O te meàma mataìki tōmua meàma o hua èhua ; ma te òaìa o hua meàma, e kaò te matahetū apaìa heimataìki. Te meàma èhua, o te iva o hua èhua kākiu ; he mea taetae oko no te mea, ma te òaìa o hua meàma e tupu ai te kohiìa mei nui.
Ohia u haahanaìa te tuhitū a te haoè i te Henua ènana, ua ìò te meàma èhua tōmua meàma o te èhua hou ; atii ua too i te koava o te ponatekao puni.
I tēnei tai hou, ia makimaki òe e tekao no te ava kamaìi me te ava veàveà o te èhua, aè he mea te ponatekao. I te tai kākiu à, e ùa ponatekao kē.
Mei te meàma nāpeka tihe atu i te meàma oaoamanu, e puhi nei te metaki mei te kēkē tuatoka āìna kanauu ; oia te ava e kaò ana te matahetū mataìki. I peàuìa ai hua ava, te tai mataìki ; oia te ava āìna kamaìi.
Mei te meàma aveà tihe atu i te meàma pohe, e puhi nei te metaki mei te kēkē tuatoka āìna tiu. Meìa enā te meàma èhua i òto o hua ava, i peàuìa ai, te tai èhua ; oia te ava veàveà aè o te èhua.
A haamaakau : o te tai èhua te ava veàveà aè o te èhua, o te tai mataìki te ava kamaìi aè.
Meìa ua ìò te meàma èhua tōmua meàma o te èhua haoè ; i haahanaìa ai mea ape atu i to te ènana èhua. A tiòhi meitaì i te hakatu kānea i te apeìa me te tekao haahua !
« E hia o òe èhua ? E toù ònohuu o au èhua » ; ia haahanaìa tītahi nūmera, e ìò o « to/ta » he « o/a » …
A PATA INEI NO TE TATAU I TE TEKAO HOU MA HE ÈO FARANI...
Patuìa e / Rédigé par Jacques Iakopo Pelleau