TOMINIKA E HITU O TE PAKATE

(A tapu 12 no Mataìki 2024)

TARAMO 103 (102) :
Te kāìè ia Òe, e te Hatu e noho nei i te ìma oko o te Motua.

Kio Vānana : Aòè e avai te Hatu ia ôtou

Me he tau tama motua koè, kui koè.

E hua hakaùa mai Īa io ôtou.

A tahi a pī ai to ôtou koekoe i te koakoa.

Pure a te poì haatià : E moû, moû nui to Òe hakatu e te Motua e.

                                     Apuu mai Òe i ta mātou pure.

ÙTUNA :       B.4     

3  A pahi mai Òe, e te Hatu / I to Kuhane Tapu
    Ia haatapu mai Īa / I tēnei ùtuna
    Ia ìò e nino, e toto no Òe.

Peàto          

Haamaakauìa :   Te kāìè ia Òe, e te Hatu e,

                             Te i mate nui, te pohuè ;

                             A tihe mai, e Ietu ; a tihe mai, e Ietu.

To mātou Motua e                 Àrenio      

Hīmene haahuaèkaèka : I.6 U tiàtohu Alleluia, Alleluia, Alleluia, Alleluia.

PAHIÌA :   V.19

2  No to meitaì, to pāpaku nui e, / To haatià, e Maria,

   A vevaò ia mātou e ape nei, / A pure no mātou nei.

TOMINIKA E HITU O TE PAKATE

TATAUÌA O TE HĀMANI HANA A TE TAU ÀPOTORO   1, 15-17.20a-26

¹⁵      I tēia mou pō, ua tū Petero i vāveka ahau

        o to īa tau tuàne tuehine, hānere me te tekau oti âtou.

        U peàu īa pēènei :

¹⁶      « U haapaoìa te mea i patuìa i òto o te Hāmani tapu,

        oia hoì ta te Kuhane Meitaì i peàu ma te haha o Tavite,

        i ùka o Iuta te i haatee i te poì i haahumu ia Ietu.

¹⁷      O Iuta tītahi me i vāveka o tātou.

        Ua àva atu īa i to tātou hana tāvini i te Etua.

²⁰      U patuìa i òto o te hāmani Taramo :

        « E ìò to Īa pāpua me he henua viviiō.

        Umoì e noho e tahi ènana i òto. »

        Atii hakaùa : « A amo tītahi i to īa hana tumu ! »

²¹      I tēnei, a tū tītahi me tātou no te haatiàtohu

        i te Tūhakaùaìa o Ietu.

²²      A vae tātou ia īa me i vāveka o te tau ènana

        te i kē mai me tātou ma te òa o te ava

        ua noho Ietu me tātou : me i te papatemaìa a Ioane

        tihe atu i te â ua takiìa Īa me i vāveka o tātou. »

²³      Ua tuhi âtou i nā ènana tokoùa :

        o Ioteve peàuìa te Toitoi tītahi, o Matia tītahi.

²⁴      I muì iho, ua pure âtou pēènei : « E te Hatu e,

        ua ìte Òe i te koekoe o te tau ènana paotū.

        A hakaìte mai o ai io nā ènana tokoùa nei ta òe e vae

²⁵      no te amo i te hana àpotoro ta Iuta i titii,

        i te â ua hee īa i to īa kōava. »

²⁶      U haakai âtou ia âua. O Matia te ènana i vaeìa.

        U haatahi īa me te tau Àpotoro Tīònohuu ma tahi.

TARAMO 103 (102)   1-2, 11-12, 19.22

 Te kāìè ia Òe, e te Hatu e noho nei i te ìma oko o te Motua.

¹       E tu ù kuhane, a haameitaì i te Hatu,

        Me io he koekoe, a haameitaì i to Īa ikoa peàto.

²       A haameitaì i te Hatu, e tu ù kuhane,

        Aua e māhaè e tahi o to Īa vaièiìa.

¹¹      Me he tiketike o te àki ma ùka o te henua,

        Ua mana to te Hatu kāòha i uē i te poì haatià.

¹²      Me he mamao o to te òumati tiheìa me i to īa kaòìa,

        U tioà te Etua i te mikeo mamao me io tātou.

¹⁹      I ùka nui o te àki te nohoka o te Hatu.

        O Īa te Hakaìki o te aomāàma vii pu.

²²      A haameitaì i te Hatu te tau mēmau paotū ta Īa i pēpena,

        Ôtou te i noho nei io te tau vahi paotū o to Īa ao.

        A haameitaì i te Hatu, e tu ù kuhane.

TATAUÌA O TO MUA HĀMANI A IOANE ÀPOTORO 4, 11-16

¹¹      E tu ù tau hoa tāhia e,

        e pēhea atii te nui o to te Etua kāòha ia tātou,

        a kāòha hoì te hoa i te hoa.

¹²      Aòè e tahi ènana i ìtemata i te Etua.

        Me kāòha te hoa i te hoa,

        ua noho te Etua i òto o tātou ;

        u meitaì oko to tātou kāòha i te Etua.

¹³      Ua ìte tātou ua noho te Etua i òto o tātou,

        ua noho tātou i òto o te Etua,

        na te mea u vaièi mai te Etua ia tātou i to Īa Kuhane.

¹⁴      O tātou â, ua ìte tātou me to tātou haatiàtohu

        i te mea u pōpahi te Motua i ta Īa Tama

        no te haapohuè i te tau ènana.

¹⁵      Te ènana e haki o Ietu te Tama a te Etua,

        ua noho te Etua i òto o īa me to īa noho i òto o te Etua.

¹⁶      O tātou â, ua ìte i te mea u kāòha te Etua ia tātou.

        U haatià tātou i hua tekao.

        He kāòha te Etua.

        Te ènana i kāòha me te tohe mau i te kāòha,

        ua noho hua ènana i òto o te Etua,

        ua noho te Etua i òto o īa.

ALLELUIA ALLELUIA

                                                                                          cf.In.14,18

Aòè e avai te Hatu ia ôtou

me he tau tama motua koè, kui koè.

E hua hakaùa mai Īa io ôtou.

A tahi a pī ai to ôtou koekoe i te koakoa.

EVANERIO O IETU KIRITO VĀÀNA E IOANE      17, 11-19

        I tēia mou pō, ua heau Ietu io he àki  

        me te pure e peàu aa :

¹¹      « E te Motua peàto e, a tiaki i to ù tau kouâ

        etià e haatià mau âtou i te ikoa ta Òe i apa mai.

        Ma èià, e haatahi âtou me he mea to tāua haatahiìa.

¹²      I te ava ua noho au me âtou, u tiaki au ia âtou

        etià e haatià âtou i te ikoa ta Òe i apa mai.

        U tiòhi meitaì au i te huaa ta Òe i tuku mai :

        aòè e tahi i kaò ai.

        Te ènana i hika, o īa anaiho te i kaò.

        Ma èià, u haatiàtohuìa te tekao o te Hāmani tapu.

¹³      I tēnei, e tihe au io Òe.

        U peàu hoì au i tēnei tekao, oi noho i te ao nei,

        etià e àva âtou i to ù iho koakoa, e pī âtou i te koakoa.

¹⁴      U hakako au ia âtou i ta Òe tekao.

        Oia te piò u haahaa to te ao nei ia âtou.

        Ua paekē hoì âtou me io te ao nei

        me he mea ua paekē au me io te ao nei.

¹⁵      U te e ape au ia Òe no te taki ia âtou me i te ao nei,

        ua ape anaè au : a pāpua ia âtou me i te ìno.

¹⁶      Aòè âtou me io te ao nei, atii anaiho me au :

        aòè au me io te ao nei.

¹⁷      A haapeàto Òe ia âtou vāàna i te Tiàtohu.

        O ta Òe tekao te Tiàtohu.

¹⁸      Me he mea ta Òe i pahi mai ia ù i te aomāàma nei,

        atii ta ù pahi atu ia âtou i te aomāàma nei.

¹⁹      U ùtuna hēaka au ia ù iho i uē ia âtou

        etià e aotahi mau âtou ia Òe vāàna i te Tiàtohu. »