Atii nei me te pahihana pouvoir faire quelque chose.

Ua ìte meitaì tātou mea kē te hakatu āvaiìa i tēia henua, i tēia henua ; henua kē, hakatu kē.

I te Henua ènana nei, ia hee tahipito i te koìka, me makimaki hua ènana e titii i te koìka, aê īa e peàu atu « Aha e ao mai ôtou a hee au ? ». E peàu oti « E hee au », me he mea aòè, ua hee pū…

Atii nei, ia makimaki tītahi hoa e kave atu i te amoka toko, aê òe e peàu atu «  E koàka ia òe te kave atu ? », u peàuìa hoì « E kave òe ? » akoè à « A kave òe ! »

E ùa haaviviniìa to te ponatekao pouvoir faire quelque chose.

1) - E koàka/aê koàka ; e koàna/aê koàna

Mea kē à te kāneaìa avetekao to te pahihana pouvoir, mea kē te kāneaìa avetekao to te pahihana koàka.

*- Me makimaki òe e peàu mai « Je peux t’aider (Je suis assez costaud pour ça) », a peàu òe « E koàka ia ù te toko ia òe », akoè à « E koàka ia ù ia toko ia òe ».

*- Ia haatekaìa « Aê koàka ia ù te toko ia òe ».

*- Atii nei, ia makimaki òe e kave atu Teve ia òe i Nuku Ataha, e ape atu « E Teve e, e koàka ia òe te kave atu ia ù i Nuku Ataha ? », akoè à « E kave atu òe ia ù i Nuku Ataha ? ».

*- Atii nei, u patuìa e Mareko Peàto i òto o ta īa evanerio: « Aòè he mea aòè e koàka i te Etua ».

Èo kē, hakatu kē, èo kē hakatu kē.

Ma he èo farani, ma òto o tītahi vaehope kē, e ìte òe aha u haakoàkaìa te hana i tekaoìa ai. O « -able » me « -ible » hua mou vaehope. No te mea e koàka i te kai, u peàu atu òe « mangeable » ; no te hāmani aê koàka ia òe te tatau, u peàu mai òe « illisible ».

Mea taetae oko hua ponatekao koàka ma he èo ènana, oia te mea i òko hae ìa a mou èhua i tēnei i te kōava o te ponatekao « E ; ua ao », mea nui te ènana i peàu pū « E koàka ».

2) - Ia makimaki òe e haatià atu, akoè à aòè.

a) - U haahana hae ìa ai te ponatekao meitaì.

*- « Mea meitaì ia hee au me ôtou ? ».

*- « Mea meitaì ia inu te tōìki i hua vai mānini ? ».

b) - U haahanaìa atii te ponatekao haatià.

*- « U haatiàìa te puhi i te maimai ma vaho o te haè kaikai ».

*- « Aòè i haatiàìa te hākai i te mako io he one ».

c) - Io he tapa hāmani 19 o te « Mou Pona Tekao » a te Haè tuhuka èo ènana, he mou ponatekao me haatià i òto ta tātou e ìte.

Haatiàìa / haatiàtina motua kui, haatiàìa / haatiàtina kave puhi. Mea kē à no te permis de conduire i peàuìa ai hāmani haakoi pereòo/poti.

d) - U haahanaìa atii te ponatekao ao/ao mai.

*- « Ua ao Nuka a hokoìa atu to īa haè », akoè à « Aòè Nuka i ao a hokoìa to īa haè. »

3) - Ia makimaki òe e haapākeka atu

a) - A haahana atu nā ponatekao aua me umoì me he mea u patuìa i òto te ìma o te Tekao Ònohuu :

*- « Aua òe e haamate i te ènana ! »

b) - A haahana atu i te ponatekao tumu tapu :

*- « Tapu te puhi i te maimai inei ! »

*- « U haatapuìa te patutiki i te Henua Ènana i te èhua 1898.»

4) - Tītahi mou ponatekao kē atu

a) - Imiahia, tapa hāmani 142-I a te kāputuèo a te èpikopo Dordillon. E haahanìa hua ponatekao i mua o tītahi hana mana, ūikaò, miterio, ia koè te haaviviniìa o te hana e tupu aa.

U tata èka te haaviviniìa me ūiahia, tapa hāmani 284-I.

b) - O « Kikaàki ! » te mea ta òe e peàu atu i te ava ua kati òe, aè koàka ia òe te oi, te keue. (D. t.h. 158-I)

c) - Me te ponatekao kiko, e koàka ia òe te hakaìte atu aha u àva te ìi o te ènana no te haapao i te hana, akoè à aòè.

*- « Mea kiko òe ? » = « E koàka ia òe ? Ua àva to òe ìi ? »

E haahua atu oti ai te hoa « E koàka », akoè à « Aê koàka ». E mutu oti te hoa…

Patuìa e Jacques Iakopo Pelleau i te èhua 2015

U haatoitoiìa te patuhei vāàna i te tau aahiìa a te Haè tuhuka èo ènana i te 23/08/2022.
(Aua te tau ponatekao me i òto mai o te tau kōtūòmia me te tau kāputuèo kākiu)