TOMINIKA E ÌMA O TE AVA MA TE ÈHUA
TATAUÌA O TE PEROHETA ITAIA 6, 1-2a.3-8
1 I te èhua ua mate nui te hakaìki Ohiata,
ua ìte au i te Hatu Etua e tū aa
i ùka o te nohoka tiketike nui.
Ua pī te Hiero i te taì o to Īa kahu uhi pu.
2 Ua ona mou anera Terafi i ùka o Īa.
3 U taaàu atu tītahi, u taaàu mai tītahi :
« Peàto, Peàto, Peàto te Hatu, te Etua o te aomāàma.
Ua pī nui te àki me te henua i to Īa kāìè. »
4 Ia taki te èo o te anera Terafi,
u keue na katina e ùa o te avaputa,
u haapī te auahi i te Hiero.
5 U peàu au : « Auē. Auē. E mate nui au.
He ènana kiinutu hava i te mīkeo au nei,
e noho ana i vāveka o te mataèinaa,
kiinutu hava i te mīkeo.
Ua ìtemata au i te Hakaìki nui, te Hatu o te aomāàma nei. »
6 Ua ona tītahi anera Terafi io ù me te kaahu ahi
ta īa i too me i ùka o te hātaa.
7 U haatukia i to ù haha me te peàu :
« U haatukia tēnei ahi i to òe kiinutu.
Ua koè to òe mīkeo. U hooiìa to òe tau tekateka. »
8 Ua òko au i te èo o te Hatu e peàu aa :
« O ai ta ù e pahi atu ? O ai to tātou keèe ? »
U haahua au : « Eīa au nei. A pōpahi ia ù. »
TARAMO 138 (137) 1-2a, 2b-3,4-5,7c-8
He Peàto te Hatu, to tātou Etua cf. It .6,3
1 E te Hatu e, u haahuaèkaèka au me io he koekoe.
U hakaòko hoì Òe i tu ù pure vevaò.
E hīmene nei au ia Òe i mua o te tau anera,
2 E oha nei au e tiòhi ana i to Òe Hiero tapu.
E hahi nei au mēìa i to Òe kāòha me te tiàtohu.
U tiketike atu i te tau mēmau paotū to Òe ikoa.
3 I te â u haahua mai Òe i ta ù pure vevaò,
U ūo to Òe mana i te ìi o tu ù kuhane.
4 U haahuaèkaèka ia Òe te tau hakaìki o te henua vii pu.
Ia òko âtou i te tekao hakaìte atu i to Òe hana,
5 U hīmene âtou i to Òe tau hana mahaò,
E hahi aa i te kāìè o te Hatu.
7 U tuàki au ma te mana o te Hatu.
8 I uē ia ù, ua hana me he mea ta Īa i peàu mai.
E te Hatu e, paona koè to Òe kāòha.
Umoì e hakaēa i to Òe matavaièi mai.
TATAUÌA TO MUA HĀMANI I TO KORINETIA 15, 1-11 ;
akoè à ,1-8.11
1 E tu ù tau tuàne tuehine.
E too ta ù e haamaakau ia ôtou
i te ÈVANERIO hakakoìa e au nei ia ôtou,
ta ôtou i apuu mai me te haatià mau.
2 E haapohuèìa ôtou e hua ÈVANERIO
ia apuu meitaì ôtou ia īa
me he mea u hakako au ia ôtou, umoì te haahuìkē.
No te koè, e aha te mea i koàka mai ia ôtou
ma te aotahi atu i te haatià ?
3 Òmua ana òa, u hakako au ia ôtou i te tekao
i tukuìa mai ia ù anaiho pēènei :
Ua mate te Kirito no to tātou tau mīkeo,
vāàna i te mea i patuìa io he Hāmani tapu.
4 Ua tomiìa, ua tū hakaùa te Kirito ma te toù o te pō,
vāàna i te mea i patuìa io he Hāmani tapu.
5 U hakaìte te Kirito ia Īa iho ia Petero,
ma hope mai i te Tīònohuu ma tokoùa.
6 I muì iho, u hakaìte ia Īa iho i te tau tuàne tuehine,
tōtahi atu e ìma hānere to âtou nuiìa.
E tahi hakaìteìa anaè ia âtou nui.
E pohuè nei te nuiìa o âtou. Ua mate tahipito.
7 Ma hope mai, u hakaìte te Kirito ia Īa iho ia Iakopo,
ma hope mai i te tau Âpotoro paotū.
8 I te hope òa, u hakaìte te Kirito ia Īa iho,
me he mea i te tama hānau koeà.
9 O au hoì te iti atu i vāveka o te tau Âpotoro.
Aòè e hei e vevaòìa au he Âpotoro,
na te mea òmua, u haamākaka au i te Èkaretia o te Etua.
10 U haaìò mai te karatia o te Etua
me he mea ua ìte ôtou ia ù i tēnei mou â.
Aòè he mea tupepaka te karatia vaièiìa mai e te Etua.
Ua nui atu to ù hana i to tahipito tau Âpotoro.
Atià, aòè to ù hana anaè :
me au nei, ua hana te karatia o te Etua.
11 No te haapoto i te tekao, u peàu pēènei :
o au nei, akoè à o âtou te tau Âpotoro,
enā to tātou tekao i hakakoìa,
oia nei te tekao ta ôtou e haatià.
ALLELUIA ALLELUIA
cf. Mt.4, 19
U peàu te Hatu pēènei : A ūtaì mai ôùa ia ù,
e haaìò au ia ôùa he àvaika ènana.
ÈVANERIO O IETU KIRITO VĀÀNA E RUKA 5, 1-11
I tēia mou pō,
1 u haatita te haètoa vii pu o Ietu.
Ua hano âtou e hakaòko i ta Īa tekao.
Ua tū Ietu i te hiku o te tai Kenetareta.
2 Ua ìte Ietu e ùa poti kātauìa pii he one.
Ua iho mai te tau ènana àvaika
me to âtou hooi i to âtou ùpeà.
3 Ua piki Ietu i òto o tītahi, o to Timone poti.
Ua ape Ietu ia Timone no te hoe me te hee atu
mea iti me io te one.
I muì iho, u kaapee
me to Īa hakako me io te poti i te haètoa nui.
4 Ia pao te tekao, u peàu Ietu ia Timone :
« A hoe ! A hee i vaho òa me te haatopa i te ùpeà
no te haamau i te ika. »
5 U haahua Timone me te peàu : « E Tuhuka e,
u paopao mātou i te haatopaìa i te ùpeà māàma te pō.
Aòè te ika i mau.
Atià, u peàu òe, e haatopa au i te ùpeà. »
6 Ua hana âtou atii. Nui oko te ika i mau.
I motumotu ai to âtou nā ùpeà.
7 U pekahi âtou i to âtou tau hoa te i òto o te poti kē
no te tihe mai me te toko ia âtou. Ua tihe âtou.
U haapī nuiìa e ùa poti, mei kaò âua.
8 Ia ìte Timone Petero i hua mea,
ua hika pii o nā vaevae o Ietu e peàu aa :
« E te Hatu e, a haamemao Òe me io ù. He ènana mīkeo au. »
9 Ua hemo hoì Timone i te haametaù, o īa me to īa tau hoa,
mēìa i te nuiìa o te ika i mau.
10 Atii me Iakopo me Ioane, nā tama a Ihepetea,
e hoa âua no Timone. U peàu Ietu ia Timone :
« Umoì òe e haametaù. I tēnei, e ìò òe he àvaika ènana. »
11 Ua ùai âtou i to âtou poti io he one.
E titii aa i te tau mēmau paotū, ua ūtaì âtou ia Ietu.
Comments est propulsé par CComment