TOMINIKA E ÌMA O TE AVA HAAOKE
TATAUÌA O TE PEROHETA ITAIA 43, 16-21
16 Oia nei te Tekao a te Hatu
te i kānea i te vaanui ma io he tai,
i te avaputa ma vāveka o te vaitahe.
O Īa te i hakapahi no te tōua
i te tau ihovare me to âtou pāriri,
i te tau pūpū kape me te nuiìa o te toa.
17 Eīa âtou, u hikaìa, moe aa, aòè âtou e tū hakaùa.
Ua mate nui âtou paotū me tītahi àma tīnaììa,
u kukumiìa âtou me tītahi ûiki.
18 Oia nei te Tekao a te Etua :
« Umoì ôtou e māmaakau i te tau tai kākiu.
Umoì e moemoeā i te tau mea i pao atu nei.
19 Enā e pēpena au i te aomāàma hou.
Aòè ôtou e ìte nei ia īa ? U tata èka.
E kānea au i te vaanui ma vāveka o te henua ataha.
E haatahe au i te vai io te vao moô.
E haakāìèìa au e te tau ânimara kaipekā na te mea,
e haatahe au i te vai io te henua ataha,
te tau vaiā io te tau taha moô
etià e inu to ù mataèinaa ta ù i vae.
21 E hahi i tu ù kāìè hua mataèinaa vaeìa e au. »
TARAMO 126 (125) 1-2b, 2c-3, 4-5, 6
He hana mahaò hoì ta te Hatu i uē ia mātou,
Ua tihe to mātou ava no te haakoìka koakoa. 126,3
1 Ia haahua mai te Hatu ia mātou,
Ia hua mai i Tiona mātou, poì mōèhu,
Me he ènana moemoeā to mātou hakatu.
2 Ua pī to mātou haha i te katahehe.
U taaàu mātou i te taa koakoa.
A tahi a mevaha te tekao io te poì êteni :
Auē, te hana mahaò ta te Hatu i hana no âtou.
3 He hana mahaò hoì to Īa i uē ia mātou,
Ua tihe to mātou ava no te haakoìka koakoa.
4 E te Hatu e, a haahua ia mātou,
Me he mea te vaitahe io te henua ataha.
5 E tūtū te ènana i te kākāno e uēuē aa.
Ua kohi īa i te tau puku me te koakoa.
6 E taha īa, taha atu e tūtū i te kākāno,
Me te uē me te mateteka.
Ua hua īa, hua mai me te koakoa,
E kave aa i te pūpā haraoa.
TATAUÌA O TE HĀMANI A PAURO PEÀTO I TO FIRIPO 3, 8-14
E tu ù tau tuàne tuehine.
8 U haapākeka mai hoì to ù hakatu pohuè òmua,
he mea tupepaka no ù te tau mēmau paotū.
Ma ùka o nā mea hakatahi, u haataetae au
te haapii me te Kirito Ietu, to ù Hatu.
U haahuìkē au i to ù hakatu pohuè.
U titii au i ta ù tau hana òmua paotū.
Ua ìò âtou no ù me he kaù, vāàna e haapii au me te Kirito,
9 me te pohuè i òto o te Kirito me he ènana toitoi noa,
aòè te toitoiìa ta ù i koàka mai
ma te aotahi atu i te Ture,
atià ma to ù haatià i te Kirito,
te toitoiìa hoì ta te Etua i vaièi mai,
o te haatià to īa tumu.
10 Ma èià, e haapii au me te Kirito,
me te àva atu i te mana o to Īa Tūhakaùaìa.
Ma èià, e àva atu au i to Īa memae
e haatūtū ana me Īa i òto o te mateìa.
11 Ma èià, e tetaì au e pohuè hakaùa
me i vāveka o te huaa mamate.
12 Aòè to ù peàu u koàka mai nei ia ù te meitaì èka,
akoè à he ènana toitoi noa au.
Atià, ua tohe au me he ènana tīkakai
e hano e haakoàka mai te tuki meitaì.
Oiana ta Ietu Kirito iho i hana etià e ūtaì au ia Īa.
13 E tu ù tau tuàne tuehine,
aòè au e kaituto ua ìò ia ù te tuki.
O īa anaè te mea e hano au : e avai pu ana i te mea i pao ai,
a tiòhi mau i te mea i mua atu.
14 U tohuti au tihe i te hakahīa etià e ìò ia ù te tuki,
Oia hoì te vevaòìa o te Etua no te pohuè io he àki,
vaièiìa mai i òto o te Kirito Ietu. »
HĪMENE VĀNANA
Ta. 130,7
Ohia io te Hatu te Kāòha, te Haapohuèìa hou ananu.
ÈVANERIO O IETU KIRITO VĀÀNA E IOANE 8, 1-11
I tēia mou pō,
1 ua hiti Ietu i ùka o te tuaivi Oriveti.
2 Ma te oìoì tika, ua hua Ietu i òto o te Hiero.
U putuputu te haètoa nui vii pu o Īa.
U kaapee Ietu me to Īa hakako ia âtou.
3 Na te tau tuhuka tekao me te tau Fariteo
u aahi io Ietu i te vehine,
te i ìtemataìa u haapē i te mātirimonio.
4 U haatū âtou i hua vehine i vāveka ahau o te haètoa.
U peàu âtou pēènei : « E te Tuhuka e,
enā te vehine i ìteìa u haapē i te mātirimonio.
5 U peàu Moite i òto o te Ture,
a pehi me te keâ, a haamate i tēia tau vehine.
E aha to òe maakau ? »
6 U peàu âtou i tēnei tekao mea haaveke ia Ietu
me te koàka mai ia âtou te piò no te hakatio atu.
Atià, e oha aa Ietu i aò,
ua patu Īa me te makamakaìma i ùka o te tuaèpo.
7 Ohia ua tohe âtou i te ūiūi atu ia Īa,
ua maô Ietu me to Īa peàu :
« Te ènana mīkeo koè, a pehi i to mua keâ ! »
8 Ua oha hakaùa Ietu
me to Īa patu iho i ùka o te tuaèpo.
9 Ia òko âtou i hua tekao, ua hee âtou ;
ua hee te hoa, ua hee te hoa.
O te tau kōkooūa te i hee òmua ìka.
Ua noho Ietu anaè me te vehine e tū aa io he tohua.
10 A tahi a maô Ietu me te peàu :
« E te vehine, i hea âtou ?
Aòè e tahi i toe no te hakatio ia òe ? »
11 U haahua te vehine : « Aòè e tahi, e te Hatu e. »
U peàu Ietu : « Aòè e hakatio me au ia òe.
A taha atu. Umoì e mīkeo hakaùa. »