TOMINIKA E HITU O TE AVA MA TE ÈHUA
TATAUÌA O TO MUA HĀMANI A TAMUERA 26, 2.7-9.12-13.22-23
2 Ua hiti Tauro te hakaìki i te henua ataha, o Tiha te ikoa.
E tahi hee me īa e toù tautini kape me i te Henua Iraene.
7 I te pō, Tavite me Apihai to īa hoa,
ua uu âua i òto o te pāpua o Tauro.
U hiamoe te hakaìki. Ua tū to īa taa pii te upoko.
Ma to īa kaokao, u hiamoe te hakaìki Apenere
me to īa pūpū kape tiaki.
8 U peàu Apihai ia Tavite :
« I tēnei pō, u haaìò te Etua io to òe îìma
i te ènana tōua ia òe.
Epō, me to īa iho taa, e patia au ia īa. E tahi tā anaè. »
9 Atià, u haahua Tavite : « Umoì e kukumi ia īa.
No te mākaka òe i te hakaìki paùìa e te Etua,
e topa te tuki pē i ùka o òe. »
12 Ua too Tavite i te taa me te hue vai i pataa te upoko o Tauro.
Ua hee atu âua. Aòè i ìte e tahi, aòè i vaa e tahi kape tiaki.
U hiamoe âtou nui.
Na te Etua i haatau i te hiamoe ma ùka o âtou.
13 Ua hiti Tavite ma ùka he tuaivi e tū aa io he kapua,
i te vahi memao me i èià.
22 U vevaò Tavite ia Tauro e taaàu pēènei :
« E te hakaìki e. Înei te taa.
A hano mai tītahi māhaì. A mai.
23 Na te Etua e haahua i te ènana vāàna i to īa koekoe toitoi,
hakahae koè. Na te Etua i haaìò ia òe i tu ù nā îìma.
Aòè au i kukumi i te hakaìki paùìa e te Etua. »
TARAMO 103 (102),1-2, 3-4, 8.10, 12-13
He moû, he kāòha anaè te Hatu. 103,8
1 E tu ù kuhane, a haameitaì i te Hatu,
Me io he koekoe, a haameitaì i to Īa ikoa peàto.
2 A haameitaì i te Hatu, e tu ù kuhane,
Aua e māhaè e tahi o to Īa vaièiìa.
3 U vevete te Hatu i to òe tau mīkeo paotū.
U haakoè te Hatu i te memae o to òe nino.
4 Na Īa i taki ia òe me io te ana tūpāpaù.
Na Īa i vāhī ia òe i te kāòha me te hinenaò.
8 He moû, he kāòha te hakatu o te Hatu.
U haatevee i to Īa pekē : ua pī i te kāòha.
10 U te e utu mai te Hatu vāàna i to tātou tau piò.
Aòè e huke Īa i te umu ia tātou poì mīkeo.
12 Me he memao te tiheìa o te òumati me i to īa kaòìa,
U tioà te Etua i te mīkeo memao me io tātou.
13 Me he mea u kāòha te motua i to īa tama,
Hua hakatu to te Hatu kāòha i te ènana pakaihi ia Īa.
TATAUÌA O TO MUA HĀMANI I TO KORINETIA 15, 45-49
E tu ù tau tuàne tuehine
45 Ua patuìa hoì pēènei :
« O Atamo, e ènana to mua i pēpenaìa he mēmau pohuè.
Atià, te Atamo paoìa, he kuhane īa me te tumu o te pohuè. »
46 To mua, ua tihe te mēmau pohuè,
ma hope mai, te taetae atu : te kuhane te i vaièi atu i te pohuè.
47 O Atamo matamua, u kāneaìa me te èpo,
he ènana me i te henua nei.
O Atamo e ùa, me io he àki mai īa.
48 Te tau ènana me i te henua nei, u hakatu âtou
me te ènana kāneaìa me te èpo.
Te tau ènana me io he àki,
e hakatu hoì âtou me hua ènana me io he àki mai.
49 Me he mea u haaìòìa tātou hakatu
me te ènana kāneaìa me te èpo,
ma tītahi â, e ìò hoì tātou hakatu
me te ènana me io he àki mai.
ALLELUIA ALLELUIA
cf. In. 13,34
U avai te Hatu Ietu ia tātou i te Tekao Hou Mai :
« A kāòha atu kāòha mai te hoa i te hoa,
me he mea u kāòha au ia ôtou. »
ÈVANERIO O IETU KIRITO VĀÀNA E RUKA 6, 27-38
I tēia mou pō, u peàu Ietu i te haètoa nui pēènei :
27 « O ôtou, e te poì e hakaòko mai, u peàu au ia ôtou :
a kāòha i te tau ènana e tōtōua me ôtou.
A vaièi atu i te poì e haahaa ia ôtou.
28 A haameitaì i te poì e haaìno ia ôtou.
A pure i uē i te poì e kaipīpiò ia ôtou.
29 Ia papaki te ènana i to òe papaìka,
avai ia īa e pehi i te papaìka kē.
Ia hao te ènana i to òe kahu uhi pu,
umoì e kaikino i to òe kahu òa.
30 Ia kaiape tītahi io òe, a vaièi atu ia īa.
Ia too te ènana i to òe mēmau,
umoì òe e haapākeka i hua mēmau ta te ènana i too pu.
31 A hana ôtou i uē i te ènana hua mea anaiho
e kōhoà ôtou e hana ta âtou i uē ia ôtou iho.
32 Anoa u kāòha atu ôtou i te tau ènana
te i kāòha mai ia ôtou,
e aha te tuki e vaièiìa mai e te Etua ?
U kāòha atu hoì me te poì mīkeo
i te tau ènana te i kāòha mai ia âtou.
33 Me he mea e toko atu ôtou i te tau ènana te i toko mai ia ôtou,
e aha te tuki e vaièiìa mai e te Etua ?
Hua mea anaiho hoì ta te poì mīkeo.
34 Me he mea e ao ôtou i te àiê mai te hoa ia ôtou
na te mea e koàka ia īa te haahua atu,
e aha te tuki e vaièiìa mai e te Etua ?
Atii ta te poì mīkeo : ua tuku atu âtou i te mēmau,
e tetaì aa e tukuìa mai hua mea anaiho.
35 O ôtou à, a kāòha i te tau ènana tōtōua me ôtou.
A vaièi atu, a ao ôtou e àiê mai te hoa ia ôtou,
koè te tetaì ana e haahuaìa mai e tahi mea anaiho.
Ma èià, e nui aè to ôtou tuki,
e ìò ôtou he tau tama o te Tiketike nui
te i vaièi atu i te poì kāòha koè me te poì pē.
36 A tūtū to ôtou hakāòha me te hakāòha o to ôtou Motua.
37 Umoì ôtou e haavā i te hoa, aòè ôtou e haavāìa.
Umoì ôtou e hakatio atu, aòè ôtou e hakatioìa mai.
A vevete i te tau tekateka, e veveteìa to ôtou tekateka.
38 A tuku atu ôtou, e tukuìa mai ia ôtou.
E tukuìa ia ôtou i te hope taetae pī nui,
òomimeitaììa, ûûìa, e meìki aa mēìa i te pī nui.
Na te mea, vāàna i to ôtou vaièi atu i tahipito,
e vaièiìa mai ia ôtou.