TOMINIKA E TOÙ O TE AVA HAAOKE
TATAUÌA O TE HĀMANI A MOITE PEÀUÌA EHOTO 3, 1-8a.10.13-15
1 I tēia mou pō, u tiaki Moite i te naho mutō o to īa motuòai,
o Ietero te ikoa, tāuà no te Henua Matiana.
U aahi Moite i hua naho mutō
ma tītahi kēkē o te henua ataha.
Ua tihe īa i te tuaivi, o Horepe te ikoa.
O īa te tuaivi o te Etua.
2 U hakaìte te anera o te Hatu ia īa iho
i vāveka o te ahi uàuà aa io tītahi maaèitā.
Ua ìte Moite i te maaèitā uàuà tāpupu.
U tiòhi mau īa : aòè te èitā e pao aa i te uà.
3 A tahi a maakau Moite : e hee au ma tītahi kēkē
no te tiòhi meitaì i tēnei mea mahaò.
No te aha aòè e pao ai te maaèitā i te uà tāpupu ?
4 Ua ìte te Hatu ia Moite e haatata mai no te tiòhi meitaì.
U vevaò te Hatu Etua ia īa me i òto o te maaèitā :
« E Moite, Moite e. » U haahua īa : « Eīa au nei. »
5 U peàu te Hatu pēènei :
« Aua òe e haatata mai. A taki i to òe aihū.
He henua tapu te vahi i aò o to òe nā vaevae. »
6 U peàu hakaùa te Hatu : « O au nei te Etua o to òe motua,
te Etua o Aparahamo, te Etua o Iakopo, te Etua o Itaako. »
Ua tomi Moite i to īa mata, na te mea u haametaù īa
no te tiòhi atu i te Etua.
7 U peàu te Hatu ia Moite :
« Ua ìte au i te àì oko o to ù mataèinaa
te i haamōèhuìa i te Henua Ekipito.
Ua òko au i to īa èo taaàu me te uēuē
i mua o te tau vivini pē e haamākaka atu ia īa.
8 Ua iho mai nei au no te haapohuè i to ù mataèinaa
me i te ìma o te poì Ekipito te haahiti ia īa
me io tēnei henua i te henua hātea, henua tapavaù,
henua i èià e tahe te vaiū me te mānini tikauè ;
te henua Kanaana,
10 I tēnei, a hee òe. E pahi au ia òe io te hakaìki Faraone.
E haahiti òe me i te Henua Ekipito i to ù mataèinaa,
te tau tama a Iraene. »
13 U peàu Moite i te Hatu Etua : « E hee hoì au.
E tutuki au me te tau tama Iraene e peàu ana ia âtou :
« Na te Etua o to ôtou tupuna i pahi mai ia ù io ôtou.
Me he mea e ūiūi mai âtou pēènei : O ai to Īa ikoa ?
E aha ta ù e haahua atu ? »
14 U peàu te Etua ia Moite : « O IAVE tu ù ikoa.
Oia hoì : O AU TĒIA TA ÔTOU E ÌTE AI.
Pēènei ta òe peàu atu i te tau tama Iraene :
O AU te i pahi mai ia ù, io ôtou. »
15 U peàu hakaùa te Etua ia Moite :
« A hakaìte atu i te tau tama Iraene pēènei :
Te Hatu Etua o to ôtou tau tupuna,
te Etua o Aparahamo, te Etua o Itaako, te Etua o Iakopo.
O AU te i pahi mai ia ù, io ôtou.
O īa tu ù ikoa ma te tau èhua paotū.
O īa te ikoa e apa ôtou ia ù
no te pakaihi mai ma te tau tai a tihe ananu. »
TARAMO 103 (102) 1-2, 3-4, 6-7, 8.11
He moû he kāòha anaè te Hatu. 103, 8
1 E tu ù kuhane, a haameitaì i te Hatu,
Me io he koekoe a haameitaì i to Īa ikoa peàto.
2 A haameitaì i te Hatu, e tu ù kuhane,
Aua e māhaè e tahi o to Īa vaièiìa.
3 U vevete te Hatu i to òe tau mīkeo paotū.
U haakoè te Hatu i te memae o to òe nino.
4 Na Īa i taki ia òe me io te ana tūpāpaù.
Na Īa i vahi ia òe i te kāòha me te hinenaò.
6 E hana te Hatu vāàna i te toitoiìa.
O Īa te vevaò o te poì i haamākakaìa.
7 Ua haki atu i to Īa makimaki ia Moite,
U hakaìte i to Īa tau hana mana ia Iraene.
8 He moû, he kāòha te hakatu o te Hatu.
U haatevee i to Īa pekē : ua pī i te kāòha.
11 Me he tiketike te àki ma ùka o te henua,
Ua mana to te Hatu kāòha i uē i te poì haatià.
TATAUÌA O TO MUA HĀMANI I TO KORINETIA 10, 1-6.10-12
E tu ù tau tuàne tuehine.
1 E too ta ù e haamaakau ia ôtou i te mea i pao nei
u haauu Moite i to tātou tau tupuna
i vaho me io te Henua Ekipito.
Ua aahiìa âtou paotū e te ao tapu.
Ua hee âtou paotū ma vāveka o te Tai pūkiki.
2 U haatahi âtou paotū me Moite ma òto o te papatema
io he ao tapu me te tai.
3 Ua kai âtou paotū i te oà e tahi, he oà kuhane.
4 Ua inu âtou paotū i te inu kuhane,
ua inu hoì âtou me io te punavai
e tahe aa me io he motukeâ
te i ūtaì ia âtou i tēia vahi, tēia vahi.
O te Kirito hua motukeâ.
5 Atià, aòè te nuiìa o âtou i haaèka i te Etua,
no èià, ua kaò âtou,
u tavavā i te henua ataha to âtou nino tūpāpaù.
6 Ua pao hua mea no te haamāàma ia tātou :
he hakatu hoì no te hakako mai :
umoì tātou e kōhoà pē me he mea to tātou tau tupuna.
10 Aua ôtou e kōhumuhumu i te Etua,
me he mea o tahipito o âtou : U kukumiìa âtou.
11 O īa te mea i patuìa io he Hāmani tapu
no te haamāàma mai ia tātou
te i pohuè nei i te ava paoìa o te aomāàma.
12 No èià, te ènana e haakāìè mēìa ua tū toitoi īa,
a tiòhi meitaì oa topa pu.
HĪMENE VĀNANA
cf.51, 14
E te Hatu e, a haahāìu Òe i to mātou koekoe
i to Òe vevaò mai.
A haakoakoa ia mātou to Òe haapohuè mai.
ÈVANERIO O IETU KIRITO VĀÀNA E RUKA 13, 1-9
1 I hua ava, ua tihe mai io Ietu te mou ènana te i kave
i te tekao hou o to Karirea poì, kukumiìa e Pinato.
U haakāvohi īa i to âtou toto
me to te tau hēaka i ùtunaìa e âtou.
2 U haahua atu Ietu ia âtou pēènei :
« E auana oti ta ôtou,
o hua poì Karirea te i haamemaeìa nei,
e mīkeo nui atu to âtou i tahipito poì Karirea kē ?
3 Aòè hoì, ta ù peàu ia ôtou.
Atià, me he mea u te e hāìu ôtou i te koekoe,
e hikaìa ôtou paotū hua mea anaiho.
4 Akoè à, te tīònohuu ma toovaù ènana i haapaìhaìa
ma aò o te mōuka Tiroe i vāvahi haahutararā ìa,
e auana oti ta ôtou ua nui atu to âtou mīkeo
i to te tau ènana paotū o Ierutaremi ?
5 Aòè hoì ta ù peàu ia ôtou.
Atià, me he mea u te e hāìu ôtou i te koekoe,
e hika ôtou paotū hua mea anaiho.
6 U peàu Ietu i tēnei tekao haapupuà : « Enā te ènana
me te tumu fiko nanuìa i òto o to īa pāpua vino.
Ua hano īa i te puku kohi, aòè i koàka mai.
7 U peàu īa i te ènana hana io te pāpua vino :
« A toù èhua i tēnei e hano pu au i te puku
me io hua tumu fiko.
Aòè he puku i koàka mai. A kokoti !
No te aha to īa kai pu i te mōmona o te èpo ? »
8 Atià, u haahua te ènana hana :
« E te hakaìki e, avai i tēnei èhua hakaùa.
O īa te ava no te keì i te èpo vii pu o te tumu,
no te haatapavaù me te tūtae.
9 E hua oti i te puku. Akoè à, e kokoti òe ! »