TOMINIKA E ÙA O TE AVA HAAOKE
TATAUÌA O TE HĀMANI A MOITE PEÀUÌA TENETE 15, 5-12.17-18
5 U aahi te Hatu ia Aparahamo i vaho o to īa haèâ
me to Īa peàu pēènei : « A tiòhi i te ataàki.
A tatau i te nuiìa o te hetū, me koàka ia òe.
Atii te nuiìa o to òe ati i ùka aè. »
6 U haatià Aparahamo i te Hatu Etua.
Ma èià, u haaìòìa Aparahamo
he ènana toitoi noa i mua o te Hatu Etua.
7 A tahi a peàu Īa pēènei : « O au te Hatu.
Na ù i haauu ia òe i vaho me i te pāpuahaè Ura,
me te Henua Karete,
etià e haaìò ia òe te hei o tēnei henua. »
8 U haahua atu Aparahamo : « E te Hatu, e tu ù Etua e,
pēhea tu ù ìte e ìò au te hei o tēnei henua ? »
9 U peàu te Etua :
« A too òe i te kōivi piha hou, e toù o īa èhua,
e tahi menē e toù èhua, e tahi koimaa e toù èhua,
e tahi manu kuku, e tahi manu pihō. »
10 Ua too Aparahamo i tēnei tau ânimara paotū,
ua vahi ia âtou ma vāveka ;
ua tuku i tītahi hope i mua o tītahi hope.
Atià, aòè īa i vahi i nā manu.
11 Ua tau te mou manu kai înaì i ùka o tenā tau poo kiko.
U tiehi Aparahamo ia âtou.
12 Ia èva te â, i te kaòìa o te òumati,
ua tau te hiamoe oko i ùka o Aparahamo me to īa hiamoe.
Ma òto o te pō keevō, u moemoeā hauhau Aparahamo me te haametaù nui.
17 I te pō, u pōtako nui te henua.
I vāveka o te tau poopoo kiko ânimara haapāveiìa,
ua taha tītahi kaahu ahi e auahi nui me he uàuà tāpupu.
18 I hua pō, u haatoitoi te Etua i te piimau me Aparahamo
vāàna tēnei tekao : « E tuku nei au i to òe ati i ùka aè
i tēnei henua, me i te vaitahe o te Henua Ekipito,
tihe atu i te vaitahe Efarata. »
TARAMO 27 (26) 1, 7-8, 9a-d, 13-14
O te Hatu to ù Māàma, to ù Pohuè. 27, 1
1 O te Hatu tu ù māàma, tu ù pātoko.
O ai òa e haametaù mai ?
O te Hatu te i tiaki i tu ù pohuè.
O ai òa e haapūkina mai ?
7 E te Hatu e, a hakaòko mai, e vevaò au ia Òe.
A hakāòha mai, a haahua mai i te tekao.
8 U maakau au ma he koekoe i to Òe peàu mai :
« A ùmihi ôtou i to ù mata. »
9 O to Òe mata hoì e ùmihi nei au.
Umoì e pūkana i to Òe mata ia ù.
E te Hatu e, umoì e titii i to Òe tāvini.
O Òe tu ù Etua, tu ù Haapohuè.
13 Tiàtohu nui e ìte au i te Meitaì o te Hatu,
I te ao nei, i vāveka o te tau ènana pohupohuè.
14 A tetaì i te Hatu. Oho te ìi.
TATAUÌA O TE HĀMANI A PAURO PEÀTO I TO FIRIPO 3, 17-21 ; 4,1.
E tu ù tau tuàne tuehine,
17 A tūtū ôtou nui me au nei. A tiòhi matiòka i te tau ènana
te i pohuè vāàna i te hakatu ta ù i hakaìte ia ôtou.
18 Òmua, u peàu au ia ôtou, e too ta ù e peàu hakaùa
atià me te uē, e mateteka ana :
He mea nui te ènana te i tute i te peka o Ietu.
19 O te mateìa to âtou paoìa.
Me he ètua no âtou te hīa o te nino.
U kāìè pu âtou mēìa i te hana haahakaìka.
U haataetae âtou i te mēmau o te aomāàma nei anaè.
20 No tātou à, te àki to tātou henua tumu,
e tetaì ana i te Tiheìa o Ietu Kirito, te Hatu,
21 te i haapohuè ia tātou me te haahuìkē i to tātou nino pepae
no te haahakatu me to Īa iho nino haakāìèìa.
Na te mea, e àva to Īa mana
no te vivini i te tau mēmau o te aomāàma ia ôtoa.
4,1 No èià, e tu ù tau tuàne tuehine tāhia e,
o ôtou ta ù e kōhoà nei e ìtemata hakaùa,
ôtou to ù koakoa, o ôtou to ù heipua haakāìè :
oho te ìi ananu i òto o te Hatu,
ôtou tu ù tau teina tāhia nui e. »
HĪMENE VĀNANA
cf. Mt.17,5
Me i òto o te ao tapu pupuà nui,
ua òkoìa te èo o te Etua Motua.
« O Īa nei tu ù Tama Tāhia, a hakaòko ôtou ia Īa. »
ÈVANERIO O IETU KIRITO VĀÀNA E RUKA 9, 28b-36
I tēia mou pō,
28 ua too Ietu me Īa ia Petero, Ioane me Iakopo
me to Īa hiti i ùka o te tuaivi no te pure.
29 E pure aa Ietu, ua huìkē te hakatu o to Īa mata ;
ua ìò to Īa kahu he tavaìè pōnionio.
30 Enā tokoùa ènana e tekatekao me Īa :
Moite me Eria âua tokoùa.
31 U hakaìteìa âua i òto o te kāìè,
e tekao atu tekao mai âua me Ietu i ùka o to Īa taha atu
me i te ao nei ta Īa e haapao i Ierutaremi.
32 U matakau Petero atii me to īa mou hoa.
Atià, e matavaa aa âtou, ua ìte i te Kāìè o Ietu.
Ua ìte âtou me i nā ènana tokoùa ma to Īa kaokao.
33 Ohia e hano hua mou ènana e pae me io Ietu,
u peàu Petero ia Ietu : « E Tuhuka e,
he mea kanahau no tātou înei. A hakatū tātou e toù haèâ :
e tahi no Òe, e tahi no Moite, e tahi no Eria. »
Aòè Petero i ìte e aha ta īa e peàu atu.
34 E tekao aa atii, ua tihe mai te ao e vāhī aa ia âtou.
35 Enā me te èo me io he àki mai, e peàu aa pēènei :
« O Īa nei tu ù Tama te i vaeìa e au,
a hakaòko ôtou ia Īa. »
36 I te ava i koè ai te èo, ua tū Ietu tootahi anaè.
Te tau kouâ te i ìte i hua mea nei, ua mutu âtou.
Aòè âtou i haki atu i te ènana e tahi i te mea ta âtou i ìte.