NO TE IUTĪ TAPU
TE PURE META AHIAHI
TATAUÌA O TE HĀMANI A MOITE PEÀUÌA ÈHOTO
12, 1-8.11-14
1 I te Henua Ekipito, u peàu te Hatu Etua ia Moite
atii me ia Aarone, to īa teina :
2 « A ìò te meàma nei e meàma tumu no ôtou.
Oia to mua meàma o to ôtou èhua.
3 A haaìte atu i te motuhaka tiàtohu
o to Iraene i te mea nei :
Ma te pō ònohuu o te meàma nei, a too ôtou
e tahi kaiū mutō ma tēia haè, ma tēia haè.
4 Me he mea ua ìte ôtou aòè e àva te huaahaè
no te haapao i te kai i te mutō,
a haapii te haè me tītahi haè kē.
Umoì te înaì e toe !
5 Te mutō à, a kanahau, kaiū toa, e tahi èhua.
E koàka te too i te kaiū menē hakatu me hua mutō nei.
6 A haaavai tihe i te pō ònohuu ma hā o te meàma.
I hua â, ia topa te pō,
a kukumi i hua mutō te motuhaka nui
o te mataèinaa tiàtohu o Iraene.
7 A tooìa i te mea toto no te paù i nā kātina e ùa
me te paèkutu o te avaputa o te haè i èià te kai.
8 I hua pō, e kaiìa te kiko nunu pātaka,
me te haraoa haapupuhi koè me te tau èitā kavakava.
11 Pēènei to ôtou kai :
A taka i te kooi. A oka te vaevae me te aihū.
Te tootoo io te ìma, a kai haakoi :
O te Pakate o te Hatu, to te Hatu Etua Tahaìa.
12 I hua pō nei,
e taha atu au ma vāveka o te Henua Ekipito ;
e tā au i te tau hāmua hakatahi o te Henua Ekipito,
me i to te ènana anamai tihe atu i to te tau ânimara.
13 E haatopa au i te tuki pē ma ùka o te tau ètua Ekipito :
O au hoì te Hatu.
E ìò te toto mea hakatu ma ùka o te haè
i èià ua noho ôtou.
E ìte au i te toto, me tu ù taha atu.
14 Aòè ôtou e pē i te mea ìno ta ù e kave
i te Henua Ekipito.
A haamāmaakau ôtou i hua â nei.
A ìò he â koìka pererina no te hahi i te Hatu.
A tū mau hua ture no te tau tai hakatahi ! »
TARAMO 115 (116 B), 12-13, 15-16a.c, 17-18
U meitaììa te ipu me te haraoa o te pohuè
te i haatū i te motuhaka nui o te Etua.
12 Pēhea tu ù haahuaèkaèka i te Hatu
No te meitaì hakatahi ta Īa i vaièi mai ?
13 E ùtuna au i te ipu o te pohuè,
E vevaò ana i te ikoa o te Hatu.
15 He taetae io te Hatu te mateìa o to Īa huaa.
16 E te Hatu e, o au to Òe tāvini,
Te ènana humuìa ta Òe i vevete.
17 E ùtuna au i te hēaka haahuaèkaèka,
E vevaò au i te ikoa o te Etua.
18 E hana au vāàna i tu ù tekao voto
I mua o te motuhaka nui o to Īa mataèinaa.
TATAUÌA O TO MUA HĀMANI A PAURO PEÀTO I TO KORINETIA
11, 23-26
E tu ù tau tuàne tuehine,
23 O au à, ua tukuìa mai e te Hatu i te tekao
ta ù i tuku atu ia ôtou, pēènei :
24 I te pō u mākakaìa, ua too te Hatu i te haraoa,
u haahuaèkaèka, ua vahi me te peàu :
« O tu ù nino tēnei i haaìòìa no ôtou.
A hana ôtou atii no te haamaakau mai ia ù. »
25 Me hua hakatu, ma hope o te mau,
ua too Īa i te ipu, e peàu aa :
« O te ipu nei he Piimau hou, i òto o to ù toto.
I te ava hakatahi e inu ôtou me io hua ipu,
a hana ôtou no te haamaakau mai ia ù. »
26 Ma èià, i tēia ava, i tēia ava,
ua kai ôtou i hua haraoa, ua inu ôtou me io hua ipu,
ua haki atu ôtou i te mateìa o te Hatu,
e tataì ana i to Īa hua mai.
« U haaìte au ia ôtou i te Ture hou :
A kāòha atu kāòha mai te hoa i te hoa
me he mea u kāòha atu au ia ôtou. »
ÈVANERIO O IETU KIRITO VĀÀNA E IOANE 13, 1-15
1 Ma mua o te Koìka Pakate, ua ìte Ietu ua tihe to Īa ava
no te taha atu me i te aomāàma nei io te Motua.
Ohia u kāòha Ietu i to Īa huaa te io he aomāàma nei,
u kāòha ia âtou tihe i te paoìa.
2 E kai aa i te kaiìa ahiahi,
u haatonake te tiaporo i te koekoe o Iuta,
tama na Timone, no te haaìò ia Ietu.
3 E ìte aa Ietu, ua tuku mai te Motua
i te tau mea paotū ma òto o to Īa îìma ;
ua ìte Īa me io te Etua to Īa ihoìa mai,
atii me to Īa hua atu io te Etua,
4 ua tū Īa me io he tapukai.
Ua taki Īa i te kahu uhi pu,
ua too i te tapa me to Īa taka anamai.
5 Ma hope, u kiini Ietu i te vai io he papa
me to Īa hano hooi i nā vaevae o te huaa kouâ ;
u haamoô me te tapa i takaìa.
6 Ua tihe Īa io Timone Petero.
U peàu Petero ia Īa :
« E te Hatu e, na Òe e hooi i to ù vaevae ? »
7 U haahua atu Ietu : « E aha te hana e hana nei au,
aòè òe e vivini. Epō iho e vivini ai òe. »
8 U peàu Petero ia Īa :
« Koè nui Òe e hooi i to ù vaevae ! »
U haahua Ietu ia īa :
« Me he mea e koè au e hooi ia òe,
u te pii òe me au nei. »
9 U peàu Petero ia Īa : « E te Hatu e,
umoì nā vaevae anaè,
atià me nā îìma atii me te upoko. »
10 U peàu Ietu ia īa :
« Te ènana i kaukau i te vai, ua àva.
Umoì e hooi hakaùa.
O ôtou nei, u taìtaì ôtou ; atià aòè paotū. »
11 Ua ìte hoì Ietu i tēia e haamākaka mai ia Īa.
Oia te piò u peàu pēènei : « Aòè i taìtaì ôtou nui. »
12 Ia pao te hooi i to âtou vaevae,
ua too hakaùa Ietu i to Īa kahu uhi pu
me to Īa noho io he tapukai.
U peàu i to Īa tau kouâ :
« E aha, u vivini ôtou i te tumu o to ù hana i uē ia ôtou ?
13 U vevaò mai ôtou ia ù : he Tuhuka, he Hatu.
He mea hei to ôtou peàu mai ; oia hoì au.
14 Me he mea u hooi au i to ôtou vaevae,
o au te Hatu me te Tuhuka, a hana me ôtou atii :
a hooi ôtou i nā vaevae te hoa i te hoa.
15 U haaìte atu nei au i te hakatu ia ôtou
etià e hana ôtou me he mea ta ù i hana i uē ia ôtou. »
Comments est propulsé par CComment