U hanaìa tēnei mou hakapeipeiìa kaikai e te tau moì o te pāòto Afat o te Cetad no Ua Pou me José Pennont, to âtou tumu hakako nunuìa kaikai i te èhua 2000-2001, oia hoì o Chantal Aka, Vanessa Hikutini, Marie-Antoinette Kautai, Yolande Peetau, Stella Teikitutoua, Anne-Marie Tamarii, Lise Tamarii me José Pennont, to âtou tumu hakako i haatià mai ia ù i te hakaìte atu i hua mou haapeipeiìa kaikai ènana.
Te hakapeipeiìa kaikai n°1 : te menē nunu kōèhi hakaènana
Te tau mēmau no te hana :
Mou poo kiko menē : e vakavaka, e pūhā mua me te kiko. E tahi kiro me te hope.
Te aniani, 120 karamu. Te rai : e hā kōpū. E ùa àu roriē. E toù èhi.
Te paatai me te pepa. Te kari (vāàna e to koe makimaki).
Pēhea te hanaìa :
*- E kotikoti te inaì hakapoopoo, e tuku i òto o te hue paapaa.
*- E paatai hakahei te kava me te nunu ; ia pupuhi, e hakamāeka i te ahi me te tiaki tihe i te mitiìa o te vai.
*- E heka i te èhi, e òoi no te koàka mai i te kōèhi.
*- E kotia i te aniani me te rai, me te tuku i òto o te hue, me i te kōèhi.
*- E koàka ia koe ia tuku i te roriē me te pepa me te kari vāàna e to òe mōmona.
*- Ia pao, ua nunu, ia pupuhi te kōèhi, ua veà ; a ako aha mea hei te paatai.
*- E kai veàveà me te karahi, akoè à me te mei, meika, taò.
Te hakapeipeiìa kaikai n°2 : te uà nunu pataka hakaènana
Te tau mēmau no te hana :
E hā uà
E kao kai
E ùa èhi mea kānea i te kōèhi
Te aniani
E tahi hītoro
Te perehī
Te aniani àu
Te paatai
Te pepa
Pēhea te hanaìa :
*- E kotia ma vāveka, ma te òaìa o te ùa.
E taki i te kato o te one me io he upoko atii me io he koekoe tutae tihe atu io he veò.
*- A heka i te èhi me te òoi no te koàka mai i te kōèhi. U avai i òto o te kooka.
A kotikoti hakavaavaa i te aniani, te aniani àu me te perehī ; a tuku i òto o te kooka.
U kāvaì ia âtou paotū, te paatai me te pepa vāàna i te mea i heiìa e tātou.
U avai io he vahi kamaii.
*- A nunu pataka i te tau ùa. E tuku òmua i te kēkē o te tua o te ùa ;
ia veà, ua huì i tītahi kēkē. Ia veà, ua taki, ua tuku io he kooka.
*- A ikia i te mitihaari i ùka iho.
*- E kai veàveà me te kai tupu, akoè à me te karaihi veàveà.
Te hakapeipeiìa kaikai n°3 : te puaka toto hakaènana
Te tau mēmau no te hana :
Te tau kaiū poo inaì puaka : te vakavaka, te umauma me te koekoe, 1,6kg
kao kai, 1dl
aniani, 120g
èka kina, e tahi kata
rai, e hā kōpū
e tahi rita toto puaka
te paatai me te pepa
Pēhea te hanaìa :
*- E kotikoti hakavaavaa i te inaì paotū me te rai me te aniani me te èka kina.
*- A hakaveàveà i te kao kai i òto o tītahi hue paapaa.
*- A tuku atu i te inaì ; a kāvohi meitaì ; umoì e hakaveà oko !
*- A tuku iho i te aniani me te pepa me tītahi hope vai.
*- Ia pupuhi toitoi, a tuku iho i te èka me te hakamoû i te ahi. A paatai vāàna e to koe mōmona.
*- A iiki atu i te toto puaka, e nunu tihe atu i te veàìa.
*- E kai veàveà me te meika nunu vai, te mei, akoè à te karaihi.
Te hakapeipeiìa kaikai n°4 : te toetoe nunu kōèhi
Te tau mēmau no te hana :
*- E ùa kiro toetoe,
*- E tahi rita kōèhi,
*- Te paatai me te pepa.
Pēhea te hanaìa :
*- E hooi i te tau toetoe.
*- A tuku i òto o te hue paapaa, u paatai hakahei.
*- A tuku me te kōèhi.
*- Ua nunu e ìma tihe ònohuu miniti te òaìa.
*- E kai veàveà me te mei, te karahi (Akoè à te kaitupu e koàka mai)
Te hakapeipeiìa kaikai n°5 : te ika nunu kōèhi
Te tau mēmau no te hana :
*- E ika oàoà, 1.600kg
*- E hā hītoro
*- Te aniani, 150 g
*- Te rai, e hā kōpū
*- Te roriē, e toù àu
*- Te paatai, te pepa, te kari
*- E tahi rita kōèhi
Pēhea te hanaìa :
*- E unahi, e hooi i te ika ; kotia hakapoopoo, a tuku i òto o te hue vai; a paatai me te nunu.
*- E heka i te èhi me te òoi no te koàka mai i te kōèhi.
*- Ia veà te ika, e ikia i te vai me io he hue.
*- A kotia i te aniani me te rai me te tuku i òto o te hue atii me te kōèhi.
*- E koàka ia koe ia tuku te roriē, te pepa me te kari vāàna i to koe mōmona.
*- Ia pao, ua nunu hakapupuhi i te kōèhi.
*- A ako e aha mea hei te paatai.
*- Ua nunu e ìma tihe ònohuu miniti te òaìa.
*- E kai veàveà me te meika nunu vai, te mei, te karahi (akoè à te kaitupu ta koe e koàka mai).
Te hakapeipeiìa kaikai n°5 : te karaihi nunu kōèhi
Te tau mēmau no te hana :
*- Karaihi, 800 karamu
*- Mānini, 400 karamu
*- E tahi hope rita kōèhi
Pēhea te hanaìa :
*- E hooi i te karaihi me te nunu hakanui me te vai mea hakakukuu.
*- Ia veà, u mānini me te tuku me te kōèhi ; u avai io he ahi moû.
*- E kai veàveà akoè à kamaii (me te ika mito)
Te hakapeipeiìa kaikai N° 7 : te heikai taò
Te tau mēmau no te hana :
*- E ùa kiro taò
*- Mānini, 500 karamu
*- E tahi hope rita kōèhi
Pēhea te hanaìa :
*- E taki i te kii o te taò me te kotia hakahei i te poopoo ; e hooi me te tuku i òto o te hue paapaa.
*- E nunu i te mānini hakapukiki me te tuku me te vai mea hakatahe.
*- Ia pūkiki meitaì, u ikia i òto he hue ; ua nunu.
*- Ia veà te taò, ua ikia te kōèhi, ua tuku me te mānini me te nunu ananu.
Ia pupuhi, e hakamoû i te ahi, e tiaki ana tihe i te mitikiaìa o te tai.
*- E kai veàveà (me te ika mito)
KAIKAI MEITAÌ !
A pīòmi înei no te tatau i te tau hakapeipeiìa ma he èo farani !
Patuìa e Jacques Iakopo Pelleau i te èhua 2016.
I te 08/08/2022, u haatoitoiìa te patuhei vāàna i te tau aahiìa a te Haè tuhuka èo ènana.