TOMINIKA TEKAU MA ONO O TE AVA MA TE ÈHUA

(Â tapu 29 no Māhinaihea 2024)

TOMOÌA : A.22

TARAMO 19 (18) : U toitoi te Tekao a te Hatu, e haakoakoa âtou i te koekoe.

Kio Vānana : E te Hatu e, he tiàtohu ta òe Tekao. A haapeàto mai ia mātou i òto o hua tiàtohu.

Pure a te poì haatià : Me he auahi kekaa, ua hiti ta mātou pure io Òe, e te Hatu e.

KŌMŌNIŌ : D.36

Hīmene haahuaèkaèka : D.13

PAHIÌA : V.79 (Pō e ono) 

V.32

TOMINIKA TEKAU MA ONO O TE AVA MA TE ÈHUA

TATAUÌA O TE HĀMANI A MOITE PEÀUÌA NŪMERA               11, 25-29

²⁵      Ua iho te Hatu Etua ma òto o te ao tapu.

        U tekao Īa me Moite.

        Atià, ua too Īa i te Kuhane e ihi nei i òto o Moite

        me to Īa tuha io te hitu tīònohuu mou ènana,

        oia hoì o te tau kōkooūa haatee i te mataèinaa.

        Ua iho mai te Kuhane i ùka o âtou.

        No te ava poto, u tekao peroheta to âtou.

²⁶      Enā tokoùa ènana i nonoho io te pāpua haèâ.

        O Eretate me Metate to âua ikoa.

        Ua ihi te kuhane i òto o âua.

        E aha à aòè âua i tihe io te haèâ o te tutukiìa,

        o âua tokoùa tikitahi i vaeìa me i vāveka o te papa kōkooūa.

        Ma òto o te pāpua haèâ ta âua e peroheta atu.

²⁷      U haakoi tītahi māhaì no te kave i te tekao hou ia Moite

        e peàu aa : « Enā Eretate atii me Metate

        e vii aa i te pāpua me he peroheta âua. »

²⁸      O Iotuē, tama na Nuna, e tāvini aa ia Moite

        me i to īa houìa, u tekao mai :

        « E Moite, e tu ù hakaìki e, a humu òe ia âua. »

²⁹      Atià, u peàu Moite ia īa : « Aha, u keitani òe mēìa ia ù ?

        E too ta ù e pōpahi te Hatu i to Īa Kuhane i ùka o âtou paotū,

        vāàna te haaìò to Īa mataèinaa, e mataèinaa peroheta. »

TARAMO 19 (18) 8, 10, 12-13, 14

U toitoi te Tekao a te Hatu, e haakoakoa âtou i te koekoe.       19,9

⁸       U toitoi noa te ture o te Hatu,

        Na Īa e haahou i to tātou ìi.

        U tiàtohu te Tekao a te Hatu

        Te i haamāàma i te poì avai noa.

¹⁰      U taìtaì te pakaihiìa o te Etua,

        E noho mau ananu to Īa tau puku.

        U toitoi te tekao paotū a te Hatu :

        He māàma âtou no te haavā i te ènana.

¹²      U haamāàmaìa to òe tāvini i hua tekao.

        E te Hatu e, ma te aotahi atu, e tapavaù īa.

¹³      O ai te i ìte i to īa iho tekateka ?

        No to ù māhaè i tahipito, a haataìtaì mai.

¹⁴      A titii me io ù i te kāìè pu.

        Umoì e haateeìa au i te maakau pē.

        Aua e hava au i te teka hakanā.

        Aua e hemo au i te mīkeo nui.

TATAUÌA O TE HĀMANI A IAKOPO      5, 1-6

¹       A hakaòko mai ôtou, e te poì tapavaù.

        A uēuē, a mateteka ôtou. E nui ai to ôtou ìno.

        U tata èka te ava e topa te ìno nui i ùka o ôtou.

²       Ua èhu pē to ôtou taetae.

        Ua kai te tau manumanu i to ôtou tau kahu.

³       Ua tupu me he mea te nenie to ôtou moni kiki

        me te moni tavaìè.

        O hua tupu haanenie te i hakatio ia ôtou,

        o īa te i kai me he ahi i to ôtou kiko.

        U haapuke ôtou i te moni,

        e aha à o īa nei te ava paoìa o te ao nei.

⁴       Ua kohi te poì hana i te tau puku io to ôtou pāpua,

        aòè ôtou i tuku atu nei i to âtou moni utu.

        E taaàu hua moni utu e hano huke i te umu.

        U tihe io te puaìka o te Hatu o te aomāàma

        te takiìa èo o te poì hana e vavaò nei i te tuki.

5         I te ao nei, ua ùmihi ôtou i te koakoa, te èkaèka,

          te haakāìè pu, ua tuha ôtou i te kaiìamau,

        e aha à, i tēnei ava, u haamākakaìa te nuiìa o te ènana.

⁶       U haavā haamate ôtou i te ènana koekoe toitoi,

        te ènana piò koè. U kukumi haamate ôtou ia īa,

        e tōtohe koè, me ôtou, hua ènana.

ALLELUIA ALLELUIA

                                                                                          cf.In.17,17

E te Hatu e, he tiàtohu ta òe Tekao.

A haapeàto mai ia mātou i òto o hua tiàtohu.

EVANERIO O IETU KIRITO VĀÀNA E MAREKO    9, 38-43.45.47-48

³⁸      I tēia mou pō, u peàu Ioane ia Ietu :

        « E Tuhuka e, ua ìte mātou i te ènana

        e tute aa i te tiaporo ma to òe ikoa.

        Ohia aòè īa i kē me mātou, u haapākeka mātou ia īa. »

³⁹      U peàu Ietu : « Umoì ôtou e haapākeka ia īa.

        Aòè te ènana e hana i te hana mana ma to ù ikoa,

        i muì iho, e kaipipiò ponihoo hua ènana ia ù.

⁴⁰      Te ènana aòè i tōua mai ia tātou,

        ua kē hua ènana me tātou.

⁴¹      Te ènana e tuku ia ôtou i te ipu vai maoì,

        na te mea ua kē ôtou me te Kirito,

        he tekao tiàtohu ta ù nei ia ôtou : aòè e kaò to īa tuki.

⁴²      Te ènana i hakapahi pē

        i tītahi me io te poì iti noa te i haatià,

        mea meitaì aè no īa e kitiiìa to īa kākī

        me te keâ nunui no te titii atu io he tai.

⁴³      Ia hakapahi to òe ìma oko ia òe i te piò, a kokoti.

        Mea meitaì aè no òe te tomo ìma motu io he pohuè

        i te topa me to òe nā îìma e ùa io he Kehena,

        i èià te ahi mate koè.

⁴⁵      Ia hakapahi to òe vaevae ia òe i te piò, a kokoti.

        Mea meitaì aè no òe te tomo vaekoki io he pohuè

        i te topa me nā vaevae e ùa io he Kehena.

⁴⁷      Ia hakapahi to òe kikomata ia òe i te piò, a tīkaò.

        Mea meitaì aè no òe te tomo mata koìò

        i òto o te Patirēia o te Etua

        i te topa me nā kikomata e ùa io he Kehena.

        I èià hoì aòè e koè te iko, aòè e mate te ahi.