I – E aha tēnei tohua niutavavā hou ?

Aha u òkoìa e ôtou te tekao hou ? U peùa iho nei tītahi hāoè i te tohua niutavavā i ùka he èo ènana ; e mea mahaò à ! I peheaìa tenā hana ? Auana tahipito oti, i na ai i haatià ia tupu hua mea ? Aha aê à na tātou ènana tumu te haamaumau i to tātou èo ?

E kiiete me te pekē oti tahipito, me te peàu atu « E aha ta òe nei ? ». Aua ôtou e kiiete ; aòè anaiho au i tihe mai me te koekoe haatuhuka atu, u tihe hoì mai au me te koekoe haapāpaku. Mea nui ta ù ūiūiìa, i tēnei, e ùmihi nei au i te tau tekao haahua mai.

Me he mea aê te èo farani na te poì farani anaiho, oia hoì, aê mana to te poì farani i ùka he èo farani, atii aê te èo ènana haataetaeìa anaiho e te tau ènana tumu, te tau tama ènana. Tu ù maakau, te tau èo ma he aomāàma, he puke èo aomāàma, he taetae tupuna me i kiu mai, mea àvaìa atu àvaìa mai e te tiàtohu o te huaa ènana. Te toitoiìa, o au, e tahi hāoè, mea au au i te èo, u hinenaò au i te èo, u mitoe au i te èo ; ma te òaìa o te tau èhua, ua ìò te èo ènana he èo hōupo, he hāika hōupo no ù.

II – O ai o Jacques Iakopo Pelleau ?

E te tau ènana me te tau ènata e, kāòha nui tātou paotū ! O Jacques Pelleau au nei ; ua apa to Ua Pou ia ù o Pero, akoè à o Sake. Mēìa o Iakopo to ù ikoa papatema, a apa mai i tēnei ikoa ! Vaièi nui.

Me haahenua au i Taiohae i tēnei, u vaeìa mai e au te hakatu tekao a to Nuku Hiva me te aotahi atu me te pakaihi atu i te tau aahiìa patuhei a te Haè tuhuka èo ènana. Atià, e aha à te ìi o ta ù hana i ùka he èo, ua ìte meitaì au enā me te ava u tekateka nui au ; aê au i hakaìka ai, mea ìi aè to ù makimaki i to ù hakaìka. No èià, o to ù hīa, ia haakoè mai ôtou i to ù tau teka me te haatoitoi atu.

III – Te hana i Ua Pou, 1995-2001

I Ua Pou, i te èhua 1995 to ù tiheìa mai òmua i te Henua ènana ; i hua ava, he tumu hakako èo menike au io he haèhāmani tuaùa i tai ; e ono èhua to ù nohoìa, me ta ù hana tumu i èià. Aòè i òa atu, u tīmata au i te hakako mai ia ù i te èo ènana no te mea aê au i makimaki hakaùa e noho pū me he tiki, ma te vivini koè e aha te mea peàuìa e te tau ènana vii pu o au.

I tēia â, i tēia â, e patu nei au i te tau ponatekao hou òkoìa e au ; u tihe ihoā mai au i te tau hora hakakoìa èo ènana a te tōìki hāmani o te pāòto e toù. U haahoa au me te tumu hakako, o Chrétienne Ohotoua, me to īa hakapahi mai i ta ù hana i ùka he èo.

Ma te ìma o te èhua, u patu au i te kōtūòmia iti mea hakako atu i te èo ; hua kōtūòmia a ù, me i òto mai o te kōtūòmia haavivini i te èo ènana patuìa e te Mihi Zewen i 1988. Na te vivini haèhāmani me to īa toko, oia hoì o Alain Bera me Christian Aubert, te i too i te amoka òomiìa. U hakako atu māua me Chrétienne e tahi pūpū hāoè, me he tekau ènana i hua pūpū ; e tahi ahiahi i te âtapu, u putuputu mai mātou io he haèhāmani no te hakakoìa : na Chrétienne te hana i ùka he ìte tekao, na ù te hana i ùka o te kāneaìa èo me te papaìa tekao.

IV – Te hana i te Henua farani, 2001-2005

I te èhua 2001 to ù titiiìa ia Ua Pou me to ù huaìa atu i te Henua farani no te hana ananu i ta ù hana tumu. E hā èhua to ù nohoìa i èià me to ù huaìa mai i te Henua ènana no te ava vakai òa i tēia èhua, i tēia èhua, ma te hakaea koè i ta ù hana i ùka he èo. Mea oko to ù makimaki no te hua mai ananu mea à, aòè i ìteìa ahea, akoè à pēhea.

Ma te òa o to ù nohoìa i Ua Pou, e tīòhi mamate nei au i te tau hakaìteìa ata èo tahiti a te Pū R.F.O ; koè nui au i makimaki e kaò hua hana me to ù hoko mai i te kōtūòmia me te tau ìpine mea hakako mai i te èo tahiti ia ù (te hāmani hakakoìa èo tahiti a Mirose Paia me Jacques Vernaudon). Te mea taetae oko haakoàkaìa mai e au, u hakaìte mai hua hana mea moe tata èka nā èo e ùa ma òto he kāneaìa me te papaìatekao me te tekaotuhi ; atià, mea kē ananu.

Me hua hana, u vivini mai au i te nuiìa o te ponatekao èo tahiti haahanaìa e te ènana tumu. E aha à te tau piò i tupu ai hua hana, a haakoè tātou nui i tenā hakatu haatekeo i te èo ènana ; atii me te tau ponatekao èo farani i tomo mai i òto he èo. He mea pakaihi koè i te èo tumu hua hakatu hana.

V - Te hana i Taiohae, me i te èhua 2005

1) – Io he haèhāmani « Te Tau Vaeìa »

I te èhua 2005 to ù hua hakaùa ìa mai i te Henua ènana, oia hoì i Taiohae no te hana ananu i ta ù hakakoìa èo menike. No te toko o ta ù hana hāmani, aê i koàka ia ù te tīmata hakaùa anamai i te hana i ùka he èo ènana. I te ùa o te èhua, mai à, mai à, u tīmata hakaùa au ma te haatoitoi i ta ù kōtūòmia hakakoìa me te haahei atu vāàna i te tau ture patuhei a te Haè tuhuka èo ènana.

I te èhua 2007-2008, u makimaki te vivini upoko haèhāmani, oia hoì o Guy Chassignol, ia haamauìa e au tītahi hakakoìa kē mea āpuu i te tau tōìki hāmani, aê âtou e tekao i te èo ènana. Ua ao mai au ; me he e toù ònohuu tōìki io hua pāòto. I hua èhua, u ape mai tītahi hoa farani ia hakako atu au ia âtou i te èo ènana ; i te tīmataìa, me he tekau ènana te i tihe mai.

Atii aa, u tihe mai te ava hakaeaìa nui i ta ù hana tumu, oia hoì te meàma Takuùa o 2009.

2) – Te ava hakaeaìa hana, 2009

a) – Te hana i ùka he èo ènana

Ma hope iho, u huìkē to ù hakatu pohuèìa ; mea nui te hana io he haè me te pāpua. U makimaki au e haapao i te tau hana kē aòè i koàka ai ia ù te hana atu i te ava o ta ù hana tumu. U koutee atu au i te Henua farani no te haatutuki me te toeka o to ù huaahaè.

Mea òa te ava hana koè i ùka o te èo ; aòè i koè te makimaki me i te ūo. Te toitoiìa, u paòpaò au mēìa i te tokoìa mai koè, te haahuaìa mai koè i to ù tau apeìa. Me he mea aòè i koàka mai ia ù te hee i mua.

I tītahi â à, u kiiete au me to ù tīmata hakaùa i te hana ; aòè i hakaea atu nei. I hua ava, u tihe mai io ù tītahi mou hoa farani me to âtou peàu mai ia hakako atu au ia âtou i te èo ènana. U ao mai au. Me i hua ava mai, e hakako nei au ia âtou io to ù haè, e tahi, akoè à e ùa hakakoìa i tēia âtapu, i tēia âtapu i te ahiahi. Mai à, mai à u iti mai, iti mai te nūmera o te poì i tihe mai, i haakoè ai au i hua hana ma te paoìa o te èhua 2015.

b) – Te hana me te tau manihii hāoè

Ma te tīmataìa o te èhua 2013, u ape mai tītahi maka me i òto mai o te pūpū āpuu manihii i ùka o Aranui ia toko mai au ia âtou i òto o ta âtou hakaìteìa vahi taetae oko o Nuku Hiva nei ; e ùa apeìa te tahi ma hope o te tahi. Epō te tiòhi meitaì i ta ù tau kōtūòmia, ua ao mai au me to ù aahi atu i te pūpū manihii èo farani, me he e ono ònohuu âtou. U koakoa nui au i hua hana i kāìè oko ai au. Te mea hou à, u vivini meitaì au he mea māeka to ù ìte i te ìte haaènana kākiu. Mea haamāàma mai ia ù, u tīmata pōponihoo au e tatau i te nuiìa o te kōtūòmia i patuìa i ùka o te tau ènana kākiu ma te òaìa o nā hānere èhua e ùa i pao atu aa. Me to ù haapuke i te nuiìa o te haamāàmaìa taetae oko i òto o ta ù òouià.

Tōtahi atu te nuiìa o te tau tekao hunahuna me te tau tekao kaùoo haapukeìa e au, tōtahi atu te oko o to ù ūo i te hee i mua.

c) – Te hana me te tau hoa

U tīmata au i te haaòko haamau i nā pū haamevaha èo e ùa e tū nei i Taiohae, oia hoì te pū haamevaha èo a te Henua ènana e vai nei i Vainaho, atii me te pū haamevaha èo a te Ekaretia katoriko, oia hoì Te Òko Nui. Enā me te â, u kapohaamau mai au i nā mou kio tekao poto me te tuku i òto o to ù òouià me te haaòko haamoû oko etià e koàka mai te vivini meitaì i te tau mea i peàuìa.

Enā te ava ua hano au e hakatoo io te Haè Tuhuka èo ènana e tū nei i Vainaho ; i èià, u tutuki au me Julien Tumuehitu Tamarii, he tuhuka èo īa, me to īa tokoìa mai ia ù. Mēìa i to īa koekoe matavaièi, u haahoa māua. Tōtahi atu e tahi èhua māua i te hānauìa, tōtahi atu e tumu pure io he paroita īa ; he ènana pāòkoòko.

E tītahi hoa kē to ù, o Teupooteii Teikivaeoho to īa ikoa ; e noho īa i Paris me to īa hua hae i Taiohae. I Paris, u hakako atu īa i te èo ènana io he haèhāmani tiketike nui, oia hoì « Dauphine ». Te mou â înei īa, e tutuki māua e tahi â i te âtapu me to īa haamāàma mai ia ù i ùka o te tau mea aê au i vivini meitaì.

Mea veìveì hoì te ènana me Julien me Teupoo u koàka ia âua te haavivini mai i te tau mea kaò o te èo ènana.

Me he mea ta ôtou i ìte, aê nui te kōtūòmia patuìa ma he èo ènana ; te nuiìa he mou kōtūòmia a te Ekaretia katoriko, me « Te Tekao a te Etua ». Ma te òa o to ù nohoìa i Ua Pou, u tatau mamate au i te tiàtohu o te 869 tapa hāmani. Nui nui te ponatekao kanahau i òto atii me te tau kāneaìa avetekao taetae oko.

E koàka ia ôtou tītahi kōtūòmia kē io he hopeka « Tau Hāmani Taetae Oko » o ta ù tohua niutavavā « http://www.te-eo.com/ ».

d) - Te hana i ùka o te pū niutavavā : te haamevahaìa o te èo me te Âkakai ènana.

U pēpenaìa tēnei tohua niutavavā etià e koàna ia ù te hakaìte atu i to ù maakau i ùka o te hakatu pohuè o to ôtou èo, to tātou èo, te èo ènana, TE ÈO ; oia te tumu i makimaki ai au e apa i te tohua niutavavā i te ùa o te ikoa « Te Èo, Te Kāìèìa ». Tōtahi atu, u makimaki oko au ia tuku mai ôtou i to ôtou maakau no te àva atu àva mai i te māàma o hua èo.

Te hakahīa ta ù e haatau nei, ia pohuè ananu, ia neke atu, ia haamevahaìa atu te èo ènana ma nā motu e ono o te Henua ènana, hava koè i te tau ponatekao hei koè me i òto mai o te mou èo kē. A oho te ìi tātou ! Àua tātou e hakaìka ! Ia tutuki tātou me te ponatekao moenahu akoè à ìte koè ìa, umoì tātou e haahana i te ponatekao hāoè akoè à te ponatekao tahiti ! A ùmihi mai tātou i te ponatekao e hei : ua pī nā kāputuèo a te èpikopo Dordillon me ta te Haè Tuhuka èo ènana i te nuiìa o te ponatekao taetae me te kanahau oko me te heitete ; a haahanaìa e tātou nui !

A tutuki hakaùa tātou i ùka o te tohua niutavavā me ta ù paka hāmani Facebook « Te Èo », a pīòmi înei !

Me makimaki òe e ìte i te hakatu toitoi o ta ù hana paotū ma he èo farani, a pīòmi înei !

Patuìa e Jacques Iakopo Pelleau.
U haatoitoiìa te patuhei vāàna i te tau aahiìa a te Haè tuhuka èo ènana i te 08/08/2022.

.