I òto o te kāputuèo a te Pū Tuhuka èo tahiti, e ìte tātou i te mou haaviviniìa me « prix, achat, taux de change, compensation financière », akoè à « échanger, changer ».
I òto o te kāputuèo a te èpikopo Dordillon, e ìte tātou e ùa ponatekao èo ènana, o « bouleversement » me « renversement » te haaviviniìa.
1) - Te ponatekaoaka « huì ».
*- O « rejet, rejeton, repousse » te haaviviniìa tumu me he mea i òto o « te huì mei » ; e hua mea ananu me « huìtaa ».
*- Tītahi haaviviniìa kē atu : « renverser, faire tourner, rouler à l’envers, opérer un changement ; décharger une marchandise ». E ìte tātou i hua hakatu i òto o te âkakai « Nika » patuìa e te mou tuhuka èo ènana : « (U) huì ake Tiha i nā mata i ùka ». (« Âkakai », tapa hāmani 5).
*- Mea haanui aè i te ìi o « huì », u haapohoìa me te ponatekao « kē », i ìò ai o « huìkē » : « Mea huìkē tenā hana ! ».
*- Ia tū i mua te vaemua « haa/haka », ua ìò ia « haahuìkē/hakahuìkē » te haaviviniìa o « changer, altérer, modifier ». « U haahuìkēìa Ietu i mua o âtou (Petero me Iakopo me Ioane) », Mareko 9,3.
*- E ìte atii tātou i te haaviviniìa kē i òto o te avetekao ma hope mai : « Te tau ènana haahuìkē i te moni », Ioane 2, 14.
2) - Te ponatekao « hāìu/fāìu ».
Ua ìteìa t omua haaviviniìa ma òto o te avetekao ma hope mai : « E hāìu ana Ietu, ua ìte ia âua », Ioane 1, 38.
U koàka ia tātou te ùa o te haaviviniìa ma òto o te tekao a Mareko Peato 1, 15 : « A hāìu i te koekoe ! ».
3) - KĒHUÌ : te ponatekao hou mea tūiava i « TAUI »
Mea òa te kaitutoìa o te tau tuhuka èo ènana no te tūiava i te tau ponatekao me i vaho mai ma te ponatekao èo ènana hei pao. I te meàma Èhua o 2021, u pēpena âtou i te ponaèo « KĒHUÌ » mea tūiava i te ponaèo tahiti « TAUI ».
I tēnei, e koàka ia tātou te peàu :
*- E kēhuì i te kahu, te huira, te tāpapaìa, enā atu ai…
E òna hoa e, na tātou e hāìu i to tātou koekoe pepee i tēnei ; a titii tātou i te nuiìa o te ponatekao me i vaho mai, a haakāìè ananu i te èo ènana !
Patuìa e Jacques Iakopo Pelleau
U haatoitoiìa te patuhei vāàna i te tau aahiìa a te Haè tuhuka èo ènana i te 21/08/2022.
A PĪÒMI ÎNEI NO TE TATAU I TE HĀTIKA TEKAO MA HE ÈO FARANI… !