TOMINIKA TEKAU MA IVA O TE AVA MA TE ÈHUA

(Â tapu 20 no Oaoamanu 2024)

TOMOÌA :     G.10 (Pō e ono)

V.23                      Mōumu : Ave, Ave, Ave Maria (bis)

TARAMO 33 (32) : E te Hatu e, a noho mau to Òe kāòha i ùka o mātou

                                  atii me mātou e tetaì mau i to Òe vaièiìa.       33,22

Kio Vānana : Ua tihe mai te Tama a te ènana no te tāvini atu

me te haaìò i to Īa pohuè me he ùtuna hēaka,

no te hoko mai i te nuiìa o te tau ènana.

Pure a te poì haatià : Me he auahi kekaa, ua hiti ta mātou pure io Òe,

                                   e te Hatu e.

KŌMŌNIŌ : D.38

Hīmene haahuaèkaèka : C.2

PAHIÌA : V.84 (Pō e ono)

V.20

TOMINIKA TEKAU MA IVA O TE AVA MA TE ÈHUA

TATAUÌA O TE PEROHETA ITAIA      53, 10-11

¹⁰      U makimaki te Hatu e tukituki atu me te mamae.

        Mēìa u ùtuna atu i to Īa pohuè mea hoko mīkeo,

        e ìte ai i to Īa tupu i ùka aè,

        e haaòa aè i to Īa tau â.

        Ma io Īa, e tae anamai te hīa o te Hatu.

¹¹      Ma hope o te ûûkina o to Īa kuhane,

        e ìteìa te Māàma, e tapavaù nui.

        Ma to Īa mamae, u haameitaì tu ù tāvini

        i te tini tini ènana, e amo aa i to âtou mīkeo.

TARAMO 33 (32) 4-5, 18-19, 20.22

 E te Hatu e, a noho mau to Òe kāòha i ùka o mātou. Atii me mātou e tetaì mau i to Òe vaièiìa.               33,22

⁴       He toitoi noa te Tekao a te Hatu.

        U tiàtohu anaè to Īa tau hana paotū.

⁵       U haataetae Īa i te hakatu toitoi, hakahae koè.

        Ua pī te aomāàma i to Īa tau hana kāòha.

¹⁸      Ua toko te Etua i te tau ènana pakaihi ia Īa,

        Te poì e tetaì mau i to Īa kāòha mai,

¹⁹      U haapohuè ia âtou me io te ìno me te mateìa,

        Te haapohuè i te ava o te ìno me te oke nui.

²⁰      O te Hatu te tumu o to tātou pohuè.

        O Īa to tātou toko me te vavao.

²²      E te Hatu e, a noho mau to Òe Kāòha i ùka o mātou

        Atii me mātou e tetaì mau i to Òe Vaièiìa.

TATAUÌA O TE HĀMANI I TO HEPEREO      4, 14-16

        E tu ù tau tuàne tuehine,

¹⁴      ohia ua ìò Ietu te Tama a te Etua,

        to tātou Tāuà nui tiketike, te i tomo i ùka nui o te àki,

        a tohe mau tātou e haki atu i te Haatià.

¹⁵      Na te mea, u mehea hua Tāuà nui

        mēìa i te tau tekateka o to tātou koekoe pepae.

        Ua ìte hoì Īa ma te tiàtohu i te nuiìa

        o te mea haaveke me te haamōtii mai ia Īa,

        atià, aòè i mīkeo Īa.

¹⁶      No èià, a haatata mai tātou haametaù koè

        me te Etua mana nui, te tumu o te Vaièiìa,

        vāàna e ìò mai ia tātou to Īa Hakāòha

        me te karatia no te toko mai, i te ava e hei.

ALLELUIA ALLELUIA

                                                                                          Mk.10,45

Ua tihe mai te Tama a te ènana no te tāvini atu

me te haaìò i to Īa pohuè me he ùtuna hēaka,

no te hoko mai i te nuiìa o te tau ènana.

EVANERIO O IETU KIRITO VĀÀNA E MAREKO      10, 35-45

akoè à : 10, 42-45

        I tēia mou pō,

³⁵      u haatata mai io Ietu Iakopo me Ioane,

        nā tama a Ihepetea. U peàu âua ia Īa :

        « E Tuhuka e. Ua ape māua :

        a hati mai Òe i to māua hīa. »

³⁶      U peàu Ietu ia âua : « E aha te hana e hana au no ôùa ? »

³⁷      U peàu âua : « A ao mai a noho māua i òto o to Òe kāìè,

        tītahi i to òe ìma oko, tītahi i to Òe ìma aèaè. »

³⁸      U peàu Ietu ia âua :

        « Aòè au i ìte i ta ôùa e ape nei.

        Aha òa e koàka ia ôùa te inu i te ipu ta ù e inu ai ?

        Aha e koàka ia ôùa te papatema e koàka mai ia ù ? »

³⁹      U peàu âua : « E koàka ia māua. »

        U peàu Ietu ia âua :

        « Te ipu e inu nei au, e inu ai me ôùa.

        Te papatema e koàka nei ia ù,

        e papatemaìa ai me ôùa.

⁴⁰      Atià, no te noho i to ù ìma oko,

        akoè à i to ù ìma aèaè, aòè na ù te tuku atu.

        E tukuìa i tēia i haapeiìa. »

⁴¹      Ua òko te Tīònohuu i hua tekao

        me to âtou haahaa ia Iakopo me Ioane.

⁴²      U vavaò Ietu ia âtou io Īa me te peàu :

        « Ua ìte ôtou : te tau ènana

        peàuìa e hakaìki o te tau êteni,

        e haatoko âtou i to âtou viviniìa.

        Atii ta te poì hōhonu : ua haatoko i to âtou hakaìkiìa.

⁴³      Umoì atii io ôtou. Me makimaki tītahi

        e ìò he ènana tiketike atu i vāveka o ôtou,

        a haaìò ia īa anaiho he ènana tāvini ia ôtou.

⁴⁴      Te ènana me i vāveka o ôtou

        i makimaki e vivini ia ôtou,

        a ìò īa he ènana tueni ia ôtou paotū.

⁴⁵      Na te mea, te Tama a te ènana,

        aòè Īa i tihe no te haatāvini mai,

        atià, no te tāvini atu me te tuku i to Īa pohuèìa

        no te hoko mai i te nuiìa o te ènana. »