INFOS / MOU TEKAO HAKAÌTE

       AUJOURD'HUI 10/09/2019, PLUS DE 12000 VISITEURS EN 6 MOIS !!! MERCI À TOUS !!! KOÙTAÙ NUI/VAIÈI NUI ÔTOU PAOTŪ !!!    (1- DE NOUVEAUX ARTICLES SONT PUBLIÉS CHAQUE SEMAINERETROUVEZ-LES DANS LEUR RUBRIQUE RESPECTIVE ! 2)- VOYEZ LA DERNIÈRE INTERVIEW DE JACQUES IAKOPO DANS LA RUBRIQUE "INTERVIEWS" !  À BIENTÔT ! ÒOA IHO !

Le site de partage de la langue marquisienne
Te tohua niu tavavā hou mea àva atu àva mai i te èo ènana
The new site for sharing the Marquesan language

Vue de la plage Vainahō et du Fort Collet, Taiohaè, Nukuhiva. René Gillotin, 1844.

TE HONO ME TE HUMU (E hoì ?)

Pēhea hoì te huì mai i te mou ponatekao farani « lien, lier, relier » ?

liens4 liens liens5

 

Oia tōmua kōhii tutukiìa e au i te peùaìa o to ù tohua niutavavā ma he èo ènana. E ùa haaviviniìa to te ponatekao « lien » ma he èo farani, atià mea ananu.


I)- Te mou haaviviniìa


1) – Te mou hāmani haavivini ponatekao

Vaana i te hāmani haavivini ponatekao Larousse me te hāmani haavivini ponatekao a èpikopo e ùa, e hua mea anaiho te ponatekao « lien » me mou ponatekao « humu, kitii, fitii, pitiki ». Ua hei me au.


2) – Te niutavavā

Te ùa o te haaviviniìa à, mea ananu. Ma òto o te niutavavā, e koàka te mou ponatekao kātoiìa. Ia pata òe i ùka o hua ponatekao, e koàka ia òe te hakaìte i te tapa hāmani uià . hana humu tēnei, he hana haatutuki ; àòè i hei me te ponatekao « lien hypertexte ».

Me to ù tiòhi atu i te tohua niutavavā a te Pūnaha Hau Henua e nei i Tahiti ; u hakaìteìa ma he èo farani, he èo rapa me he èo ènana : http://www.assemblee.pf/ma/. U kiiete au i te ìte u vaeìa te ponatekao « te tau humuìa » mea huì mai i te ponatekao « lien hypertexte ». Me to ù ùmihiìa i te ponatekao e peàu atu meitaì i te haaviviniìa i hei.


3)- Na ù ta ù te vaeìa

Me he mea u kātoiìa hua hakatu avetekao, enā te vaò ma àò. hana humu hoì te hana a hua vaò, atià à e hakatihe atu i te tapa hāmani uià .

Ua tiòhi atu au io te hāmani haavivini ponatekao a te èpikopo Dordillon mea haatiàtohu mai i te haaviviniìa o te ponatekao « tutuki ». I pii o « rencontre, rencontrer », ua ìte au ia « se toucher, se joindre ».

Oia te piò i vae ai au te avetekao « vaò haatutukiìa »

 

II) – Te ponatekao « hono »

Te ùa o te kōhii, mei òto mai o te ponatekao « hono ».

I te ava i noho ai au i Ùapou, e tahi anaiho haamevaha ata, he tahi anaiho puke haamevahaìa ata, o R.F.O te ikoa. I èià tōmua òkoìa i te ponatekao « Te Hono ».

Ava poto i muì iho, u haahana te Pātokoìa Mataèinaa, oia hoì te C.P.S, i te pereòo mea haamaeka i te tau hakatoo a te ènana mea mamao mei Papeete to âtou noho ; u apaìa « Te Hono » te pereòo. I òto o to ù òo, « Le Lien », mea tahakahaka hoì te haaviviniìa o hua ponatekao.


1) - Te mou hāmani haavivini ponatekao

A mou meàma i tēnei, ma òto o to ù ùmihiìa mau i te ponatekao kaò i òto o te hāmani haavivini ponatekao a te èpikopo Dordillon, ua ìte au i te ponatekao « hono » io he tapa hāmani 141-I, me to ù kiiete i te mea ta ù e tatau nei. « Hono : cri que pousse le prêtre ou tuhuka dans certaines circonstances ; cri en unisson poussé par la multitude ». « Ua hono te tōua : on a fait la paix sans se battre. ». he mea te haaviviniìa « lien ».


2) - Te tau ponatekao i tukuìa mei àò

I haamaakau ai au mea nui te moì me te vehine e tīmata to âtou ikoa ma « Te hono », i tēnei tai hou atii me te tai kākiu.

I òto o te hāmani a te òrometua porotetane William Crook te i noho i Vaitahu me Taiohaè mei 1797 tihe atu i 1799, e tatau tātou, i te èhua 1798, ua tupu te koìka mātiri a Tuitōua/Tūitōua, tōmua mahaì a Kiatonui, te hakaìki nui o te ati Teii no Taiohaè ; ònohuu ma ùa to hua poìti èhua. Ta īa vehine à, me he tekau ma ìma to īa èhua. He moì a te hakaìki o te ati Teavaaki no Hooumi. O Hinateiani/Hinatiakiani tōmua ikoa o hua vehine, o Tehonotutuàki te ùa o to īa ikoa.


3) – Tītahi mou hakatu atu

Ma hope mai, e o au kiieteìa i mua o te ponatekao « te hono ».


a) – Ma he èo ènana

*- A ìma èhua i tēnei, u tuku mai Moetai Huioutu i ta īa pehe uià me mou èo taki èka i òto, u peàu mai īa o « Te hono » te ikoa o te pehe uià me te haaviviniìa « le lien » ma he èo farani. To ù maakau, ua teka nui òe, e te hoa ē ; mei òto mai o te èo tahiti hua ponatekao « te hono ».

*- Tītahi, to ù tiòhiìa i te tohua niutavavā a te haè tuaùa « Te tau vaeìa » no Taiohaè, ua ìte au enā me ta âtou hana haapeipei i te tiheìa mai o te tau tōìki hāmani tuatahi ; o « te hono » te ikoa o hua haapeipeiìa.

b) – Ma he èo tahiti

*- « Te natira’a o te mau motu », oia te miitoiìa a Air Tahiti. U vae mai âtou i te ponatekao « natira’a » i te koava o te ponatekao « Te Hono », no te aha ? Mea tata èka te ponatekao « nati » me te ponatekao èo ènana « nani » ta tātou i ìte i òto o te ponatekao « nanikaha ».

Ma tai kākiu, me makimaki te tauà e haamamae me te òonaki i tītahi ènana, u kānea īa i te memau nanikaha me te mou poo òuoho, a koè à te mou poo maìkuku mei io hua ènana, me te tuku i òto o te pikao iti vāhīìa, naniìa io he tapa me te puu. U hakanāìa te memau nanikaha io he maa èitā, a koè à io he vai, a koè à io he tai.

*- Vaana e te hāmani haavivini ponatekao a te Tuhuka èo tahiti, o « humu mau » te haaviviniìa o te ponatekao « nati », mea ananu me te ata o te koutee.

*- Ma hope mai, u haamau te O.P.T i te niuniu kaùoo mea kave mai i Motutini farani mei te Henua Vaihi i te nuiìa o te haamāàmaìa uià i haììa ma òto o te niutavavā. U apaìa hua niuniu i te ikoa o « Honotua ». I to ù ùmihiìa i te haaviviniìa toitoi o hua ponatekao i òto o te hāmani haavivini ponatekao a te Tuhuka èo tahiti, ua ìte au « ùmihi mamate i to òe matatatau tupuna ». E tekao ana no te tai kākiu hua ponatekao, no te aha i vaeìa ai mea hakaìte i te memau uià no tēnei tai hou ?

*- A tahi ua tiòhi au i òto o te hāmani haavivini ponatekao a te Tuhuka èo tahiti me to ù kiiete hakaùa. No te aha ? Na te mea, mei òto mai o haaviviniìa e ta ù i ìte no te ponatekao « hono », he mea te haaviviniìa « lien ». Ia tiòhi atu òe i te tapa hāmani 199, e ìte òe : « hono, n.c, 1) - une rangée de chaume, 2) - une file (de voitures), 3) - nourriture prise par les buveurs de kava après leurs beuveries, 4) - v.t. faire une épissure, assembler deux pièces de bois.

Mea tata èka hoì tēnei haaviviniìa paoìa me te ponatekao « lien », atika à he ponatekao haahana, mea ananu te haahanaìa.

*- A mou i tēnei à, e hana nei au ma ùka o te ponatekao tahiti « pāhono » ; i òto o te hāmani haavivini ponatekao a te Tuhuka èo tahiti to ù ìteìa i tōmua haaviviniìa o hua ponatekao, oia hoì « joindre, unir » ma he èo farani. Mea tata èka hoì tēnei haaviviniìa me te ponatekao « lien », atika à he ponatekao haahana, mea ananu te haahanaìa.


Mea haapao i tēnei tekao tumu, e aha à u haahanaìa te ponatekao « hono » i Tahiti atii me te Henua ènana me te haaviviniìa o « lien » ma he èo farani, àòè i ìteìa hua ponatekao me hua haaviviniìa i òto o tītahi hāmani haavivini ponatekao èo tahiti a koè à èo ènana.

Me he mea ua nui oko to òe māàma, a haavivini mai, a haatahahaka mai i hua mea kaò.


Tītahi ponatekao kē. Mea huì mai i te kiotekao « relier un livre » ma he èo ènana, io te tapa hāmani 173-II o ta īa hāmani haavivini ponatekao, u vae mai te èpikopo Dordillon ia « tui iho i te hāmani » …


Tekao paoìa (01/10/2019)

I te meàma māhina ihea (2019) i pao atu nei, ua vae te pū haamevaha Polynésie 1ère i te ikoa e ùa o « Te Hono Tahi » e hakaìte ana na âtou e haatahi oti i te tiàtohu o te ènana e pohuè nei i Motutini farani


Patuìa e/Rédigé par Jacques Iakopo Pelleau (2015, haaheiìa i 2019)

 

Plus dans cette catégorie : « NĀ KOMAÌ ÈNANA E ÙA

Comments est propulsé par CComment