TOMINIKA E HĀ O TE AVA HAAOKE
TATAUÌA O TE HĀMANI A IOTUE 5, 10-12
10 Ma muì ua taha te mataèinaa Iraene
io tītahi kēkē o te vaitahe Ioritane,
ua noho âtou i te kaavai o Kikara te ikoa.
Ma te pō ònohuu ma hā o te meàma, ia èva te â,
pii te pāpuahaè Ieriko, ua haì âtou i te Koìka Pakate.
11 I te oìoì o te Koìka Pakate,
ua kai âtou i te tau puku o hua henua :
te haraoa haapupuhi koè, te tau kāhui haraoa nunupatakaìa.
12 Me i tēnei â, aòè te Manahū e iho hakaùa mai me io he àki,
mēìa e kai nei âtou i te tau puku o hua henua.
I hua èhua, ua kai te tau tama a Iraene
i te tau puku kohiìa io he Henua Kanaana.
TARAMO 34 (33) 2-3, 4-5, 6-7
A mai. A ìte me ôtou i te vaièìa o te Hatu. 34, 9
E haameitaì au i te Hatu ma te tau â paotū.
E hahi au i te Hatu i te tau vahi ia ôtoa.
Io te Hatu anaè to ù haakāìè.
A òko mai te poì veve, a koakoa me âtou.
A haatiketike ôtou me au nei i te Hatu.
A haakāìè tātou nātoa i to Īa ikoa.
Ia ùmihi au i te Hatu, u tiòhi mai Īa.
U haakoè Īa i to ù tau pūpūkina ia ôtoa.
Te ènana e heau io te Hatu, e pupuà īa :
He moû, hakaìka koè to īa mata.
Ia taaàu te ènana veve, u haaòko te Hatu,
Me to Īa haapohuè me i te mea haametaù mai.
TATAUÌA O TE ÙA O TE HĀMANI I TO KORINETIA 5, 17-21
E tu ù tau tuàne tuehine,
17 Me he mea u haatahi te ènana me te Kirito,
ua ìò hua ènana me he mēmau pēpenahouìa.
Ua koè te hakatu pohuè kākiu.
U tīmata te hakatu pohuè hou.
18 Me io te Etua hua mea paotū i uē ia mātou.
Ua ao te Etua e tutuki mātou me Īa, ma io te Kirito.
I tēnei, ua vae te Etua ia mātou no te tāvini ia Īa
ma te haamevaha i te haatutukiìa
o te tau ènana paotū me te Etua.
19 I òto o te Kirito, o te Etua anaiho te i haatutuki
i te tau ènana paotū me Īa.
U haakoè te Etua i to âtou tau mīkeo.
U tuku ia mātou he tau Âpotoro no te haamevaha
i hua tekao o te haatutukiìa.
20 Ua ìò mātou he tau keèe no te Kirito.
Na te Etua iho i oonaki ia ôtou ma òto to mātou haha.
I te ikoa o te Kirito, u toutaki mātou ia ôtou :
a ao ôtou e haatutuki te Etua ia ôtou me Īa.
21 Ua piò koè, mīkeo koè te Kirito.
Atià, i uē ia mātou, u haatopa te Etua
i te tuki pē o te mīkeo i ùka o Īa.
Ma èià, i òto o te Kirito,
u toitoi mātou nei i mua o te Etua.
HĪMENE VĀNANA
Ta.103, 8.13
He moû he kāòha te hakatu o te Hatu ;
me he moû o te motua i ta īa tama.
ÈVANERIO O IETU KIRITO VĀÀNA E RUKA 15, 1-3.11-32
I tēia mou pō,
1 u haatata mai io Ietu te tau pupurikano
me te poì mīkeo paotū no te hakaòko i ta Īa tekao.
2 U kōhumuhumu te tau Fariteo me te tau tuhuka tekao,
e peàu aa :
« U apuu meitaì te ènana nei i te poì mīkeo,
ua kai īa me âtou. »
3 U peàu Ietu ia âtou i tēnei tekao haapupuà :
11 « Enā te ènana me nā tama tokoùa.
12 U peàu te teina i to īa motua : E to ù motua e,
a tuku mai i te hope taetae e ìò mai ia ù. »
Ua tuha te motua ia âua i to īa taetae.
13 Mou pō i muì iho, u haapuke te teina i to īa taetae paotū,
me to īa hee atu i te henua memao.
I èià, ua tūtā pu īa i to īa taetae e pohuè aa māàma koè.
14 Ia pao to īa taetae i tūtā pu, ua oke nui io hua henua.
Aòè he mea to īa no te kai.
15 Ua hano īa e tāvini i te ènana o hua henua
te i pahi atu ia īa i te vahi èitā no te tiaki i te tau puaka.
16 U makimaki īa e kai haamaòna i te tau puku e kai nei
te tau puaka, atià u te e tuku atu te ènana e tahi ia īa.
17 E kaituto aa io he koekoe, u peàu īa :
« Tokohia ènana hana io tu ù motua te i kai haamaòna.
He mea nui te poo haraoa i toe.
O au à înei, ua mate au i te oke.
18 E tū au me te hee atu io to ù motua.
E peàu au ia īa : « E tu ù motua e,
ua teka au io te Etua io he àki. Ua teka au io òe.
19 Aòè e hei ia ù e apaìa he tama na òe.
A apuu mai me he ènana hana e tāvini ia òe. »
20 No èià, ua tū īa, ua hua io to īa motua.
Ia tihe īa i te vahi memao me io he haè,
ua ìte te motua ia īa. E mehea aa te motua,
u tohuti io te tama, ua hopu mau me te hoki ia īa.
21 U peàu te tama : « E te motua e,
ua teka au io te Etua io he àki. Ua teka au io òe.
Aòè e hei ia ù e apaìa he tama na òe. »
22 Atià, u peàu te motua i to īa tau tāvini :
« A kave mai ponihoo i te kuà o te kahu òoa,
a haauhi ia īa. A kokomo te koro io to īa ìma.
A oka i te aihū io to īa nā vaevae.
23 A hano mai i te piha taùtaù me te kukumi.
A kai tātou, a haaèkaèka.
24 Ua mate hoì tu ù tama nei, enā u pohuè hakaùa.
Ua kaò tu ù tama, enā u koàka mai. »
U tīmata âtou i te koìka haaèkaèka.
25 Enā io te vahi èitā te tama hāmua o hua ènana.
I te ava ua hua īa me to īa haatata io he haè,
ua òko īa i te takiìa o te pū me te haka.
26 U vevaò īa i tītahi tāvini.
Ua ūi atu e aha te hakatu o tenā mea.
27 U peàu te tāvini ia īa : « Ua hua mai to òe teina.
U kukumi to òe motua i te piha taùtaù
mēìa i koàka mai, nino heòheò to īa. »
28 U pekē nui te tama hāmua.
Aòè īa i makimaki e tomo io he haè.
Ua uu i vaho to īa motua, u vevaò mai e toutaki ana ia īa.
29 Atià, u haahua te tama i to īa motua :
« E hia èhua i tēnei e tāvini au ia òe ?
Aòè au i pūtuì e tahi anaè o ta òe tau tekao.
Koè nui to òe tuku mai e tahi kaiū menē
no te haaèkaèka me to ù tau hoa.
30 Atià, me hua mai ta òe tama nei
te i tūtā pu i to īa taetae me te tau vehine mako,
u kukumi òe i te piha taùtaù. »
31 U peàu te motua ia īa :
« E tu ù òna tama e, ua noho òe ananu me au.
Na òe anaiho to ù tau taetae paotū.
32 Atià, he mea hei te tuha i te kaiìamau me te haaèkaèka,
mēìa i to òe teina : ua mate nui īa, u pohuè nei ;
ua kaò īa, u koàka mai nei. »