

        I te mānini tikauè e tahe me io te kaka.

 

TATAUÌA O TE HĀMANI A PAURO PEÀTO I TO KOROHA  1, 15-20

        E tu ù tau tuàne tuehine.

15      O te Kirito te ata o te Etua ìtemata koè ìa.

        O te Kirito te Tama hāmua, tiketike atu

        i te tau mēmau ia ôtoa te i pēpenaìa.

16      I òto o te Kirito, u pēpenaìa to te àki, to te henua,

        Te tau mēmau ìtea, te mea ìtemata koè ìa :

        Te tau kuhane mana, hakaìki, hatu, vivini.

        U pēpenaìa âtou nui, ma io Īa, no te haakāìè ia Īa.

17      O te Kirito à, ua Īa ma mua atu

        o te tau mēmau paotū te i pēpenaìa.

        I òto o Īa, e mau nei âtou paotū.

18      O te Kirito te upoko o te Tino, te Èkaretia.

        O te Kirito te Tumu o to te Èkaretia pohuè.

        O Īa te Tama hāmua hakaùa, haakāìèìa e te Etua,

        etià e ìò o Īa te vivini o te tau mēmau ia ôtoa.

19      Vāàna i to te Etua makimaki hakanā :

        i òto o te Kirito te paoònaòna o te hakatu Etua.

20      Ma io te Kirito, e haatutuki me te Etua

        te tau mēmau paotū, to te àki, to te henua.

        Ma te toto o te Kirito pāokapekaìa,

        e haaneke i te moû, e haakoè nui i te tōua,

        i vāveka o te tau mēmau ia ôtoa.

 

ALLELUIA ALLELUIA   cf. .1In,21.

Oianei te tekao hou ta te Etua i peàu mai :  O te ènana e kāòha i te Etua, a kāòha īa me to īa teina.


EVANERIO O IETU KIRITO VĀÀNA E RUKA    10, 25-37

        I tēia mou ,

25      ua tū tītahi tuhuka tekao

        me to īa peàu no te haahiiveke ia Ietu :

        « E Tuhuka e, e aha te hana e hana atu au

        etià e ìò ia ù te pohuè ananu ? »

26      U peàu Ietu ia īa : « E aha te mea i patuìa

        io he Hāmani tapu ?  Pēhea to òe tatau ? »

27      Ua haahua īa : « A kāòha òe i te Hatu to òe Etua

        ma io he koekoe, ma io he ènana tiàtohu,

        ma io to òe ìi paotū, ma io he kuhane.

        A kāòha i te hoa me he mea ia òe anaiho. »

28      U peàu Ietu ia īa : « He mea toitoi ta òe tekao.

        A hana òe i hua hana, e pohuè ai. »

29      Atià, e makimaki ana te tuhuka tekao te hakaìte atu

        he mea māàma to īa ūiìa,

        u peàu hoì ia Ietu : « O ai à to ù hoa ? »

30      U haahua atu Ietu :

        « Ua hee te ènana me i Ierutaremi i Ieriko.

        Ua tutuki īa me te puke poì kamo.

        Ua hao âtou ia īa me te kukumi.

        Ua hiki âtou e avai ana i hua ènana mei mate nui.

31      Ua tihe pu tītahi tāuà, e hee ana ma io hua vaanui.

        Ua ìte īa i te ènana me to īa taha atu

        ma te tāî o te vaanui.

32      Ua tihe me tītahi Revita i tēia vahi.

        Ua ìte īa i te ènana me to īa taha atu

        ma te tāî o te vaanui.

33      Atià, o te ènana Tamaria e vii ana i te henua,

        u haatata mai me hua ènana te i haamākakaìa.

        Ua ìtemata ia īa, u mehea to īa koekoe.

34      Ua oha, ua vāhī i te tau maki o te ènana takapii

        e iiki ana i te kao me te uaina.

        Ua tuku ia īa ma ùka o to īa pūriki

        no te kave io he haè āpuu manihii.

        U tiòhi meitaì ia īa.

35      I te oìoì, e too ana e ùa moni tea,

        ua tuku atu i te ènana heihaè manihii me te peàu ia īa :

        « A tiòhi meitaì i te ènana hōpī. Ia nui atu te moni e pao,

        na ù e tuku atu ia òe i te ava e hua mai au. »

36      O ai òa me io ènana tokoùa ua ìò he hoa

        o te ènana i mākakaìa e te poì kamo ?  To òe maakau ? »

37      U peàu te tuhuka tekao : « O tēia te i hakāòha mai i te ènana. »

        U peàu Ietu ia īa :

        « A taha atu, a hana òe hua mea anaiho. »

 

Comments est propulsé par CComment