NO TE VENINI TAPU
TATAUÌA O TE HĀMANI A TE PEROHETA ITAIA
52, 13-15 ; 53, 1-12
13 Eīa e tapavaù to ù tāvini,
e òko nui aè, e hiti aè, e tiketike nui.
14 U peàu te Hatu : « U kiiete nui te mataèinaa
ia tiòhi atu i to ù tāvini :
ohia u mata koè īa, aòè e hakatu ènana hakaùa.
15 Atii te tau hakaìki, e haamāmā i te haha
i mua o to ù tāvini.
E ìte ai âtou i te mea koè ananu i peàuìa mai,
e kanino atu i te mea koè ananu i òkoìa mai.
53,1 O ai e haatià atu i ta tātou i òko nei ?
Ia ai te ìi o te Hatu i haaìteìa mai ?
2 I te aò o te Etua, ua tupu te tāvini me he kohoe i àò,
me he aka totoo ma he henua moô.
Ia tiòhi atu, koè īa i poèa, koè īa i kanahau.
3 U haameeìa, u titiiìa hua tāvini
me he mātua kai mamae.
U haaìno atu tātou ia īa me te haapaòpaò anaiho,
u tukitukiìa e te uē
hakatu me te mea toomanu e haapiko i to mātou mata.
4 Atià, no tātou te mamae e amo nei īa,
no tātou te uē u òomi i to īa menava.
5 I to tātou maakau, na te Etua i oonaki, i pehi,
i haapaìha iho.
Atià, mēìa i to tātou mīkeo, u tīputaìa īa ;
mēìa i to tātou mākaka i pehiìa īa.
6 Ma ùka o īa, u topa mai te tuki haamoû mai ia tātou ;
mēìa i to īa tau maki i oà ai tātou.
Me he mutō papauō tātou, hakatahi ma to īa iho puta.
Me te haatopa o te Hatu ma ùka o īa
i te mīkeo o tātou paotū.
7 U hanapēìa, u haapāpaku, aòè e pepeù i te haha.
Me he àrenio aahiìa i te kukumi.
Me he kōivi mutō i mua o te ènana tīnai,
pepeù koè te haha.
8 Ua humuìa, haavāìa, haakoèìa.
O ai to te haamaakau atu i to īa paoìa ?
U takiìa me io te henua o te poì pohuè.
U pehiìa haamate mēìa i te mīkeo o to īa mataèinaa.
9 U tomiìa me he poì haatià koè.
Me te poì moni to īa menema.
Atià īa, koè ananu i mākaka i tītahi,
koè to īa èo i tekao tīvava.
10 U makimaki te Hatu e tukituki atu me te mamae.
Mēìa u ùtuna atu i to īa pohuè mea hoko mīkeo,
e ìte ai i to īa tupu i ùka aè, e haaòa aè i to īa tau â.
Ma io īa, e tae anamai te hīa o te Hatu.
11 Ma hope o te ûûkina o to īa kuhane, e ìteìa te māàma,
e tapavaù nui. Ma to īa mamae, e haameitaì tu ù tāvini
i te tini tini ènana a amo ai i to âtou mīkeo.
12 No èià, e tuku au io īa i te tau haètoa,
e àva īa i te tuhaìa taetae me te poì mana.
Ohia à, na īa ta īa i ìò atu i te mate,
i tatauìa me te poì mīkeo.
Mēìa ua amo i te mīkeo o te tau ènana tini tini,
u vevaò īa i uē i te poì mīkeo.
TARAMO 30 (31), 2.6, 12, 13-14ac, 15-16, 17.25
Io to ìma, e te Hatu e, e tuku nei au i to ù kuhane.
2 E te Hatu e, io Òe to ù vahi maù.
Umoì au e haameeìa ma te tau â paotū.
6 Io to Òe îìma, e tuku nei au i to ù kuhane,
E te Hatu, te Etua tiàtohu e, tu ù Haapohuè.
12 U toomanu au nei no to ù tau hoa noho tata,
Ia ìte mai, u haametaù to ù tau hoa.
Ua hiki mamao me io ù
Te poì i tutuki me au ma io he vaanui.
13 U haatūhaèìa au me he tūpāpaù ìtekoèìa.
U haatūhaè âtou ia ù me he kaù tioàìa.
14 Ua òko au i te tekao haapōtoho mai
Ta te haètoa e hano aa no te kukumi mai.
15 U haatià au ia Òe, e te Hatu e.
U peàu hakaùa : o Òe tu ù Etua.
16 I òto o to Òe îìma to ù pohuè :
A taki mai me io te îìma i mākaka ia ù.
17 A pupuà to Òe mata no to Òe tāvini,
Mēìa i to Òe uē, a haapohuè mai.
25 A oko nui te koekoe. Oho te ìi
Ôtou paotū e tataì nei i te Hatu !
TATAUÌA O TE HĀMANI I TO HEPEREO 4, 14-16 – 5, 7-9
E tu ù tau tuàne tuehine.
4,14 Ohia ua ìò Ietu he Tama a te Etua,
to tātou Tāuà nui tiketike,
te i tomo i ùka nui o te àki,
a tohe mau tātou i te haki atu i te haatià.
15 Na te mea, u mehea hua Tāuà nui
mēìa i te tau tekateka o to tātou koekoe pepee.
Ua ìte hoì Īa ma te tiàtohu i te nuiìa
o te mea haaveke me te haamōtii mai ia Īa ;
atià à, u mīkeo koè Īa.
16 No èià, a haatata mai tātou haametaù koè
me te Etua mana nui, te tumu o te vaièiìa,
vāàna e ìò mai ia tātou to Īa hakāòha
me te karatia no te toko mai, i te ava e hei.
5,7 O Ietu Kirito e pohuè aa io he henua nei,
me he ènana mate vave, ua pure Īa i te pure vevaò,
e uē aa, e taaàu aa io te Etua,
etià e haapohuèìa me io te mana o te mateìa.
U apuuìa ta Ietu Kirito pure
mēìa i to Īa kāòha me te aotahi atu.
8 E aha à he Tama te Kirito,
ma to Īa mamae, u hakako Īa i te aotahiìa.
9 Ma èià, ua ìò Īa he toitoi noa i mua o te Etua,
u haatūìa te tumu o te pohuè ananu,
no te tau ènana paotū e aotahi ia Īa.
U aotahi te Kirito tihe i te mateìa,
te mateìa io he peka.
Oia te tumu u haatiketike anaè te Etua ia Īa,
me te apa i te ikoa, ma ùka o te tau ikoa ia ôtoa.
TATAUÌA O TE MEMAE O IETU KIRITO
VĀÀNA E IOANE 18, 1-40 – 19, 1-42
I tēia mou pō,
18.1 ua hee Ietu me to Īa huaa kouâ
i tītahi kēkē o te vaitahe Keterone.
Enā i èià e tahi pāpua.
Ua uu Ietu me to Īa huaa kouâ i òto o hua pāpua.
2 O Iuta, te i haaìò ia Ietu, ua ìte meitaì i hua vahi ;
mea nui hoì te tiheìa o Ietu i èià me to Īa huaa kouâ.
3 Ua tihe mai Iuta, e haatee aa
i te hatu kape Roma me te tau mūtoi tiaki
i tukuìa mai ia īa e te tau tāuà nui me te tau fariteo.
Ua kave âtou i te tau àmahue,
te àmakohe me te haìna tōua.
4 Ua ìte Ietu i te tau hana paotū ta âtou i haapao
ma ùka o Īa.
Ua hee Īa i to âtou aò me te peàu :
+ « O ai ta ôtou e ùmihi nei ? »
5 U hua atu âtou ia Īa :
F « Ietu no Natareti. »
U peàu Ietu ia âtou :
+ « O au. »
O Iuta tītahi me âtou.
6 Ia peàu Ietu i tēnei ponatekao, O au,
ua hua âtou i muì me te topa io he tuaèpo.
7 Ua ūi hakaùa Ietu ia âtou :
+ « O ai ta ôtou e ùmihi nei ? »
U peàu âtou ia Īa :
F « Ietu no Natareti. »
8 U hua atu Ietu ia âtou :
+ « U peàu au ia ôtou i kapo nei : O au.
No to ôtou ùmihi mai ia ù,
a avai ia âtou a hee atu. »
9 Atii e haatiàtohuìa te tekao a Ietu, pēènei à :
« Aòè i kaò e tahi o te huaa ta òe i tuku mai. »
10 Timone Petero, ua too i te kohetā ta īa i kave mai.
Ua tā īa i te tueni o te tāuà nui
me to īa haamotu i te puaìka ìma oko o te tueni.
O Marakuto te ikoa o hua tueni.
11 U peàu Ietu ia Petero :
+ « A tuku iho i to òe kohetā io he pokoo.
E aha, aòè au e inu i te ipu mamae
i tukuìa mai e tu ù Motua ? »
NO IETU I HAAVĀÌA E ANA ME KAIFA
12 Te hatu kape Roma, to âtou vivini,
te tau mūtoi i pahiìa e te tau ati Iuta,
u popoki âtou ia Ietu me te humu ia Īa.
13 Òmua ìka, u aahi âtou ia Ietu io Ana.
He motuòai īa no Kaifa. I hua ava, he tāuà nui Kaifa.
14 Na hua Kaifa i peàu i te tau ati Iuta :
« E meitaì atu no ôtou e mate nui te ènana e tahi anaè
i uē i te mataèinaa. »
15 Atià, u ūtaì Petero me tītahi kouâ kē ia Ietu.
Ua ìteìa hua kouâ e te tāuà nui.
Ua uu īa me Ietu io te pāpua o te tāuà nui.
16 Ua noho Petero i vaho o te avaputa.
Ia uu hua kouâ te i ìteìa e te tāuà nui i vaho,
u tekao īa me te vehine tiaki avaputa.
U haauu īa ia Petero i òto o te pāpua.
17 U peàu hua vehine tiaki avaputa ia Petero :
A « Aòè à òe tītahi kouâ o tēnei ènana ? »
Ua hua atu Petero ia īa :
D « Aòè au e kouâ no Īa. »
18 Mēìa i te kamaìi, u haauà te tau tueni
me te tau mūtoi tiaki i te ahi.
Ua noho âtou pii he ahi no te haamāhanahana.
Petero tītahi me âtou.
19 Ua ūi atu te tāuà nui ia Ietu no to Īa tau kouâ
atii me to Īa hakakoìa.
20 U haahua atu Ietu ia īa pēènei :
+ « U tekao ananu au
etià e vivini te tau ènana paotū ia ù.
U hakako ananu au io he tinakoka me te Hiero,
i èià te putuputu o te tau ati Iuta paotū.
U te peàu au e tahi tekao hakanā.
A ape òe i te tau ènana te i hakaòko mai
e aha ta ù i peàu ia âtou.
O âtou hoì te i ìte i tu ù hakakoìa. »
22 Ia òko i hua ponatekao tītahi mūtoi tiaki e tū aa nei,
u papaki ia Ietu me te peàu :
A « Atii ta òe tekao i te tāuà nui ? »
23 U hua atu Ietu ia īa :
+ « Me he mea u teka tu ù tekao, a haaìte mai.
Ia meitaì tu ù tekao,
e aha te piò o to òe papaki ia ù ?
24 I muì iho, ua pahi atu Ana ia Ietu humuìa io Kaifa.
25 Atià i èià, pii he ahi, ua noho Timone Petero,
e haamāhanahana aa ia īa. U peàu mou ènana ia īa :
A « Aòè à òe tītahi o to īa tau kouâ ? »
U haakoè Petero me te peàu :
D « Aòè au he kouâ no Īa. »
26 U pohā te èo o tītahi tueni o te tāuà nui,
e huaa īa no te ènana i haamotuìa te puaìka
e Petero me to īa kohetā. U peàu hua tueni ia Petero :
A « E aha, aòè ua ìte au ia òe
io he pāpua me te ènana nei ? »
27 U haakoè hakaùa Petero. Ua taki anamai te moa.
NO IETU HAAVĀÌA E PINATO
28 U aahiìa Ietu me io Kaifa io te haè o te hakaìki Roma.
He pōpōuì tika. Atià, aòè te tau ati Iuta i uu
i òto o te haè o te hakaìki Roma,
oa hava âtou i te piò.
E hano hoì âtou i te mau Pakate kai.
29 Ua uu Pinato i vaho no te tutuki me âtou. U peàu īa :
A « E aha te piò e hakatio pu ôtou
i tēnei ènana ? »
30 Ua peàu âtou ia Pinato :
F « Anoa aòè īa he ènana mākaka,
u te haaìò mātou ia òe i hua ènana. »
31 U peàu Pinato ia âtou :
A « A too ôtou ia īa me te haavā vāàna
i to ôtou ture. »
U haahua atu te tau ati Iuta :
F « Aòè e koàka ia mātou
te haamate i te ènana. »
32 Oia hoì te mea e haatiàtohu ai i ta Ietu i peàu
no te haavivini i te hakatu o to Īa mateìa.
33 Ua uu hakaùa Pinato io to īa haè
me to īa vevaò ia Ietu. U peàu ia Īa :
A : « E aha, o òe te Hakaìki nui o te tau ati Iuta ? »
34 U hua atu Ietu :
+ « Na òe ta òe tenā tekao,
akoè à na tahipito i peàu mai i ùka o au ? »
35 U peàu Pinato :
A « E aha, he ènana ati Iuta au nei ?
Na to òe mataèinaa me te tau tāuà
i haaìò mai ia òe io ù. E aha ta òe i hana atu ? »
36 Ua hua atu Ietu :
+ « Aòè me i te ao nei to ù hakaìkiìa.
Anoa me i te ao nei to ù hakaìkiìa,
e tōtōua hoì to ù huaa tautua,
oa haaìòìa au i te poì ati Iuta.
Atià, aòè e hakatu to ù hakaìkiìa
me to te ao nei. »
37 U peàu Pinato :
A « No èià, he hakaìki òe ? »
Ua hua atu Ietu :
+ « Na òe i peàu. He hakaìki au.
Oia te tumu o to ù hānauìa me te tiheìa
i te aomāàma nei : no te haaìte i te mea tiàtohu.
Te ènana ua kē me te tiàtohu,
u hakaòko i ta ù tekao. »
38 U peàu Pinato ia Īa :
A « E aha te tiàtohu ? »
Ia haahitipona Pinato i hua tekao,
ua uu hakaùa i vaho.
NO IETU E HAKATIOÌA E PINATO
39 Ua taha Pinato io te poì ati Iuta me te peàu :
A « Aòè i koàka ia ù te piò no te hakatio
i hua ènana.
Atià, no te Koìka Pakate, vāàna i to ôtou haa ati Iuta,
e vevete au i tītahi me io he haèhumu.
E aha, u makimaki ôtou e vevete au
i te hakaìki nui o te tau ati Iuta ? »
40 U taaàu oko ki âtou :
F « Umoì tēia. A vevete ia Parapā ! »
O Parapā hoì, he ènana mākaka.
19,1 I muì iho, u peàu Pinato a tooìa Ietu no te tā ia Īa.
2 U àaka te tau kape i te paè me te èitā taataa.
Ua tuku âtou i hua paè i ùka o te upoko o Ietu.
Ua tomi âtou ia Īa me te kahu uhi pu veàkiki.
3 U haatata mai âtou me Ietu e peàu aa :
F « Kāòha, e te hakaìki o te tau ati Iuta. »
U papaki âtou ia Īa.
4 Ua uu hakaùa Pinato i vaho me te peàu :
A « Eīa. U aahi au ia Īa i vaho nei io ôtou
etià e ìte ôtou aòè i koàka ia ù
te piò no te hakatio i hua ènana. »
5 Ua uu Ietu i vaho me te paè taataa,
me te kahu uhi pu veàkiki.
U peàu Pinato ia âtou :
A « O īa nei te ènana. »
6 Te tau tāuà nui me te tau mūtoi tiaki,
e tiòhi aa ia Ietu, u taaàu oko ki âtou :
F « A pāoka. A pāokapeka atu ! »
U hua atu Pinato ia âtou :
A « A too ôtou ia Īa. A pāokapeka atu !
Aòè i koàka ia ù te piò
no te hakatio ia Īa. »
7 U haahua atu te tau ati Iuta :
F « He Ture no mātou.
Vāàna i hua Ture, a mate nui Īa
mēìa u peàu e Tama Īa a te Etua. »
8 Ia òko Pinato i hua tekao, ua nui aè to īa haametaù.
9 Ua uu hakaùa Pinato io to īa haè. Ua ūi atu ia Ietu :
A « Me i hea mai òe ? »
Ua mutu Ietu.
10 A tahi a peàu Pinato :
A « Umaha u te makimaki òe e tekao mai ?
Aòè òe i ìte e mana to ù no te vevete ia òe,
akoè à e mana to ù no te pāokapeka ia òe ? »
11 U haahua Ietu :
+ « He mana ta òe i ùka o au
mēìa i tukuìa ia òe e te Etua.
No èià, nui atu te mīkeo o te ènana
te i haaìò ia ù i to òe îìma. »
12 Oia te tumu ua hano Pinato e vevete ia Ietu.
Atià, u taaàu te tau ati Iuta me te peàu :
F « Me he mea e vevete òe i tēnei ènana,
aòè òe e hoa no Ketare.
Te ènana ua hano ia īa haahakaìki nui,
ua hano hua ènana e tōua me Ketare. »
13 Ia òko Pinato i hua tekao,
u peàu no te aahi ia Ietu i vaho.
U noho īa ma ùka o to īa nohoka haavā tekao,
io he taha i vevaòìa Tohua keâ,
Kapata ma he èo hepereo.
14 He â i peàuìa no te haapei i te Koìka Pakate,
hua â nei, i te oatea nui.
U peàu Pinato i te poì ati Iuta :
A « O īa nei to ôtou hakaìki nui. »
15 U taaàu âtou :
F « A mate ! A mate. A pāokapeka atu ! »
U peàu Pinato :
A « E pāokapeka au i to ôtou hakaìki ? »
U haahua atu te tau tāuà nui :
F « O Ketare anaiho to mātou hakaìki. »
16 A tahi a haaìò Pinato ia Ietu
etià e pāokapekaìa e âtou.
NO TO IETU PĀOKAPEKAÌA
17 Ua too âtou ia Ietu me te aahi atu.
E amo aa Ietu tootahi i to Īa peka,
ua taha Īa io te vahi apaìa Karavario,
Korokota ma he èo hepereo.
18 I èià, u pāokapeka âtou ia Ietu.
U pāokapeka âtou i nā ènana kē tokoùa :
i tēia kēkē tītahi, i tēia kēkē tītahi.
I vāveka Ietu.
19 U kānea Pinato e tahi mēmau patuìa.
U tauèvaìa hua mēmau io he peka.
Oia nei te mea i patuìa :
« O Ietu no Natareti, te Hakaìki nui o te tau ati Iuta. »
20 E mea nui te ati Iuta te i tatau i hua tekao haaìte,
na te mea, ua tata me te pāpuahaè
te vahi i èià u pāokapekaìa Ietu.
U patuìa ma he èo hepereo, te èo hereni, te èo ratino.
21 U peàu te tau tāuà nui ia Pinato.
F « Umoì e patu :
e hakaìki nui o te tau ati Iuta. »
A patu pēènei : u peàu hua ènana :
O au te hakaìki o te tau ati Iuta. »
22 U haahua Pinato :
A « Te mea ta ù i patu, ua pao i te patu. »
23 Ia pāokapekaìa Ietu e te tau kape,
ua too âtou i to Īa tau kahu me te hopehope e hā pāio,
pāio kē to te hoa, pāio kē to te hoa.
Ua too âtou me to Īa kahu òa.
Atià, aòè i tuiìa hua kahu.
E tahi tapa anaiho me i ùka tihe atu i àò nui.
24 U peàu âtou :
A « Umoì e haatuivā,
a tuha tātou ma te haakai. »
Ua pao hua mea etià e toitoi te tekao
i patuìa io he Hāmani tapu :
« Ua tuha âtou i to ù kahu, u haakai i to ù kahu òa. »
Oiana ta te tau kape i haapao.
NO TO IETU MATEÌA
25 U tū pii te peka o Ietu to Īa kui
me te teina o to Īa kui,
te vehine a Kereopa, o Maria te ikoa,
Maria Matarena.
26 E tiòhi aa Ietu i to Īa kui
me to Īa kouâ tāhia ma to īa kaokao,
u peàu i to Īa kui :
+ « E te vehine, o īa nei ta òe tama. »
27 I muì iho, u peàu i to Īa kouâ :
+ « O īa nei to òe kui. »
Me i tēia ava anaiho,
ua too te kouâ ia Maria io to īa haè.
28 Ua ìte Ietu ua pao te mea ta Īa i haapao
no te haatoitoi i tītahi ponatekao patuìa
io he Hāmani tapu, u peàu :
+ « Ua paka au i te vai. »
29 Enā i èià e tahi ipu pī i te vīneka.
U haakutaùìa me te vīneka tītahi mēmau omotai.
U haamauìa hua mea omotai
ma ùka o te makamaka âkau.
U haatataìa me to Ietu haha.
30 Ia ako Ietu i te vīneka, u peàu :
+ « Ua pao ònaòna. »
A tahi, e oha aa Ietu i te upoko,
ua tuku atu i te kuhane.
(A noho muò, a kaituto)
NO TE VEÒ I TE KAOKAO O IETU
31 Oia te â no te Haapei i te Koìka Pakate.
He â tapu oko no te tau ati Iuta tēia koìka,
tōtahi atu mēìa e haììa ma te Tāpati.
No èià, ua ape âtou ia Pinato
a hahati i nā vaevae o te tau ènana i pāokapekaìa
me te taki iho i to âtou nino
oa èva âtou i hua â io he peka.
32 Ua tihe mai mou kape te i hahati i te tau pūhāvaevae
o nā ènana i pāokapekaìa me Ietu.
33 Ua tihe âtou io Ietu, ua ìte u mate nui,
aòè âtou i hahati i to Īa vaevae.
34 Atià, tītahi kape, me te taa, ua veò i to Īa kaokao.
Ua tahe anamai te toto me te vai.
35 Na te ènana i ìtemata te i haatiàtohu i hua mea.
He tekao tiàtohu ta īa.
Ua ìte te Hatu : u peàu īa i te mea tiàtohu,
etià e haatià me ôtou.
36 U haapaoìa hoì hua mea etià e toitoi
te tekao a te Hāmani tapu te i peàu :
« Umoì e hahatiìa e tahi o to Īa tau ivi. »
37 U patuìa io he taha kē :
« E tiòhi ai âtou i tēia ta âtou i tīputaèe. »
NO TE TOMIÌA O IETU
38 I muì iho, ua ape Ioteve no Arimatea ia Pinato
no te too mai i te nino tūpāpaù o Ietu.
He kouâ Ioteve no Ietu, atià ma te haapupuni
na te haametaù i te tau ati Iuta.
Ua ao Pinato. Ua tihe Ioteve
me to īa taki atu i te nino o Ietu.
39 Ua tihe me Nikotemo.
O īa te i tutuki me Ietu òmua i te pō.
Ua kave mai īa i te mea kakaa,
me he e ìma ònohuu kiro,
he mira me te aroe ua pao i te kāvohi.
40 Ua too âtou i te nino o Ietu,
ua vāhī me te tapa me te mēmau kakaa.
Ua hana anaiho âtou vāàna i te haa ati Iuta
no te tomiìa i te nino tūpāpaù.
41 Enā i èià, tata èka me te taha o to Īa pāokapekaìa,
e tahi pāpua me te ana tūpāpaù hou.
Òmua, aòè tītahi nino tūpāpaù i tomiìa i òto o hua ana.
42 Mēìa i te â Haapei i te Koìka Pakate,
ohia mea tata èka hua ana tūpāpaù,
i èià ua tomi âtou ia Ietu.
_____________________