Tau pure no te tominika tekau ma ìma o te Ava ma te Èhua, èhua B (22/08/2024)

Taille de police Réduire la taille de la police Augmenter la taille de police
Imprimer
E-mail

« Te ènana e apuu ma tu ù ikoa i tītahi tōìki hakatu me īa, u apuu mai ia ù. »

TOMINIKA TEKAU MA ÌMA O TE AVA MA TE ÈHUA

(Â tapu 22 no Māhinaihea 2024)

Te karatia na te Hatu o Ietu Kirito, atii te haataetae na te Etua me i te haatahi na te Kuhane Meitaì ia tātou nui.

- A haameitaììa te Etua, i tēnei, ananu

TOMOÌA : A.17

1
E te poì haatià,
A momoe haatona !
A atoratio atu
Ia Ietu te Kirito !

Mōumu
O Ietu to tātou Hatu,
To tātou Haapohuè.
E hakako mai ia tātou
Te Vaanui Meitaì.

2
Ua tihe me i ùka
Mea ùtuna te nino,
Mea ùtuna te toto
Io to Īa Motua.

3 E te Etua Motua e, / A tiòhi mai Òe
I te toto mana oko / o to Tama, o Ietu !

TARAMO 54 (53) : E te Hatu e, a tiòhi mai. O Òe tu ù Pātoko me tu ù Haapohuè.

Kio Vānana : Ma te Tekao Meitaì Hou Mai, u vavaò te Etua ia tātou

no te àva atu i te kāìè nui o Ietu Kirito to tātou Hatu.

Pure a te poì haatià : Mēìa to Òe kāòha, e te Hatu e,

(Pō e ono) a apuu mai Òe i ta mātou nei pure no te aomāàma.

E te Hatu e, a òko mai ; e te Hatu e, a apuu mai.

ÙTUNA : B.5

1
E aha ta ù e tuku atu
I te Hatu, to ù Pēpena ?
Oia anaiho

O tu ù hōupo
Me tu ù pohuè.

2
Ia ao mai Òe,

E te Haut,
I tēnei vaetukia.
A too mai Òe

I to ù kōhoà
I te kāòha ia Òe.

3
To Òe nino, to Òe toto,
E mea taìtaì

To Òe mata
Ta mātou e haamaakau
Ma òto o te ùtuna.

B.6

1
A tuku i te Hatu
To tātou ùtuna
Me te haameitaì atu
Ia Īa aneiho
Te hakatu vaièi
Me to Īa meitaì

Mōumu
A too te hakatu
Ta Ietu i tuku mai.
A hahi i te Motua,
To tātou Pēpena.
Kātahi tātou nui
No te hee me Ietu.

2
E Ietu Kirito e,
U haatià mātou
He Etua tiàtohu,
He Etua mana Òe.
E ūtaì mātou
Ma muì o Òe.

Haamaakauìa : Te kāìè ia Òe te i mate no mātou.

(Pō e ono) Te kāìè ia Òe te pohuè nei ananu.

E to mātou Hatu e, e to mātou Etua,

A tihe mai Òe, e Ietu, te Haapohuè.

Hīmene haahuaèkaèka : A haahuaèkaèka i to tātou Etua.

A hīmene i to Īa ikoa,

A hīmene i to tātou Hatu.

Hīmene Atoratio C.12

3
A hahi, a kāìè ananu
I te Etua mana, te Pēpena,
Me ia Ietu, te Tama Tāhia,
Me i te Kuhane Meitaì.

Te hahi, te kāìè
I to tātou Etua... Pohuè,
I tēnei ma te tau tai ananu.

KŌMŌNIŌ : D.27

1
E Ietu, e Ietu e,
Etua tiàtohu,
Ènana tiàtohu Òe,
Ua noho pohuè hoì Òe
I òto o te mataèinaa.

E Ietu, o Òe te tumu,
E Ietu, o Òe te hiku
O nā mea kōtoa.
E Ietu, òmua naoti,
E Ietu, i tēnei, ananu
To mātou Hatu.

2
E Ietu, e Ietu e,
U hakāòha mai Òe
I te tau ènana paotū.
E moû, e kāòha anaè
To Òe hakatu Etua.

3
E Ietu, e Ietu e,
O Òe te Tekao
I te tumu anamai io te Etua,
U haaènanaìa Òe
No te haapohuè ia mātou.

4
E Ietu, e Ietu e,
E ùmihi nei Òe
I te tau hoa pii tini tini
No te pōpahi ia âtou
I te kākāno meitaì ananu.

PAHIÌA : V.15 Ave, Ave (bis), Ave Maria. (Pō e ono)

1
E hahi mātou ia Òe, e Maria e,
No to Òe kāòha ia mātou nei,
Ta Òe tau tama nei.

2
A tuku Òe ia mātou nei i ta Òe tama
A peàu atu i te kāòha
O to mātou hōupo.

V.78 1
Mamau te Virikine
I tupu mikeo koè,
Te kui te i hānau
I te Haapohuè.

Mōumu

E Maria tāhia e,

Te kui o te Hatu,

A tiòhi meitaì Òe

I ta Òe tau tama.

2
A hahi me te kāòha
I te kui Virikine,
E te tau ati paotū
Ma nā henua kōtoa.

TOMINIKA TEKAU MA ÌMA O TE AVA MA TE ÈHUA

TATAUÌA O TE HĀMANI O TE MĀÀMA 2, 12.17-20

U kaituto te poì haatià koè i te maakau pē.

U peàu hoì âtou pēènei à :

¹² « A moioè tātou i te ènana koekoe toitoi.

U haapaòpaò mai hoì īa,

e haapākeka nei i to tātou hakatu pohuè.

U oonaki mai īa mēìa u pūtuì tātou i te Ture a te Etua.

U hakatio mai mēìa u titii tātou i te tekao

hakakoìa mai e to tātou tau tupuna.

¹⁷ A tiòhi tātou aha he tekao tiàtohu ta īa tekao.

Epō, e ìte tātou e aha te hakatu o to īa mateìa.

Me he mea e tama a te Etua hua ènana toitoi,

e toko hoì te Etua ia īa.

E haapohuè te Etua ia īa

me i te îìma o te tau ènana tōtōua me īa.

¹⁹ A haamee oko nui tātou ia īa, a haamāio atu

etià e ìteìa to īa koekoe moû, pekē koè.

²⁰ A haamate tātou ia īa ma òto o te mateìa hauhau.

U peàu hoì īa enā tītahi no te tiòhi meitaì ia īa. »

TARAMO 54 (53) 3-4, 5.7b, 6.8

E te Hatu e, a tiòhi mai. O Òe tu ù pātoko me tu ù Haapohuè. cf. 70,6

³ E te Hatu e, a toko mai, o Òe tu ù Haapohuè.

Ma to Òe ikoa, a haavā mai me te toitoi.

⁴ E te Etua e, a apuu i tu ù vavaò ia Òe.

A hakaòko i tu ù èo e uēuē nei.

⁵ Ua hano tahipito hāoè e haatōtōua me au.

Enā te poì mana e hano e kukumi ia ù.

Aòè he kōava i toe no te Etua i mua o âtou.

E te Etua tiàtohu nui e, a haahika ia âtou.

⁶ U tiòhi mai te Etua, o Īa tu ù pātoko.

O te Hatu te kuà o tu ù tau toko.

⁸ E te Hatu e, e ùtuna au ia Òe i te hēaka,

E haahuaèkaèka au ia Òe te kuà o te meitaì.

TATAUÌA O TE HĀMANI A IAKOPO PEÀTO 3, 16-4,3

E tu ù tau tuàne tuehine,

¹⁶ o te keitani me te ovi atu ovi mai

te tumu o te tōtōua me te nuiìa o te tau hana pē.

¹⁷ O te koekoe toitoi to mua puku o te māàma

ta te Etua i vaièi mai.

I muì iho, e ìò te māàma he koekoe moû,

te koekoe pakaihi te hoa i te hoa,

e avai aa i te ènana na īa ta īa.

Ua pī te koekoe māàma i te hakāòha, nui oko to īa vaièi,

u apuu īa i te tau ènana paotū,

e aha à hakatu kē to tītahi, hakatu kē to tītahi.

Aòè e koekoe e ùa to te ènana māàma.

¹⁸ Ia hano te ènana e haaneke i te moû,

u hakatu īa me tītahi i nanu i te kākāno.

E haatupu hua kākāno i te koekoe toitoi i mua o te Etua.

^4,1 Me i hea mai hoì te pipikièe me te tōtōua i vāveka o ôtou ?

Aha, aòè me io te tau hīa pē te i tōtōua nei i òto o to ôtou ?

² Ua pī ôtou i te nuiìa o te hīa kē, hīa kē.

Aòè he mea e koàka mai ia ôtou.

A tahi a kukumi pu te hoa i te hoa.

E kōhoà keitani ta ôtou.

Aòè e tae to ôtou hīa.

Ua hano hoì ôtou e koàka mai ma te tōtōua me te pipikièe.

³ Aòè he mea ta ôtou e koàka mai mēìa u te e ape ôtou.

Ia pure ôtou, aòè he mea e tukuìa ia ôtou

na te mea aòè i meitaì ta ôtou pure.

E pure nei hoì ôtou no te ape anaiho i te taetae

vāàna i to ôtou hīa haakoakoa i te nino.

ALLELUIA ALLELUIA

cf. .2 Te.2,14

Ma te Tekao Meitaì Hou Mai, u vavaò te Etua ia tātou

no te àva atu i te kāìè nui o Ietu Kirito to tātou Hatu.

EVANERIO O IETU KIRITO VĀÀNA E MAREKO 9, 30-37

I tēia mou pō,

³⁰ ua taha Ietu me to Īa tau kouâ

ma vāveka o te Henua Karirea.

Aòè Ietu i makimaki e ìte te ènana pēhea Īa.

³¹ Na te mea, u hakako i to Īa tau kouâ me ta Īa peàu :

« Enā e haaìòìa te Tama a te ènana

i te îìma o te tau ènana haamate âtou ia Īa.

Ia mate nui Īa, ma te toù o te pō, e tū hakaùa Īa. »

³² Atià, aòè âtou i vivini i hua tekao

me to âtou haametaù i te ūi atu ia Ietu.

³³ Ua tihe âtou i Kafaranaumi.

Io he haè, u peàu Ietu ia âtou :

« Ma io he vaanui, e aha ta ôtou tekatekao ? »

³⁴ Ua mutu âtou na te mea, u tōtohe âtou ma io he vaanui

no te ìte : o ai i vāveka o âtou te tiketike atu.

³⁵ E noho aa Ietu, u vavaò i te Tīònohuu ma tokoùa

me to Īa peàu ia âtou :

« Me makimaki tītahi e tū ai i mua,

a haaìò ia īa iho he ènana i muì òa.

A ìò īa te tueni no ôtou paotū. »

³⁶ Ua too Ietu i te pōìti me te hakatū i vāveka ahau o âtou.

Ua hopu ia īa me te peàu ia âtou :

³⁷ « Te ènana e apuu ma tu ù ikoa

i tītahi tōìki hakatu me īa, u apuu mai ia ù.

Te ènana i apuu mai ia ù,

aòè īa i apuu mai ia ù anaiho :

atià, u apuu i tēia i pahi mai ia ù. »

Plus dans cette catégorie : « Tau pure no te tominika tekau ma hā o te Ava ma te Èhua, èhua B (15/09/2024)

Comments est propulsé par CComment

Retour en haut

Tau pure no te tominika tekau ma ìma o te Ava ma te Èhua, èhua B (22/08/2024)