VENINI TAPU

(Te Venini Tapu 29 no Pohe 2024)

TOMOÌA :   Umoì e hīmene.  (le Célébrant s’allonge).

                       

TE TEKAO A TE ETUA : (Umoì e hīmene te Hakaòko).

 

TARAMO 31 (30) : Io to ìma, e te Hatu e, e tuku nei au i to ù kuhane.

            E te Hatu e, io Òe to ù vahi maù.

            Umoì e haameeìa au ma te tau â paotū.

⁶          Io to Òe îìma, e tuku nei au i to ù kuhane,

            E te Hatu, te Etua tiàtohu e, tu ù Haapohuè.

¹²         U toomanu au nei no to ù tau hoa noho tata ;

            Ia ìte mai, u haametaù to ù tau hoa.

            Ua hiki mamao me io ù

            Te poì i tutuki me au ma io he vaanui.

¹³         U haatūhaèìa au me he tūpāpaù ìtekoèìa.

            U haatūhaè âtou ia ù me he kaù tioàìa.

¹⁴         Ua òko au i te tekao haapōtoho mai

            Ta te haètoa e hano aa no te kukumi mai.

¹⁵         U haatià au ia Òe, e te Hatu e.

            U peàu hakaùa : o Òe tu ù Etua.

¹⁶         I òto o to Òe îìma to ù pohuè :

            A taki mai me io te îìma i mākaka ia ù.

¹⁷         A pupuà to Òe mata no to Òe tāvini,

            Mēìa i to Òe uē, a haapohuè mai.

²⁵         A oko nui te koekoe. Oho te ìi

            Ôtou paotū e tetaì nei i te Hatu !

 

HĪMENE VĀNANA : Te kāìè me te hahi ia Òe, to mātou Hatu e,

                                       te tāvini aotahi te i mate i uē ia mātou.

 

HĪMENE VĀNANA : U aotahi te Kirito tihe i te mateìa, te mateìa io he peka.

Oia te tumu u haatiketike anaè te Etua ia Īa,

me te apa i te ikoa ma ùka o te tau ikoa ia ôtoa.

 

TATAUÌA O TE MAMAE O IETU KIRITO VĀÀNA E IOANE

(18,1-40—19,1-42.)

 

1°) No Ietu i òto o te pāpua Ketemane

1 Ma te vevaò me te hopo Ia Òe, e Ietu, To ù kuhane e pūkina nei, To īa mikeo e nui ananu.

Mōumu Auē, to kāòha, e Ietu e, O Òe te Hatu moû oko,            A hakāòha ia mātou !

2°) No Ietu io Kaifa                  2 Mea nui to peàu, e to ù hoa, A tihe mai ! U titii au ; aê au i apuu. To Òe meitaì e nui ananu.	3°) No Ietu i mua o Pinato                    3 E noho muò au me to ù koekoe I to Òe aò. Umoì e tōua, a tiòhi to kouâ Ta Òe i hoko me to òe toto mana.
Noho muò (Jésus au Calvaire) E tuku atu nei au I tu ù kuhane Io to Òe ìma, E tu ù Etua e.	4°) No to Ietu mateìa O Òe, e te Kirito e, I memae me te mate I ùka o te peka no mātou, E atoratio mātou ia Òe.

 

Pure a te poì haatià :  - E te Hatu e, a òko mai ! / E te Hatu e, a apuu mai !

                                      - E te Motua e, a òko mai ia mātou, ta Òe tau tama.

 

TE PAKAIHIÌA I TE PEKA :       Te hahi kātahi i te peka :

 O Òe, e te Kirito e, i mamae me te mate i ùka o te peka no mātou,

 E atoratio mātou ia Òe.

 

TE HOKIÌA PEKA :                                Te kohiìa moni (Quête)

	H.17    1 A hahiìa te peka No Ietu, te Àrenio, I memae me te mate No tātou, poì mikeo.		Mōumu A hahi tātou ia Ietu,  To tātou Haapohuè.			2 A hahiìa te peka, Te âkau o te Pohuè Te i apuu i te hēaka Ùtunaìa no tātou.
	3 A hahiìa te peka Te i haapeàtoìa E te toto o te Tama I uē i te tau ènana.	4 A hahiìa te peka, He tekao o te kāòha, He mana o te Etua, No te poì haatià.		5 A hahiìa te peka, Te tumu o te kāìè. A amo tātou i te peka No te ūtaì me Ietu.
H.5      U peàu mai te Etua ia ù : A hee mai òe ma te hakaēa koè. A tiòhi mai te puta i tu ù kaokao, To ù hōupo tēnei e avai nei. A tiòhi mai to ù mou îìma nei. Auē hoì te māhoahoa nei,             E hopu au ia Òe.					E Ietu e, te hoko mikeo, E mamae nei au, Auē, auē. A tiiki mai Òe te pohuè Ia tihe atu au io Òe.

 

H.4

1 E Ietu e, te i mate io he peka, Ma te haatià, a òko to mātou pure nei ; A toko mai ia mātou, ia hopee iho, O to Òe pākeka te hakatu mana ètereno.		2 E te Hatu e, kāòha mai to kouâ ! Òe anaiho to mātou pātoko mau ; Ia tihe mai te mate, e Ietu tiàtohu, U pahiìa mai Òe e aahi no mātou nei.
Mōumu : Òe, Òe Ietu, to mātou Hatu, O mātou nei to Òe tueni ; Ma te amo hoì i to mātou peka Mea tūtaì me Òe io he àki.
	H.8     Ùmihi nei au te pohuè Ma òto o te aomāàma nei. No to ù nei àì nui e, Ua tihe i te paoìa. Ma òto o te haaìi nui I te amoìa to ù tau mamae, E ape nei au i te Hatu Ia toko mai ia ù.

(Aê he Ùtuna) / (Aê he Haatiketikeìa)

 

Pure : To mātou Motua e

 

KŌMŌNIŌ :       D.29

Mōumu E Ietu e, Haapohuè mau, U vevaò mai Òe ia ù nei No te kaiìamau o te Eukaritia Mea pohuèìa no ù.	E taha atu nei hoì au Io Òe, e Ietu e ; Ua too i to Òe nino, Ua inu i to Òe toto ; Òe tu ù Etua, tu ù Pohuè.
Ua noho mai Òe, e Ietu, / i òto o au nei. Ua tahi tāua. / E hahi, e hīmene nei Tu ù kuhane ia Òe, tu ù Pohuè.

 

H.16   Mōumu : Ma to Īa peka, u haapohuè Ietu ia tātou, poì mikeo.

1 U mamae te Kirito I uē ia tātou. E haaìte atu ana i te hakatu Etià e ūtaì tātou ia Īa.	2 U teka koè te Kirito Ietu, U hakahae koè to Īa haha ; Ua pahaìa te Tama Tāhia, Aòè i haahua Īa i te paha.
3 Ia haamākakaìa te Kirito, Ua mutu Īa, e òomi aa i te pekē. U avai anaè i te Etua Te haavā me te toitoi.		4 Ia pāokapekaìa te Kirito, Ua amo Īa i to tātou mikeo. Ma te mamae i koè ai te tau mikeo. Na to Īa tau maki, u haapohuèìa tātou.

 

PAHIÌA : Umoì e hīmene.                 

NO TE VENINI TAPU

TATAUÌA O TE PEROHETA ITAIA     52, 13-15 ; 53,1-12

¹³      Eīa e tapavaù to ù tāvini,

        e òko nui aè, e hiti aè, e tiketike nui.

¹⁴      U peàu te Hatu : « U kiiete nui te mataèinaa

        ia tiòhi atu i to ù tāvini :

        ohia u mata koè īa, aòè e hakatu ènana hakaùa.

¹⁵      Atii te tau hakaìki, e haamāmā i te haha i mua o to ù tāvini.

        E ìte ai âtou i te mea koè ananu i peàuìa mai,

        e kanino atu i te mea koè ananu i òkoìa mai.

 

^53,1    O ai e haatià atu i ta tātou i òko nei ?

        Ia ai te ìi o te Hatu i hakaìteìa mai ?

²       I te aò o te Etua, ua tiò te tāvini me he kohoe i àò,

        me he aka totoko ma he henua moô.

        Ia tiòhi atu, koè īa i poèa, koè īa i kanahau.

³       U haameeìa, u titiiìa hua tāvini me he mātua kai mamae.

        U haaìno atu tātou ia Īa me te haapaòpaò anaiho,

        u tukitukiìa e te uē

        hakatu me te mea toomanu e haapiko i to mātou mata.

⁴       Atià, no tātou te mamae e amo nei Īa,

        no tātou te uē u òomi i to Īa menava.

⁵       I to tātou maakau, na te Etua i oonaki, i pehi, i haapaìha iho.

        Atià, mēìa i to tātou mikeo, u tīputaìa Īa ;

        mēìa i to tātou mākaka, i pehiìa Īa.

⁶       Ma ùka o Īa, u topa mai te tuki haamoû mai ia tātou ;

        mēìa i to Īa tau maki i oà ai tātou.

        Me he mutō papauō tātou hakatahi ma to Īa iho puta.

        Me te haatopa o te Hatu ma ùka o Īa i te mikeo o tātou paotū.

⁷       U hanapēìa, u haapāpaku, aòè e pepeù i te haha.

        Me he àrenio aahiìa i te kukumi.

        Me he koivi mutō i mua o te ènana tinaì, pepeù koè i te haha.

⁸       Ua humuìa, haavāìa, haakoèìa.

        O ai to te haamaakau atu i to Īa paoìa ?

        U takiìa me io te henua o te poì pohuè.

        U pehiìa haamate mēìa i te mikeo o to Īa mataèinaa.

⁹       U tomiìa me he poì haatià koè.

        O to Īa menema me te poì moni.

        Atià o Īa, koè ananu i mākaka i tītahi,

        koè to Īa èo i tekao tīvava.

¹⁰      U makimaki te Hatu e tukituki atu me te mamae.

        Mēìa u ùtuna atu i to Īa pohuè mea hoko mikeo,

        e ìte ai i to Īa tupu i ùka aè, e haaòa aè i to Īa tau â.

        Ma io Īa, e tae anamai te hīa o te Hatu.

¹¹      Ma hope o te ûûkina o to Īa kuhane, e ìteìa te māàma,

        e tapavaù nui. Ma to Īa mamae, e haameitaì tu ù tāvini

        i te tini tini ènana a amo ai i to âtou mikeo.

¹²      No èià, e tuku au io Īa i te tau haètoa,

        e àva Īa i te tuhaìa taetae me te poì mana.

        Ohia à, na Īa ta Īa i ìò atu i te mate,

        i tatauìa me te poì mikeo.

        Mēìa ua amo i te mikeo o te tau tini tini ènana,

        u vavaò nei Īa i uē i te poì mikeo.

 

TARAMO 31 (30), 2.6, 12, 13-14ac, 15-16, 17.25

 Io to ìma, e te Hatu e, e tuku nei au i to ù kuhane.

 

        E te Hatu e, io Òe to ù vahi maù.

        Umoì e haameeìa au ma te tau â paotū.

⁶       Io to Òe îìma, e tuku nei au i to ù kuhane,

        E te Hatu te Etua tiàtohu e, tu ù Haapohuè.

 

¹²

      U toomanu au nei no to ù tau hoa noho tata,

        Ia ìte mai, u haametaù to ù tau hoa.

        Ua hiki mamao me io ù

        Te poì i tutuki me au ma io he vaanui.

 

¹³      U haamāhaèìa au me he tūpāpaù ìtekoèìa.

        U haamāhaè âtou ia ù me he kaù tioàìa.

¹⁴      Ua òko au i te tekao haapōtoho mai

        Ta te haètoa e hano ana no te kukumi mai.

 

¹⁵      U haatià au ia Òe, e te Hatu e.

        U peàu hakaùa : o Òe tu ù Etua.

¹⁶      I òto o to Òe îìma to ù pohuè :

        A taki mai me io te îìma i mākaka ia ù.

 

¹⁷      A pupuà to Òe mata no to Òe tāvini,

        Mēìa i to Òe uē, a haapohuè mai.

²⁵      A oko nui te koekoe. Oho te ìi

        Ôtou paotū e tetaì nei i te Hatu !

 

TATAUÌA O TE HĀMANI I TO HEPEREO     4, 14-16-- 5, 7-9

        E tu ù tau tuàne tuehine.

^4,14    Ohia ua ìò Ietu he Tama a te Etua, to tātou Tāuà nui tiketike,

        te i tomo i ùka nui o te àki,

        a tohe mau tātou i te haki atu i te haatià.

¹⁵      Na te mea, u mehea hua Tāuà nui

        mēìa i te tau tekateka o to tātou koekoe pepae.

        Ua ìte hoì Īa ma te tiàtohu i te nuiìa

        o te mea haaveke me te haamōtii mai ia Īa,

        atià à, u mikeo koè Īa.

¹⁶      No èià, a haatata mai tātou haametaù koè

        me te Etua mana nui, te tumu o te vaièiìa,

        vāàna e ìò mai ia tātou to Īa hakāòha

        me te karatia no te toko mai, i te ava e hei.

^5,7     O Ietu Kirito e pohuè aa io he henua nei,

        me he ènana mate vave, ua pure Īa i te pure vavaò,

        e uē aa, e taaàu aa io te Etua,

        etià e haapohuèìa me io te mana o te mateìa.

        U apuuìa ta Ietu Kirito pure

        mēìa i to Īa kāòha me te aotahi atu.

⁸       E aha à he Tama te Kirito,

        ma to Īa mamae, u hakako Īa i te aotahiìa.

⁹       Ma èià, ua ìò Īa he toitoi noa i mua o te Etua,

        u haatūìa te tumu o te pohuè ananu

        no te tau ènana paotū e aotahi ia Īa.

 

HĪMENE VĀNANA :

                                                                                          cf. Fi. 2,8-9

U aotahi te Kirito tihe i te mateìa, te mateìa io he peka.

Oia te tumu u haatiketike anaè te Etua ia Īa,

me te apa i te ikoa ma ùka o te tau ikoa ia ôtoa.

  TATAUÌA O TE MAMAE O IETU KIRITO VĀÀNA E IOANE 18, 1-40--19, 1-42

 

        I tēia mou pō,

^18.1    ua hee Ietu me to Īa huaa kouâ

        i tītahi kēkē o te vaitahe Keterone. Enā i èià e tahi pāpua.

        Ua uu Ietu me to Īa huaa kouâ i òto o hua pāpua.

²       O Iuta, te i haaìò ia Ietu, ua ìte meitaì i hua vahi,

        mea nui hoì te tiheìa o Ietu i èià me to Īa huaa kouâ.

³       Ua tihe mai Iuta, e haatee aa

        i te hatu kape Roma me te tau mūtoi tiaki

        i tukuìa mai ia īa e te tau tāuà nui me te tau fariteo.

 

        Ua kave âtou i te tau àma hue, te àma kohe me te hāìna tōua.

⁴       Ua ìte Ietu i te tau hana paotū ta âtou i haapao ma ùka o Īa.

        Ua hee Īa i to âtou aò me te peàu :

            +  « O ai ta ôtou e ùmihi nei ? »

⁵       U hua atu âtou ia Īa :

            F  « O Ietu no Natareti. »

        U peàu Ietu ia âtou :

            +  « O au. »

        O Iuta tītahi me âtou.

⁶       Ia peàu Ietu i tēnei ponatekao, O au,

        ua hua âtou i muì me te topa io he tuaèpo.

⁷       Ua ūi hakaùa Ietu ia âtou :

            +  « O ai ta ôtou e ùmihi nei ? »

        U peàu âtou ia Īa :

            F  « O Ietu no Natareti. »

⁸       U hua atu Ietu ia âtou :

            + « U peàu au ia ôtou i kapo nei : O au.

                No to ôtou ùmihi mai ia ù,

                a avai ia âtou a hee atu. »

⁹       Atii e haatiàtohuìa te tekao a Ietu, pēènei à :

        « Aòè i kaò e tahi o te huaa ta òe i tuku mai. »

¹⁰      O Timone Petero, ua too i te kohetā ta īa i kave mai.

        Ua tā īa i te tueni o te tāuà nui

        me to īa haamotu i te puaìka ìma oko o te tueni.

        O Marakuto te ikoa o hua tueni.

¹¹      U peàu Ietu ia Petero :

            + « A tuku iho i to òe kohetā io he kato.

                Aha, aòè au e inu i te ipu mamae

                i tukuìa mai e tu ù Motua ? »

 

NO IETU I HAAVĀÌA E ANA ME KAIFA

 

¹²      Te hatu kape Roma, to âtou vivini,

        te tau mūtoi i pahiìa e te tau ati Iuta,

        u popoki âtou ia Ietu me te humu ia Īa.

¹³      Òmua ìka, u aahi âtou ia Ietu io Ana.

        He motuòai īa no Kaifa. I hua ava, he tāuà nui Kaifa.

¹⁴      Na hua Kaifa i peàu i te tau ati Iuta :

        « E meitaì atu no ôtou e mate nui te ènana e tahi anaè

        i uē i te mataèinaa. »

¹⁵      Atià, u ūtaì Petero me tītahi kouâ kē ia Ietu.

        Ua ìteìa hua kouâ e te tāuà nui.

        Ua uu īa me Ietu io he pāpua o te tāuà nui.

¹⁶      Ua noho Petero i vaho o te avaputa.

        Ia uu i vaho hua kouâ te i ìteìa e te tāuà nui,

        u tekao īa me te vehine tiaki avaputa.

        U haauu īa ia Petero i òto o te pāpua.

¹⁷      U peàu hua vehine tiaki avaputa ia Petero :

            A « Aòè à òe tītahi kouâ o tēnei ènana ? »

        Ua hua atu Petero ia īa :

            D « Aòè au e kouâ no Īa. »

¹⁸      Mēìa i te anu, u haauà i te ahi te tau tueni me te tau mūtoi tiaki. Ua noho âtou pii he ahi no te haamāhanahana.

       

        O Petero tītahi me âtou.

¹⁹      Ua ūi atu te tāuà nui ia Ietu no to Īa tau kouâ

        atii me to Īa hakakoìa.

²⁰      U haahua atu Ietu ia īa pēènei :

            + « U tekao ananu au etià e vivini ia ù te tau ènana paotū.

                U hakako ananu au io he tinakoka me te Hiero,

                i èià te putuputu o te tau ati Iuta paotū.

                U te e peàu au e tahi tekao hakanā.

²¹              A ape òe i te tau ènana te i hakaòko mai

                e aha ta ù i peàu ia âtou.

                O âtou hoì te i ìte i tu ù hakakoìa. »

²²      Ia òko i hua ponatekao tītahi mūtoi tiaki e tū aa nei,

        u papaki ia Ietu me te peàu :

            A « Atii ta òe tekao i te tāuà nui ? « 

²³      U hua atu Ietu ia īa :

            + « Me teka tu ù tekao, a hakaìte mai.

'               Ia meitaì tu ù tekao,

                e aha te piò o to òe papaki ia ù ? »

²⁴      I muì iho, ua pahi atu Ana ia Ietu humuìa io Kaifa.

 

²⁵      Atià i èià, pii he ahi, ua noho Timone Petero,

        e haamāhanahana aa ia īa. U peàu mou ènana ia īa :

        A « Aòè à òe tītahi o to īa tau kouâ ? »

                U haakoè Petero me te peàu :

        D « Aòè au he kouâ no Īa. »

²⁶      U pohā te èo o tītahi tueni o te tāuà nui,

        e huaa īa no te ènana i haamotuìa te puaìka

        e Petero me to īa kohetā. U peàu hua tueni ia Petero :

            A « Aha aòè ua ìte au ia òe

                io he pāpua me te ènana nei ? »

²⁷      U haakoè hakaùa Petero. Ua taki anamai te moa.

 

 

NO IETU HAAVĀÌA E PINATO

 

²⁸      U aahiìa Ietu me io Kaifa io te haè o te hakaìki Roma.

        He pōpōuì tika. Atià, aòè i uu te tau ati Iuta

        i òto o te haè o te hakaìki Roma, oa havaìa âtou i te piò.

        E hano hoì âtou i te mau Pakate kai.

²⁹      Ua uu Pinato i vaho no te tutuki me âtou. U peàu īa :

            A « E aha te piò te hakatio pu ôtou i tēnei ènana ? »

³⁰      Ua peàu âtou ia Pinato :

            F  « Me he mea aòè īa he ènana mākaka,

                u te e haaìò mātou ia òe i hua ènana. »

³¹      U peàu Pinato ia âtou :

            A « A too ôtou ia Īa me te haavā vāàna i to ôtou ture. »

        U haahua atu te tau ati Iuta :

            F  « Aòè e koàka ia mātou te haamate i te ènana. »

³²      Oia hoì te mea e haatiàtohu ai i ta Ietu i peàu

        no te haavivini i te hakatu o to Īa mateìa.

³³      Ua uu hakaùa Pinato io to īa haè

        me to īa vavaò ia Ietu. U peàu ia Īa :

            A « Aha, o òe te Hakaìki nui o te tau ati Iuta ? »

³⁴      U hua atu Ietu :

            + « Na òe ta òe tenā tekao ?

                Akoè à na tahipito i peàu mai i ùka o au ? »

³⁵      U peàu Pinato :

            A « Aha, he ènana ati Iuta au nei ?

                Na to òe mataèinaa me te tau tāuà

                i haaìò mai ia òe io ù. E aha ta òe i hana atu ? »

³⁶      Ua hua atu Ietu :

            +  « Aòè me i te ao nei to ù hakaìkiìa.

                Anoa me i te ao nei to ù hakaìkiìa,

                e tōtōua hoì to ù huaa tautua,

                oa haaìòìa au i te poì ati Iuta.

                Atià, aòè e hakatu to ù hakaìkiìa me to te ao nei. »

³⁷      U peàu Pinato :

            A « No èià, he hakaìki òe ? »

        Ua hua atu Ietu :

            +  « Na òe i peàu. He hakaìki au.

                Oia te tumu o to ù hānauìa me te tiheìa

                i te aomāàma nei : no te hakaìte i te mea tiàtohu.

                O te ènana ua kē me te tiàtohu, u hakaòko i ta ù tekao. »

³⁸      U peàu Pinato ia Īa :

            A « E aha te tiàtohu ? »

        Ia haahitipona Pinato i hua tekao, ua uu hakaùa i vaho.

 

NO IETU E HAKATIOÌA E PINATO

 

³⁹      Ua taha Pinato io te poì ati Iuta me te peàu :

            A « Aòè i koàka ia ù te piò no te hakatio i hua ènana.

                Atià, no te Koìka Pakate, vāàna i to ôtou haa ati Iuta,

                e vevete au i tītahi me io he haèhumu.

                Aha, u makimaki ôtou e vevete au

                i te hakaìki nui o te tau ati Iuta ? »

⁴⁰      U taaàu oko ki âtou :

            F  « Umoì tēia. A vevete ia Parapā. »

        O Parapā hoì he ènana mākaka.

 

^19,1    I muì iho, u peàu Pinato a tooìa Ietu no te tā ia Īa.

²       U àaka te tau kape i te paè me te èitā taataa.

        Ua tuku âtou i hua paè i ùka o te upoko o Ietu.

        Ua tomi âtou ia Īa me te kahu uhi pu veàkiki.

³       U haatata mai âtou me Ietu e peàu aa :

            F  « Kāòha, e te hakaìki o te tau ati Iuta. »

        U papaki âtou ia Īa.

 

⁴       Ua uu hakaùa i vaho Pinato me te peàu :

            A « Eīa. U aahi au ia Īa i vaho nei io ôtou,

                etià e ìte ôtou aòè i koàka ia ù

                te piò no te hakatio i hua ènana. »

⁵       Ua uu Ietu i vaho me te paè taataa,

        me te kahu uhi pu veàkiki.

        U peàu Pinato ia âtou :

            A « Oia nei te ènana. »

⁶       O te tau tāuà nui me te tau mūtoi tiaki,

        e tiòhi aa ia Ietu, u taaàu oko ki âtou :

            F  « A pāoka. A pāokapeka atu ! »

        U hua atu Pinato ia âtou :

            A « A too ôtou ia Īa. A pāokapeka atu.

                Aòè i koàka ia ù te piò no te hakatio ia Īa. »

⁷       U haahua atu te tau ati Iuta :

            F  « He Ture no mātou. Vāàna i hua Ture, a mate nui Īa

                mēìa u peàu e Tama Īa a te Etua. »

⁸       Ia òko Pinato i hua tekao, ua nui aè to īa haametaù.

⁹       Ua uu hakaùa Pinato io to īa haè. Ua ūi atu ia Ietu :

            A « Me i hea mai òe ? »

        Ua mutu Ietu.

¹⁰      A tahi a peàu Pinato :

            A « Umaha u te e makimaki òe e tekao mai ?

                Aòè òe i ìte e mana to ù no te vevete ia òe,

                akoè à e mana to ù no te pāokapeka ia òe ? »

¹¹      U haahua Ietu :

            +  « He mana ta òe i ùka o au

                 mēìa i tukuìa ia òe e te Etua.

                No èià, nui atu te mikeo o te ènana

                te i haaìò ia ù i to òe îìma. »

¹²      Oia te tumu ua hano Pinato e vevete ia Ietu.

        Atià, u taaàu te tau ati Iuta me te peàu :

            F  « Me vevete òe i tēnei ènana, aòè e hoa òe no Ketare.

                O te ènana i hano ia īa haahakaìki nui,

                ua hano hua ènana e tōua me Ketare. »

¹³      Ia òko Pinato i hua tekao, u peàu no te aahi ia Ietu i vaho.

        U noho īa ma ùka o to īa nohoka haavā tekao,

        io he vahi i vavaòìa Tohua keâ,

        o Kapata ma he èo hepereo.

¹⁴      He â i peàuìa no te haapei i te Koìka Pakate,

        o hua â nei, i te oatea nui.

        U peàu Pinato i te poì ati Iuta :

            A « O īa nei to ôtou hakaìki nui. »

¹⁵      U taaàu âtou :

            F  « A mate. A mate. A pāokapeka atu ! »

        U peàu Pinato :

            A « E pāokapeka au i to ôtou hakaìki ? »

        U haahua atu te tau tāuà nui :

            F  « O Ketare anaiho to mātou hakaìki. »

¹⁶      A tahi a haaìò Pinato ia Ietu, etià e pāokapekaìa e âtou.

 

NO TO IETU PĀOKAPEKAÌA

 

¹⁷      Ua too âtou ia Ietu me te aahi atu.

        E amo aa Ietu tootahi i to Īa peka,

        ua taha Īa io te vahi apaìa Karavario,

        o Korokota ma he èo Hepereo.

¹⁸      I èià, u pāokapeka âtou ia Ietu.

        U pāokapeka âtou i nā ènana kē tokoùa :

        i tēia kēkē tītahi, i tēia kēkē tītahi.

        O Ietu i vāveka.

¹⁹      U kānea Pinato e tahi mēmau patuìa.

        U tauèvaìa hua mēmau io he peka.

        Oia nei te mea i patuìa :

        « O Ietu no Natareti, te Hakaìki nui o te tau ati Iuta. »

²⁰      He mea nui te tau ati Iuta te i tatau i hua tekao hakaìte,

        na te mea ua tata me te pāpuahaè

        te taha i èià u pāokapekaìa Ietu.

        U patuìa ma he èo hepereo, te èo hereni, te èo ratino.

²¹      U peàu te tau tāuà nui ia Pinato.

            F  « Umoì e patu : e hakaìki nui o te tau ati Iuta.

                A patu pēènei : u peàu hua ènana :

                O au te hakaìki o te tau ati Iuta. »

²²      U haahua Pinato :

            A « O te mea ta ù i patu, ua pao i te patu. »

²³      Ia pāokapekaìa Ietu e te tau kape,

        ua too âtou i to Īa tau kahu me te hopehope e hā pāio,

        pāio kē to te hoa, pāio kē to te hoa.

        Ua too âtou me to Īa kahu òa.

        Atià, aòè i tuiìa hua kahu.

        E tahi tapa anaiho me i ùka tihe atu i àò nui.

²⁴      U peàu âtou :

            A « Umoì e veti, a tuha tātou ma te haakai. »

        Ua pao hua mea etià e toitoi te tekao

        i patuìa io he Hāmani tapu :

        « Ua tuha âtou i to ù kahu, u haakai i to ù kahu òa. »

        Oiana ta te tau kape i haapao.

 

NO TO IETU MATEÌA

 

²⁵      U maô pii te peka o Ietu to Īa kui me te teina o to Īa kui,

        te vehine a Kereopa, o Maria te ikoa, o Maria Matarena.

²⁶      E tiòhi aa Ietu i to Īa kui

        me to Īa kouâ tāhia ma to īa kaokao,

        u peàu i to Īa kui :

            +  « E te vehine, o īa nei ta òe tama. »

²⁷      I muì iho, u peàu i to Īa kouâ :

            +  « O īa nei to òe kui. »

        Me i tēia ava anaiho, ua too te kouâ ia Maria io to īa haè.

²⁸        Ua ìte Ietu ua pao te mea ta Īa i haapao,

        no te haatoitoi i tītahi ponatekao patuìa io he Hāmani tapu,

        u peàu :

            +  « Ua paka au i te vai. »

²⁹      Enā i èià e tahi ipu pī i te vīneka.

        U haakutaùìa me te vīneka tītahi mēmau omotai.

        U haamauìa hua mea omotai ma ùka o te makamaka âkau.

        U haatataìa me to Ietu haha.

³⁰      Ia ako Ietu i te vīneka, u peàu :

            +  « Ua pao ònaòna. »

        A tahi, e oha aa Ietu i te upoko, ua tuku atu i te kuhane.

 

(A noho muò, a kaituto)

 

NO TE VEÒ I TE KAOKAO O IETU

 

³¹      Oia te â no te Haapei i te Koìka Pakate.

        He â tapu oko no te tau ati Iuta tēia koìka,

        tōtahi atu mēìa e haììa ma te Tāpati.

        No èià, ua ape âtou ia Pinato

        a hahati i nā vaevae o te tau ènana i pāokapekaìa

        me te taki iho i to âtou nino

        oa èva âtou i hua â io he peka.

³²      Ua tihe mai mou kape te i hahati i te tau pūhāvaevae

        o nā ènana i pāokapekaìa me Ietu.

³³      Ua tihe âtou io Ietu, ua ìte u mate nui,

        aòè âtou i hahati i to Īa vaevae.

³⁴      Atià, tītahi kape, me te taa, ua veò i to Īa kaokao.

        Ua tahe anamai te toto me te vai.

³⁵      Na te ènana i ìtemata te i haatiàtohu i hua mea ;

        he tekao tiàtohu ta īa.

        Ua ìte te Hatu : u peàu īa i te mea tiàtohu,

        etià e haatià me ôtou.

³⁶      U haapaoìa hoì hua mea etià e toitoi

        te tekao o te Hāmani tapu te i peàu :

        « Umoì e hahatiìa e tahi o to Īa tau ivi. »

³⁷      U patuìa io he vahi kē :

        « E tiòhi ai âtou i tēia ta âtou i tīputaèe. »

 

NO TE TOMIÌA O IETU

 

³⁸      I muì iho, ua ape Ioteve no Arimatea ia Pinato,

        no te too mai i te nino tūpāpaù o Ietu.

        He kouâ Ioteve no Ietu, atià ma te haapupuni

        na te haametaù i te tau ati Iuta.

        Ua ao Pinato. Ua tihe Ioteve

        me to īa taki atu i te nino o Ietu.

³⁹      Ua tihe me Nikotemo.

        O īa te i tutuki me Ietu, òmua i te pō.

        Ua kave mai īa i te mea kakaa, me he e ìma ònohuu kiro,

        he mira me te aroe ua pao i te kāvohi.

⁴⁰      Ua too âtou i te nino o Ietu,

        ua vāhī me te tapa me te mēmau kakaa.

        Ua hana anaiho âtou vāàna i te haa ati Iuta

        no te tomiìa i te nino tūpāpaù.

⁴¹      Enā i èià, tata èka me te taha o to Īa pāokapekaìa,

        e tahi pāpua me te ana tūpāpaù hou.

        Òmua, aòè i tomiìa tītahi nino tūpāpaù i òto o hua ana.

⁴²      Mēìa i te â Haapei i te Koìka Pakate,

        ohia mea tata èka hua ana tūpāpaù,

        i èià ua tomi âtou ia Ietu.