1- TATAUÌA O TE HĀMANI A MOITE PEÀUÌA TENETE
1, 1-31 – 2, 1-2
1 I te tumu, u pēpena te Etua i te àki me te henua.
2 Te henua à, e hakatu koè, kiko koè.
Ma ùka o te peteò, he pō keevō ;
ma ùka o te tau vai, e ona nei te kuhane o te Etua.
3 U peàu te Etua : « A māàma ! »
Me te māàma anamai.
4 Ua ìte te Etua u meitaì te māàma.
Me te haapae o te Etua i te māàma
me io he pō keevō.
5 Ua apa te Etua i te māàma, he â.
Ua apa te Etua i te pōtako, he pō.
Me te ahiahi me te pōpōuì anamai.
Pō a tahi.
6 U peàu te Etua :
« A papahenua ma vāveka o te tau vai
mea haapae i te tau vai me io te tau vai. »
7 Ua hana te Etua i te papahenua,
me te haapae i te tau vai ma ùka o te papahenua
me io te tau vai ma àò o te papahenua.
Ua pao anamai atii.
8 Ua apa te Etua i te papahenua, he àki.
Me te ahiahi me te pōpōuì anamai.
Pō a ùa.
9 U peàu te Etua :
« A putu mai ma he ava e tahi
te tau vai ma àò o te àki,
a ìteìa mai te vahi moô. »
Ua pao anamai atii.
10 Ua apa te Etua i te vahi moô, he henua.
Ua apa i te tau vai, he tai.
Ua ìte te Etua e mea meitaì.
11 U peàu te Etua :
« A tupu te henua i te mutiē,
i te èitā e hua nei i te kākāno,
me te tumuâkau e hua nei i te puku
e avai nei ma òto te kākāno ma to īa hakatu. »
Ua pao anamai atii.
12 Ua tupu te henua i te mutiē,
i te èitā e hua nei i te kākāno ma to īa hakatu,
me te tumuâkau e hua nei i te puku
e avai nei ma òto iho o te kākāno ma to īa hakatu.
Ua ìte te Etua e mea meitaì.
13 Me te ahiahi me te pōpōuì anamai.
Pō a toù.
14 U peàu te Etua :
« A tauèva mou àma ma àò o te papahenua o te àki
mea haapae i te â me i te pō.
A ìò âtou he mou hakatu e tuhi i te tau ava koìka,
te tau â me te tau èhua.
15 E ìò hua tau àma ma àò o te papahenua o te àki,
mea tūìka i te henua. » Ua pao anamai atii.
16 U kānea te Etua i nā àma kākaùoo e ùa.
Te àma kaùoo oko mea vivini i te â,
me te àma iti mea vivini i te pō ; i muì iho, te tau hetū.
17 U tauèva te Etua ia âtou io te papahenua o te àki
mea tūìka i te henua,
18 mea vivini i te â me i te pō,
mea haapaekē i te māàma me io te pō keevō.
Ua ìte te Etua e mea meitaì.
19 Me te ahiahi me te pōpōuì anamai.
Pō a hā.
20 U peàu te Etua : « A pī nui te tau vai
i te nuiìa o te mēmau pohuè.
A ona te manu ma ùka o te henua,
i àò o te papahenua o te àki. »
21 U pēpena te Etua i te tau ika tai hakaìpaìpa pē
me te ika pohuè hakatahi e nokenoke nei,
e pī nei ma he tau vai, vāàna i to âtou hakatu,
me te manu pekeheu hakatahi vāàna i to âtou hakatu.
Me te ìte o te Etua e mea meitaì.
22 U haameitaì atu te Etua ia âtou e peàu aa :
« A tuputupu, a nuinui, a haapī i te tau vai me te tai,
a nuinui me te tau manu ona ma he henua. »
23 Me te ahiahi me te pōpōuì anamai :
Pō a ìma.
24 U peàu te Etua :
« A pī te henua i nā puaka pohuè
vāàna i to âtou hakatu,
te tau puaka kai, te tau puaka totoo,
te tau puaka hae vāàna i to âtou hakatu.
Ua pao anamai atii.
25 U kānea te Etua i te tau manu hae
vāàna i to âtou hakatu,
me te tau puaka kai vāàna i to âtou hakatu
me te puaka paotū totoo ma ùka o te henua
vāàna i to âtou hakatu.
Ua ìte te Etua e mea meitaì.
26 U peàu te Etua : « A kānea tātou i te ènana
he ata no tātou, e haahakatu me tātou anaiho.
A vivini īa i te ika o te tai,
i te puaka kai me te puaka hae paotū,
i te tau puaka paotū e totoo nei ma ùka o te henua. »
27 U pēpena te Etua i te ènana e ata no Īa.
He ata no te Etua i pēpena atu ai i te ènana.
He vāhana, he vehine i pēpena atu ai ia âua.
28 U haameitaì atu te Etua ia âua.
U peàu atu te Etua ia âua :
« A tuputupu, a nuinui, a haapī i te henua, a tuàki atu :
a vivini i te ika o te tai me te manu o te ataàki
me te puaka hakatahi totoo ma ùka o te henua. »
29 U peàu te Etua :
« Eīa, ua tuku au no ôtou i te èitā paotū
e hua nei i te kākāno,
e avai nei ma ùka o te henua tiàtohu
me te tumuâkau paotū
e hua nei i te puku me te kākāno i òto :
a kai ôtou i tēia kai.
30 Atii i te puaka hae paotū me te manu paotū o te ataàki,
i te mēmau paotū e totoo ma ùka o te henua,
i te mēmau paotū me te menava o te pohuèìa,
ua tuku atu au i te èitā hakatu kē no te kai.
Ua pao anamai atii.
31 Ua ìte te Etua i ta Īa mea paotū i hana,
eīa e mea meitaì nui.
Me te ahiahi me te pōpōuì anamai :
Pō a ono.
2,1 Atii ua pao anamai te àki me te henua
me to âua mēmau paotū i òto.
I te pō e hitu, ua haapao te Etua i te hana ta Īa i hana.
2 U hakaēa ma te pō e hitu me i te hana paotū.
TARAMO 103 (104) 1-2a, 5-6, 10.12, 13-14b, 24.35c
E te Hatu e, a pōpahi i to Òe Kuhane no te haahou
i te hakatu o te henua. 103, 30
1 A haameitaì i te Hatu, e tu ù kuhane e.
E te Hatu e, tu ù Etua e, u tiketike Òe.
Ua tāpīìa Òe me te kāìè
2 Te àma te kahu e vāhī ia Òe.
5 E haamau Òe i te tūàka o te henua,
Etià e keue koè ma te tau tai a tihe nei.
6 Ua uhiìa hua henua me te tau tai.
Òmua, u haakaò te vai i te tau tuaivi.
10 Io te vao nui, e haapīhiti Òe i te punavai.
E tahe te vai ma io he kaavai hōhonu o te tuaivi.
12 Ua noho pii o hua vai te nuiìa o te manu ;
Ua òkoìa te takiìao to âtou èo.
13 Me io to Òe nohoka, u hāinu Òe i te tau tuaivi,
Ua kai haamāòna te mēmau pohuè i to Òe tau puku.
14 U haatupu Òe i te èitā no te tau naho ânimara,
U haatapavaù i te pāpua o te ènana paòpaò i te hana.
24 E mea nui to Òe hana, e te Hatu e.
Na to Òe māàma i pēpenaìa te tau mēmau paotū.
Ua pī te henua i to Òe tau taetae.
35 A haameitaì i te Hatu, e tu ù kuhane e !
Akoè à
TARAMO 32 (33) 4-5, 6-7, 12-13, 20.22,
Ua pī te aomāàma i to Òe tau hana kāòha, e te Hatu e.
32, 5
4 He toitoi noa te Tekao a te Hatu.
U tiàtohu anaè to Īa tau hana paotū.
5 U haataetae Īa i te hakatu toitoi, hakahae koè.
Ua pī te aomāàma i to Īa tau hana kāòha.
6 U pēpena te Etua i te àki na ta Īa tekao.
U kānea Īa i te aomāàma na te mana o to Īa ao.
7 U haapuke Īa i te tai me te haapākeka, oa neke īa.
U tāpae Īa i te moana me te tau taetae i òto.
12 Mamau te mataèinaa ia ìò te Etua he Hatu no īa.
Mamau te henua vaeìa me he pāpua no te Hatu.
13 Me io he àki, u tiòhi meitaì te Hatu
E ìte aa i tēia ènana, i tēia ènana.
20 O te Hatu te tumu o to tātou pohuè.
O Īa to tātou toko me te vevaò.
22 E te Hatu e, a noho mau to Òe kāòha i ùka o mātou
Atii me mātou e tataì mau i to Òe vaièiìa.
2- TATAUÌA O TE HĀMANI A MOITE PEÀUÌA TENETE
22, 1-18
1 U haahiiveke te Etua ia Aparahamo me te peàu ia īa :
« E Aparahamo e ! » U haahua atu īa : « Eīa au nei. »
2 U peàu te Etua :
« A too i ta òe tama, te tamaòa tootahi,
te tama ta òe e haataetae nei, o Itaako.
A hee atu io te henua Moria ; i èià, a ùtuna mai ia īa
i ùka o te tuaivi e haaìte atu au ia òe. »
3 I te pōpōuì tika, ua vaa Aparahamo
me to īa haapei i te pūriki.
U vevaò īa i nā pahikaèo e ùa me Itaako, ta īa tama.
U haapūpā i te vehie no te ahi tapu.
Ua hiti īa i uta, io te tuaivi ta te Etua i peàu atu.
4 I te â e toù, u heau Aparahamo
me to īa ìte mamao i te tuaivi peàuìa e te Etua.
5 U peàu Aparahamo i ta īa nā pahikaèo :
« A noho ôùa i înei me te pūriki.
O au nei me te tama e hiti māua i èià.
Ia pao to māua moe haatona me te pure,
e hua mai māua. »
6 Ua too Aparahamo i te pūpā vehie
me to īa tuku ma ùka o te pauhihi o Itaako, ta īa tama.
Ua tooìma īa i te ahi me te kohe.
U hihiti âua amana tokoùa.
7 U peàu Itaako ia Aparahamo : « E to ù motua e. »
U haahua atu : « Eīa au nei, e tu ù tama e. »
U peàu Itaako :
« Enā te ahi, enā me te vehie, i hea te hēaka ? »
8 U haahua atu Aparahamo :
« Na te Etua e haaìte mai i te hēaka, e tu ù tama e. »
U hihiti âua amana tokoùa.
9 I te ava ua tihe âua i te vahi peàuìa e te Etua,
u haatūAparahamo i te hātaa pure
me te tuku i te vehie ma ùka.
U kitii Aparahamo i ta īa tama, o Itaako,
me te tuku atu ma ùka o te hātaa, io he puke vehie.
10 U hapai Aparahamo i te ìma,
ua too i te kohe no te kukumi i ta īa tama.
11 A tahi a vevaò te anera o te Hatu Etua me io he àki
me te peàu : « E Aparahamo, Aparahamo e. »
U haahua atu ia : « Eīa au nei. »
12 U peàu te anera : « Umoì òe e tā i te māhaì.
Umoì òe e haamamae ia īa.
Ua ìte au i tēnei i te mea u pakaihi òe i te Etua.
Aòè hoì òe i kaikino mai i te tama,
ta òe tama tootahi. »
13 A tahi a heau Aparahamo
me to īa ìte i te koimaa menē
te i haavekeìa io he maamaakeoho.
Ua hano īa i te menē too
me to īa ùtuna atu i te hēaka io te kōava o ta īa tama.
Ua apa Aparahamo i hua vahi :
« Ua ìte te Hatu Etua. »
15 Na te anera o te Hatu Etua me io he àki
i vevaò hakaùa ia Aparahamo me te peàu pēènei :
16 « He tekao a te Hatu Etua.
E haatiàtohu au ma to ù iho ikoa :
mēìa u aotahi mai, aòè òe i kaikino i te tama,
ta òe tama tootahi,
e haameitaì me te vaièi nui au ia òe.
17 E haanui au tini, tini i to òe ati i ùka aè,
me he nui o te hetū io he ataàki,
me he nui o te one io te hiku o te tai.
E haahika âtou i te pākeâ me te mōuka tōua
o te mataèinaa e ahi me âtou.
18 Mēìa u aotahi mai òe, e haameitaì atu haameitaì mai
te tau mataèinaa paotū ma te vevaò mai i to òe ikoa. »
TARAMO 15 (16), 5.8, 9-10, 1b.11
E tu ù Etua e, a tiaki meitaì ia ù ; io Òe anaè tu ù tataì. 15, 1
5 O te Hatu te hope taetae ua ìò ia ù.
Io to Òe ìma, e te Hatu e, to ù pohuèìa.
8 I mua o to ù mata ananu te Hatu,
Ma to ù kaokao to Īa noho, u haametaù koè au.
9 Ua û i te koakoa to ù kuhane.
U èkaèka to ù nino, ua moe me te moû.
10 Aòè te Hatu e ao e hika au i te mateìa.
Aòè Īa e avai i to Īa hoa e pē ai io he èpo.
1b E tu ù Etua e, o to ù hīa, io Òe tu ù vahi maù.
11 U aahi mai Òe ma io te vaanui o te pohuè ;
I mua o to Òe mata, te koakoa, te koakoa nui.
Ma to Òe kaokao, te èkaèka paona koè.
3- TATAUÌA O TE HĀMANI A MOITE PEÀUÌA ÈHOTO
14, 15-31 – 15,1a
Ia ìte te poì o Iraene u tātai mai te pūpū kape Ekipito,
ua pī âtou i te haametaù.
14,15 U peàu te Hatu Etua ia Moite :
« No te aha te taaàu io ù ?
A peàu i te tau tama Iraene a tataha atu.
16 A too òe i to òe tokotoko,
a hapai i to ìma ma ùka o te tai, e vahiìa ma vāveka.
A taha atu te poì Iraene io he tai,
paìpaì koè nā vaevae.
17 O au à, e haaheò i te koekoe o te poì Ekipito.
Ma hope o ôtou, e taha âtou io he tai.
E haakāìèìa au e te hakaìki Faraone,
to īa tau pūpū kape, to īa tau pāriri, to īa tau ihovare.
18 E ìte to Ekipito o au te Hatu Etua,
ia pao i te tuàki te hakaìki Faraone me to īa tau pāriri
me to īa tau pūpū kape piki ihovare.
19 Enā ma mua o te pāpua o te tau tama Iraene
te anera o te Etua ; ua hee īa i hope atu.
Hua mea te kohu keekee te i ūtaì
i te pūpū tama Iraene ;
ua hee īa i hope atu.
20 Ua tū te kohu keekee i vāveka o te pāpua
o te tau kape Ekipito me te pāpua o to Iraene.
I te tūmoe, e ùa hakatu hua kohu :
he pō keevō i te kēkē Ekipito,
he àma pupuà i te kēkē Iraene.
I te pō, u te haatata mai to Ekipito me to Iraene.
21 U hapai Moite i te ìma ma ùka o te tai.
Ma te tiàtohu o te pō, ua puhi te Etua i te metaki oko
me i te kēkē tiheìa o te òumati.
Ua hee pororō nui te tai, vahiìa ma vāveka.
22 Ua taha atu to Iraene paìpaì koè te vaevae.
Ua tū anaè te tai me he pā i te ìma oko,
me he pā i te ìma aèaè.
23 U tātai i to Iraene te poì Ekipito,
te hakaìki Faraone, me to īa tau ihovare,
to īa tau pāriri, to īa tau pūpū kape.
Ua tihe âtou paotū i vāveka o te tai.
24 I te hāhakateiao, me i vāveka anamai o te kohu,
u tiòhi mai te Hatu i te tau pūpū kape Ekipito.
U haahika te Hatu ia âtou.
25 U haakati Īa i to âtou pāriri,
e mea hana nui te aahi atu.
U peàu to Ekipito : « A hihiki tātou i mua o Iraene.
U tōua te Hatu, e toko aa ia âtou. »
26 U peàu te Hatu Etua ia Moite :
« A hapai i to òe ìma i ùka o te tai.
A hua anamai te tai ma ùka o te tau kape Ekipito,
to âtou pāriri, to âtou poì piki ihovare. »
27 U hapai Moite i te ìma ma ùka o te tai.
I te pōpōuì tika, ua hua te tai i to īa kōava.
U hihiki to Ekipito.
Ua tomi te Hatu ia âtou i te take o te tai.
28 Ua hiti te tai. U tomiìa te tau pāriri,
te poì piki ihovare, te tau pūpū kape o Faraone
te i tohuti ma hope o te tau tama Iraene.
Aòè e tahi anaiho i toe atu.
29 Te tau tama Iraene,
ua taha atu âtou paìpaì koè nā vaevae,
me he pākeâ te tai i to âtou ìma oko me te ìma aèaè.
30 I hua â, u haapohuè te Hatu ia Iraene
me i te îìma o te tau Ekipito.
I te hiku o te tai, ua ìtemata Iraene
i te puke nino tūpāpaù o te poì Ekipito.
31 A tahi nei, ua ìte Iraene i te hana mana o te Hatu Etua
te i haahika i to Ekipito.
U pakaihi me te haametaù
te mataèinaa Iraene i te Hatu.
U haatià âtou i te Hatu Etua, ia Moite, to īa tāvini.
15,1 Ua hahi Moite me te tau tama Iraene i te Hatu Etua,
e hīmene aa pēènei :
HĪMENE A MOITE Eho 15, 2, 3-4, 5-6, 10a-11, 17
A hahi tātou i te Hatu, u pupuà to Īa kāìè ;
o te Hatu to tātou ìi. 15, 1a
2 O te Hatu tu ù ìi. No Īa tu ù hīmene hahi.
O te Hatu tu ù Etua, te i haapohuè mai.
Ua haki au i to Īa òko nui.
U haatiketike au i te Etua o to ù tupuna.
3 O te Hatu te toa mana io he tōua,
He Hatu Etua to Īa ikoa.
4 U tioà Īa io he tai i te pāriri o Faraone,
Io he tai, u haakaò Īa i to Ekipito tau kape.
5 Ua tomiìa âtou io he peteò,
Ua kaò me he keâ io he take o te tai.
6 E te Hatu e, ua mana to Òe ìma,
U haapaìha i te poì e tōtōua me Òe.
10 Ua puhi te Hatu : ua tomiìa âtou io he moana.
11 O ai te ètua e kiko me Òe, e te Hatu e ?
O ai e tūtū me Òe, te Peàto nui,
Te tumu o te mana haahopo i te ènana ?
17 U aahi mai Òe ia âtou me te nanu io he henua
I ùka o te tuaivi ta Òe i haataetae.
E te Hatu e, oiana te vahi o to Òe noho,
Te haè tapu ta Òe i haatū, e te Hatu Etua e.
4- TATAUÌA O TE HĀMANI A TE PEROHETA ITAIA
54, 5-14
Oia nei ta te Hatu Etua i peàu ia Ierutaremi :
5 He vāhana no òe te Etua te i pēpena ia òe.
O te Hatu o te aomāàma, to Īa ikoa.
He Haapohuè no òe te Etua peàto no Iraene.
O te Etua o te henua ia ôtoa, to Īa ikoa.
6 E Ierutaremi e, te vehine titiiìa, haameeìa,
E vevaò hakaùa te Etua ia òe.
U peàu te Hatu Etua pēènei :
« E aha, e titii te hoa mātiri
i ta īa vehine vaeìa i te ava hou te nino ? »
7 U haatūhaè au ia òe no te ava poto.
Ma òto o to ù kāòha nui ia òe,
e haakātahi mai hakaùa.
8 Mēìa i tu ù pekē, u haapiko i tu ù mata me io òe.
Ma òto o tu ù kāòha paona koè,
u matavaièi mai hakaùa.
Oia te tekao a to òe Haapohuè, te Hatu Etua.
9 Me he mea i te tai kākiu i mua o Noa,
u haatiàtohu au i tu ù tekao pēènei :
umoì e haakaòìa te henua i te vaiā ;
atii tēnei, u haamau i tu ù tekao :
Aòè au e pekē ia òe.
Aòè e oonaki ma te haametaù ia òe.
10 E aha à e takitumuìa te tau tuaivi,
e aha à e heùu te tau pūkei,
u te huìkē to ù kāòha ia òe.
U te hakaēa tu ù Piimau o te moû me òe.
Oia nei te Tekao a te Hatu Etua te i kāòha ia òe.
11 E Ierutaremi e, òmua, u haameeìa,
u haapūpūkinaìa, u titiiìa òe.
Enā, e haakeàpa au i to òe pā
me te tau keâ menia èreère.
He tau keâ pūkiki te puke keâ o to òe tūàka.
12 E pupuà to òe pā i te tau keâ pīàma pōnionio
i te òumati.
He mea karahi to òe tau avaputa.
13 E haamāàma te Etua iho i ta òe tau tama.
E noho ananu to te Etua moû i ùka o âtou.
14 E tohe mau òe i òto o te toitoi.
E haamamaoìa me io òe te tau kōhii e òomi mākaka.
Aòè òe e haametaù hakaùa,
e koè ai te mea haahopo.
TARAMO 29 (30) 3-4, 5-6b, 6c.12, 13
U haatiketike au ia Òe, e te Hatu e, te i haatū ia ù. 29, 2
3 I te ava e taaàu to ù èo io Òe,
E te Hatu, tu ù Etua e, u haameitaì mai.
4 Ua taki mai Òe me io he ōpata,
U haapohuè mai me io te ana o te tūpāpaù.
5 A hahi i te Hatu, ôtou, e te poì haatià e.
A haahuaèkaèka ma te haaòko nui i to Īa ikoa.
6 He ava poto to te Etua pekē,
Ma te òa o te pohuè to Īa haameitaì.
I te ahiahi, e tahe te vaimata,
Ma te pōpōuì te taaàu koakoa.
12 U haaìò Òe i tu ù uēuē me he â koìka.
Ua veti i to ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì Òe e mutu pu, a haakoìka no te Hatu.
E hahi au hakaēa koè i te Hatu, tu ù Etua.
U haahuaèkaèka au ia Òe, e te Hatu e.
5- TATAUÌA O TE HĀMANI A TE PEROHETA ITAIA
55, 1-11
1 Oia nei te Tekao a te Hatu Etua :
E mate ôtou i te pakavai ? A mai. A inu.
Moni koè ôtou ? A hoko pu.
A kai. A inu i te vino, i te vaiū.
2 Umoì e haapao pu i ta ôtou moni hana
no te kai i te înaì haamāòna koè.
3 A hakaòko mai. E māòna ôtou i te înaì mōmona.
A hakaòko mai. Mave mai. E pohuè meitaì ôtou.
E haatoitoi au me ôtou i te Piimau paona koè.
E ìò hoì ia ôtou te taetae o Tavite.
4 Ua haamau au ia īa he ènana no ù
i vāveka o te tau mataèinaa, te aahi,
te vivini o te tau ati.
5 O òe à, e vevaò òe i tītahi ati aòè òe i ìte ;
e tihe mai io òe tītahi ati kē mēìa i to òe Hatu Etua,
te Peàto Nui o Iraene te i haakāìè ia òe.
6 A ùmihi ôtou i te Etua, oia te ava e tutuki me Īa.
I te ava nei, a pure ôtou i te Etua,
u tata èka me ôtou.
7 A hua mai te ènana mākaka
me io to īa vaanui hūkaka.
A titii te ènana ìno i to īa maakau pē.
A hua io te Etua te i hakāòha mai ia īa.
8 He mea kē hoì te makimaki o te Etua,
mea kē to te tau ènana.
He mea kē te hakatu o te Etua,
mea kē to te tau ènana.
9 Atii te tiketike o te àki ma ùka o te henua,
atii te hōhonu atu o te maakau o te Etua
ma ùka o te maakau ènana.
10 Ia topa te ūa me te nive me io he àki,
u haakutaù âtou me te haatapavaù i te henua.
U haatupu âtou i te èitā, haahua i te puku
no te hākai i te tau ènana me te tau manu e kai aa.
11 Atii hoì te tekao ta ù i haaìte atu :
E hana tēia tekao i te hana ta ù i makimaki.
U te hua io ù ta ù tekao puku koè.
HĪMENE It 12, 2, 4b.e-5a, 5b-6a.c
O te Hatu Etua te vaipuna o te pohuè ;
a èkaèka tātou, a taaàu i te koakoa ! 12, 3
2 O te Hatu Etua tu ù Haapohuè.
U haatià nei au, haametaù koè.
O te Hatu Etua tu ù ìi. E hīmene au ia Īa.
Io te Hatu te tumu o to ù pohuè.
4 A haahuaèkaèka i te Hatu. A hahi i to Īa ikoa,
A haki atu io te poì êteni i to Īa tau hana mana.
A haaìte atu : he Tiketike to Īa ikoa.
5 A haataki i te pū no te hahi i te Hatu.
Ua hana hoì te Hatu i te hana mahaò.
U mevaha to Īa òko nui ma nā henua vii pu.
6 E Tiona e, a èkaèka, a taaàu i te koakoa.
U tiketike te Hatu Etua i vāveka o ôtou.
6- TATAUÌA O TE HĀMANI A TE PEROHETA PARUKO
3, 9-15.32-38 – 4, 4
9 E te mataèinaa Iraene,
a hakaòko i te tekao haameitaì i te pohuè.
A apuu i te tekao haamāàma ia òe.
10 E to Iraene, no te aha ua noho òe
i te henua o te tau ènana e tōtōua me òe ?
No te aha ua ìò òe he kooūa i te henua hāoè ?
11 Ua hava òe ma te haatukia me te nino tūpāpaù.
U tatauìa i vāveka o te huaa mamate i havaiki.
12 O īa nei te piò : u titii òe i te puna o te Māàma.
13 Anoa òe i taha ma io te vaanui o te Etua,
e noho òe me te moû i to òe henua.
14 A haamaakau òe i hea te māàma, te ìi, te ìteìa.
Ma èià, e ìte òe i hea te tumu o te pohuè òa,
i hea te àma e haatāhakahaka i to òe kikomata,
i hea te moû.
15 E noho te Māàma i hea ? O ai te i ìte ?
O ai te i uu io te pāòto o to te Māàma taetae ?
32 Na te Etua i tuhi i te vaanui o te Māàma.
Ua ìte Īa i te tau mea ia ôtoa.
Ua ùmihi Īa i te tau mea paotū.
U kānea Īa i te aomāàma vii pu.
U haapī Īa i te henua
me te tau ânimara kē, ânimara kē.
33 Ua pahi Īa i te àma te i hee atu, hee atu paona koè.
U vevaò Īa i hua àma, ua taha mai,
e aotahi aa me te emièe.
34 U tāmiomio te tau hetū i te pō,
me he mea u koakoa âtou.
35 U vevaò te Etua ia âtou,
u haahua âtou e peàu aa : « Eīa au nei. »
U keàpa âtou no te haaèkaèka i te i pēpena ia âtou.
36 O Īa hoì to tātou Etua.
Aòè te Etua kē i mua o Īa.
37 Ua ùmihi Īa i te vaanui o te Māàma.
Ua tuku Īa i hua vaanui ia Iakopo, to Īa tāvini,
ia Iraene ta Īa i haataetae.
38 Ma èià, u haaìte ia Īa iho i te Māàma io he henua nei.
Ua noho te Māàma i vāveka o te tau ènana.
4, 1 He Tekao a te Etua hua Māàma.
Oia te Ture te i noho mau ma te tau tai ananu.
E pohuè te tau ènana e aotahi i hua Tekao.
E mate nui te tau ènana e titii i hua Tekao.
2 A hua mai, e Iakopo e.
A apuu me te aotahi mau i te Tekao.
A tūìka te Tekao i te vaanui e aahi ia òe
io he pohuè kanahau.
3 Aua e too pu te mataèinaa kē i to òe kāìè.
Aua e hao te ati kē i to òe iho taetae.
4 Oho te ìi, e Iraene ! A oko òe !
Ua ìte tātou i te mea te i haaèkaèka i te Etua.
E te Etua e, io Òe te tekao e aahi atu i te pohuè ananu.
In 6, 68
8 U toitoi noa te ture o te Hatu,
Na īa e haahou i to tātou ìi.
U tiàtohu te Tekao a te Hatu,
Te i haamāàma i te poì avai noa.
9 U toitoi te Tekao a te Hatu,
E haakoakoa âtou i te koekoe.
U hōata te makimaki o te Hatu,
E haakeàpa i te mata o te ènana.
10 U taìtaì te pakaihiìa o te Etua,
E noho mau ananu to īa tau puku.
U toitoi te tekao paotū o te Hatu :
He māàma âtou no te haavā i te ènana.
11 U taetae atu te makimaki o te Hatu
I te puke monikiki, te kuà o te monikiki.
He mānini atu te Tekao a te Etua
I te mānini tikauè e tahe me io he tīpapa.
7- TATAUÌA O TE HĀMANI A TE PEROHETA EHEKIERE 36, 16-28
16 Ua òko au i te Tekao a te Hatu, pēènei à :
17 « E te ènana e, i nā pō e noho nei te mataèinaa Iraene
io to âtou henua, u hava hua henua e âtou
mēìa i to âtou hakatu hauhau me to âtou hana pē.
18 U haatopa au ma ùka o âtou i te tuki pē,
mēìa i te toto ta âtou i kiini nei,
mēìa i te tau ètua tīvava te i haameìe i hua henua.
19 I haatavavā ai au ia âtou i vāveka
o te tau mataèinaa êteni
te i haahiki kē ia âtou ma he henua kē ananu.
U haavā au ia âtou vāàna i to âtou hakatu me te hana.
20 I vāveka o hua tau mataèinaa êteni ta âtou i hee atu,
u haameìe âtou i tu ù ikoa tapu.
U peàu te tau ènana pēènei :
« Oia nei te mataèinaa o te Hatu Etua
te i titiiìa me io to Īa henua. »
21 Atià, u makimaki au e haakāìè atu i tu ù ikoa tapu
ta te ati Iraene i haameìe
io he tau henua, i èià u tavavā âtou.
22 A peàu atu òe i te mataèinaa Iraene,
pēènei te Tekao a te Hatu Etua :
« E to Iraene, a hakaòko mai.
Aòè no ôtou te tau hana e hana atu au,
atià no te haakāìè i tu ù ikoa
ta ôtou i haameìe io te tau henua i hee atu ai ôtou. »
23 Ua tihe mai te Tekao a te Hatu Etua, pēènei :
« E haaìte au e mea tapu to ù ikoa tiketike
te i haameeìa e te tau mataèinaa êteni mēìa ia ôtou.
E vivini te tau mataèinaa i te mea : o au te Hatu Etua.
Na ù anaiho e haatapu i to ù ikoa.
24 E vevaò au ia ôtou me i vāveka o te tau mataèinaa
e haaputuputu au ia ôtou
te i takiìa me io te tau henua paotū.
E haahua au ia ôtou i to ôtou henua tumu.
25 E kiini au ma ùka o ôtou i te vai mā
no te haamā ia ôtou.
E haataìtaì au i to ôtou tau mīkeo paotū
me to ôtou tau hana pakaihi teka i te tau ètua tīvava.
26 E vaièi atu au ia ôtou i te koekoe hou.
E tuku au ia ôtou i te kuhane hou.
E taki au i to ôtou koekoe keâ no te tuku atu
i te koekoe kiko.
27 E haaihi au i òto o ôtou i to ù Kuhane
etià e aotahi ôtou i to ù makimaki
me te haamau io he koekoe i ta ù tau tekao.
28 E nonoho ôtou io te henua ta ù i tuku atu
i to ôtou tau tupuna.
E ìò ôtou e mataèinaa no ù. He Etua au no ôtou. »
- Me he mea aòè he papatema
TARAMO 41 (42) 1-2, 5bcd ; 43 (42) 3, 4,
Io te Etua to ù hīa, io te Etua haapohuè. Ahea e koàka ia ù te haatata me te tū i te aò o te Etua ?
41, 3
1 Me he mea te menē i paka i te vai pohuè,
2 Atii e ùmihi nei au ia Òe, e te Hatu, tu ù Etua e.
5 E taha au i vāveka o te haètoa nui
No te tomo io te haè o te Etua.
Na ù te haatee ia âtou e hiti ana,
E hahi me te taaàu koakoa i te Etua.
3 A pahi mai i to Òe māàma me te tiàtohu,
Na âua te haatee i to ù tahaìa,
Te aahi ia ù i ùka o to Òe tuaivi,
Tihe atu io te vahi tapu i èià e noho ai Òe.
4 E haatata au pii o te hātaa pure o te Etua,
Te Etua, te tumu o to ù koakoa.
E haahuaèkaèka au me te hīmene kitā,
Ia Òe, e te Etua, tu ù Etua e.
- Me he mea e papatemaìa te tama hou,
HĪMENE It 12, 2, 4b-e, 5b-6a.c,
Akoè à
TARAMO 50 (51) 12-13, 14-15, 18-19
E te Etua e, a pēpena i òto o au nei i te koekoe hou. 50, 12
12 A pēpena i òto o au nei i te koekoe taìtaì.
A haahou i to ù kuhane, a haamau i to īa meitaì.
13 Umoì e titii atu ia ù mamao me io Òe.
Umoì e taki me i òto o au i to Òe Kuhane Meitaì.
14 A haakoakoa ia ù to Òe haapohuè mai.
A haamau i te èkaèka io to ù koekoe.
15 E hakako au i to Òe vaanui i te poì mīkeo.
E hua mai io Òe te poì i hūkaka nei.
18 No tu ù ùtuna atu i te hēaka, aòè Òe e apuu mai.
Me kānea au i te hēaka pūovo i te ahi, u titii Òe.
19 Te koekoe unu i te uē, oia te hēaka e kaki Òe.
Te koekoe unu i te uē me te hopo mīkeo
Te ùtuna hēaka e haatāvaè ia Òe, e te Hatu e.
TATAUÌA O TE HĀMANI A PAURO PEÀTO I TO ROMA 6, 3b-11
E tu ù tau tuàne tuehine,
3 ua ìte hoì ôtou u papatemaìa tātou
no te haatahi me te Kirito Ietu
i òto o to Īa mateìa, to tātou papatema.
4 Ua tomiìa tātou kātahi me Ietu Kirito
mēìa i te papatema te i haatahi ia tātou
me to Ietu Kirito mateìa.
No èià, me he mea ua tū hakaùa Ietu Kirito
me i vāveka o te huaa mamate
ma te mana nui o te Motua,
atii e pohuè ai me tātou no te hakatu pohuè hou.
5 Me he mea e haatahi tātou me Ietu
ma te mateìa kātahi me Īa,
e haatahi hoì tātou me Īa
ma te pohuè hakaùa kātahi me Īa.
6 Ua ìte meitaì tātou i te mea nei :
u pāokapekaìa kātahi me Ietu
to mua hakatu pohuè o tātou, ènana mīkeo,
vāàna e haakoè te Etua i te hīa pē o te nino.
Ma èià, u te vivini mai hakaùa ia tātou
te mana o te mīkeo.
7 Me he mea e mate nui hoì te ènana,
ua koè to īa tāvini atu i te mīkeo.
8 Me he mea e mate tātou kātahi me te Kirito,
e haatià mau tātou e pohuè hoì kātahi me Īa.
9 Ua ìte tātou i te mea nei :
ua tū hakaùa te Kirito me i vāveka o te poì mamate,
ua koè te mana o te mateìa i ùka o Īa.
Koè nui te Kirito e hika hakaùa i te mateìa.
10 Ua mate nui Ietu,
ua koè te mana o te mīkeo i ùka o Īa.
Ua àva to Īa mateìa no te tau tai hakatahi.
I tēnei, to Ietu pohuè, he pohuè no te Etua.
11 Atii me ia ôtou. A kaituto ia ôtou iho,
me he poì mamate ôtou :
ua koè te mana o te mīkeo i ùka o ôtou.
Atià, he poì pohupohuè nei ôtou
no te haaèkaèka i te Etua kātahi me Ietu Kirito.
ALLELUIA. ALLELUIA
TARAMO 117 (118) 1.4, 16-17, 22-23
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
16 U tuàki te ìma oko o te Hatu,
Ua mana nui te pūhāìma o te Hatu.
17 Aòè au e mate havaiki, e pohuè meitaì
No te haaìte atu i te tau hana o te Hatu.
22 Te keâ i titiiìa e te poì ato haè,
Hua keâ avai noa, ua ìò he keâtaa.
23 Oiana te hana o te Hatu,
E hana mahaò haapekahi ia mātou.
No te Èhua A
ÈVANERIO O IETU KIRITO VĀÀNA E MATEO 28, 1-10
1 Ma muì o te Tāpati, i te pōpōuì mākehukehu
o te â to mua o te âtapu, ua hee Maria Matarena
me tītahi Maria kē i te ana tūpāpaù tiòhi.
2 Enā, u heùu oko te henua,
ua iho mai hoì te anera o te Hatu me io he àki.
E haatata mai aa, ua huì te anera i te keâ
me to īa noho ma ùka o hua keâ.
3 U hakatu to īa mata me he uià,
ua tavaìè me he nive to īa kahu.
4 Mēìa i te haametaù, u pūpūkina te tau kape tiaki,
mei mate nui âtou.
5 Atià, u pohā te èo o te anera me te peàu i nā vehine :
« Umoì ôùa e haametaù.
Ua ìte au e ùmihi nei ôùa ia Ietu te i pāokapekaìa.
6 Aòè Īa i înei. Ua tū hakaùa
me he mea ta Īa i peàu atu.
A mai, a tiòhi ôùa i te vahi o to Īa moe.
7 I tēnei, a hee ponihoo me te peàu i to Īa tau kouâ :
ua tū hakaùa Īa me i vāveka o te huaa mamate.
Enā Īa i te Henua Karirea i mua o ôtou.
I èià e ìte ôtou ia Īa.
Enā, ua òko ôùa i te tekao hou. »
8 U titii ponihoo âua i te ana tūpāpaù
me te haametaù me te koakoa nui.
U kokouō âua no te kave atu
i te tekao hou io to Īa tau kouâ.
9 Eīa, ua tihe mai Ietu e haatutuki me hua mou vehine
me to Īa peàu : « Kāòha ôùa ! »
U haatata mai âua me Ietu.
Ua too âua i to Ietu mou vaevae,
ua moe haatona i to Īa aò.
10 U peàu Ietu ia âua : « Umoì ôùa e haametaù.
A taha atu me te peàu i to ù tau teina :
a hee âtou i te Henua Karirea. I èià e ìte âtou ia ù. »
No te Èhua B
ÈVANERIO O IETU KIRITO VĀÀNA E MAREKO 16, 1-7
1 Ma hope mai o te Tāpati, Maria Matarena,
Maria te kui o Iakopo me Tarome, ua hoko mai âtou
i te mēmau kakaa no te haapaù
i te nino tūpāpaù o Ietu.
2 I te pōpōuì tika nui mākehukehu,
i te â to mua o te âtapu,
ua tihe âtou io he ana tūpāpaù. U pōpōuì nui.
3 U peàpeàu atu peàpeàu mai âtou :
« Na ai e huì atu i te keâ
me i mua o te avaputa o te ana ? »
4 Atià, e heau aa, ua ìte âtou
ua huììa hua keâ : he keâ kaùoo.
5 Ua uu âtou i òto o te ana tūpāpaù.
Ua ìte âtou e tahi māhaì e noho aa i te kēkē ìma oko,
he kahu òa, he kahu tavaìè to īa.
U emièe âtou me te haametaù.
6 U peàu hua māhaì ia âtou : « Umoì ôtou e haametaù !
Ua ùmihi ôtou ia Ietu no Natareti te i pāokapekaìa.
Ua tū hakaùa Īa. Aòè Īa i înei.
Oia nei te vahi i tuku ai âtou ia Īa.
7 A tataha atu.
A peàu i to Īa tau kouâ atii me ia Petero,
enā Īa i te Henua Karirea ma mua o ôtou.
I èià, e ìte ai ôtou ia Īa
me he mea ta Īa i peàu atu ia ôtou. »
No te Èhua C
ÈVANERIO O IETU KIRITO VĀÀNA E RUKA 24, 1-12
1 I te â to mua o te âtapu, ma te oìoì tika,
ua tihe te mou vehine io he ana tūpāpaù,
e kave aa i te mēmau kakaa kāneaìa e âtou.
2 U koàka ia âtou te keâ huììa
me i mua o te ana tūpāpaù.
3 Ua uu âtou i òto he ana.
Aòè i koàka mai ia âtou te nino o te Hatu Ietu.
4 Ohia ua pē âtou i te mahaò, enā i mua o âtou
nā ènana tokoùa tāpīìa me te kahu haapōnionio.
5 Ua hemo âtou i te haametaù
me to âtou oha i àò te mata.
U peàu nā ènana ia âtou : « Umaha to ôtou ùmihi
i vāveka o te huaa mamate i tēia i pohuè ?
6 Aòè Īa i înei. Ua vaa Īa.
A haamāmaakau ôtou i ta Īa tekao
i te ava ua noho Īa i te Henua Karirea.
7 U peàu Īa e haaìòìa te Tama a te Ènana
i te îìma o te poì mīkeo, e pāokapekaìa.
Ma te pō toù, e tū hakaùa Īa. »
8 A tahi a haamāmaakau âtou i ta Ietu tau tekao.
9 Ia hua âtou me io he ana tūpāpaù,
ua haki atu i nā mea hakatahi
i te Tīònohuu ma tahi me te tau ènana kē paotū.
10 Oia nei te ikoa o hua mou vehine :
Maria Matarena tītahi, Ioana tītahi,
Maria, te kui o Iakopo tītahi.
Enā me tahipito vehine kē me âtou
te i peàu hua mea anaiho i te tau Àpotoro.
11 E auana he tekao paèpaèa ta te tau vehine,
aòè te tau Àpotoro i haatià ia âtou.
12 Atià, ua tū Petero me to īa tohuti atu
io he ana tūpāpaù.
Ua oha īa. Ua ìte īa i òto he tau tapa anaè.
Ua hua mai īa io he haè.
U mahaò īa e kaituto aa i te mea i haapaoìa.
TATAUÌA O TE HĀMANI HANA A TE TAU ÀPOTORO
10, 34a.37-43
Io te haè o te kereturione Korenio,
34 u pohā te èo o Petero me to īa peàu pēènei à :
37 « Ua ìte ôtou i te mea i haapaoìa
i te Henua Iutea vii pu,
i te Henua Karirea te tīmataìa,
ma muì o te papatema te i haaìteìa atu e Ioane.
38 Ua ìte ôtou pēhea u haapaù te Etua ia Ietu no Natareti
me te Kuhane Meitaì me te mana.
Ua taha Ietu e hana i te hana meitaì,
u haapohuè Īa i te tau ènana paotū
te i haamōèhuìa e te tiaporo. O te Etua hoì me Ietu.
39 O mātou te tau ènana haatiàtohu i to Īa tau hana paotū
io he henua ati Iuta atii me Ierutaremi.
O hua Ietu ta âtou i haamate ma te tauèva ia Īa
io he peka.
40 Atià, na te Etua i haatū hakaùa mai ia Īa
ma te toù o te pō me te ao no te haaìte atu
ia Īa anaiho,
41 aòè i te mataèinaa paotū,
atià i te tau ènana i vaeìa e te Etua,
mātou à te i kai me te inu me Īa,
ma muì o to Īa Tūhakaùaìa
me i vāveka o te huaa mamate.
42 U peàu mai no te haaìte atu i te mataèinaa
me te haatiàtohu i tēnei tekao :
O Īa te i haatūìa e te Etua
no te haavā i te poì pohuè me te huaa mamate.
43 U haatiàtohu te tau peroheta paotū ia Ietu, e peàu aa :
ma to Īa ikoa, a veveteìa te tau mīkeo
o te ènana u haatià ia Īa. »
TARAMO 117 (118) 1.4, 16-17, 22-23
Oia nei te â haatoitoiìa e te Hatu.
He â koìka te â o te koakoa, alleluia. 117, 24
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
16 U tuàki te ìma oko o te Hatu,
Ua mana nui te pūhāìma o te Hatu. »
17 Aòè au e mate havaiki, e pohuè meitaì
No te haaìte atu i te tau hana o te Hatu.
22 Te keâ i titiiìa e te poì haatūhaè,
Hua keâ avai noa, ua ìò he keâtaa.
23 Oiana te hana o te Hatu,
E hana mahaò haapekahi ia mātou.
TATAUÌA O TE HĀMANI A PAURO PEÀTO I TO KOROHA 3, 1-4
E tu ù tau tuàne tuehine,
1 mēìa u pohuè hakaùa ôtou kātahi me te Kirito,
a ùmihi i te taetae te io he àki, i èià hoì te Kirito,
e noho aa i te ìma oko o te Etua.
2 A kōhoà anaiho i te mea te io he àki,
umoì i te mea te io he aomāàma nei.
3 Ua mate ôtou kātahi me te Kirito.
To ôtou hakatu pohuè hou, u te haaìteìa atu nei,
me he mea u te haaìteìa to te Kirito :
u hakanāìa i òto o te Etua.
4 E tahi to ôtou hakatu pohuè hou me to te Kirito.
No èià, i te â e haaìte te Kirito ia Īa iho,
e tū ai ôtou me Īa i òto o te kāìè Etua.
Akoè à
TATAUÌA O TO MUA HĀMANI A PAURO PEÀTO
I TO KORINETIA 5, 6b-8
E tu ù tau tuàne tuehine,
6 ua ìte ôtou i te tekao haapupuà :
A kāvohi i te mana o te mea haapupuhi
me te haraoa tee,
e pupuhi te haraoa paotū.
7 A haataìtaì hoì ia ôtou ma te taki me io ôtou
i te mea haapupuhi pē,
ma èià he haraoa tee hou ôtou.
Na te mea, ôtou, he haraoa tee hou haapupuhikoèìa.
U ùtunaìa hoì to tātou Pakate e te Kirito.
8 A haì tātou i te Koìka Pakate,
umoì me te mēmau haapupuhi kākiu,
haapupuhi pē, haapupuhi teka.
Atià, a haì ôtou i te koìka me te haraoa tee
o te toitoi me te tiàtohu,
ia hoì te haraoa haapupuhikoèìa.
PURE VEVAÒ
I te Hēaka Pakate,
E te poì kiritiano e, a hahi ia Īa.
Ua hoko mai te Àrenio i te tau mutō ;
U haatutuki te Kirito piò koè
I te ènana mīkeo me te Motua.
U tōua atu, tōua mai te mate me te pohuè
Ua mate te Tuhuka o te pohuè ;
E pohuè aa, u vivini Īa.
E Maria Materena e, a peàu mai,
E aha ta òe i ìte ma io he vaanui ? »
« Ua ìte au i te ana o te Kirito pohuè,
Ua ìte au i te kāìè o Teīa i tū hakaùa.
Ua ìte au i te tau anera, to Īa tau mataìte,
te tapa vāhī i te nino me te tau kahu.
Ua tū hakaùa te Kirito, tu ù tataììa
Enā Īa i mua o ôtou i te Henua Karirea. »
Ua ìte toitoi tātou : tiàtohu nui,
ua tū hakaùa te Kirito me i vāveka o te huaa mamate.
E te Hakaìki kāìèa e,
A hakāòha mai Òe ia mātou.
Àmene.
ALLELUIA. ALLELUIA 1 Ko 5, 7-8
U ùtunaìa hoì to tātou Pakate, te Kirito.
Oia nei te kainamau o te Hatu.
Mave mai. A haamāòna tātou me te koakoa.
ÈVANERIO A IETU KIRITO VĀÀNA E IOANE 20, 1-9
1 I te â to mua o te âtapu, i te pōpōuì tika,
hāhakateiao, ua tihe Maria Matarena
io he ana tūpāpaù.
Ua ìte i te keâ takiìa me io he ana.
2 A tahi a tohuti īa io Timone Petero
me tēia kouâ i haataetaeìa e Ietu.
U peàu ia âtou :
« U tooìa te nino o te Hatu me io he ana tūpāpaù.
Aòè mātou i ìte i hea te tukuìa. »
3 Ua hee atu Petero me tītahi kouâ
me to âua tihe i te ana tūpāpaù tiòhi.
4 U tohuti nātoa amana tokoùa âua.
Atià, ua tihe te kouâ òmua ia Petero
mēìa i te koi o to īa vaevae.
5 Ua oha me to īa ìte i òto o te ana
i te tapa vāhī i te nino, tukuìa ma ùka o te tohua.
Atià, aòè īa i uu i òto o te ana tūpāpaù.
6 Ua tihe Timone Petero ma muì o īa.
Ua uu i òto o te ana me to īa ìte,
ma ùka o te tohua, i te tapa vāhī i te nino
7 me te tapa tomi i to Ietu upoko.
Aòè i tāpapaìa hua tapa
me to mua tapa te i vāhī i te nino.
U pīkaoìa hoì i vahi kē.
8 A tahi a uu i òto te kouâ kē te i tihe òmua ìka.
Ua ìte īa. U haatià.
9 Aòè hoì âua i vivini i te Hāmani tapu e peàu aa :
e tū hakaùa Ietu me i vāveka o te huaa mamate.
Akoè à, i te pure meta ahiahi Pakate :
ÈVANERIO O IETU KIRITO VĀÀNA E RUKA 24, 13-35
13 I hua â to mua o te âtapu,
ua hee nā kouâ tokoùa o Ietu
io he pāpuahaè, o Emau te ikoa.
E ùa hora nehe te tahavaevaeìa me i Ierutaremi.
14 U tekatekao âua no tenā tau mea paotū i pao.
15 Ohia u tekao atu tekao mai âua,
u haatata mai Ietu iho me to Īa taha atu me âua.
16 E aha à u tiòhi âua ia Īa, u haakekehuìa to âua mata,
oi te ìte âua o Īa Ietu.
17 U peàu Ietu ia âua : « E aha te tumu
o ta ôùa tekao atu tekao mai, e taha ana ? »
U hakaēa âua, u kekehu nui te mata.
18 U haahua tītahi, o Kereopata te ikoa,
me te peàu ia Ietu :
« O òe anaè me i vāveka o te tau ènana
e noho nei i Ierutaremi,
aòè i ìte i te tau mea i hanaìa i nā pō i pao atu nei. »
19 U peàu Ietu : « E aha òa ? »
U peàu âua : « Te tekao i ùka o Ietu no Natareti.
Ua tū Īa me he peroheta mana
ma te hana me te tekao,
i mua o te Etua me te mataèinaa paotū.
20 Pēhea i haaìòìa no te haamate nui
me te pāokapeka atu
e to mātou tau tāuà nui me te tau hakaìki.
21 O mātou à, u tataì mātou
e haapohuè Īa i te mataèinaa Iraene.
Tōtahi atu, oia nei te toù o te pō
me i te ava i pao ai tēia mea.
22 Atià à, u haaemièe mai te mou vehine kē me mātou.
I te pōpōuì tika, ua hee âtou io te ana tūpāpaù.
23 Aòè i koàka ia âtou to Īa nino.
Ua hua me to âtou peàu mai : ua ìte âtou i nā anera
te i peàu ia âtou u pohuè Ietu.
24 Ua hee tahipito me i vāveka o mātou
io te ana tūpāpaù.
Ua ìte âtou i te mea i peàuìa e te tau vehine.
O Ietu à, aòè âtou i ìte ia Īa. »
25 U peàu Ietu ia âua : « E te poì pōtako !
E te koekoe tevee i te haatià i te mea paotū
ta te tau peroheta i peàu atu.
26 Aòè à tēia mamae e mamae ai te Kirito
no te tomo io to Īa kāìè ? »
27 U haavivini Ietu i te tekao i patuìa i ùka o Īa
i òto o te Hāmani tapu, e tīmata aa
ma te haatuhuka i nā hāmani vāàna e Moite,
ma hope iho vāàna e te tau Perofeta hakatahi.
28 U tata âtou me te pāpuahaè i èià to âtou tahaìa.
Ua hano Ietu e hee mamao atu.
29 Ua tāî âua ia Īa e peàu ana : « A noho me māua.
Ua èva te â. E kaò ai te òumati. »
Ua uu Ietu no te noho me âua.
30 Ohia io he tapukai me âua,
ua too Ietu i te haraoa, u haahuaèkaèka,
ua vahi me te tuku atu ia âua.
31 U pepeùìa to âua kikomata : ua ìte âua ia Ietu.
Ua kaò anamai Ietu me i to âua aò.
32 U peàpeàu atu peàpeàu mai âua :
« Aòè à u veàveà me he ahi to tāua koekoe
i te ava u tekao Īa me tāua ma io he vaanui ?
I te ava o to Īa haatuhuka i te Hāmani tapu ? »
33 Ua tū ponihoo âua no te hua i Ierutaremi.
U koàka mai ia âua te Tīònohuu ma tahi
putuputuìa me te huaa e noho aa me âtou.
34 U peàu âtou ia âua : « Tiàtohu nui.
Ua tū hakaùa te Hatu. U haaìte ia Īa iho ia Petero. »
35 Ua haki atu me âua i te mea i pao ma io he vaanui,
pēhea to âua ìte ia Ietu i te ava vahiìa o te haraoa.
Comments est propulsé par CComment