TOMINIKA E ÙA O TE AVA TETAÌ
(Â tapu 10 no Mei 2023)
TOMOÌA : Mutu
TARAMO 85 (84) : E te Hatu e, a hakaìte mai i to Òe kāòha !
A vaièi mai i to Òe haapohuèìa !
Kio Vānana : A haapeipei i te putaìa mai o te Hatu.
A haapāàhaaha i to Īa vaanui.
E ìte te ènana paotū i te haapohuèìa o te Etua.
Pure a te poì haatià : A matavaièi mai, e te Motua e,
i te pure ta mātou e haahiti nei.
A apuu mai me te moû.
ÙTUNA : G.3
1 |
2 |
3 A mave mai, e Ietu e, / E pepeù nei mātou, (e Ietu e)
I to mātou hōupo, / Òe te Hakāòha.
Peàto
Haamaakauìa : Te kāìè ia Òe, e te Hatu e,
Te i mate nui, te pohuè ;
A tihe mai, e Ietu ; a tihe mai, e Ietu.
KŌMŌNIŌ : D.28
Mōumu |
E taha atu nei hoì au |
||
Ua noho mai Òe, e Ietu,/ i òto o au nei. |
|
Hīmene haahuaèkaèka : D.15 Mōumu : Mave mai Òe, e to ù Hatu e,
E kōhoà nei te hōupo ia Òe ;
Mave, mave mai. (bis)
1 3 5 7 |
2 4 6 8 |
PAHIÌA : V.67
Maria, te kui no Ietu, |
Umoì òe e titii |
TOMINIKA E ÙA O TE AVATETAÌ
TATAUÌA O TE PEROHETA ITAIA 40, 1-5.9-11
1 Oia nei te tekao a to ôtou Etua :
« A haamaha te uē, a haamaha te uē, e to ù mataèinaa.
2 A kōnini ta òe tekao no te peàu i Ierutaremi :
Ua pao nui to īa ava mamae,
ua ìò i te hooi i to īa tau mikeo.
Na te ìma o te Hatu to īa tuki haamamae,
mēìa i to īa tau hana tekateka. »
3 U taaàu te èo : « I te henua ataha,
a haapei ôtou i te tiheìa o te Hatu.
I te henua ataha, a kānea te vaanui no te Etua.
4 A haapī meitaì i te tau kākaavai paotū.
A haapāàhaaha i te tau tuaivi me te tau pūkei.
A haamenia i te vaanui keâkeâ.
A pepeù te ava i ùka o te tau kapua tuaivi.
5 A tahi a pupuà te kāìè o te Hatu Etua.
E ìte ai te tau ènana paotū i te mea
me io te haha o te Etua hua haahitipona i te tekao.
9 A piki òe ma ùka o te tuaivi tiketike,
e te keèe te i kave atu i te tekao i Tiona.
A taaàu òe me te èo oko,
e te keèe i kave i te tekao hakaìte i Ierutaremi.
A tekao me te èo oko : umoì e haametaù.
A haki atu io te tau pāpuahaè o te Henua Iutea :
« Eīa to ôtou Etua.
10 Eīa te Hatu Etua e tihe nei me te mana nui.
Ua ìò te vivini ia Īa. Me Īa te tau taetae
ta Īa i koàka mai ma òto o te tōtōua.
I mua o Īa te tuki kāìè i koàka mai.
11 U hākai Īa i to Īa naho hakatu me te ènana tiaki mutō.
Na to Īa ìma e haaputuputu i te tau mutō kakaiū,
me to Īa hopu ia âtou.
TARAMO 85 (84), 9ac-10, 11-12, 13-14
E te Hatu e, a hakaìte mai i to Òe kāòha !
A vaièi mai i to Òe haapohuèìa ! 85,8
9 E hakaòko au : E aha òa ta te Hatu e peàu ?
Oia nei ta te Hatu Etua i peàu :
te moû no to Īa mataèinaa.
10 U tata èka to Īa haapohuè no te ènana haatià.
E noho te kāìè o te Etua io to tātou henua.
11 U tutuki te kāòha me te tiàtohu.
U hoki atu hoki mai te toitoi me te moû.
12 E tupu te tiàtohu me io he henua.
E tiòhi mai te toitoi me io he àki.
13 E vaièi mai te Etua i to Īa taetae kāòha.
E hua to mātou henua i to īa puku.
Taha te toitoi ma mua o te Hatu.
14 E hakaìte hua toitoitìa i te vaanui.
TATAUÌA O TE HĀMANI E ÙA A PETERO ÀPOTORO 3, 8-14
E tu ù tau tuàne tuehine tāhia e,
8 Oia nei e tahi tekao, umoì ôtou e māhaè.
No te Hatu, u hakatu te â e tahi me te tautini, tini èhua.
Atii hoì no te Hatu, ua tūtū te tautini,
tini èhua me te â e tahi.
9 U te e haatevee te Hatu i te haapao
i te mea ta Īa i peàu mai,
me he mea e maakau nei tahipito.
U haaòa, òa te Etua i to tātou tetaììa,
na te mea aòè Īa i makimaki e kaò e tahi ènana.
U makimaki Īa e hāìu te tau ènana paotū i te koekoe
no te hua i te meitaì.
10 Atià, e tihe te â o te Hatu me he ènana kamo.
I hua â, e koè ai te ataàki ma òto o te pokokina nui.
E koè ai te tau mēmau ia ôtoa, e haaèhuìa âtou me te ahi.
Te henua atii me to īa tau mēmau paotū e haapūovoìa.
11 Ohia e koè ai te tau mēmau paotū o te ao nei,
a pohuè ôtou me he tau ènana e tāvini i te Etua,
e aotahi mau i ta Īa tekao.
12 A tetaì ôtou, a hana i te hana meitaì
etià e tihe mai ponihoo te â o te Hatu.
I hua â, e koè ai te ataàki na te ahi uàuà,
e èhu nui te tau mēmau i pūovo.
13 Atià, vāàna i te tekao a te Hatu, e tetaì nei tātou
i te àki hou me te henua hou,
i èià, e tae toitoi noa te makimaki o te Etua.
14 E tu ù tau teina tāhia e,
mēìa e tetaì tātou i hua mea i peàuìa,
a hana tātou vāàna e koàka mai i te Kirito
ôtou nui, piò koè, teka koè, e noho ana me te moû.
ALLELUIA ALLELUIA
cf. Rk.3,4.6
A haapeipei i te putaìa mai o te Hatu. A haapāàhaaha i to Īa vaanui. E ìte te ènana paotū i te haapohuèìa o te Etua.
EVANERIO O IETU KIRITO VĀÀNA E MAREKO 1, 1-8
1 Te tīmataìa o te Evanerio o Ietu Kirito, Tama a te Etua.
2 Vāàna i te mea i patuìa i òto te hāmani o Itaia te peroheta :
« Eīa e pōpahi au i to ù keèe i mua o òe.
Na īa e haapei i to òe vaanui.
3 I te henua ataha, u taaàu e tahi èo, pēènei :
« A haapei ôtou i te putaìa mai o te Hatu.
A haapāàhaaha i to Īa vaanui. »
4 Ua tihe mai Ioane i te henua ataha
me to īa hakaìte atu i te papatema
no te hāìu i te koekoe, etià e haakoèìa te tau mikeo.
5 U titihe mai io īa to Iutea henua ia ôtoa
me to Ierutaremi paotū.
U koàka ia âtou te papatema ma io īa
i òto o te vaitahe Ioritane,
e haki aa i to âtou tau mikeo.
6 Ua uhiìa Ioane i te kahu huu kamerō,
e taka kii puaka to īa taka kooi.
Ua kai īa i te tau manu kakaiū me te mānini tikauè kaipekā.
7 U hakako Ioane i te tekao me ta īa peàu :
« Enā a tihe mai tītahi ma hope o au nei :
he mana kaùoo to Īa, he mana iti to ù nei.
Aòè e hei ia oha au pii to Īa nā vaevae
no te vevete i te aho o to Īa aihū.
8 O au â, u papatema au ia ôtou me te vai,
o Īa e papatema ia ôtou i òto o te Kuhane Meitaì. »