TE KOÌKA O TE HUAAPEÀTO
1 NO ÂVEA
TATAUÌA O TE HĀMANI APOKARUPO 7, 2-4.9-14
2 Ua ìte au i te anera e hiti aa me i te kēkē tiheìa òumati.
Ua kave īa i te mēmau no te òomi i te hakatu
o te Etua pohuè.
3 U taaàu oko ki īa i nā anera tokohā te i pōpahiìa
me te mana no te haapē i te henua me te tai.
U peàu te anera pēènei : « Umoì ôtou e vāvahi
i te henua, te tai me te tau tumuâkau.
To mua, e òomi tātou i te hakatu i ùka o te àe
o te tau tāvini o to tātou Etua »
4 Ua òko au i te nuiìa o te ènana i òomiìa :
hānere e ùa tekau ma hā tautini âtou nui.
Ònohuu ma ùa tautini hoì me io te ònohuu ma ùa
ati kē, ati kē o te mataèinaa Iraene.
9 I muì iho, ua ìte au i te haètoa ènana nui oko, nui oko.
Aòè e koàka i te ènana te tatau tokohia âtou
me io te tau mataèinaa kē, te tau ati kē,
te tau henua kē, te tau èo kē, èo kē.
Ua tū âtou i te aò o te Nohoka kāìè atii me te Àrenio.
Ua uhiìa âtou me te kahu tavaìè
me te makamaka èitā io to âtou îìma.
10 U hīmene âtou me te èo oko, pēènei :
« A pohuè to tātou Etua
e tū nei i ùka o te Nohoka kāìè. A pohuè te Àrenio. »
11 Te tau anera paotū i putuputuìa vii pu
o te Nohoka kāìè,
te tau Kōkooūa me nā Ânimara e hā,
ua moe haatona i àò te aò no te atoratio i te Etua.
12 U peàu âtou : « Àmene.
I to tātou Etua, te hahi, te kāìè,
te māàma, te haahuaèkaèka, te mana me te ìi,
ma te tau tai a tihe ananu. Àmene. »
13 A tahi a pohā te èo o tītahi Kooūa i peàu mai :
« O ai tēnei haètoa uhiìa me te kahu tavaìè ?
Me i hea mai âtou ? »
14 U haahua atu au ia īa : « E te hakaìki e. O òe te i ìte. »
U peàu mai :
« Ua tihe mai âtou me io te tōua haamamae nui oko.
U hooi âtou me te haataìtaì i to âtou kahu
i òto o te toto o te Àrenio.
TARAMO 23 (24) 1-6
Oia nei te mataèinaa kaùoo i ùmihi ia Òe.
1 Na te Etua te aomāàma me to īa taetae paotū,
Te henua me te tau ènana e noho nei i òto.
2 Na Īa i haatū i te henua me io te tau vai.
Na Īa i haamau keue koè ma ùka o te tai.
3 O ai te ènana e hiti i ùka o te tuaivi o te Hatu ?
O ai e koàka te noho io he vahi tapu ?
4 Te ènana koekoe taìtaì me te îìma piò koè.
Te ènana i vevaò teka koè i te ikoa o te Hatu.
5 Me io te Hatu, e ìò mai to īa meitaì.
Me io te Etua, e ìò mai to īa toitoiìa.
6 O īa te mataèinaa e ùmihi nei i te Hatu.
Oia te poì e ùmihi nei i te mata o te Etua.
TATAUÌA O TO MUA HĀMANI A IOANE PEÀTO
1 In 3, 1-3
1 A kaituto me te mahaò
i te nuiìa o to te Etua kāòha ia tātou.
Ua ao Īa e apaìa tātou e tau tama na Īa.
Ua ìò hoì tātou e tau tama tiàtohu na Īa.
Oia te piò aòè to te ao nei e apuu ia tātou.
Pēhea òa te koàka ? Aòè âtou i ìte i te Etua.
2 E tu ù tau hoa tāhia e, i tēnei, e tama tātou a te Etua.
E aha òa to tātou hakatu ma tītahi â ?
U te ìte meitaì tātou.
E tahi anaiho mea tiàtohu :
i te ava e hakaìte Ietu Kirito ia Īa iho,
e ìò tātou hakatu me Īa,
na te mea, mata he mata, e ìte ai tātou ia Īa.
3 Te ènana e tataì ana i hua hakatu pohuè,
e haataìtaì ia īa iho,
e tūtū hoì īa me to Ietu Kirito taìtaììa. »
ALLELUIA. ALLELUIA Mt 11, 28
A tihe mai io ù, ôtou nui te i paòpaò hae
mēìa i te toko o te amoka. Na ù e haaàkaàka
ÈVANERIO O IETU KIRITO VĀÀNA E MATEO 5, 1-12a
I tēia mou pō,
1 ia ìte Ietu i te haètoa nui,
ua hiti Īa i ùka o te tuaivi.
U noho Īa.
U haatata mai to Īa tau kouâ.
2 U pohā te èo o Ietu. U hakako ia âtou.
U peàu Īa pēènei :
3 Mamau te poì koekoe veve,
no âtou te Patirēia o te àki.
4 Mamau te poì koekoe moû,
e ìò ia âtou te henua peàuìa e te Etua.
5 Mamau te poì e uēuē nei, e haakoèìa ai to âtou uē.
6 Mamau te poì e ūo to âtou kōhoà me te aotahi atu
i te makimaki o te Etua,
e vaièiìa mai ia âtou vāàna i to âtou kōhoà.
7 Mamau te poì koekoe hakāòha atu, e hakāòhaìa mai.
8 Mamau te poì koekoe taìtaì, e ìte âtou i te Etua.
9 Mamau te poì haaneke i te moû,
e peàuìa âtou e tau tama a te Etua.
10 Mamau te poì e mākakaìa mēìa i to âtou aotahi atu
i te makimaki o te Etua,
no âtou te Patirēia o te àki.
11 Mamau ôtou me he mea u haapēìa, u mākakaìa,
me he mea u pōtohopuìa mēìa he kouâ ôtou no ù.
12 A koakoa, a èkaèka.
E nui ai to ôtou tuki meitaì i òto o te àki. »