INFOS / MOU TEKAO HAKAÌTE

     04/08/2022 - Afin de mettre en conformité avec la graphie académique ses textes rédigés en langue marquisienne il y a plusieurs années, Jacques Iakopo Pelleau a entrepris la correction graphique de tous ses articles et de son lexique (Vocabulaire), ce qui prendra plusieurs semaines ; la date de normalisation est indiquée en fin d'article.

Le site de partage de la langue marquisienne
Te tohua niu tavavā hou mea àva atu àva mai i te èo ènana
The new site for sharing the Marquesan language

Vue de la plage Vainahō et du Fort Collet, Taiohaè, Nukuhiva. René Gillotin, 1844.

Tau pure no te â tapu ònohuu ma hitu o te Ava ma te èhua, èhua C (24/07/2022)

 demandez

« Na te mea, me ape tītahi, e ìò ia īa. Me ùmihi te ènana, e koàka mai. »

 

TOMINIKA ÒNOHUU MA HITU

TATAUÌA TE HĀMANI A MOITE PEÀUÌA TENETE   18, 20-32

        Ua maô manihii tokotoù āpuuìa e Aparahamo.

        Ua hano âtou e hee i te pāpuahaè Totoma me Komora.

20      U peàu te Hatu ia Aparahamo :

        « Auē, te oko nui o te pokokina e hiti io ù

        me i pāpuahaè Totoma me Komora !

        Auē, te toko o to âtou mikeo !

21      E too ta ù e hee tiòhi i te hakatu o to âtou hana,

        te oko o te pokokina ua hiti i tu ù .

        No te mea e tīvava oti, e ìte au. »

22      A tahi a taha ènana tokoùa i Totoma.

        O Aparahamo à, ua noho i mua o te Hatu.

23      U haatata mai Aparahamo me te ūi atu :

        « E te Hatu e, aha e hano òe e haamate

        i te ènana toitoi me te ènana mikeo ?

24      Enā oti e ìma ònohuu ènana toitoi io te pāpuahaè Totoma ?

        Aha e hano Òe haamate ia âtou ?

        Aòè e koàka ia Òe e vevete i to âtou mikeo

        mēìa i hua e ìma ònohuu ènana toitoi

        e noho aa i òto o te pāpuahaè ?

25      Auē, te hauhau o to Òe hana me hana Òe atii !

        E haamate e tahi mateìa i te ènana toitoi me te ènana mikeo ?

        E oonakiìa te poì toitoi hakatu me te poì hauhau ?

        E aha e hakatio pu, e haavā pu me te toitoi koè

        te Hakaìki nui o te aomāàma vii pu ? »

26      U haahua atu te Hatu : « Anoa e koàka ia ù i Totoma

        e ìma ònohuu ènana toitoi,

        mēìa ia âtou e vevete au i te tau mikeo

        o te tau ènana paotū noho ana io he pāpuahaè. »

27      U peàu Aparahamo

        « E vaavō au nei oti no te tekao hakaùa i tu ù Hatu.

        O ai au nei ? E èpo anaiho au, tutu me te èhuahi anaè.

28      Atià, i òto o tenā tau ènana e ìma ònohuu toitoi noa,

        e koè oti tokoìma.

        E aha no tenā mou ènana tokoìma

        e haamamape Òe i te pāpuahaè ? »

        U haahua te Etua :

        « Aòè au e haamamape i te pāpuahaè

        me koàka ia ù e ònohuu ma ìma ènana toitoi. »

29      Ua tohe Aparahamo e peàu ana :

        « E ònohuu ènana toitoi ta Òe e koàka mai oti. »

        U peàu te Hatu :

        « Aòè au e haapē i te pāpuahaè

        mēìa i tenā tau ènana e ònohuu. »

30      U peàu hakaùa Aparahamo :

        « Aua e pekē mai, e tu ù Hatu e,

        no te mea e vaavō hakaùa au no te tekao :

        e koàka ia Òe e toù ònohuu ènana toitoi anaè. »

        U haahua te Etua : « Aòè au e haapē i te pāpuahaè

        mēìa i tenā tau ènana e toù ònohuu. »

31      Ua tohe Aparahamo :

        « E vaavō oti au no te peàu hakaùa i tu ù Hatu :

        e koàka oti ia Òe tekau ènana toitoi anaè. »

        U haahua te Etua : « Aòè au e haapē i te pāpuahaè

        mēìa i nā tekau ènana toitoi. »

32      U peàu hakaùa Aparahamo :

        « Aua e pekē mai e tu ù Hatu e.

        Oia tu ù tekao paoìa :

        tīònohuu ènana toitoi anaè oti, ta Òe e koàka mai. »

        A tahi a haahua atu te Etua :

        « Aòè au e haapē i te pāpuahaè Totoma

        mēìa i hua tīònohuu ènana toitoi. »

 

TARAMO 138 (137), 1-2a, 2b-3, 6-7b, 7c-8

E te Hatu e, u hakaòko Òe i tu ù pure vevaò.    138,3

 

1     E te Hatu e, u haahuaèkaèka au me io he koekoe.

      U hakaòko hoì Òe i tu ù pure vevaò.

      E hīmene nei au ia Òe i mua o te tau anera,

2     E oha nei au e tiòhi ana i to Òe Hiero tapu.

 

      E haahuaèkaèka nei au mēìa i to Òe kāòha me te tiàtohu.

      U tiketike atu i te tau mēmau paotū to Òe ikoa.

3     I te â u haahua mai Òe i to ù pure vevaò,

      U ūo to Òe mana i te ìi o tu ù kuhane.

 

6     Ua ìte te Etua tiketike i te ènana avai noa.

      Me i te vahi mamao, ua tuhi Īa i te ènana kāìè pu.

7     E te Hatu e, me òomiìa au e te ìno haapūkina mai,

      U haapohuè mai Òe ma te haahika i te poì kaipīpiò ia ù.

 

      U tuàki au ma te mana o te Hatu.

8     I ia ù, ua hana me he mea ta Īa i peàu mai.

      E te Hatu e, paona koè to Òe kāòha.

      Umoì e hakaea i to Òe matavaièi mai.

 

TATAUÌA O TE HĀMANI A PAURO PEÀTO I TO KOROHA   2, 12-14

12      E tu ù tau tuàne tuehine.

        Ma te papatema, u tomiìa ôtou kātahi me te Kirito ;

        kātahi me Īa, u pohuè hakaùa ôtou,

        na te mea u haatià ôtou i te mana o te Etua

        te i haatū hakauà ia Ietu Kirito

        me i vāveka o te poì mamate.

13      Òmua, me he poì mamate ôtou mēìa i to ôtou tau mikeo,

        he êteni ôtou, ìte koè i te Ture a Moite.

        U vaièi te Etua ia ôtou i te pohuè kātahi me te Kirito,

        ma te haakoè i to ôtou tau mikeo paotū.

14      Ua veti te Etua i te hāmani àiê te i hakatio ia tātou

        ma to īa tau ture.

        U haakoè te Etua i hua hāmani àiê,

        me he mea u patia te Etua ia īa io he peka o te Kirito.

 

ALLELUIA ALLELUIA          cf. Rm.8,15

 Haateeìa e te Kuhane Meitaì te i haaìò ia tātou he tau tama a te Etua, ua apa tātou i te Etua : « To mātou Motua »

 

EVANERIO O IETU KIRITO VĀÀNA E RUKA     11, 1-13

1       Ohia ua noho Ietu io tītahi vahi, ua pure Īa.

        Ia pao to Īa pure,

        u peàu tītahi me i vāveka o to Īa tau kouâ :

        « E te Hatu e, a hakako mai i te pure

        me he mea u hakako Ioane i to īa tau kouâ. »

2       U peàu Ietu ia âtou pēènei :

        « I te ava e pure ôtou, a peàu pēènei :

        E te Motua e, a tapu to Òe ikoa.

        A tihe to Òe Patirēia.

3       A tuku mai i te no te â nei, paotū te â.

4       A haakoè i to mātou mikeo,

        atii me mātou u haakoè i te poì u àiê mai.

        Aua e haahemo mai i te mōtii. »

5       U peàu Ietu ia âtou pēènei :

        « O ai i vāveka o ôtou me te hoa,

        ia hee īa i te tūmoe nui no te peàu :

        E te hoa e, a àiê mai e toù haraoa.

6       Ua tihe hoì io ù to ù hoa e vii ana i te henua.

        Aòè he mea kai ta ù no te āpuu ia īa.

7       Atià, me i òto o te haè, u haahua atu te hoa :

        « Umoì e haapaòpaò mai. I tēnei, ua pāìa te avaputa.

        Ua moe au me ta ù tau tama.

        Aòè e koàka ia ù te no te tuku atu ia òe. »

8       U peàu au ia ôtou : anoa aòè e te hoa

        no te tuku i te haraoa, e aha à he hoa īa,

        e maô hoì me te tuku atu i te mea paotū te i apeìa

        mēìa u vaavō to īa kaiapeìa.

9       U peàu au ia ôtou : a ape ôtou, e tukuìa mai.

        A ùmihi ôtou, e koàka mai. A paopao, e pepeùìa ia ôtou.

10      Na te mea, me ape tītahi, e ìò ia īa.

        Me ùmihi te ènana, e koàka mai.

        E pepeùìa te avaputa no te ènana e paopao.

11      O ai te motua me i vāveka o ôtou,

        me ape ta īa tama i te ika, e tuku atu i te puhihenua ?

12      Akoè à, me ape te tama i te māmaì moa,

        e tuku atu i te koropio ?

13      Me ìte ôtou, e te poì ,

        e tuku atu i te mea meitaì i ta ôtou tau tama,

        tōtahi atu ta te Motua te io he àki

        e tuku atu i te Kuhane Meitaì i te poì e ape io Īa. »

Comments est propulsé par CComment