TOMINIKA MAKAMAKA ÈITĀ
1 - TE TAHAÌA PURE ME TE MAKAMAKA ÈITĀ
ÈVANERIO O IETU KIRITO VĀÀNA E RUKA 19, 28-40
I tēia mou pō,
28 ua taha Ietu me to Īa tau kouâ,
e hiti aa i Ierutaremi, i mua Ietu.
29 Ohia ua tihe âtou tata èka me Petefahe me Petania,
i pii te tuaivi Oriveti, u pōpahi Ietu i nā kouâ tokoùa,
30 e peàu aa ia âua :
« A hee atu ôùa io te pāpuahaè i mua nei.
Ia tomo ôùa i òto, e koàka mai ia ôùa
te punua pūriki humuìa,
aòè i pikiìa e te ènana e tahi ma ùka o īa.
A vevete ia īa me te aahi mai.
31 Me he mea e ūi mai tītahi :
No te aha e vevete ôùa ia īa ?
a peàu ôùa : E hana ta te Hatu me īa. »
32 Ua hee atu nā keèe me te koàka mai ia âua
te mea vāàna ta Ietu i peàu.
33 Ohia u vevete âua i te punua pūriki, u peàu to īa hatu :
« No te aha u vevete ôùa i te pūriki ? »
34 U peàu âua : « E hana ta te Hatu me īa. »
35 U aahi âua i te pūriki io Ietu.
Ua tuku ma ùka o hua pūriki i to âtou kahu ;
ma hope, u haapiki ia Ietu ma ùka iho.
36 Ohia u taha atu Ietu,
u auau te mataèinaa i to âtou kahu io he vaanui.
37 Ia tau tata èka Ietu me te vaanui
no te iho me i ùka o te tuaivi Oriveti,
u taaàu me te èo oko te haètoa nui o te tau kouâ,
e hahi aa i te Etua mēìa i te nuiìa
o te hana mana ta âtou i ìtemata.
U peàu âtou pēènei :
38 « A meitaììa te tihe nei ma te ikoa o te Hatu.
Oia nei te Hakaìki nui.
Te moû io he àki. Te kāìè i ùka nui. »
39 Enā te mou Fariteo, me i vāveka o te haètoa,
te i peàu ia Ietu : « E tuhuka e, a oonaki i to òe kouâ ! »
40 U haahua Ietu : « U peàu hoì au ia ôtou :
Me he mea ua mutu âtou, e taaàu te tau keâ. »
2 - TE PURE META
TATAUÌA O TE HĀMANI A TE PEROHETA ITAIA 50, 4-7
4 Ua tuku mai te Etua, to ù Hatu,
i te èo o te ènana aotahi, te èo o te kouâ.
Ma èià, e koàka ia ù te toko i te ènana kuhane koè.
5 I tēia pōpōuì, i tēia pōpōuì, u hakavaa mai ia ù
te Tekao a te Etua
etià e òko au me he ènana aotahi, me he kouâ.
6 Na te Etua i pepeù mai i to ù puaìka.
Aòè au e patitoo, aòè au e pūtuì.
Ua tuku au i to ù tua i te tau ènana e tā ia ù.
Ua tuku au i tu ù papaìka i te tau ènana
e huhuti i te huu o to ù kumikumi.
Aòè au i pāpua i to ù mata me io te ènana
e haamāio mai,
me te tuhā mai i te vaianu io ù.
7 O te Hatu tu ù pātoko. Aòè au e hika.
No èià, u haaheò au i to ù koekoe,
me he keâ to ù mata.
Aòè au e hakaìka.
TARAMO 21 (22), 8-9, 17-18a, 19-20, 22c-24a
He ènana toomanu au nei, e te Hatu e, a haapohuè mai.
It 38, 16-17
Akoè à :
Tu ù Etua e, tu ù Etua e, umaha to òe titii mai ia ù. 21, 2
8 He ènana toomanu ia tiòhi mai âtou.
U haameemee te poì paotū e ûû i te upoko :
9 U haatià īa i te Hatu, na Īa te haapohuè mai.
O te Hatu to īa hoa, a haapohuè hoì ia īa.
17 Nui te peto i muimui vii pu o au nei.
Ua hano tītahi pūpū ènana pē e tuàki ia ù.
18 U tīputaèe âtou i tu ù îìma me tu ù vaevae,
U koàka ia ù te tatau i tu ù tau ivi hakatahi.
19 U hopehope âtou i to ù kahu no âtou.
U haakai âtou i to ù kahu uhi pu.
20 E te Hatu e, umoì Òe e haamamao me io ù.
O Òe to ù ìi, a haakoi no te toko mai.
22 U haaòko nui au i to Òe ikoa
23 I mua o to ù tau tuàne tuehine.
U haahuaèkaèka atu au ia Òe,
i vāveka nui ahau o te motuhaka.
24 A hahi i te Etua, te poì e haatià ia Īa.
TATAUÌA O TE HĀMANI A PAURO PEÀTO I TO FIRIPO
2, 6-11
E tu ù tau tuàne tuehine,
6 O te Kirito Ietu hakatu tiàtohu me te Etua.
Aòè Īa e haamau kaikino i te haatūtaì me te Etua.
7 U haakoè pu ia Īa iho e too aa i te hakatu o te tāvini,
ua ìò Īa hakatu me te tau ènana.
8 E haaènana to Īa, ia tiòhi atu,
u haapāpaku iho ma te aotahi atu,
e aotahi aa tihe i te mateìa,
te mateìa hoì io he peka.
9 Oia te tumu i haatiketike anaè ai te Etua ia Īa,
me te apa atu i te ikoa
ma ùka o te ikoa ia ôtoa, ia ôtoa.
10 Etià, ia taki te ikoa o Ietu, e noho muò paotū
to te àki, to te henua, to havaiki.
11 A haki anamai te tau èo paotū :
« He Hatu o Ietu Kirito,
no te haakāìè i te Etua Motua. »
I uē ia tātou, u haapāpaku iho Ietu Kirito,
ma te aotahi atu i te hīa o to Īa Motua,
tihe i te mateìa, te mateìa hoì o te peka.
Oia te tumu i haatiketike anaè ai te Etua ia Ietu,
me te apa atu i te ikoa ma ùka
o te tau ikoa ia ôtoa.
TE AVA MEMAE O IETU KIRITO VĀÀNA E RUKA
22, 14 – 23, 56
14 Ia tihe i te hora, ua moe noho Ietu io he tapukai,
enā me te tau Àpotoro me Īa.
U peàu Ietu ia âtou :
+ « U kōhoà nui au e kai i tēnei Pakate me ôtou,
ma mua e mamae au.
16 Na te mea, u peàu au ia ôtou,
koè nui au e kai hakaùa i te Pakate
tihe atu e haapaoìa io te Patirēia o te Etua. »
17 I muì iho, ua tukuìa te ipu ia Īa.
U haahuaèkaèka Ietu me te peàu :
+ « A too i te ipu, a tuha ia ôtou.
18 U peàu hoì au ia ôtou : me i tēnei,
koè nui au e inu i te puku o te tumuvino
ma mua e tihe mai te Patirēia o te Etua. »
19 I muì iho, e too aa Ietu i te haraoa,
ua vahi me te tuku atu i to Īa tau kouâ, e peàu aa :
+ « O tu ù nino tēnei, haaìòìa no ôtou.
A hana ôtou atii mea haamamaakau mai ia ù. »
20 Me hua hakatu no te ipu, ma hope o te mau,
e peàu aa :
+ « O tēnei ipu, he Piimau hou, i òto o tu ù toto,
te i tahe aè no ôtou. »
21 Atià, e noho me au nei io te tapukai,
te ènana te i haaìò ia ù ma to īa iho îìma.
22 E hee hoì te Tama a te Ènana,
vāàna i te mea i haaheiìa òmua.
Atià, mea ìno te ènana te i haaìò ia Īa. »
23 Ua ūiūi atu ūiūi mai âtou nātoa, te hoa i te hoa :
o ai òa me i vāveka o âtou te hana i hua hana.
24 U tōtohe atu tōtohe mai âtou no te ìte
o ai me i vāveka o âtou te ènana tiketike atu.
25 U peàu Ietu ia âtou :
+ « Te tau hatu i haatoko i to âtou viviniìa,
o te tau hakaìki i haatee i te tau mataèinaa êteni.
U makimaki âtou e apaìa te ikoa Hatuvaièi.
26 Aua ôtou atii.
A tūtū te tiketike i vāveka o ôtou me te ènana hou atu.
A tūtū te hakaìki me te ènana tāvini.
27 O ai hoì te ènana tiketike atu ?
Te ènana e noho io te tapukai,
akoè à te ènana e tāvini atu ?
Aòè te ènana e noho i te tapukai ?
Atià, o au nei, i vāveka o ôtou,
ua tūtū au me te ènana e tāvini atu. »
28 « O ôtou te huaa te i tohe mau ananu me au nei,
e aha à te nuiìa o te kōhii e haahiiveke mai.
29 Me he mea ua vaièi mai to ù Motua i te Hakaìkiìa,
hua mea anaiho e vaièi atu au ia ôtou i te Hakaìkiìa,
30 etià e kai, e inu ôtou e noho ana io to ù tapukai
i òto o to ù Patirēia.
E noho ôtou i ùka o te tau nohoka haakāìè
no te vivini i to Iraene ònohuu ma ùa ati. »
31 « E Timone, Timone e ! Enā, u vevaò mai Tatane
ia ôtou, e hano hoì e tūtū ia ôtou
me he mea ua tūtūìa te kākāno haraoa.
32 Atià, ua pure au i uē ia òe, oa koè to òe haatià.
O òe à, ia hua mai òe io ù,
a haaoko i te koekoe o to òe tau teina. »
33 U peàu Petero ia Ietu :
D « E te Hatu e, e ūtaì au ia Òe
io he haèhumu akoè à tihe i te mateìa. »
34 U peàu Ietu :
+ « E Petero e, u peàu au ia òe :
i tēnei pō, ma mua e taki te moa,
e haki atu òe no te e ìte ia ù.
U titii òe ia ù, e toù titiiìa. »
35 U peàu Ietu ia âtou :
+ « I te ava ua pahi atu au ia ôtou moni koè,
kete koè, aihū koè,
e aha te mea e toe ia ôtou ? »
U haahua âtou :
D « Aòè e mea. »
36 U peàu Ietu ia âtou :
+ « I tēnei, te ènana me te kete moni, a too mai.
Atii te ènana me te kete avaiìa taetae, a too ia īa.
Ia koè te kohetā i tītahi, a hoko atu hua ènana
i to īa kahu uhi pu me te hoko mai i te kohetā.
37 U peàu hoì au ia ôtou :
enā, e pao ai te mea i patuìa i ùka o au nei.
U haatahi âtou ia īa me te poì mākaka.
Ma te tiàtohu,
u tata èka te paoìa o to ù hana tumu. »
38 U peàu âtou :
D « E te Hatu e, eīa i înei na kohetā e ùa. »
U haahua Ietu :
+ « Etue ! »
39 Ua uu Ietu i vaho me to Īa hiti atu
io he tuaivi Oriveti me he mea ua hani Īa.
Ua ūtaì te huaa kouâ ia Īa.
40 Ia tihe Ietu io hua taha, u peàu ia âtou :
+ « A pure, oa hemo ôtou i te mōtii. »
41 Ua hee Īa mamao me io âtou,
me he e tahi pehiìa keâ.
Ua noho muò me to Īa pure, e peàu aa :
42 + « E te Motua e, me he mea e makimaki Òe,
a haamamao me io ù i hua ipu.
Atià, umoì to ù makimaki, a tae to Òe. »
43 Ua ìteìa te anera me io he àki mai, te i haaoko ia Īa.
44 Ua hemo Ietu i te haametaù òomi i te menava
me to Īa haanui atu i te pure.
Ua tahe to Īa hānia,
me he patapata toto e topa aa ma ùka o te tuaèpo.
45 E hakaēa aa i te pure, ua tū Ietu.
U haatata mai me te tau kouâ.
U koàka ia Īa e hihiamoe aa âtou
mēìa i te kuhane koè.
U peàu Ietu ia âtou :
+ « E aha ? U hiamoe ôtou ?
A vaa, a pure, oa hemo ôtou i te mōtii. »
NO TE HUMUÌA O IETU
47 Aòè i pao èka hua tekao, ua tihe te haètoa.
U aahiìa âtou e tītahi
me i vāveka o te Tīònohuu ma ùa, o Iuta te ikoa.
U haatata mai īa me Ietu, e hano e hoki ia Īa.
48 U peàu Ietu ia īa :
+ « E Iuta e, ma te hoki mai,
e haaìò òe i te Tama a te Ènana ? »
49 E ìte aa te huaa vii pu o Ietu
i te mea e tihe mai, u peàu âtou :
+ « E te Hatu e, e tā mātou me te kohetā ? »
50 Ua tā tītahi o âtou i te tueni o te tāuà nui,
me te haamotu i to īa puaìka ìma oko.
51 U pohā te èo o Ietu me te peàu :
+ « Avai pu. Ua àva. »
U haapipii Īa i te puaìka, u haameitaì ia īa.
52 I muì iho, u peàu Ietu i te haètoa te i tihe mai io Īa,
te mou tāuà nui me te tau vivini
o te pūpū mūtoi tiaki o te Hiero me tahipito kōkooūa,
u peàu Ietu pēènei :
+ « He ènana mākaka au ?
No te aha ua hano ôtou ia ù
me te kohetā me te tau pooâkau ?
53 I tēia â, i tēia â,
i vāveka o ôtou au nei io he Hiero.
Aòè ôtou i popoki ia ù.
Atià, oia nei te ava i haaheiìa no ôtou.
Oia nei te ava ua mana te kuhane ìno
te i hana i te pō. »
NO TO PETERO TITIIÌA
54 U popoki âtou ia Ietu.
U aahi atu me te haauu io te haè o te tāuà nui.
Ua ūtaì Petero me i te vahi mamao.
55 U haauà âtou i te ahi io te pāpua
me to âtou noho nātoa vii pu.
U noho me Petero i vāveka ahau o âtou.
56 Ua ìte te vehine tueni ia īa,
e noho aa pii o te ahi uà tāpupu.
U tiòhi mau te vehine i to īa mata me te peàu :
A « O īa nei tītahi me hua ènana. »
57 U haakoè Petero, e peàu aa :
D « E te vehine, aòè au i ìte ia Īa. »
58 Ava poto ma hope, u peàu tītahi ènana kē,
e ìte aa ia Petero :
F « O òe tītahi me i vāveka o âtou. »
U peàu Petero :
D « E hoa e, aòè anaiho au. »
59 E tahi hora ùanei ma hope,
u tōtohe iho te èo kē, e peàu aa :
F « Ma te tiàtohu, ua kē tēnei ènana me Īa.
He ènana Karirea hoì. »
60 U peàu Petero :
D « E hoa e,
aòè au e vivini nei i ta òe i peàu mai. »
E tekao aa Petero pu anamai, ua taki te moa.
61 E hāìu aa te Hatu, u tiòhi mau ia Petero.
A tahi a haamaakau īa i te Tekao a te Hatu
te i peàu ia īa : « I tēnei pō, ma mua e taki te moa,
u titii òe ia ù : e toù titiiìa. »
62 Ua uu Petero i vaho. Ua nui to īa mateteka.
NO TE HAAMEE IA IETU
63 Atià, u haamāio te poì tiaki ia Ietu.
Ua pehipehi âtou ia Īa.
64 E tomi aa âtou i to Īa mata me te tapa,
ua ūiūi atu ia Īa, e peàu aa :
F « A peroheta mai. O ai òa te i pehi ia òe ? »
65 Ma te nuiìa o te pona kē, ua paha âtou ia Ietu.
NO IETU I MUA O TE TUNETERI
66 I te pōpōuì tika, u putuputu mai te motuhaka
o te tau kōkooūa o te mataèinaa,
te papa tāuà nui, te tau tuhuka tekao.
U aahi âtou ia Ietu i mua o to âtou Tuneteri.
67 U peàu âtou :
F « Me he mea o òe te Kirito, a haki mai. »
U haahua atu Ietu :
+ « Me he mea e haki atu au ia ôtou,
aòè ôtou e haatià.
68 Me he mea e ūi atu au ia ôtou,
aòè ôtou e haahua mai.
69 Atià à, me i tēnei, e tānoho te Tama a te Ènana
i te ìma oko o te Etua mana nui. »
70 U peàu âtou nātoa :
F « O òe te Tama a te Etua ? »
U haahua Ietu :
+ « O ôtou anaiho te i peàu : o au nei. »
71 A tahi a peàpeàu âtou :
F « E aha te piò e hano hakaùa
i te ènana no te haatiàtohu ?
Ua òko tātou anaiho me io to Īa haha. »
NO IETU I MUA O PINATO
23,1 Ua tū te motuhaka nui me to âtou aahi
ia Ietu i mua o Pinato.
2 Ua hano âtou e hakatio ia Ietu, e peàu aa :
F « U koàka mai ia mātou hua ènana
e hano haatohuì i te mataèinaa.
U haapākeka Īa i te tuku i te moni ia Ketare.
U vevaò mai ia Īa anaiho he Kirito, he Hakaìki. »
3 Ua ūi Pinato ia Ietu :
A « O òe nei te hakaìki o te tau ati Iuta ? »
U peàu Ietu :
+ « Na òe i peàu. »
4 U peàu Pinato i te tau tāuà nui me te haètoa :
A « Tu ù maakau, aòè tēnei ènana i teka. »
5 U tōtohe âtou, e peàu aa :
F « U haatohuì Īa i te mataèinaa,
ma to Īa hakakoìa io he Henua Iutea vii pu,
ma muì o te Henua Karirea.
I èià u tīmata Īa, i înei te paoìa. »
6 Ia òko Pinato i hua tekao,
ua ūi atu : aha, me i Karirea te ènana nei ?
7 Ia ìte Pinato o Ietu tītahi me i te henua
i viviniìa e te hakaìki Herote,
ua pahi atu ia Īa io Herote.
I hua mou pō, ua noho anaiho Herote i Ierutaremi.
NO IETU I MUA O HEROTE
8 E ìte aa ia Ietu, u koakoa nui Herote.
He mea òa hoì u kōhoà Herote e tutuki me Ietu
mēìa i te tekao ta īa i òko me to īa kaituto
e ìte ai ia Ietu e hana i tītahi hana mana me he hakatu.
9 Ua ūi atu Herote ia Ietu
ma te nuiìa o te tekao kē, tekao kē.
O Ietu à, ua mutu : aòè i pohā to Īa èo.
10 Ua tū te tau tāuà nui me te tau tuhuka tekao i eīa.
U hakatio âtou ia Ietu me he èo oko me te mata ìi.
11 Herote, kātahi me to īa pūpū kapetiaki,
u haamee, u māio ia Ietu.
Ma hope, u haauhi âtou ia Īa me te kahu kaèkaè
ma mua o te haahua io Pinato.
12 I hua â anaiho, u tutuki Herote me Pinato,
hakatu me nā hoa tokoùa.
Òmua hoì, u tōtōua atu tōtōua mai âua.
NO IETU I MUA O PINATO HAKAÙA
13 U vevaò Pinato i te papa tāuà,
te papa hakaìki me te mataèinaa tiàtohu.
14 U peàu Pinato ia âtou :
A « U aahi mai ôtoui mua o au nei i tēnei ènana,
mēìa u haatohuì Īa i te mataèinaa.
O au anaiho tēnei i mua o ôtou, u haatoitoi au i te tekao.
Aòè i koàka mai ia ù te piò ta ôtou e hakatio ia Īa.
15 Atii me Herote : u haahua hoì ia Īa i mua o mātou nei.
No èià, aòè o Īa e piò no te kukumi haamate.
16 E tā au ia Īa, ma hope iho e haapohuè au ia Īa. »
17 I te ava o te Koìka Pakate, vāàna i to âtou ture,
u vevete Pinato i tītahi ènana humuìa.
18 U taaàu âtou nātoa :
F « A haamate i te ènana nei.
A vevete mai ia Parapa. »
19 Ua humuìa hua Parapa, mēìa i te tōua
te i haatohuì i te mataèinaa io te pāpuahaè.
I hua ava, u kukumi Parapa i te ènana.
20 U tekao hakaùa Pinato me âtou.
U makimaki hoì īa e vevete ia Ietu.
21 Atià, u taaàu âtou, e peàu aa :
F « A pāokapeka atu ! A pāokapeka atu ! »
22 U peàu Pinato ia âtou, o te toù i tēnei :
A « E aha òa te hana mākaka o tēnei ènana ?
Aòè i koàka ia ù te piò no te haamate ia Īa.
No èià, e tā au ia Īa
me te vevete ma hope mai. »
23 Âtou à, u toutaki e taaàu aa
me te ape no te pāokapeka ia Ietu.
Ua oko aè, oko aè to âtou taaàu.
24 A tahi a peàu Pinato i te tekao haavā :
a tae to âtou hīa.
25 U vevete īa i te ènana humuìa mēìa i to īa piò :
te tōtōua me te kukumi haamate i te ènana.
Oia te i apeìa e âtou.
O Ietu à, u haaìò Pinato ia Īa
vāàna i to te tau ati Iuta makimaki.
NO TE VAANUI O TE PEKA
26 Ohia u aahi atu âtou ia Ietu,
ua toi pu i te ènana no te Henua Kireneo,
o Timone te ikoa, e hua mai aa me io te vahi èitā.
Ua tuku âtou i te peka i ùka o to īa pauhihi,
no te amo, e ūtaì aa ia Ietu.
27 Ua ūtaì ia Ietu te mataèinaa me te haètoa nui.
Enā me te tau vehine e pehipehi aa i te umauma
me te uēuē ia Īa.
28 E hāìu aa Ietu, u tiòhi ia âtou me te peàu :
+ « E te tau moî no Ierutaremi e,
umoì e uēuē ia ù.
A uēuē ia ôtou anaiho me ta ôtou tau tama.
29 Enā, e tihe ai te tai e peàuìa :
Mamau te tau vehine mahoi.
Mamau te tau vehine tama koè,
mamau te ū i omokoèìa.
30 A tahi a peàuìa i te tau tuaivi :
a òomi mai ia tātou.
E te tau pūkei e, a tomi mai ia tātou.
31 Me he mea o īa nei te tuki o te âkau tee,
me he aha òa to te âkau moô ? »
32 U aahi âtou me nā ènana mākaka tokoùa,
no te haamate ia âua e tahi me Ietu.
NO TE PĀOKAPEKAÌA O IETU
33 Ia tihe âtou io te vahi peàuìa Ipuoo,
te Karavario ma he èo ratino,
u pāokapeka âtou ia Ietu i èià.
U pāokapekaìa me nā ènana mākaka tokoùa :
tītahi i te ìma oko, tītahi i te ìma aèaè.
34 U peàu Ietu :
+ « E te Motua e, a vevete i to âtou piò.
Aòè âtou i ìte e aha ta âtou e hana nei. »
U tuhatuha âtou i to Ietu kahu ma te haakai.
35 Ua tū i èià te mataèinaa e tiòhi aa.
Te tau hakaìki à, u haameemee âtou, e peàu aa :
F « U haapohuè Īa i tahipito.
A haapohuè ia Īa anaiho
me he mea o Īa te Kirito o te Etua, te Vaeìa. »
36 U māio me te tau kape ia Ietu.
U haatata mai âtou me Īa no te hāinu me te vīneka.
37 U peàu âtou :
F « O òe te hakaìki nui o te tau ati Iuta,
a haapohuè ia òe anaiho. »
38 Enā ma ùka o Ietu te mēmau i patuìa pēènei :
« O īa nei te Hakaìki o te tau ati Iuta. »
NO NĀ ÈNATA MĀKAKA TOOÙA
39 Ua paha ia Ietu tītahi o nā ènana mākaka
i pāokapekaìa me Īa, e peàu aa :
A « E aha, o òe te Kirito ?
A haapohuè ia òe anaiho me ia māua nei. »
40 U haahua atu tītahi me te oonaki, e peàu aa :
A « Aòè òe e hopo i te Etua,
e aha à ua àva òe
i te tuki mamae e tahi me to Īa ?
41 No tāua e mea toitoi :
oia nei te tuki o to tāua hana mākaka.
He mea kē to Īa : u piò koè Īa. »
42 U peàu me īa :
A « E Ietu e, a haamaakau mai ia ù,
i te ava e tihe mai òe me he Hakaìki. »
43 U peàu Ietu ia īa :
+ « Ma te tiàtohu to ù peàu ia òe :
i tēnei â, o òe me au i òto o te Pāpua meitaì. »
NO TE MATEÌA O IETU
44 I te oatea nui, ua tū toitoi te òumati,
ua topa te pō pōtako ma ùka o te henua ia ôtoa,
tihe atu i te hora e toù i te ahiahi.
45 Ua kaò te òumati.
Io he Hiero, u tuivā ma vāveka te tapa
i te pā i te vahi tapu.
46 U taaàu Ietu me te èo oko.
U peàu Īa :
+ « E te Motua e, io to Òe îìma
e tuku nei au i to ù kuhane. »
Ia pao hua ponatekao, ua tuku atu Ietu i te ao paoìa.
(A noho MUÒ tātou, e kaituto ana)
MA HOPE O TE MATEÌA O IETU
47 E ìte aa te keneturione i te mea paotū,
ua hahi i te Etua me to īa peàu atu :
A « Tiàtohu nui, he ènana toitoi noa tēnei. »
48 Te haètoa nui te i haaputuputuìa
no te tiòhi i te mea e pao ai,
ia ìtemata âtou i te mea paotū,
ua hua âtou io he haè, e pehipehi aa i te umauma.
49 I te vahi mamao, ua noho te tau ènana i kē me Ietu,
atii me te mou vehine
te i ūtaì ia Ietu me i te Henua Karirea ;
u tiòhi mau âtou i tēia mea paotū.
NO TE TOMIÌA O IETU
50 Enā, ua tihe te ènana, o Ioteve te ikoa,
tītahi me io te pūpū Tuneteri,
he ènana meitaì, toitoi noa.
51 Aòè īa i haakē me to tahipito makimaki,
aòè īa i ao i to âtou hana.
U hānauìa i Arimatea io te pāpuahaè o te Henua Iutea.
U tataì īa e tihe ai te Patirēia o te Etua.
52 U haatutuki īa me Pinato no te ape i te nino o Ietu.
53 U haaiho mai Ioteve i hua nino.
Ua vāhī me te tapa pōùu.
Ua tomi i òto o te ana tūpāpaù
taaiìa io he papakeâ.
Òmua, aòè e tahi nino tūpāpaù i tomiìa i òto.
54 Oia nei te â haapeiìa o te Tāpati
te i tīmata i hua ava : u pupuà te tau àma.
55 Te tau vehine
te i tihe mai me Ietu me i te Henua Karirea,
u tiòhi mau âtou i te ana tūpāpaù
me te kōava i èià i tukuìa te nino.
56 I muì iho, u hua atu âtou io he haè,
u kānea âtou i te mēmau kakaa me te mira.
U aotahi âtou i te ture o te Tāpati
ma te hakaēa i te hana.
Comments est propulsé par CComment