TOMINIKA E VAÙ O TE AVA MA TE ÈHUA
TATAUÌA O PENETIRA, TE TUHUKA TEKAO 27, 4-7
4 E tūtūìa te haraoa no te haapaekē i te kākāno me te kaù.
Atii hoì te ènana te i pohā te èo, u pupuà to īa tau tekateka.
5 E tūtūìa te hue keâ i òto o te umu haaveàveàìa e te ahi.
Atii hoì e koàka ia òe e haavā i te ènana ma ta īa tekao.
6 Na te puku e ìteìa te hakatu o te tumuâkau.
Na te tekao a te ènana, ua ìteìa te hakatu o to īa koekoe.
7 Aua òe e haakāìè vave i te ènana,
tiaki epō e òkoìa ta īa tekao.
E haapuàha te tekao i te ènana tiàtohu.
TARAMO 92(91), 2-3, 13-14, 15-16
E te Hatu e, u hei nui te hīmene hahi i to Òe ikoa. 92,2
2 U hei nui te haahuaèkaèka i te Hatu,
Te hīmene hahi i to Òe ikoa, e te Etua tiketike.
3 I te pōpōuì, e haamevaha i te òko o to Òe kāòha,
I te ahiahi te haatiàtohu i to Òe vaièiìa.
13 E tupu te ènana toitoi me he tumuèhi,
E hohoà aa i to īa tau makamaka,
14 Hakatu me te âkau o te tuaivi Ripano,
Nanuìa io te pāpua tapu o to tātou Etua.
15 E hua īa i te puku tihe to īa kooūa pē,
Pī i te èpau hakatu me to te nino hou,
16 No te haamevaha i te tekao : « U toitoi te Hatu.
Aòè e hakahae te Etua, to ù motukeâ. »
TATAUÌA O TO MUA HĀMANI I TO KORINETIA 15, 54-58
E tu ù tau tuàne, tuehine e,
E huìkēìa te mēmau pao vave
me te haaìòìa he mēmau paona koè.
E huìkēìa te mēmau mate vave
me te haaìòìa he mēmau mate koè.
54 Ia tihe hua ava o te pohuè mau ananu,
ia haahuìkēìa te mēmau mate vave
no te haaìò he mēmau te i mate koè,
u haatoitoiìa te tekao o te Hāmani tapu te i peàu pēènei :
« U tuàki te pohuè. Ua kaò te mateìa.
55 E te mateìa e, i hea to òe mana ?
E te mateìa e, i hea to òe taa tekeo ? »
56 O te mīkeo te taa tekeo o te mateìa ;
O te Ture te ìi o te mīkeo.
57 A haahuaèkaèka tātou i te Etua.
Na Īa hoì i vaièi mai no te tuàki i te mateìa
i òto o to tātou Hatu Ietu Kirito.
58 No èià, e tu ù tau tuàne tuehine tāhia e,
a tohe mau paòpaò koè
te haahee i mua i te hana haakāìè i te Hatu.
Ua ìte ôtou io Īa te tuki meitaì o to ôtou hana.
ALLELUIA ALLELUIA
cf. Fi. 2,15-16
A tiaki mau i te tekao haapohuè :
O ôtou te àma e pupuà no te tūìka i to te ao nei.
ÈVANERIO O IETU KIRITO VĀÀNA E RUKA 6, 39-45
I tēia mou pō,
39 u peàu hakaùa Ietu i to Īa tau kouâ i te tekao haapupuà.
« Aha, e koàka i te ènana matapō te aahi i te matapō ?
E vivii hoì âua tokoùa io he ōpata.
40 Aòè te kouâ ma ùka aè o to īa tuhuka.
Te kouâ meitaì noa, u hakatu toitoi me to īa tuhuka.
41 No te aha e tiòhi òe i te kaù vaavaa
te i òto o te kikomata o to òe teina ?
Aòè òe e ìte i te papapoho te i òto o to òe kikomata ?
42 Pēhea òa e koàka ia òe te peàu i to òe teina :
E tu ù teina e, epō a taki au i te kaù
me i òto o to òe kikomata,
o òe te i ìte koè i te papapoho
te i òto o to òe anaiho kikomata ?
E te ènana koekoe e ùa, a taki òmua i te papapoho
me i òto o to òe kikomata, a tahi a ìte tāhakahaka òe
mea taki i te kaù te i òto o te kikomata o to òe teina.
43 Aòè te tumuâkau meitaì e hua i te puku pē.
Atii hoì aòè te tumuâkau pē e hua i te puku meitaì.
44 Na te puku i hakaìte aè i te hakatu o te tumuâkau.
Aòè e kohiìa te pukufiko me io te maaèitā taataa.
Aòè e kohiìa te pukuvino me io te èitā keoho.
45 Te ènana meitaì, ua too i te mea meitaì
me io te tau taetae meitaì te i òto o to īa koekoe.
Te ènana pē, ua too i te mea pē
me io to īa puke taetae pē.
U pohā te èo o te ènana no te tekao
vāàna i te mea haapī nui i to īa koekoe.