Imprimer cette page

Tau pure no te tominika to mua o te Ava Haaoke, èhua B (18/02/2024)

« Ua noho Ietu i te henua ataha e hā ònohuu â, u haamōtiiìa e Tatane. I vāveka o te tau puaka kaipekā to īa nohoìa. U tāvini te tau anera ia Īa. » « Ua noho Ietu i te henua ataha e hā ònohuu â, u haamōtiiìa e Tatane. I vāveka o te tau puaka kaipekā to īa nohoìa. U tāvini te tau anera ia Īa. »

TOMINIKA TO MUA O TE AVA HAAOKE

(Â tapu 18 no Ūaòa 2024)

 

TOMOÌA :     G.5

             1
E te tau kiritiano,
Umoì e haaòa ;
A hua mai i te Etua,
A haakoè i te mikeo.

            Mōumu
A hua mai i te Etua,
A hua mai i te Etua,
A haakoè (i) te mikeo.

                 2
E te tau kiritiano,
A hahi i te Etua
I tuku mai ia tātou
I to Īa karatia.

 

Penitenia

 

TARAMO 25 (24) : E te Hatu e, he kāòha me te tiàtohu to Òe vaanui, no te ènana e aotahi atu i to Òe Piimau.  

  

Kio Vānana : He tiàtohu nui ta Òe tekao ; aòè te ènana e pohuè i te haraoa anaè, atià i te tekao paotū me io te haha o te Etua.

 

Pure a te poì haatià :  A matavaièi mai, e te Motua e, i te pure ta mātou e haahiti nei. A apuu mai me te moû.

 

ÙTUNA :   G.10

             1
E kāòha ananu te Etua
I te poì veve,
I te poì iti noa,
I te poì mikeo.

             Mōumu
A tū, a tohe mau
I te haatià kiritiano.
A tiòhi te hana o Ietu,
To tātou Etua.

              2
E pātoko ananu te Etua
I te poì e memae nei,
Te i hemo i te mate,
Te i òto o te àì nui.

 

Haamaakauìa :  Te kāìè ia Òe, e te Hatu e, te i mate nui, te pohuè ; A tihe mai, e Ietu ; a tihe mai, e Ietu.

 

KŌMŌNIŌ :   G.3

             1
E Ietu to ù Māàma
Me to ù Pohuè tiàtohu, (e Ietu e)
A toko mai ia mātou
I te aomāàma nei.

                    2
A vevete i te teka,
Ma òto o mātou nei, (e Ietu e)
A tinai i te ìno,
A noho i òto o mātou.

 

3  A mave mai, e Ietu e, / E pepeù nei mātou, (e Ietu e)
    I to mātou hōupo, / Òe te Hakāòha.

 

  

 

Hīmene haahuaèkaèka : A.24

          1
To mātou Motua,
To mātou Pēpena,
Motua pī i te kāìè,
Motua pī i te kāòha,
Ia mātou poì mikeo.

        Mōumu

He moû, he kāòha
To hakatu, e te Hatu.
U haataetae ia mātou.
He moû, he kāòha ananu.

            2
E Ietu Pohuè,
To mātou Hatu e,
Etua Haapohuè,
Etua pī i te kāòha,
No Òe mātou paotū.

 

PAHIÌA :  V.19

            1
E Maria e, haatià nui e,
Virikine peàto ;
E kui meitaì i vaeìa,
A pure no mātou nei.

       Mōumu
Maria     (bis)
Peàto e  (bis)
E te kui   (bis)
No Ietu    (bis)
O īa to ù hīa ia Òe, Maria,
Ma te tau tai ananu.

 

  

2  No to meitaì, to pāpaku nui e, / To haatià, e Maria,
   A vevaò ia mātou e ape nei, / A pure no mātou nei.

 
   

---------------------------------------------------------------------------------------

TE TOMINIKA TO MUA O TE AVA HAAOKE

TATAUÌA O TE HĀMANI A MOITE PEÀUÌA TENETE   9,8-15

        Ma hope o te vaiā nui,

8       u peàu te Hatu Etua ia Noa me ta īa tau tama, pēènei :

9       « Enā to ù Piimau me ôtou, atii me to ôtou ati i ùka aè,

10      te tau mēmau pohuè paotū vii pu o ôtou ana :

        te tau manu e ona nei ma he ataàki,

        te tau puaka vaè me te tau puaka kaipekā,

        te tau ànimara paotū te i uu i vaho o te Àraka

        no te haapī hakaùa i te henua.

11      Oia nei te Piimau e haatoitoi au me ôtou :

        Aòè e tahi mēmau pohuè e haamateìa hakaùa e te vaiā nui.

        Aòè e vaiā nui hakaùa no te haakaò i te henua. »

12      U peàu atu te Hatu Etua :

        « Eīa te hakatu no te haamaakau i te Piimau

        e haatoitoi au me ôtou

        atii me te tau mēmau pohuè vii pu o ôtou ana,

        no te tau tai ènana a tihe ananu.

13      E tauèva au i to ù anuanua io te ataàki,

        i vāveka ahau o te kohu.

        I èià, e ìteìa te hakatu o to ù Piimau me te henua.

14      Ohia e haamuimui mai au i te tau kohu i ùka o te henua,

        me ìteìa te anuanua i vāveka ahau o âtou,

        e haamaakau au i to ù Piimau me ôtou,

        atii me te tau mēmau pohuè paotū.

15      Aòè te tau vai e ìò hakaùa he vaiā nui

        no te haakaò i te mēmau pohuè.


TARAMO 25 (24), 4-5b, 6-7, 8-9

 E te Hatu e, he kāòha me te tiàtohu to Òe vaanui, no te ènana e aotahi atu i to Òe Piimau.         cf. 25,10

 

4       E te Hatu e, a hakaìte mai i to Òe makimaki.

        O Òe iho, a hakako mai i to òe tau vaanui.

5       A haatee mai to Òe tiàtohu : a haamāàma mai.

        O Òe hoì te Etua e haapohuè ia ù.

 

6       E te Hatu e, a haamaakau i to Òe uē,

        Me i kiu mai to Òe kāòha te i noho mau.

7       A māhaè i te tau tekateka o to ù houìa,

        Umoì e titii atu ia ù nei : a haamaakau mai.

 

8       U meitaì, u toitoi anaè te Hatu

        Te i hakaìte i te vaanui i te poì hukaka.

9       U aahi to Īa toitoi i te poì haapāpaku,

        U hakako i to Īa makimaki i te ènana kāìè koè.

 

TATAUÌA O TO MUA HĀMANI A PETERO PEÀTO    3, 18-22

        E te tau tuàne tuehine.

18      Ua mate nui hoì Ietu Kirito mēìa i te tau mikeo o te ènana.

        U mamae Īa i te mateìa e tahi anaè,       

        ua àva no te tau tai ananu.

        Ua mate te ènana toitoi noa i uē i te poì toitoi koè

        no te aahi ia tātou io te Etua.

        U haamate te tau ènana i to te Kirito nino,

        u hakatū hakaùa te Etua ia Īa vāàna i te Kuhane.

19      I hua ava, ua hee Ietu no te kave i te Tekao hou

        io te tau kuhane humuìa i Havaiki.

20      O âtou te poì pūtuì i haatevee ai te Etua i to Īa pekē,

        u kānea Noa i te Àraka.

        I ùka o hua Àraka, u haapohuèìa te mou ènana,

        toovaù âtou, mēìa ua àka âtou io he vai.

21      Ua ìò hua haapohuèìa i òto o te vai,

        te hakatu o te papatema te i haapohuè ia tātou.

        U te e hooi te papatema i te èpo me io he nino,

        he pure vavaò io te Hatu Etua hua papatema

        no te koàka mai i te koekoe toitoi noa,

        ma te mana o te Tūhakaùaìa o Ietu Kirito.

22      U tānoho hoì Ietu io he àki, i te ìma òko o te Etua,

        e vivini aa i te tau anera, te tau hakaìki anera,

        atii me te tau kuhane mana ia ôtoa.

 

HĪMENE VĀNANA :

He tiàtohu nui to Òe tekao,
Aòè e pohuè te ènana i te haraoa anaè,
Atià i te tekao paotū me io te haha o te Etua.

 

EVANERIO O IETU KIRITO VĀÀNA E MAREKO      1, 12-15

        I tēia mou pō,

        u aahi ponihoo te Kuhane Meitaì ia Ietu i te henua ataha.

13      Ua noho Ietu i te henua ataha e hā ònohuu â,

        u haamōtiiìa e Tatane.

        I vāveka o te tau puaka kaipekā to īa nohoìa.

        U tāvini te tau anera ia Īa.

14      Ma hope u haaìòìa Ioane, ua hiti Ietu i te Henua Karirea.

        U hakaìte atu Īa i te Tekao Meitaì Hou Mai me io te Etua.

15      U peàu Īa pēènei :

        « Ua pao te ava i haaheiìa.

        U tata èka te Patirēia o te Etua.

        A hāìu ôtou i te koekoe.

        A haatià i te Tekao Meitaì Hou Mai ! »

 

Comments est propulsé par CComment