TOMINIKA TO MUA O TE AVA HAAOKE
TATAUÌA O TE HĀMANI TEUTERO 26, 4-10
4 U peàu Moite i te mataèinaa Iraene pēènei :
Ia ùtuna òe i te Etua i te tau puku
kohiìa to mua i te ava mei nui,
e too te tāuà i te kete me i to òe îìma
no te tuku atu i mua o te hātaa pure
o te Hatu, to òe Etua.
5 O òe, a haahitipona me te peàu pēènei :
« Me io te Henua Aramo tu ù motua.
He ènana hee ananu, hee ananu īa.
Ua iho īa i te Henua Ekipito.
I èià, ua noho īa me he manihii.
He mou ènana anaè to īa huaahaè.
E noho aa io hua henua,
ua ìò âtou he mataèinaa mana, nui oko.
6 U haamākaka mai te poì Ekipito
me te haaveve nui ia tātou,
u haaìòìa tātou he poì mōèhu.
7 U taaàu tātou io te Hatu, te Etua o to tātou tau tupuna.
Ua òko Īa i to tātou èo,
ua ìte Īa e poì io he àì nui tātou,
poì haamākakaìa, òomiìa e te mamae.
8 Na te Etua i haauu ia tātou i vaho
me io te Henua Ekipito
ma te mana o to Īa îìma,
ma te tau hana haahaametaù,
te tau hakatu mahaò, me te tau hana mana.
9 Na te Hatu i aahi ia tātou io tēnei vahi.
Na Īa i vaièi mai i tēnei henua,
he henua i èià e tahe pu te vaiū me te mānini tikauè.
10 E te Hatu e, i tēnei, e ùtuna au
i te puku to mua ta ù i kohi io he henua
ta Òe i vaièi mai. »
TARAMO 90 (91) 1-2, 10-11, 12-13, 14-15
E te Hatu e, i te ava e uēuē ai mātou,
a tū Òe ma to mātou kaokao. 90, 15
1 Ua noho au io te vahi maù o te Tiketike,
U hakaēa au io te maù o te Mana nui,
2 U peàu au i te Hatu : O Òe to ù toko.
To ù motukeâ, te Etua e haatià nei au.
10 Aòè te ìno e haatata me Òe.
Aòè te mamae e uu io to Òe haè.
11 Ua pahi te Etua i to Īa tau anera
No te tiaki i te vaanui o to Òe tahaìa.
12 E amo te tau anera ia Òe i ùka o to âtou îìma,
Oa tukia to Òe vaevae me te keâ.
13 E haapaìha Òe i te koropio me te puhihenua.
E keàhi Òe i te reone me te tarakone.
14 Ohia u haapii te ènana me au, na ù e haapohuè ia īa.
Ohia u pakaihi i to ù ikoa, e toko nei au ia īa.
15 U vevaò mai īa, e apuu au ia īa.
I te ava e uēuē īa, e tū nei au ma to īa kaokao.
TATAUÌA O TE HĀMANI A PAURO PEÀTO I TO ROMA
10, 8-13
E tu ù tau tuàne tuehine,
8 E aha te mea kē i peàuìa ? Pēènei :
« Ua tata me òe te Tekao a te Etua.
Enā hua tekao io to òe haha, i òto o to òe koekoe. »
Oia hoì te tekao a te haatià ta tātou i hakako nei.
9 No to òe peàu ma te haha : O Ietu te Hatu.
Ia haatià òe io he koekoe i te mea,
u haatū hakaùa te Etua ia Ietu
me i vāveka o te huaa mamate, e haapohuèìa òe.
10 U haatià hoì tātou me io he koekoe
etià e haatoitoi te Etua ia tātou i mua o Īa.
Ua haki atu ma he haha i hua haatià,
etià e haapohuè te Etua ia tātou.
11 U peàu te Hāmani tapu pēènei :
« Te ènana e haatià i te Etua,
aòè e hika ai hua ènana. »
12 No èià, hua mea anaiho te tau ènana i mua o te Etua,
e aha à ati Iuta tahipito, Hereni tahipito.
E tahi Hatu anaè no tātou paotū,
te i vaièi atu i te nuiìa o to Īa taetae
i te tau ènana e vevaò ia Īa.
13 Vāàna i te Hāmani tapu :
« E pohuè te ènana e vevaò i te ikoa o te Hatu. »
HĪMENE VĀNANA Mt 4,4
Aòè te ènana e pohuè i te haraoa anaè.
E pohuè īa i te tekao me io te haha o te Etua.
ÈVANERIO O IETU KIRITO VĀÀNA E RUKA 4, 1-13
1 I tēia mou pō, me i te kaavai Ioritane,
ua hua mai Ietu pī i te Kuhane Meitaì.
Aahiìa e te Kuhane Meitaì, ua vii Īa i te henua ataha.
2 I èià, ma te òa e hā ònohuu pō,
u haamōtiiìa Ietu e te tiaporo.
I hua tau pō, aòè Īa i kai i tītahi mea.
Ia pao tenā mou pō, ua mate Ietu i te oke.
3 U peàu te tiaporo ia Īa :
« Me he mea e Tama òe a te Etua,
a peàu i te keâ nei a ìò mea haraoa. »
4 U haahua Ietu ia īa :
« Ua patuìa : aòè te ènana e pohuè i te haraoa anaè. »
5 U haahiti te tiaporo ia Ietu i ùka atu
me to īa haaìte ma te tiòhiìa e tahi
i te tau henua ia ôtoa o te aomāàma vii pu.
6 U peàu te tiaporo ia Ietu :
« E tuku atu au ia òe i te mana no te vivini
ia âtou kōtoa atii me to âtou kāìè paotū.
Ua ìò hoì ia ù hua mana me te kāìè.
E koàka ia ù e tuku atu i te ènana
vāàna e to ù makimaki.
7 E ìò ia òe hua mea ia ôtoa
me he mea e moe haatona òe i mua o au nei
me te pakaihi mai. »
8 U haahua Ietu me te peàu ia īa :
« U patuìa : A moe haatona i mua o te Hatu,
to òe Etua, me te pakaihi ia Īa anaè. »
9 U aahi te tiaporo ia Ietu i Ierutaremi.
U haatū ia Īa i ùka o te pūkeo o te Hiero me te peàu :
« Me he mea e Tama òe a te Etua,
a tūhao me i înei i aò nui.
10 U patuìa hoì pēènei : E peàu Īa i te tau anera
no te tiòhi meitaì ia Òe.
11 U patuhakaùaìa : E amo âtou ia Òe
i ùka o to âtou îìma,
oa tukia to Òe vaevae me te keâ.
12 U haahua Ietu i te tiaporo : « U peàuìa pēènei :
Umoì òe e haamōtii i te Hatu, to òe Etua. »
13 Ia pao te haamōtiiìa a te tiaporo
ma te tau hakatu mōtii kē paotū,
ua pae īa me io Ietu tihe i te ava i haaheiìa.