Tau pure no te tominika ònohuu ma hitu o te Ava ma te Èhua, èhua B (28/06/2024)

Taille de police Réduire la taille de la police Augmenter la taille de police
Imprimer
E-mail

« U haahuaèkaèka me te tuha i te tau hoakai. Atii no te mou ika, vāàna i to âtou makimaki. »

TOMINIKA ÒNOHUU MA HITU O TE AVA MA TE ÈHUA

(Â tapu 28 no Takuùa 2024)

TOMOÌA : A.24 (Pō e ono)

1
To mātou Motua,
To mātou Pēpena,
Motua pī i te kāìè,
Motua pī i te kāòha,
Ia mātou poì mikeo.

Mōumu

He moû, he kāòha
To hakatu, e te Hatu.
U haataetae ia mātou.
He moû, he kāòha ananu.

2
E Ietu Pohuè,
To mātou Hatu e,
Etua Haapohuè,
Etua pī i te kāòha,
No Òe mātou paotū.

A.4

Putuputu tātou i òto te Hiero
Mea hahi i to tātou ùtuna kekaa
O te i kave mai te Pohuè ètereno
No to tātou kuhane, no to tātou nino.

A hahi (bis) i te Hatu (bis)
Mana nui io he àki,
To tātou Etua,
To tātou Hakaìki.

E te Hatu e

TARAMO 145 (144) : Ua tuha Òe i te mea e hei, i kai ai haamaòna mātou.

Kio Vānana : Enā i vāveka o tātou e tahi Peroheta òko nui.

U tiòhi me te meitaì te Etua i to Īa mataèinaa.

Pure a te poì haatià : E te Motua e, a òko mai ia mātou, (Pō e ono)

ta Òe tau tama.

Mēìa to Òe kāòha, e te Hatu e,

a apuu mai Òe i ta mātou nei pure no te aomāàma.

ÙTUNA : B.4 (Pō e ono)

1 A apuu mai, e te Haut, I tēnei haraoa, Puku no te henua, Hanaìa e te ènana Ia ìò e oà kuhane.	Mōumu E Ietu oà, Te i vahiìa No te ao hou, Te tiketike, te kāìè, Ia haameitaììa Òe.	2 A apuu mai, e te Hatu I tēnei vino, Puku no te henua, Hanaìa e te ènana Ia ìò e inu kuhane.
3 A pahi mai Òe, e te Hatu / I to Kuhane Tapu Ia haatapu mai Īa / I tēnei ùtuna, Ia ìò e nino, e toto no Òe.

A.1b 1 O te pure meta te ùtuna A Ietu io to Īa Motua. E atoratio ta tātou nei Ia Ietu i ùka o te peka.	2 E pure nei tātou haapāpāku, A ùtuna i to tātou Hatu. Ia too Īa to tātou pure, U vevete mai te tau veke.
3 Haahou te ùtuna hēaka / Ta tātou i mākaka ia Ietu ; Haahouìa te tau koekoe / Mea tūtaì ananu me Ietu.

Haamaakauìa : Te kāìè ia Òe, e te Hatu e,

Te i mate nui, te pohuè ;

A tihe mai, e Ietu ; a tihe mai, e Ietu.

KŌMŌNIŌ : D.27 (Pō e ono)

1
E Ietu, e Ietu e,
Etua tiàtohu,
ènana tiàtohu Òe,
Ua noho pohuè hoì Òe
I òto o te mataèinaa.

E Ietu, o Òe te tumu,
E Ietu, o Òe te hiku
O nā mea kōtoa.
E Ietu, òmua naoti
E Ietu, i tēnei, ananu
To mātou Hatu.

2
E Ietu, e Ietu e,
U hakāòha mai Òe
I te tau ènana paotū.
E moû, e kāòha anaè
To Òe hakatu Etua.

3
E Ietu, e Ietu e,
O Òe te Tekao
I te tumu anamai io te Etua,
U haaènanaìa Òe
No te haapohuè ia mātou.

4
E Ietu, e Ietu e,
E ùmihi nei Òe
I te tau hoa pii tini tini
No te pōpahi ia âtou
I te kākāno meitaì ananu.

A.8

1
O te â tēnei
Te i kātahi ia tātou nei
I te aò o Ietu Kirito,

Te hōupo vaièi e.

Mōumu
O te haaìò (bis)
E Piimau Hou (bis)
O ta tātou e (bis)
E haameitaì nei.

2
A kātahi à tātou nui
Me to tātou Hatu Ietu,
Io to Īa hōupo vaièi
I te poì kōtoa e.

3
A inu à tātou nui
I te vai te e maò.
Me io to Ietu hōupo,
U pupuhi ananu e.

Mōumu
O te i hoohoo (bis)
Io te vaipuna (bis)
O ta Ietu (bis)
I kātahe anamai.

4
Te hōupo o te kāòha nui
E tūnou anaè ia tātou nei.
Ia tohuti atu tātou
I te Pohuè ananu e.

Hīmene haahuaèkaèka :

PAHIÌA : V.15 Mōumu : Ave, Ave (bis), Ave Maria.

1
E hahi mātou ia Òe, e Maria e,
No to Òe kāòha ia mātou nei,
Ta Òe tau tama nei.

2
A tuku Òe ia mātou nei i ta Òe tama ;
A peàu atu i te kāòha
O to mātou hōupo.

I.7 Mōumu : A koakoa, e Maria e, Tū hakaùa Ietu,
A koakoa, Matarena e ; U pohuè to tātou Hatu.

1
O Ietu te Etua,
U haapāpāku Īa,
Ua ako i te mate
No mātou uo he peka.

2
Ua vaeìa Òe
No te haaìte atu
I te Tekao meitaì :
U pohuè Ietu, te Hatu.

TOMINIKA ÒNOHUU MA HITU O TE AVA MA TE ÈHUA

TATAUÌA O TE HĀMANI E ÙA O TE TAU HAKAÌKI 4.42-44

⁴² I tēia mou pō, ua oke nui te henua.

Ua too te ènana i te hope o te tau puku i kohihouìa :

tekau haraoa me te kākāno tee i òto o te kaka.

Ua tuku atu īa i hua mēmau kāòha i te peroheta Erihea.

⁴³ U peàu Erihea : « A tuha atu i te tau ènana. A kai âtou. »

U peàu to īa tāvini :

« E ìma hānere ènana âtou paotū. Pēhea te tuha atu ?

U peàu hakaùa Erihea :

A tuha atu i te tau ènana paotū. A kai âtou.

Oia nei te tekao a te Hatu :

A kai haamaòna âtou.

Enā e toe hakaùa te mea e kai. »

⁴⁴ Ua tuha atu te tāvini i te tau ènana i te haraoa me te kākāno.

Ua kai haamaòna âtou. Aòè i pao te mea e kai.

Atii hoì ta te Hatu i peàu.

TARAMO 145 (144) 10-11, 15-16, 17-18

Ua tuha Òe i te mea e hei, i kai ai haamaòna mātou. 145,16

¹⁰ E te Hatu e, a hahi te tau mēmau paotū

Me te haahuaèkaèka to mataèinaa ia Òe.

¹¹ E haavivini âtou i te kāìè o to Òe Patirēia,

E vānana âtou i to Òe tau hana mahaò.

¹⁵ U heau io Òe te mēmau pohuè paotū

E tetaì aa i to âtou oà me io Òe.

¹⁶ Ua tuha to Òe nā îìma i te mea e hei :

E kai haamaòna te tau mēmau pohuè kōtoa.

¹⁷ U toitoi noa to te Hatu makimaki paotū.

O te kāòha te tumu o to Īa tau hana ia ôtoa.

¹⁸ U tata èka me te poì i vavaò ia Īa

E pure aa ma io he koekoe tiàtohu.

TATAUÌA O TE HĀMANI A PAURO PEÀTO I TO EFETIA 4,1-6

¹ O au nei Pauro, io he haèhumu,

mēìa u tāvini au i te Hatu.

U toutaki au ia ôtou no te pohuè

vāàna i to te Etua makimaki te i vavaò ia ôtou.

² A haapāpaku ôtou, a moû te koekoe,

a tohe mau paòpaò koè.

A kāòha atu kāòha mai ma te apuu te hoa i te hoa.

³ A hano ôtou te haatahi i òto o te Kuhane Meitaì,

te i haatūtaì ia ôtou i òto o te moû.

⁴ Enā e tahi nino anaè,

e tahi Kuhane anaè

me he mea u vavaò te Etua ia ôtou paotū

no te tetaììa e tahi anaè.

⁵ E tahi Hatu anaè,

e tahi haatià anaè,

e tahi papatema anaè,

⁶ e tahi Etua me te Motua anaè no te tau ènana kōtoa.

O Īa te Hatu no tātou paotū,

te i hana me tātou paotū, te i noho i òto o tātou paotū.

ALLELUIA ALLELUIA

Rk.7,16

Enā i vāveka o tātou e tahi Peroheta òko nui.

U tiòhi me te meitaì te Etua i to Īa mataèinaa.

EVANERIO O IETU KIRITO VĀÀNA E IOANE 6, 1-15

I tēia mou pō,

¹ ua hee Ietu i tītahi kēkē o te tai Karirea

te i peàuìa Tiperiata.

² Ua ūtaì te haètoa nui ia Īa,

mēìa ua ìte âtou i te tau hana mahaò haahakatu

ta Ietu i hana no te meitaì o te poì hōpī.

³ O Ietu à, ua hiti i ùka o te tuaivi.

I èià, u noho Īa e tahi me to Īa tau kouâ.

⁴ Ua tata te Pakate. He â koìka no te tau ati Iuta.

⁵ E heau aa Ietu, ua ìte i te haètoa nui e haatata mai.

U peàu Ietu ia Firipo :

« I hea e hoko mai tātou i te haraoa etià e kai âtou nui ? »

⁶ Atii hoì ta Ietu peàu no te haaveke ia Firipo,

na te mea ua ìte Īa e aha te hana e hana atu Īa.

⁷ U haahua Firipo ia Ietu :

« Aòè e àva e ùa hānere moni tenario

etià e koàka mai ia âtou tikitahi i te òna poo haraoa. »

⁸ U peàu tītahi me i vāveka o to Īa tau kouâ,

o Aterea te ikoa, te teina o Timone Petero :

⁹ « O te pōìti înei me nā haraoa e ìma me nā ika e ùa.

E mea à, e aha tēia no te haètoa nui ? »

¹⁰ U peàu Ietu : « A haanoho ia âtou ! »

He mea nui te mutiē i hua vahi.

Ua nonoho âtou me he ìma tautini vāhana âtou nui.

¹¹ Ua too Ietu i te tau haraoa.

U haahuaèkaèka me te tuha i te tau hoakai.

Atii no te mou ika, vāàna i to âtou makimaki.

¹² Ia maòna âtou, u peàu Ietu i to Īa tau kouâ :

« A kohi ôtou i te toeka. Umoì e pao i te pē e tahi mea. »

¹³ Ua kohi âtou i te toeka : ònohuu ma ùa kete

pī i te tau poo haraoa i toe, ia pao toitoi te mau.

¹⁴ Ia ìte te haètoa i te hana mahaò i hanaìa e Ietu,

u peàu âtou : « Tiàtohu nui, o te ènana nei

te peroheta e tihe ai io te aomāàma. »

¹⁵ Atià, ua ìte Ietu e hano âtou ia Īa e viitoi

me te hakatū mea hakaìki no âtou ;

no èià, ua hiti hakaùa Īa io he tuaivi, tootahi anaè.

Plus dans cette catégorie : « Tau pure no te tominika ònohuu ma ono o te Ava ma te Èhua, èhua B (21/07/2024) Tau pure no te tominika ònohuu ma vaù o te Ava ma te Èhua, èhua B (04/08/2024) »

Comments est propulsé par CComment

Retour en haut

Tau pure no te tominika ònohuu ma hitu o te Ava ma te Èhua, èhua B (28/06/2024)