1) - Paha ma he èo tahiti :

I òto o te kāputuèo a te Pū tuhuka èo tahiti, e ìte tātou :

*- tapa hāmani 334, paha : peut-être, probablement, sans doute.

2) - Oti me nehe ma he èo ènana :

Ma he èo ènana, mea nui te ponatekao e hua mea ananu me paha, me he mea o oti me nehe. E ìò ai te avetekao : « E ìma pūpū oti/nehe ? ».

Mea haapoto i te tekao, ua ìte meitaì tātou, mea au te ènana e haahana i hua ponatekao oti. Me koè to òe ìte pēhea te haahua atu i tītahi uiuiìa, o te ponatekao oti ta òe e haahana.

3) - Tītahi hakatu kē no oti :

Me ape mai tahipito ia òe « I hea te pāriri ? », e haahua atu ai òe : « I hea oti ? ». Totahi atu : « E hia o Pio èhua ? », e haahua atu ai òe : « E hia oti ? ».

A tiòhi meitaì ! O te ponatekao oti tītahi ma he èo tahiti me nā haaviviniìa e ùa :

*- pao

*- e koàka (oti ?) …

4) - Paha ma he èo ènana :

Enā te ponatekao paha ma he èo ènana, mea kē ananu à te haaviviniìa. I te tapa hāmani 108 o te hāmani tāpapaìa ponatekao a te èpikopo Le Cléac’h, e ìte tātou : paha, insulte, injure, blasphème ; jurer, blasphémer.

Oia hoì te haaviviniìa toitoi oko i koàka ia tātou i òto o te ùa o te « Tekao Ònohuu » : « Aua òe e paha i te Etua to òe Hakaìki ! ».

A pīòmi înei no te tatau i te hātika tekao ma ùka te nuiìa hakatu e haaèo mai i te ponatekao farani « peut-être » ma he èo ènana…

Patuìa e Jacques Iakopo Pelleau - 2016
U haatoitoiìa te patuhei vāàna i te tau ture a te Haè tuhuka èo ènana i te 11/08/2022.