TOMINIKA E ONO O TE AVA MA TE ÈHUA
TATAUÌA O TE PEROHETA IEREMIA 17, 5-8
5 Oia nei te Tekao a te Hatu.
« A ìno nui te ènana e haatià i te tau ènana anaè !
U haamee hoì hua ènana i te Etua,
ua vae īa i te hoa e mate vave no te toko ia īa.
6 Ua tūtū īa me te èitā taataa e tupu i te henua ataha.
Aòè īa e ìte i te koakoa.
Io te vahi viviiō to īa nohoka, te henua ataha,
te henua i èià ua koè te vai me te mea kai.
7 Mamau te ènana haatià i te Hatu Etua !
Mamau te ènana e tetaì nei i to te Etua hakāòha.
8 Ua tūtū hua ènana me te tumuâkau
nanuìa pii te vaitahe,
e hohoà aa i to īa tau aka io te vai.
Aòè i puòi to īa àu i te veàveà o te òumati ;
u òutītee ananu to īa àu.
Ia moô te henua, u te e mate īa, aòè e kaò to īa puku.
TARAMO 1, 1a.c-2,3,4.6a
Io te Etua to tātou tetaì, io te Etua to tātou koakoa. cf. 40,5
1 Mamau te ènana e haapii koè me te poì tekateka,
E taha koè ma io to âtou vaanui hukaka,
2 Mamau te ènana haataetae i te Tekao a te Etua,
E kaituto aa i hua māàma me i te pō me i te â.
3 E ìò hua ènana me he tumuâkau,
Nanuìa i te kaavai io he èpo mōmona.
I te ava e hei, e hua to īa tau puku.
E puòi koe to īa àu, u òutītee ananu.
E pao meitaì to īa tau hana paotū.
4 He mea kē to te poì tekateka, mea kē ananu.
Ua ìò te poì tekateka me he kaù moô.
6 Ua ìte hoì te Hatu i te vaanui o te ènana toitoi.
E kaò ai te vaanui hukaka o te poì tekateka.
TATAUÌA O TO MUA HĀMANI I TO KORINETIA 15, 12-20
E tu ù tau tuàne tuehine.
12 U hakako tātou i te mea ua tū hakaùa te Kirito
me i vāveka o te huaa mamate.
No èià, pēhea e koàka i tahipito me io ôtou te peàu :
aòè e pohuè hakaùa te huaa mamate ?
13 Anoa he tekao tiàtohu to âtou,
aòè hoì i tū hakaùa te Kirito.
14 Anoa u te e tū hakaùa te Kirito
me i vāveka o te huaa mamate,
he mea avai noa to tātou hakakoìa.
He mea tupepaka to ôtou haatià.
15 Tōtahi atu, ua ìò tātou he poì pōtoho pu i te Etua.
U peàu hoì tātou, u haatū hakaùa te Etua i te Kirito
me i vāveka o te huaa mamate.
Vāàna e âtou : aòè e pohuè hakaùa te huaa mamate.
No èià, aòè i tū hakaùa te Kirito.
16 Me he mea u te e pohuè hakaùa te huaa mamate,
aòè hoì i tū hakaùa te Kirito.
17 No te e tū hakaùa te Kirito, he tupepaka to ôtou haatià ;
tihe i tēnei, u hava ôtou e te mīkeo.
18 Tītahi :
ua kaò te poì te i mamate ma òto o te haatià i te Kirito.
19 Me tetaì tātou i te Kirito
no te haameitaì atu i to tātou pohuè to te ao nei,
ua ìò tātou he poì ìno nui i vāveka o te tau ènana paotū.
20 He mea kē : tiàtohu nui, ua tū hakaùa te Kirito
me i vāveka o te huaa mamate. O Īa te ènana to mua
te i pohuè hakaùa me i vāveka o te tau mamate paotū.
ALLELUIA ALLELUIA
Rk .6, 23
A koakoa, a tātakahiti ôtou i te koakoa
na te mea he nui atu to ôtou tuki io he àki.
ÈVANERIO O IETU KIRITO VĀÀNA E RUKA 6, 17.20-26
17 I tēia mou pō, e iho aa Ietu
me te tau Âpotoro, u hakaēa io te vahi pāàhaàha.
I èià te nuiìa o te kouâ me te haètoa nui oko
me i te Henua Iutea mai, me i Ierutaremi,
me i te henua o te hiku o te tai Tiro me Titone.
20 E tiòhi aa Ietu i to Ia tau kouâ, u peàu pēènei :
« Mamau ôtou, e te poì veve,
na te mea ia ôtou te Patirēia o te Etua.
21 Mamau ôtou, e te poì mate i te oke i tēnei,
na te mea e haamaònaìa ôtou.
Mamau ôtou, e te poì mateteka ana i tēnei,
na te mea e kakata ôtou.
22 Mamau ôtou i te ava e haahaa te tau ènana ia ôtou,
te tiehi, te paha me te haamee i to ôtou ikoa,
mēìa i te Tama a te Ènana.
23 I tēia mou pō, a koakoa, a tātakahiti i te koakoa,
he mea nui atu to ôtou tuki io he àki.
Atii hoì ua hana to âtou tau tupuna i ùka o te tau peroheta.
24 Mea ìno ôtou, e te poì me te taetae nui.
na te mea ua tukuìa mai to ôtou koakoa.
25 Mea ìno ôtou, e te poì maòna i tēnei,
na te mea e mate ai ôtou i te oke.
Mea ìno ôtou, e te poì kakata i tēnei,
na te mea e tihe te ava o te uēuē, te mateteka.
26 Mea ìno ôtou ia hahi te tau ènana paotū ia ôtou,
atii hoì to âtou hana i ùka o te tau peroheta tīvava. »
Commentaires (0)
Comments est propulsé par CComment