Nā ponatekao , he mou ponatekao èo tahiti ; umoì ia haahana hakaùa ìa e tātou nui !
1) - Ārea
I te tapa hāmani 61 o te kāputuèo a te Pū tuhuka èo tahiti, e ìte tātou : ārea, espace, intervalle ; couloir ; zone.
Ia haaèoìa mai ma he èo ènana, e ìò he ponatekao ava i ìteìa io te tapa hāmani 22 o te « Ponatekao tāpapaìa » a te èpikopo Le Cléac’h : , fissure, fente ; défilé, passe, passage, col ; intervalle.
U meitaì atu e peàu « I te ava (o te meàma) no Pohe… » i te kōava o « I te ārea no mars… ». Totahi atu, ua ìte meitaì tātou aê he mea te ponatekao ārea ma he èo ènana.
2) - Taime
I òto o te ùa o te avetekao, u haahanaìa te ponatekao taime.
I te tapa hāmani 443 o te kāputuèo a te Pū tuhuka èo tahiti, e ìte tātou : taime, me i òto mai o te èo menike time /taim/ : « moment, laps de temps ; (nombre de) fois ; salaire, rémunération ; intérêts (bancaires) ; dommages et intérêts ».
Ma he èo ènana, u haahanaìa to mua haaviviniìa anaè. Atii nei, ua ìte meitaì tātou he hua mea anaiho nā ponatekao e ùa me te ponatekao èo ènana ava. Aê he mea te ponatekao taime ma he èo ènana.
Te mea taetae oko, e ùa hakatu tiòhi i hua ponatekao ava :
- o te ava-hora : « I te ava vākai »
- o te ava-vahi : « Te avaputa ». Atii anaiho, e koàka te haahana i te ponatekao « kōava ».
A pīòmi înei no te tatau i te tumu tekao ma he èo farani !
Patuìa e Jacques Iakopo Pelleau i te èhua 2016.
I te 08/08/2022, u haatoitoiìa te patuhei vāàna i te tau aahiìa a te Haè tuhuka èo ènana.