TOMINIKA E ÙA O TE PAKATE
NO TE ETUA HAKĀÒHA NUI
TATAUÌA O TE HĀMANI HANA A TE TAU ÀPOTORO
2, 42-47
42 U tohe mau te tau tuàne i te hakaòko
i te hakakoìa o te tau Àpotoro
te haatūtaì atu tūtaì mai me he tuàne tuehine,
te vahi i te haraoa, te haaputuputu no te pure.
43 Ua hemo te tau ènana paotū i te haametaù
mēìa i te nuiìa o te hana mahaò
me te hakatu mana i haapaoìa e te tau Àpotoro.
44 U haatahi te poì haatià ia ôtoa,
u àva atu àva mai âtou i to âtou tau mēmau paotū.
45 U haaìò i to âtou tau henua me te taetae
i te hoko atu, no te tuha i te moni i koàka mai
vāàna i te mea e hei i tītahi i tītahi.
46 I tēia â, i tēia â, ma òto o te koekoe e tahi,
ua tohe mau âtou te hiti io te Hiero o Ierutaremi.
Ua vahi âtou i te haraoa io to âtou iho haè.
Pī i te koakoa, u atekai âtou i te oà me te koekoe moû.
47 Ua hahi âtou i te Hatu.
U haataetae ia âtou te mataèinaa paotū.
I tēia â, i tēia â, na te Etua i haapii me âtou
i te poì haapohuèìa.
TARAMO 117 (118), 1.4, 13-14, 19.21, 22-23, 24-25
Paona koè to Īa kāòha. 117, 1
1 A haahuaèkaèka i te Hatu : u matavaièi mai Īa.
Paona koè to Īa kāòha.
4 A peàu te poì pakaihi i te Hatu :
Paona koè to Īa kāòha.
13 U tōtōua âtou me au, ua ketu mai e hano e haamate,
O te Hatu te i tiòhi meitaì i ùka o au.
14 Io te Etua to ù ìi, e hahi au ia Īa.
O Īa hoì te i haapohuè mai.
19 A pepeù i te avaputa o te Hiero,
E tomo au no te haahuaèkaèka i te Hatu.
21 U haahuaèkaèka au ia Òe te i haaòko mai,
E te Hatu e, o Òe tu ù haapohuè.
22 Te keâ i titiiìa e te poì haatū i te haè,
Hua keâ avai noa, ua ìò he keâtaa.
23 Oiana te hana o te Hatu,
E hana mahaò haapekahi ia mātou.
24 Oia nei te â i haatoitoiìa e te Hatu.
He â koìka, he â o te koakoa no mātou.
25 E te Hatu e, a vaièi mai i te pohuèìa.
E te Hatu e, a vaièi mai i te tuàkiìa.
TATAUÌA O TO MUA HĀMANI A PETERO ÀPOTORO
1, 3-9
3 A haameitaììa te Etua,
te Motua o to tātou Hatu, Ietu Kirito.
Mēìa i to Īa hakāòha nui,
u haahānau hou te Etua Motua ia tātou
ma te haatū hakaùa ia Ietu Kirito
me i vāveka o te huaa mamate.
4 Oia te tumu u tataì mau tātou i te tau taetae
ta te Etua e vaièi mai i to Īa mataèinaa.
Aòè e koè ai, aòè e haapēìa, aòè e kaò hua taetae.
Na te mea, u tāpaeìa io he àki no ôtou.
5 O ôtou anaiho ta te mana o te Etua e pāpua meitaì,
mēìa i to ôtou haatià i te Kirito.
U tataì ôtou i te haapohuèìa ta te Etua e haaìte
i te ava paoìa o te aomāàma nei.
Enā e haatata mai īa.
6 No èià, ua pī to ôtou koekoe i te koakoa,
e aha à no te ava poto e haamamae ia ôtou
te nuiìa o te kōhii.
7 Na hua kōhii e haatiàtohu i to ôtou haatià.
U haapupuà hoì te ahi i te monikiki te i pao vave.
Tōtahi atu, na te tau kōhii e haatiàtohu i to ôtou haatià.
Ma èià, e mea nui atu to ôtou hahi,
te kāìè, te haatiketike
i te â e haaìte hakaùa mai Ietu Kirito ia Īa iho.
8 U kāòha ôtou ia Īa, e aha à aòè i ìtemata.
U haatià ôtou ia Īa, e aha à i tēnei, aòè ôtou i ìtemata.
Ua pī i te koakoa to ôtou koekoe ;
u te àva te ponatekao
no te haavivini i te tumu o hua koakoa
me io he àki mai.
9 Na te mea, u haapohuè te Etua ia ôtou.
Oia hoì te mea i koàka mai ma to ôtou haatià
ia Ietu Kirito.
Ua ìte Toma i te Hatu, u haatià īa.
Mamau te ènana u haatià ìte koè īa.
ÈVANERIO O IETU KIRITO VĀÀNA E IOANE 20, 19-31
19 I te ahiahi o hua â to mua o te âtapu,
u putuputu te huaa kouâ i òto te pāòto.
Ua pāìa te avaputa na te haametaù i te poì ati Iuta.
Ua tihe anamai Ietu.
Ua tū anaè Īa i vāveka ahau o âtou.
U peàu Īa : « Ia ôtou te moû. »
20 E peàu aa i hua ponatekao, u haaìte Ietu ia âtou
i to Īa nā îìma me to Īa kaokao.
Ua pē i te koakoa te tau kouâ,
mēìa ua ìtemata âtou i te Hatu.
21 U peàu hakaùa Ietu : « Ia ôtou te moû.
Me he mea ua pahi mai to ù Motua ia ù,
atii me to ù pahi atu ia ôtou. »
22 Ia pao hua ponatekao,
ua puhi Ietu i to Īa ao i ùka o âtou me te peàu :
« A haakoàka ia ôtou te Kuhane Meitaì.
23 To te tau ènana mīkeo e veveteìa e ôtou, u veveteìa.
To te tau ènana mīkeo e tāmauìa e ôtou, u tāmauìa. »
24 Toma, te i vevaòìa Mahaka,
Titime, ma he èo hereni,
tītahi o te Tīònohuu ma ùa kouâ,
aòè īa me âtou i te â u haaìte Ietu ia Īa iho.
25 U peàu tahipito kouâ ia īa : « Ua ìte mātou i te Hatu. »
U hua atu Toma ia âtou :
« Me he mea u te ìte au io to Īa nā îìma,
i te maki o te puhipuhi i te pāoka,
me he mea u te tuku au i tu ù makamaka ìma
i òto o hua maki o te puhipuhi,
tu ù ìma i òto o to Īa ava kaokao,
aòè au e haatià. »
26 E vaù pō ma hope iho,
ua noho hakaùa te huaa kouâ io he haè.
O Toma tītahi me âtou.
Ua pāìa te avaputa.
Ua tihe anamai Ietu.
Ua tū anaè Īa i vāveka ahau o âtou me te peàu :
« Ia ôtou te moû. »
27 I muì iho, u peàu ia Toma :
« A tuku i înei i to òe makamaka ìma ;
a tiòhi i to ù nā îìma. A haatata i to òe ìma ;
a tuku i òto o to ù ava kaokao.
Umoì òe e pūtuì. A haatià. »
28 U hua atu Toma ia Īa me te peàu :
« E tu ù Hatu e, e tu ù Etua e. »
29 U peàu Ietu ia īa :
« U haatià òe, e Toma, mēìa i to òe ìtemata ia ù.
Mamau te tau ènana u haatià
e aha à u te ìtemata âtou. »
30 Mea nui te hana mana kē me te tau hakatu kē
ta Ietu i hana i te aò o to Īa tau kouâ.
Aòè i patuìa i òto o te hāmani nei.
31 U patuìa hua tau mea nei, etià e haatià ôtou
o Ietu te Kirito, te Tama a te Etua.
Mēìa i to ôtou haatià, e pohuè ai ôtou ma to Īa ikoa.