Pēhea te haaèo mai i te ponatekao farani « peut-être » ?

1) - Ma te haahana i nā mou ponatekao e toù ma hope iho :

a) - « Maakau » : « E hee òe i te koìka oìoì ? ». « Maakau.»

b) - Tekateka : Tekateka e topa te ūa i te pō.

c) - E oti : « E vahi òe i ta ù èhi ? » « E oti »

2) - Ma te tuku ma hope mai o te pahihana i nā mou tekao ma muì mai :

a) - E haa : « E tīmata e haa te hana i te hora e hitu. »

b) - Haana : « U vivini haana te tōìki i ta ù tekao ? »

c) - Oti : «  U koakoa oti òe i ta òe hana ?»

d) - Ùanei : « E ìma tautini ùanei te nuiìa o te ènana kai » (Mateo 14, 21)

Ia haatekaìa, e koàka : « Aê oti Tāporo e tihe mai i tēnei pō e ùa ».

Tītahi mou hakatu kē :

1) - Ua ìte aè nei tātou me he mea aòè te ènana i makimaki e haahua atu i tītahi ūiūiìa mai, akoè à me he mea aòè īa i ìte pēhea te haahua atu, e haahana hoì īa i te ponatekao « oti ».

*- «  I hea to ù (i)hovare ? » «  I hea oti ? »

2) - Tītahi kāneaìa kē atu :

a) - Mea haaèo mai ia « soit…soit… », « ou bien…ou bien » :

« U koakoa oti òe, ua pekē oti òe ? »

b) - Mea haaèo mai ia « ni…ni… » :

« Aê i tihe mai i te hoeìa vaka to Ua Pou, me i to Ua Huna, me i to Tahuata ».

c) - I òto o te tau ūiūiìa, mea nui te ènata e haahana nei i te ponatekao tahiti « ānei » : « E aha teâ ânimara ? E peto ānei ? E potu ānei ? ». Atika à enā te ponatekao « oti », u haahakatu te haaviviniìa me « ānei ». I peàu hoì ai tātou : « E aha teâ ânimara ? E peto oti ? E potu oti ? »

Aua tātou e kāvaì i te tau èo kē ! A pakaihi tātou i te èo ènana/ènata ma te haahana koè i te tau ponatekao me i vaho mai te haatekeo nei i te èo tumu o te Henua ènana/Fenua ènata !

A pīòmi înei mea tatau ma he èo farani !

Patuìa e Jacques Iakopo Pelleau i te èhua 2016.
U haatoitoiìa te patuhei vāàna i te tau aahiìa a te Haè tuhuka èo ènana i te 21/08/2022.