TE HUAAHAÈ MEITAÌ NO NATARETI
TATAUÌA O TO MUA HĀMANI O TAMUERA 1,20-22.24-28
20 Ua too Erekana i ta īa vehine. U haameitaì te Etua ia īa.
Ia tihe te ava, u hānau Ana i te tamaòa.
Ua apaìa te ikoa o te tama : Tamuera,
Oia hoì ma he èo ènana : « U hakaòko te Etua. »
na te mea, u peàu Ana :
« Ua ape au io te Hatu Etua i te tamaòa. »
21 Ia tihe e tahi èhua o te tama,
u peàu te motua, Erekana te ikoa,
e hiti pererina īa e tahi me to īa huaahaè paotū
no te ùtuna hēaka i te Hatu Etua. Oia nei ta īa tekao voto.
22 U te e hiti Ana. U peàu īa i ta īa vāhana :
« Epō e hakaēa te hākai me te ū i te tama.
A tahi a hiti īa. E ùtuna au ia īa i te Etua.
Ma hope, e noho īa ananu i èià. »
Ia haapaeìa Tamuera me io te ū, u aahi Ana,
to īa kui, i te pōìti i te kaavai Tiro, io te haè o te Hatu.
Ua too Ana i te kaiū toro piha, e toù o īa èhua.
Ua too īa me te kaka haraoa tee me te hue vino.
25 Ua ùtunaìa te piha me he hēaka.
I muì iho, u aahiìa te tama io he tāuà.
O Eria te ikoa o te tāuà.
26 A tahi a peàu Ana ia īa : « A hakaòko mai, e te hakaìki e.
Tiàtohu nui, me he mea he ènana pohuè òe,
o au te vehine te i tū i înei, i mua o òe, e pure ana i te Hatu.
27 Ua ape au i te Hatu i te tama : oia ta ù pure.
Ua tuku mai te Hatu i te tamaòa vāàna i to ù hīa.
28 I tēnei, e ùtuna au i te Hatu i hua tama.
Ma te òa o to īa pohuèìa,
e mau ananu he taetae ùtunaìa i te Hatu. »
Ua moe haatona âtou i te aò o te Hatu.
TARAMO 84 (83) 3, 4, 5-6, 9-10
E te Hatu e, he moû, he koakoa anaè i òto o to Òe haè.
3 E kōhoà nei au me te uēuē
E hiti io te haè o te Hatu.
Me i òto te koekoe me te hōupo
To ù taaàu i te koakoa io Òe, te Etua e.
4 No te manu kōmako to īa kōhata.
No te tau kiokio kōpeka to âtou vahi maù.
No ù to Òe hātaa pure, e te Hatu e,
To ù Etua, to ù Hakaìki nui e.
5 Mamau te tau ènana te i noho io to Òe haè,
Oatea te pō, e hahi aa i to Òe Kāìè.
6 Mamau te tau ènana haaìiìa e Òe,
E tohe âtou i te Meitaì me te koekoe oko.
9 E te Etua mana nui e, a hakaòko mai.
A apuu i ta ù pure, e te Etua o Iakopo e.
10 E te Hatu Etua te i pāpua mai,
A tiòhi i te mata o to Òe Kirito.
TATAUÌA O TO MUA HĀMANI A IOANE ÂPOTORO 3, 1-2.21-24
E tu ù tau tuàne tuehine,
1 A kaituto me te mahaò i te nuiìa
o to te Etua kāòha ia tātou.
Ua ao Īa e apaìa tātou he tau tama no Īa.
Ua ìò hoì tātou he tau tama tiàtohu no Īa.
O īa te piò aòè to te ao nei e apuu ia tātou.
Pēhea te koàka ? Aòè īa i ìte i te Etua.
2 E tu ù tau hoa tāhia e, i tēnei, he tau tama tātou a te Etua.
E aha to tātou hakatu ma tītahi â ? U te e ìte meitaì tātou.
E tahi mea tiàtohu anaiho :
i te ava e hakaìte Ietu Kirito ia Īa iho,
e ìò tātou hakatu me Īa,
na te mea, he mata he mata e ìte ai tātou ia Īa.
21 E tu ù tau hoa tāhia e,
me hakatio koè to tātou koekoe ia tātou iho,
a noho tātou me te moû i mua o te Etua.
22 E vaièi mai Īa i te mea paotū ta tātou e ape me io Īa,
na te mea u aotahi tātou i ta Īa tekao,
ua hana tātou i te hana haaèka ia Īa.
23 Pēènei hoì te Tekao a te Etua :
A haatià tātou ia Ietu Kirito, ta Īa Tama,
a kāòha te hoa i te hoa, vāàna i to Īa makimaki hakaìteìa mai.
24 Te ènana u aotahi i te Tekao a te Etua,
ua noho īa i òto o te Etua, ua noho te Etua i òto o īa.
Ua ìte tātou i te mea ua noho te Etua i òto o tātou,
na te Kuhane Meitaì te i vaièiìa mai.
ALLELUIA ALLELUIA.
U hei nui, he Etua pūkana pu Òe,
he Etua ma vāveka o te tau ènana, Ietu, Haapohuè !
ÈVANERIO O IETU KIRITO VĀÀNA E RUKA 2, 41-52
41 I tēia èhua, i tēia èhua, i te ava Koìka Pakate,
ua hiti i Ierutaremi te motua me te kui o Ietu.
42 I te ava ua pao toitoi ònohuu ma ùa èhua to Ietu,
ua hiti âtou i te koìka me he mea ua hani âtou.
43 Ia pao te mou â koìka, ua hua âtou.
Te tama Ietu à, ua noho i Ierutaremi,
ìte koè to īa motua me te kui.
44 E auana ta âua enā te tama me te tau hoa,
ua taha atu âtou, e tahi â te tahaìa.
A tahi a hano âua e ùmihi ia Ietu
i vāveka o te huaa me te tau hoa.
45 Aòè i koàka mai Ietu ia âua.
I hua atu ai âua i Ierutaremi e ùmihi aa.
46 Ua pao e toù â i te ùmihi, io he Hiero u koàka ia âua Ietu,
e kaapee aa i vāveka o te tau tuhuka tekao,
e hakaòko me te ūi atu ia âtou.
47 Ua pē i te mahaò te poì paotū e hakaòko ia Īa,
e ìte aa i to Īa māàma me to Īa haahua atu i te tekao.
48 U emièe te motua me te kui i te ìteìa ia Ietu.
U peàu to Īa kui : « E tu ù tama e,
no te aha ta òe atii ia māua ?
Eīa to òe motua me au nei pī i te uē, e ùmihi ia òe. »
49 U peàu Ietu ia âua : « No te aha i ùmihi ai ôùa ia ù ?
Aha u te e ìte ôùa :
o to ù hana tumu te tiòhi i ta to ù Motua ? »
50 Aòè âua i vivini i ta Ietu tekao ia âua.
51 Ua hee Ietu me âua i Natareti. U aotahi atu Īa ia âua.
U haamau to Īa kui i tēia mea paotū io he koekoe.
52 Ua nui aè, nui aè to Ietu māàma me te òa atu to Īa nino.
U koàka mai ia Īa te karatia io te Etua.
U haataetae te tau ènana ia Īa.