A) - I te tapa hāmani 172 - I o ta īa kōtūòmia, u patu mai te èpikopo Dordillon :
*- Mahaò : admirable, étonnant ; admirer, être rempli d’admiration ; louer quelqu’un ; s’étonner ; pē/pī i te mahaò : être grandement surpris, ravi, étonné de…
B) - Ua ìte hoì tātou i te âkakai « Le Petit Prince » patuìa e Antoine de Saint-Exupéry. I te èhua 2010, u haaèoìa mai hua hāmani ma he èo ènata e Tehaumate Tetahiotupa me te tau tuhuka èo ènana, to īa mou hoa. O « Te Tama hakaìki iti » te ikoa ma he èo ènana ; haè òomi kōtūòmia : Haere Pō, Tahiti, 2010.
I ìò ai hua kōtūòmia he mēmau taetae oko no tātou no te nuiìa o te kāneaìa avetekao me te tau ponatekao o tēnei tai hou enā i òto me he mea te mou kio ma hope iho.
*- Tapa hāmani 10 : « J’ai vu un petit bonhomme tout à fait extraordinaire… » / « Me to ù ìte e tahi kaiū ènana mahaò nui… »
*- Tapa hāmani 10 : « …avec des yeux tout ronds d’étonnement ». / « …me nā mou mata pī i te mahaò ».
*- Tapa hāmani 16 : « Ça ne pouvait pas m’étonner beaucoup. » / « Aê hoì au i mahaò oko. »
C) - E koàka atii ia tātou e hakaìte atu i to tātou mahaò me te ponatekao « kiiete ».
1) - Te vahi oko, aê koàka ia tātou hua ponatekao i òto o te kāputuèo i òomiìa i te èhua 1903 ; e koàka anaiho i òto o te kāputuèo no 1931.
*- Tapa hāmani 221-I : Kiiete : frisson, sursaut, surprise ; frissonner, tressaillir. « U kiiete Toma i te haametaù. » / « Toma frissonne/frissonna de peur ».
2) - I òto o « Te Tama Hakāìki iti » e ìte tātou :
*- Tapa hāmani 9 : « Alors vous imaginez ma surprise quand… » / « E vivini ana ôtou i to ù kiiete i… »
*- Tapa hāmani 13 : « Mais je fus bien surpris de voir s’illuminer le visage de mon jeune juge. » / « Mea à, o au te mea i kiiete i to ù ìteìa (i) te puàhaìa o te mata o to ù haavā māhaì hou. »
D) - I òto o nā mou kāputuèo e ùa, e ìte tātou i te ponatekao « emièe », e hua mea ananu te haaviviniìa me « kiiete ».
I tēnei tai hou, u hakaìteìa tītahi haaviviniìa kē, oia hoì « être choqué » me he mea ua ìte tātou io te tapa hāmani 26 o te hāmani tāpapa ponatekao a te haèhāmani Ioteve Peàto no Taiohae. U aahiìa tēna hana e Poi Taata ; i òto o hua kāputuèo, u hakaìteìa te tau ponatekao ma he èo ènana, ma he èo farani me te èo menike. Me te nuiìa o te ata kanahau !
E) - E koàka atii ia tātou te hakaìte atu i to tātou mahaò e haahana ana i te mau mehea :
1) - « Kanahau ! », « O ! Kanahau ! »
Tītahi tekao hakaìte. I te mou pō òmua, e peàuìa aa tokotahi anaè te ponatekao « kanahau ». I tēnei, u haahanaìa mea hakaìte i te hakatu o te tau mea paotū.
2) - Te mou hakatu kē :
« Ae ! Ae ! Ae ! Ae ! »
« Auē te mahaò ! »
« Ihe te mei heò ! », « Eve te mei heò ! »
« Ihea te emièe ! »
« E ao paa ! » (« C’est étonnant ! » - Dordillon, tapa hāmani 116-I)
3) - Ma òto o « Te tama Hakaìki iti » :
*- Tapa hāmani 13 : « Tiens ! Le petit mouton s’est endormi. » / « Eō ! U hiamoe te kaiū mutō. »
*- Tapa hāmani 15 : « Quelle drôle d’idée ! » / « Tēia maakau huìkē ! »
4) - Me he mea u mahaò òe i hua tau mea, e peàu mai oti òe : « Ae ? »
5) - Tekao paoìa, enā ma òto o nā èo e ùa, e ùa kāneaìa tata èka tītahi me tītahi. Ma he èo farani : « Les bras m’en tombent ! », ma he èo ènana : « Ua motu tu ù îìma ! » (Dordillon, p. 191-I)
F) - Mea haanui aè i to tātou ìte i te èo, a tiòhi meitaì tātou i hua mou ponatekao èo tahiti « māere » me « fa’ahiahia ». O « stupéfiant, merveilleux, admirable ; être rempli d’admiration » te mou haaviviniìa i tukuìa mai e te pū tuhuka èo tahiti.
No te èpikopo Dordillon, mea kē hua mou ponatekao. Oia nei to īa maakau i òto o ta īa kāputuèo.
*- Io he tapa hāmani 187-II, no « stupéfiant », u patuìa ai « Mea emièe, mea haametaù ».
*- Io he tapa hāmani 133-II, no « merveilleux » me « merveille », u patuìa ai « Mea kanahau oko, mea mākivikivi ».
*- Io he tapa hāmani 9-I, no « admirable », e tatau tātou « kanahau » me « mahaò ».
I tēnei tai hou, e vivini meitaì te tau tama ènana paotū i te tau hakatu kē o hua mou ponatekao.
G) - Tekao paoìa (oti)...
I tēnei, ia ìte tātou i te mea kanahau pao, aua tātou e haahana hakaùa i nā mou ponatekao « fa’ahiahia » me « māere » ! A haahana à tātou i nā mou ponatekao èo ènana e ùa, o « mākivikivi » me « mahaò ».
Atii nei, ma mua o tītahi hana meitaì oko, e koàka ia tātou te peàu : « Mea mākivikivi ! » akoè à « Mea mahaò ! » akoè à « E ao paa ! ».
Umoì tātou ia tūhaè te ponatekao « HARARĀ » haataetae oko ìa e to Ua Pou…
Patuìa e Jacques Iakopo Pelleau i te èhua 2016.
U haatoitoiìa te patuhei vāàna i te tau aahiìa a te Haè tuhuka èo ènana i te 21/08/2022.