TOMINIKA E TOÙ NO PAKATE
TATAUÌA O TE HĀMANI HANA A TE TAU ÀPOTORO
5, 27-32.40-41
27 U aahiìa mai te tau Àpotoro i mua o te Tuneteri.
Ua ūi atu te Tāuà nui ia âtou pēènei :
28 « U haatapu nui mātou ia ôtou
no te hakako i te ikoa o Ietu.
Atià, u haapī ôtou ia Ierutaremi
me ta ôtou tekao haatuhuka.
U makimaki ôtou e haatopa mai i ùka o mātou
i te toto o hua ènana ? »
29 U haahua atu Petero me te tau Àpotoro :
« E mea meitaì aè te aotahi i te Etua
i te aotahi atu i te tau ènana.
30 Na te Etua o to mātou tau tupuna
i haatū hakaùa ia Ietu,
ta ôtou i haamate ma te pāokapeka ia Īa.
31 Na te mana o to Īa ìma oko,
u haatiketike te Etua ia Ietu
me te haaìò ia Īa e Hakaìki nui me te Haapohuè,
etià e koàka mai ia Iraene te hāìuìa koekoe
me te tukuìa o te tau mīkeo.
32 O mātou te tau ènana haatiàtohu i hua tau hana,
mātou me te Kuhane Meitaì
ta te Etua i tuku mai i te tau ènana i aotahi ia Īa. »
40 U vevaò âtou i te tau Àpotoro,
u peàu no te tā ia âtou.
I muì iho, u haatapu âtou no te tekao ma te ikoa o Ietu
me te avai e hee atu âtou.
41 O âua à, ua paekē me io te Tuneteri,
pī i te koakoa nui mēìa ua vaeìa âtou
no te amo i te mamae i uē i te ikoa o Ietu.
TARAMO 29 (30) 3-4, 5-6b, 6cd.12, 13
E te Hatu e, u haatiketike au ia Òe te i haatū mai ia ù. 29, 2
3 I te ava e taaàu to ù èo io Òe,
E te Hatu, tu ù Etua e, u haameitaì mai.
4 Ua taki mai Òe me io he ōpata,
U haapohuè mai me io te ana o te tūpāpaù.
5 A hahi i te Hatu, ôtou, e te poì haatià e.
A haahuaèkaèka ma te haaòno nui i to Īa ikoa.
6 E ava poto to te Etua pekē,
Ma te òa o te pohuè to Īa haameitaì.
I te ahiahi, e tahe te vaimata,
Ma te pōpōuì te taaàu koakoa.
12 U haaìò Òe i tu ù uēuē me he â koìka.
Ua veti i tu ù kahu pēpē no te uhi mai me te koakoa.
13 A taaàu i te koakoa, e tu ù kuhane.
Umoì au e mutu pu, a haakoìka no te Hatu.
E hahi au hakaēa koè i te Hatu, tu ù Etua.
U haahuaèkaèka au ia Òe, e te Hatu e.
TATAUÌA O TE HĀMANI APOKARUPO 5, 11-14
O au nei o Ioane,
11 e tiòhi mau i te mea ta ù i ìte, ua òko i te èo
o te nuiìa o te anera,
e tū aa vii pu o te nohoka kāìè,
te tau Ânimara me te tau Kōkooūa. Tautini, tini âtou,
aòè e koàka i te ènana te tatau i te nuiìa.
12 U taaàu âtou paotū, pēènei : « Ua hei nui e ìò
i te Àrenio i ùtunahēakaìa, te māàma, te tapavaù,
te mana, te ìi, te hahi, te kāìè, te haahuaèkaèka ! »
13 Ua òko au i te tau mēmau paotū i pēpenaìa,
to te àki, to te henua, to te havaiki, to te tainui,
ua òko au ia âtou paotū e hīmene aa, pēènei :
« I Tēia io he nohoka kāìè, i te Àrenio,
te hahi, te haameitaì, te kāìè, te hakaìkiìa,
ma te tau tai hakatahi a tihe ananu ! »
14 U peàu nā Ânimara e hā : Àmene !
Ua moe haatona te mou Kōkooūa no te atoratio.
ALLELUIA. ALLELUIA
Ua tū hakaùa te Kirito,
te Pēpena o te àki me te henua,
te Haapohuè o te tau ènana paotū.
ÈVANERIO O IETU KIRITO VĀÀNA E IOANE 21, 1-19
Akoè à 21, 1-14
1 I te mou pō i muì iho,
u hakaìte hakaùa Ietu ia Īa anaiho
i to Īa huaa kouâ i te hiku o te tai Tiperiata.
U haapaoìa pēènei.
2 U putuputuìa Timone Petero, Toma,
te i vevaòìa Titimo,
Nataere no Kana i te Henua Karirea,
nā tama tokoùa a Ihepetea,
me nā kouâ kē tokoùa : tokohitu âtou paotū.
3 U peàu Timone Petero ia âtou :
« E hee au i te àvaika. »
Ua haahua atu âtou : « O mātou tītahi me òe. »
Ua hee âtou me te piki io he vaka.
Atià, i hua pō nei, aòè he ika i koàka mai.
4 I te oìoì tika mākehukehu, e tū aa Ietu io he one,
aòè te tau kouâ i ìte o Ietu hua ènana.
5 U peàu Ietu ia âtou :
« E nā tama e. Enā me ta ôtou mea kai ? »
U haahua atu âtou : « Aòè. »
6 U peàu Ietu ia âtou : « A haatopa i te ùpeà
ma te kēkē ìma oko o te vaka. E koàka mai ia ôtou. »
Ua haatopa âtou i te ùpeà.
Aòè i koàka ia âtou te toi mēìa i te nuiìa o te ika.
7 U peàu te kouâ haataetaeìa e Ietu ia Petero :
« O te Hatu. »
Ia òko Petero o te Hatu te io he one,
ua taka i to īa kahu,
ua takiìa to īa kahu no te hana.
Ua tūhao anamai Petero io he tai.
8 Te tau kouâ kē e noho aa io he vaa,
ua tihe âtou me te toi i te ùpeà pī i te ika.
Me he e ìma tekau maò to âtou mamao me io he one.
9 Ia tau âtou i uta, ua ìte i te ahi e uà aa.
Enā te ika i ùka o te kāàhu ahi me nā haraoa.
10 U peàu Ietu ia âtou :
« A kave mai i te ika ta ôtou
i koàka i kapo nei. »
11 Ua piki hakaùa Timone Petero i ùka o te vaka
me to īa toi i uta i te ùpeà pī i te tau ika kaùoo.
Hānere e ìma ònohuu ma toù âtou.
E aha à te nuiìa, aòè te ùpeà i motu.
12 U peàu Ietu ia âtou : « A mai. A kai ! »
Aòè tītahi o âtou i ūi atu : « O ai òe ? »
Na te mea, ua ìte meitaì âtou o Īa te Hatu.
13 U haatata mai Ietu, ua too i te haraoa
me to Īa tuku atu ia âtou. Atii anaiho i te ika.
14 Te toù tēnei o to Ietu hakaìteìa ia Īa
i te tau kouâ ma hope o to Īa Tūhakaùaìa
me i vāveka o te huaa mamate.
15 Ia pao te kaiìa, u peàu Ietu ia Timone Petero :
« E Timone e, tama a Iona,
e aha, ua nui atu to òe kāòha ia ù
i to âtou nei kāòha mai ? »
Ua hua atu Timone ia Ietu :
« E te Hatu e, ua ìte Òe i to ù kāòha ia Òe. »
U peàu Ietu ia īa : « A hākai òe i tu ù tau punua mutō. »
16 Ua ūi hakaùa Ietu ia īa :
« E Timone e, tama a Iona, e aha, u kāòha òe ia ù ? »
U hua atu Timone ia Ietu :
« E te Hatu e, ua ìte Òe i to ù kāòha īa Òe. »
U peàu Ietu ia īa : « A tiaki i tu ù naho mutō. »
17 Ua ūi hakaùa Ietu ia Timone, te toù o te ūiìa :
« E Timone e, tama a Iona, e aha, u kāòha òe ia ù ? »
U mamae te koekoe o Petero mēìa i te toù o te ūiìa.
« E aha, u kāòha òe ia ù ? »
Ua haahua atu īa :
« E te Hatu e, aòè he mea e kaò ia Òe.
Ua ìte Òe i to ù kāòha ia Òe. »
U peàu Ietu ia īa : « A tiaki i tu ù naho mutō. »
18 E tekao tiàtohu ta ù nei ia òe :
I te ava o to òe nino hou, ua taka i te kooi,
ua hee na òe ta òe vāàna i to òe makimaki.
Atià, ia kooūa òe, e hapai òe i nā ìma
etià e taka kooi tītahi ènana ia òe
no te aahi io te vahi aòè òe i makimaki. »
19 U peàu Ietu i hua tekao mea hakaìte
i te hakatu o to Petero mateìa no te haakāìè i te Etua.
Ia pao hua tekao, u peàu Ietu : « A ūtaì mai ! »
Comments est propulsé par CComment