TOMINIKA ÒNOHUU MA ONO O TE AVA MA TE ÈHUA
TATAUÌA O TE HĀMANI TENETE 18, 1-10
1 Io te maaâkau peàuìa Mapere,
u hakaìte te Hatu Etua ia Īa iho ia Aparahamo, pēènei à :
I te oatea nui, tū toitoi me veàveà te òumati,
ua noho Aparahamo io te avaputa o to īa haèâ.
2 E heau aa, ua ìte Aparahamo i nā ènana tootoù
e maô aa i mua toitoi o īa.
U maô Aparahamo me to īa tohuti io âtou.
Ua moe haatona io he tuaèpo e peàu aa pēènei :
3 « E te hakaìki e, me he mea u èkaèka òe e tutuki me au,
aua e taha pu. A hakaēa mea iti io to òe tāvini nei.
4 Enā e kaveìa mai tītahi mea vai
no te hooi i to ôtou tau vaevae.
A hakaēa ôtou me te moe ma aò o te tumuâkau nei.
5 Enā e hano mai au i te mea haraoa.
A haaēa i te menava, a atenoho me te moû,
epō e hee atu ôtou.
Na te mea, ua tihe mai ôtou io ta ôtou tāvini. »
Ua haahua mai âtou : « Meitaì. A hana vāàna i ta òe i peàu. »
6 Ua hano Aparahamo haatutuki me Tara, ta īa vehine,
io te haèâ me to īa peàu atu :
« A too anamai e toù hakatu haraoa tee,
a oi me te tao mai i te haraoa. »
7 A tahi a koi Aparahamo io te naho piha.
Ua too īa i tītahi kaiū piha taùtaù, òpio,
me to īa tuku atu i te tāvini no te nunu mai.
8 Ua too īa i tītahi mea vaiū heò, te vaiū tee,
Ua tuku īa i te înaì me te mea kai i mua o nā ènana tootoù.
Ua kai âtou. O Aparahamo à, ua tū īa
i te vahi maù o te tumuâkau, e tiòhi aa ia âtou.
9 Ua ūiūi âtou ia īa : « I hea Tara, ta òe vehine ? »
U haahua Aparahamo : « Enā īa i òto o te haèâ. »
10 U peàu hakaùa te Hatu :
« Ma tēnei èhua a tihe mai, e hua mai au io òe.
I tēia ava, ua hānau te tama a Tara, ta òe vehine, e tamaòa. »
TARAMO 15 (14), 1a.2, 3b-4b, 5
U tata mai Òe, e te Hatu e, a haatūtaì Òe ia mātou me Òe.
1 E te Hatu e, o ai òa e noho io to Òe haè ?
2 Te ènana e hana vāàna i te toitoi noa.
Te ènana e haki ananu i te tekao tiàtohu.
3 Aòè īa e hao i te mēmau o to īa teina.
Aòè īa e tekao kaipīpiò i te hoa.
4 E haamee īa i te ènana ta te Etua e tute.
E pakaihi i te ènana haataetae i te Etua.
5 Aòè īa e kamo i te ènana te i àiê io īa.
U titii īa i te moni utu i te kaipīpiò.
Te ènana e hana atii e haamau i to īa pohuèìa.
TATAUÌA TE HĀMANI A PAURO PEÀTO I TO KOROHA 1, 24-28
E tu ù tau tuàne tuehine.
24 U koakoa au mēìa i to ù memae i uē ia ôtou.
Ua hano au e haapao i te nuiìa o te memae
e memae ai tātou e tahi me te Kirito
no te meitaì o to Īa Tino, te Èkaretia.
25 Ua ìò au te tāvini o hua Èkaretia,
vāàna i te makimaki o te Etua
te i vae ia ù no te toko ia ôtou,
ma te haavivini mai i te tiàtohu o te Tekao a te Etua.
26 Oia hoì te makimaki hakanā o te Etua
te i hakaìtekoèìa òmua
i te tau tai ènana tehito, i te tau tupuna i aò aè.
I tēnei, u hakiìa e te Etua i to Īa mataèinaa peàto.
27 U makimaki te Etua e haapuàha i mua o to Īa mataèinaa
i te kāìè taetae nui o hua tekao hakanā
ia hakakoìa i te poì êteni, pēènei :
ua noho i vāveka o ôtou te Kirito,
te tumu o te kāìè ta ôtou e tetaì nei.
28 U hakako mātou i hua Kirito,
e oonaki ana i te tau ènana tikitahi,
e haamāàma atu ia âtou nui,
etià e meitaì aè te hakatu pohuè
o te tau ènana ia ôtoa i òto o te Kirito.
ALLELUIA ALLELUIA
cf.Ap.3,20
Mamau te ènana i òko i te èo o te Hatu
me te pepeù i to īa avaputa :
ua koàka ia īa te koakoa me te èkaèka.
ÈVANERIO O IETU KIRITO VĀÀNA E RUKA 10, 38-42
I tēia mou pō,
38 e hiti aa i Ierutaremi Ietu me to Īa tau kouâ,
ua tomo âtou i òto o te pāpuahaè.
U apuu tītahi vehine ia Ietu io to īa haè.
O Marata te ikoa o hua vehine.
39 Enā me to īa teina, o Maria te ikoa,
te i kaapee pii o nā vaevae o Ietu
e hakaòko aa i ta Īa tekao.
40 U kokouō Marata mēìa i te nuiìa o te hana tāvini atu.
E tū ana īa, u peàu :
« E te Hatu e, aha he mea tupepaka no Òe,
u avai to ù teina e hana au tootahi i te hana tāvini ?
A peàu ia īa no te toko mai. »
41 U haahua Ietu ia īa :
« E Marata, Marata e,
u haapaòpaò pu òe me te kokouō
no te nuiìa o te mēmau.
42 E àva te mou mēmau. Ua àva e tahi anaè.
Ua vae Maria i te hope taetae meitaì atu.
Aòè e takiìa me io īa. »
Comments est propulsé par CComment