TOMINIKA ÒNOHUU MA HITU O TE AVA MA TE ÈHUA
TATAUÌA TE HĀMANI A MOITE PEÀUÌA TENETE 18, 20-32
Ua maô nā manihii tokotoù apuuìa e Aparahamo.
Ua hano âtou e hee i te pāpuahaè Totoma me Komora.
20 U peàu te Hatu ia Aparahamo :
« Auē, te oko nui o te pokokina e hiti io ù
me i nā pāpuahaè Totoma me Komora !
Auē, te toko o to âtou mīkeo !
21 E too ta ù e hee tiòhi i te hakatu o to âtou hana,
te oko o te pokokina ua hiti i tu ù aò.
No te mea e tīvava oti, e ìte au. »
22 A tahi a taha nā ènana tokoùa i Totoma.
O Aparahamo à, ua noho i mua o te Hatu.
23 U haatata mai Aparahamo me te ūi atu :
« E te Hatu e, aha e hano òe e haamate
i te ènana toitoi me te ènana mīkeo ?
24 Enā oti e ìma ònohuu ènana toitoi io te pāpuahaè Totoma ?
Aha, e hano Òe haamate ia âtou ?
Aòè e koàka ia Òe e vevete i to âtou mīkeo
mēìa i hua e ìma ònohuu ènana toitoi
e noho aa i òto o te pāpuahaè ?
25 Auē, te hauhau o to Òe hana me hana Òe atii !
E haamate e tahi mateìa i te ènana toitoi me te ènana mīkeo ?
E oonakiìa te poì toitoi hakatu me te poì hauhau ?
E aha e hakatio pu, e haavā pu me te toitoi koè
te Hakaìki nui o te aomāàma vii pu ? »
26 U haahua atu te Hatu : « Me he mea e koàka ia ù i Totoma
e ìma ònohuu ènana toitoi,
mēìa ia âtou e vevete au i te tau mīkeo
o te tau ènana paotū noho ana io he pāpuahaè. »
27 U peàu Aparahamo
« E vaavō au nei oti no te tekao hakaùa i tu ù Hatu.
O ai au nei ? E èpo anaiho au, tūtū me te èhuahi anaè.
28 Atià, i òto o tenā tau ènana e ìma ònohuu toitoi noa,
e koè oti tokoìma.
E aha no tenā mou ènana tokoìma
e haamamape Òe i te pāpuahaè ? »
U haahua te Etua :
« Aòè au e haamamape i te pāpuahaè
me he mea e koàka ia ù e hā ònohuu ma ìma ènana toitoi. »
29 Ua tohe Aparahamo e peàu aa :
« E hā ònohuu ènana toitoi ta Òe e koàka mai oti. »
U peàu te Hatu :
« Aòè au e haapē i te pāpuahaè
mēìa i tenā tau ènana e hā ònohuu. »
30 U peàu hakaùa Aparahamo :
« Aua e pekē mai, e tu ù Hatu e,
no te mea e vaavō hakaùa au no te tekao :
e koàka ia Òe e toù ònohuu ènana toitoi anaè. »
U haahua te Etua : « Aòè au e haapē i te pāpuahaè
mēìa i tenā tau ènana e toù ònohuu. »
31 Ua tohe Aparahamo :
« E vaavō oti au no te peàu hakaùa i tu ù Hatu :
e koàka oti ia Òe tekau ènana toitoi anaè. »
U haahua te Etua : « Aòè au e haapē i te pāpuahaè
mēìa i nā tekau ènana toitoi. »
32 U peàu hakaùa Aparahamo :
« Aua e pekē mai e tu ù Hatu e.
Oia tu ù tekao paoìa :
tīònohuu ènana toitoi anaè oti ta Òe e koàka mai. »
A tahi a haahua atu te Etua :
« Aòè au e haapē i te pāpuahaè Totoma
mēìa i hua tīònohuu ènana toitoi. »
TARAMO 138 (137), 1-2a, 2b-3, 6-7b, 7c-8
E te Hatu e, u hakaòko Òe i tu ù pure vevaò. 138,3
1 E te Hatu e, u haahuaèkaèka au me io he koekoe.
U hakaòko hoì Òe i tu ù pure vevaò.
E hīmene nei au ia Òe i mua o te tau anera,
2 E oha nei au e tiòhi ana i to Òe Hiero tapu.
E haahuaèkaèka nei au mēìa i to Òe kāòha me te tiàtohu.
U tiketike atu i te tau mēmau paotū to Òe ikoa.
3 I te â u haahua mai Òe i ta ù pure vevaò,
U ūo to Òe mana i te ìi o tu ù kuhane.
6 Ua ìte te Etua tiketike i te ènana avai noa.
Me i te vahi memao, ua tuhi Īa i te ènana kāìè pu.
7 E te Hatu e, me òomiìa au e te ìno haapūkina mai,
U haapohuè mai Òe ma te haahika i te poì kaipīpiò ia ù.
U tuàki au ma te mana o te Hatu.
8 I uē ia ù, ua hana me he mea ta Īa i peàu mai.
E te Hatu e, paona koè to Òe kāòha.
Umoì e hakaēa i to Òe matavaièi mai.
TATAUÌA O TE HĀMANI A PAURO PEÀTO I TO KOROHA 2, 12-14
12 E tu ù tau tuàne tuehine.
Ma te papatema, u tomiìa ôtou kātahi me te Kirito ;
kātahi me Īa, u pohuè hakaùa ôtou,
na te mea u haatià ôtou i te mana o te Etua
te i haatū hakaùa ia Ietu Kirito
me i vāveka o te poì mamate.
13 Òmua, me he poì mamate ôtou mēìa i to ôtou tau mīkeo,
he êteni ôtou, ìte koè i te Ture a Moite.
U vaièi te Etua ia ôtou i te pohuè kātahi me te Kirito,
ma te haakoè i to ôtou tau mīkeo paotū.
14 Ua veti te Etua i te hāmani àiê te i hakatio ia tātou
ma to īa tau ture.
U haakoè te Etua i hua hāmani àiê,
me he mea u patia te Etua ia īa io he peka o te Kirito.
ALLELUIA ALLELUIA cf. Rm.8,15
Haateeìa e te Kuhane Meitaì te i haaìò ia tātou e tau tama a te Etua, ua apa tātou i te Etua : « To mātou Motua ».
ÈVANERIO O IETU KIRITO VĀÀNA E RUKA 11, 1-13
1 Ohia ua noho Ietu io tītahi vahi, ua pure Īa.
Ia pao to Īa pure,
u peàu tītahi me i vāveka o to Īa tau kouâ :
« E te Hatu e, a hakako mai i te pure
me he mea u hakako Ioane i to īa tau kouâ. »
2 U peàu Ietu ia âtou pēènei :
« I te ava e pure ôtou, a peàu pēènei :
E te Motua e, a tapu to Òe ikoa.
A tihe to Òe Patirēia.
3 A tuku mai i te oà no te â nei, paotū te â.
4 A haakoè i to mātou mīkeo,
atii me mātou u haakoè i te poì u àiê mai.
Aua e haahemo mai i te mōtii. »
5 U peàu Ietu ia âtou pēènei :
« O ai i vāveka o ôtou me te hoa,
ia hee īa i te tūmoe nui no te peàu :
E te hoa e, a àiê mai e toù haraoa.
6 Ua tihe hoì io ù to ù hoa e vii aa i te henua.
Aòè he mea kai ta ù no te apuu ia īa.
7 Atià, me i òto o te haè, u haahua atu te hoa :
« Umoì e haapaòpaò mai. I tēnei, ua pāìa te avaputa.
Ua moe au me ta ù tau tama.
Aòè e koàka ia ù te tū no te tuku atu ia òe. »
8 U peàu au ia ôtou : me he mea aòè e tū te hoa
no te tuku i te haraoa, e aha à he hoa īa,
e maô hoì me te tuku atu i te mea paotū te i apeìa
mēìa u vaavō to īa kaiapeìa.
9 U peàu au ia ôtou : a ape ôtou, e tukuìa mai.
A ùmihi ôtou, e koàka mai. A paopao, e pepeùìa ia ôtou.
10 Na te mea, me he mea e ape tītahi, e ìò ia īa.
Me he mea e ùmihi te ènana, e koàka mai.
E pepeùìa te avaputa no te ènana e paopao.
11 O ai te motua me i vāveka o ôtou,
me he mea u ape ta īa tama i te ika,
e tuku atu i te puhihenua ?
12 Akoè à, me he mea u ape te tama i te māmaì moa,
e tuku atu i te koropio ?
13 Me he mea ua ìte ôtou, e te poì pē,
e tuku atu i te mea meitaì i ta ôtou tau tama,
tōtahi atu ta te Motua te io he àki
e tuku atu i te Kuhane Meitaì i te poì e ape io Īa. »