INFOS / MOU TEKAO HAKAÌTE

       AUJOURD'HUI 08/12/2019, PLUS DE 13000 VISITEURS EN 8 MOIS !!! MERCI À TOUS !!! KOÙTAÙ NUI/VAIÈI NUI ÔTOU PAOTŪ !!!  DE NOUVEAUX ARTICLES ET LA LITURGIE CATHOLIQUE DE CHAQUE DIMANCHE SONT PUBLIÉS DANS LES DEUX LANGUES CHAQUE SEMAINE ; RETROUVEZ-LES DANS LEUR RUBRIQUE RESPECTIVE !  À BIENTÔT ! ÒOA IHO !

Le site de partage de la langue marquisienne
Te tohua niu tavavā hou mea àva atu àva mai i te èo ènana
The new site for sharing the Marquesan language

Vue de la plage Vainahō et du Fort Collet, Taiohaè, Nukuhiva. René Gillotin, 1844.

Umaha te tohua niutavavā nei ?

No te aha te tohua niutavavā nei ? O ai òa o Jacques Iakopo Pelleau ? E aha te hakatu o ta īa hana ?

IE aha tēnei tohua niutavavā hou ?

Aha u òkoìa e ôtou te tekao hou ? U peùa iho nei tītahi haoè i te tohua niutavavā i ùka he èo ènana ; e mea mahaò à ! I peheaìa tena hana ? Auana tahipito oti, i na ai i haatià ia tupu hua mea ? Aha àè à na tātou ènana tumu te haamaumau i to tātou èo ?

E kiiete me te pekē oti tahipito, me te peàu atu « E aha ta òe nei ? ». Āua ôtou e kiiete ; àòè anaiho au i tihe mai me te koekoe haatuhuka atu, u tihe hoì mai au me te koekoe haapāpaku. Mea nui ta ù uiuiìa, i tēnei, e ùmihi nei au i te tau tekao haahua mai.

Me he mea àè te èo farani na te poì farani anaiho, oia hoì, àè mana to te poì farani i ùka he èo farani, atii àè te èo ènana haataetaeìa anaiho e te tau ènana tumu, te tau tama ènana. Tu ù maakau, te tau èo he aomāàma, he puke èo aomāàma, he taetae tupuna mei kiu mai, mea àvaìa atu àvaìa mai e te tiàtohu o te huaa ènana. Te toitoiìa, o au, e tahi haoè, mea au au i te èo, u hinenaò au i te èo, u mitoe au i te èo ; te òaìa o te tau èhua, ua ìò te èo ènana he èo hōupo, he hāika hōupo no ù.

 

II – O ai o Jacques Iakopo Pelleau ?

Ē te tau ènana me te tau ènata ē, kāòha nui tātou paotū ! O Jacques Pelleau au nei ; ua apa to Ùapou ia ù o Pero, a koè à o Sake. Meìa o Iakopo to ù ikoa papatema, a apa mai i tēnei ikoa ! Vaièi nui.

jacques iakopo pelleau

Me haahenua au i Taiohaè i tēnei, u vaeìa mai e au te hakatu tekao a to Nukuhiva me te aotahi atu me te pakaihi atu i te tau ture patuhei a te Tuhuka Èo Ènana. Atià, e aha à te ìi o ta ù hana i ùka he èo, ua ìte meitaì au enā me te ava e tekateka nui au ; àè au i hakaìka ai, mea ìi to ù makimaki i to ù hakaìka. No èià, o to ù hia, ia haakoè mai ôtou i to ù tau teka me te haatoitoi atu.

 

III – Te hana i Ùapou, 1995-2001

I Ùapou, i te èhua 1995 to ù tiheìa mai òmua i te Henua ènana ; i hua ava, he tumu hakako èo menike au io he haè hāmani tuaùa i tai ; e ono èhua to ù nohoìa, me ta ù hana tumu i èià. Àòè i òa atu, u tīmata au i te hakako mai ia ù i te èo ènana no te mea àè au i makimaki hakaùa e noho me he tiki, ma te vivini koè e aha te mea peàuìa e te tau ènana viipū o au.

I teia â, i teia â, e patu nei au i te tau ponatekao hou òkoìa e au ; u tihe ihoa mai au i te tau hora hakakoìa èo ènana a te tōìki hāmani o te pāòto e toù. U haahoa au me te tumu hakako, o Chrétienne Ohotoua, me to īa hakapahi mai i ta ù hana i ùka he èo.

Ma te ìma o te èhua, u patu au i te hāmani iti mea hakako atu i te èo ; hua hāmani a ù, mei òto mai o te hāmani haavivini i te èo ènana patuìa e te Mihi Zewen i 1988. Na te vivini haè hāmani me to īa toko, oia hoì o Alain Bera me Christian Aubert, te i too i te amoka òomiìa. U hakako atu māua me Chrétienne e tahi pūpū haoè, me he tekau ènana i hua pūpū ; e tahi ahiahi i te âtapu, u putuputu mai mātou io he haè hāmani no te hakakoìa : na Chrétienne te hana i ùka he ìte tekao, na ù te hana i ùka o te kāneaìa èo me te papaìa tekao.

 

IV – Te hana i te Henua farani, 2001-2005

I te èhua 2001 to ù titiiìa ia Ùapou me to ù huaìa atu i te Henua farani no te hana ananu i ta ù hana tumu. E èhua to ù nohoìa i èià me to ù huaìa mai i te Henua ènana no te ava vakai i teia èhua, i teia èhua, te hakaea koè i ta ù hana i ùka he èo. Mea oko to ù makimaki no te hua mai ananu mea à, àòè i ìteìa ahea, a koè à pēhea.

Ma te òa o to ù nohoìa i Ùa pou, e tīòhi mamate nei au i te tau hakaìteìa ata èo tahiti a te R.F.O ; koè nui au i makimaki e kaò hua hana me to ù hoko mai i te hāmani me te tau ìpine mea hakako mai i te èo tahiti ia ù (te hāmani hakakoìa èo tahiti a Mirose Paia me Jacques Vernaudon). Te mea taetae oko haakoàkaìa mai e au, u hakaìte mai hua hana mea moe tata èka èo e ùa ma òto he kāneaìa me te papaìa tekao me te tekaotuhi ; atià, mea ananu.

Me hua hana, u vivini mai au i te nuiìa o te ponatekao èo tahiti haahanaìa e te ènana tumu. E aha à te tau piò i tupu ai hua hana, a haakoè tātou nui i tena hakatu haatekeo i te èo ènana ; atii me te tau ponatekao èo farani i tomo mai i òto he èo. He mea pakaihi koè i te èo tumu hua hakatu hana.

 

V - Te hana i Taiohaè, mei te èhua 2005

1) – Io he haè hāmani « Te Tau Vaeìa »

I te èhua 2005 to ù hua hakaùa ìa mai i te Henua ènana, oia hoì i Taiohaè no te hana ananu i ta ù hakakoìa èo menike. No te toko o ta ù hana hāmani, àè i koàka ia ù te tīmata hakaùa anamai i te hana i ùka he èo ènana. I te ùa o te èhua, mai à, mai à, u tīmata hakaùa au te haatoitoi i ta ù hāmani hakakoìa me te haahei atu vaana i te tau ture patuhei a te Tuhuka Èo ènana.

I te èhua 2007-2008, u makimaki te vivini upoko haè hāmani, oia hoì o Guy Chassignol, ia haamauìa e au tītahi hakakoìa mea apuu i te tau tōìki hāmani, àè âtou e tekao i te èo ènana. Ua ao mai au ; me he e toù ònohuu tōìki io hua pāòto. I hua èhua, u ape mai tītahi hoa farani ia hakako atu au ia âtou i te èo ènana ; i te tīmataìa, me he tekau ènana te i tihe mai.

Atii aa, u tihe mai te ava hakaeaìa nui i ta ù hana tumu, oia hoì te meàma takuùa o 2009.

2) – Te ava hakaeaìa hana, 2009

a) – Te hana i ùka he èo ènana

Ma hope iho, u huìkē to ù hakatu pohuèìa ; mea nui te hana io he haè me te pāpua. U makimaki au e haapao i te tau hana àòè i koàka ai ia ù te hana atu i te ava o ta ù hana tumu. U koutee atu au i te Henua farani no te haatutuki me te toeka o to ù huaa haè.

Mea òa te ava hana koè i ùka o te èo ; àòè i koè te makimaki mei te uo. Te toitoiìa, u paòpaò au meìa i te tokoìa mai koè, te haahuaìa mai koè i to ù tau apeìa. Me he mea àòè i koàka mai ia ù te hee i mua.

I tītahi â à, u kiiete au me to ù tīmata hakaùa i te hana ; àòè i hakaea atu nei. A hitu èhua i tēnei, u tihe mai io ù tītahi mou hoa farani me to âtou peàu mai ia hakako atu au ia âtou i te èo ènana. U ao mai au. Mei hua ava mai, e hakako nei au ia âtou io to ù haè, e tahi, a koè à e ùa hakakoìa i teia âtapu, i teia âtapu i te ahiahi. Mai à, mai à u iti mai, iti mai te nūmera o te poì i tihe mai, i haakoè ai au i hua hana ma te paoìa o te èhua 2015.

b) – Te hana me te tau manihii haoè

Ma te tīmataìa o te èhua 2013, u ape mai tītahi maka mei òto mai o te pūpū apuu manihii i ùka o Aranui ia toko mai au ia âtou i òto o ta âtou hakaìteìa vahi taetae oko o Nukuhiva nei ; e ùa apeìa te tahi ma hope o te tahi. Epō te tiòhi meitaì i ta ù tau hāmani, u ao mai au me to ù aahi atu i te pūpū manihii èo farani, me he e ono ònohuu âtou. U koakoa nui au i hua hana i kaìè oko ai au. Te mea hou à, u vivini meitaì au he mea maeka to ù ìte i te ìte haaènana kākiu. Mea haamāàma mai ia ù, u tīmata pōpōnihoo au e tetau i te nuiìa o te hāmani i patuìa i ùka o te tau ènana kākiu ma te òaìa o hānere èhua e ùa i pao atu aa. Me to ù haapuke i te nuiìa o te haamāàmaìa taetae oko i òto o ta ù òouià.

Totahi atu te nuiìa o te tau tekao hunahuna me te tau tekao kaùoo haapukeìa e au, totahi atu te oko o to ù uo i te hee imua.

c) – Te hana me te tau hoa

U tīmata au i te haaòko haamau i na haamevaha èo e ùa e nei i Taiohaè, oia hoì te haamevaha èo a te Henua ènana e vai nei i Vainaho, atii me te haamevaha èo a te Ekaretia katoriko, oia hoì Te Òko Nui. Enā me te â, u kapokapoèo mai au i mou kio tekao poto me te tuku i òto o to ù òouià me te haaòko haamoû oko etià e koàka mai te vivini meitaì i te tau mea i peàuìa.

Enā te ava ua hano au e hakatoo i te Tuhuka èo ènana e nei i Vainaho ; i èià, u tutuki au me Julien Tumuehitu Tamarii, he tuhuka èo īa me to īa tokoìa mai ia ù. Meìa i to īa koekoe matavaièi, u haahoa māua. Totahi atu e tahi èhua māua i te hanauìa, totahi atu e tumu pure io he paroita īa ; he ènana pāokooko.

E tītahi hoa to ù, o Teupooteii Teikivaeoho to īa ikoa ; e noho īa i Paris me to īa hua hae i Taiohaè. I Paris, u hakako atu īa i te èo ènana io he haè hāmani tiketike nui, oia hoì « Dauphine ». Te mou â inei īa, e tutuki māua e tahi â i te âtapu me to īa haamāàma mai ia ù i ùka o te tau mea àè au i vivini meitaì.

Mea veìveì hoì te ènana me Julien mei Teupoo u koàka ia âtou te haavivini mai i te tau mea kaò o te èo ènana.

Me he mea ta ôtou i ìte, àè nui te hāmani patuìa ma he èo ènana ; te nuiìa he mou hāmani a te Ekaretia katoriko, me « Te Tekao a te Etua ». Ma te òa o to ù nohoìa i Ùa Pou, u tetau mamate au i te tiàtohu o te 869 tapa hāmani. Nui nui te ponatekao kanahau i òto atii me te tau kāneaìa avetekao taetae oko.

E koàka ia ôtou tītahi hāmani io he hopeka « Tau Hāmani Taetae Oko » o ta ù tohua niutavavā Te èo.com.

d) - Te hana i ùka o te niutavavā : te haamevahaìa o te èo me te Âkakai ènana.

U pepenaìa tēnei tohua niutavavā etià e koàna ia ù te hakaìte atu i to ù maakau i ùka o te hakatu pohuè o to ôtou èo, to tātou èo, te èo ènana, TE ÈO ; oia te tumu i makimaki ai au e apa i te tohua niutavavā i te ùa o te ikoa « Te Èo, Te Kaìèìa ». Totahi atu, u makimaki oko au ia tuku mai ôtou i to ôtou maakau no te àva atu àva mai i te māàma o hua èo.

Te hakahia ta ù e haatau nei, ia pohuè ananu, ia neke atu, ia haamevahaìa atu te èo ènana ma na motu e ono o te Henua ènana, hava koè i te tau ponatekao hei koè mei òto mai o te mou èo . A oho te ìi tātou ! Aua tātou e hakaìka ! Ia tutuki tātou me te ponatekao moenahu a koè à ìte koè ìa, umoì tātou e haahana i te ponatekao haoè a koè à te ponatekao tahiti ! A ùmihi mai tātou i te ponatekao e hei : ua hāmani haavivini ponatekao a Mgr Dordillon me ta te Tuhuka èo ènana i te nuiìa o te ponatekao taetae me te kanahau oko me te heitete ; a haahanaìa e tātou nui !

A tutuki hakaùa tātou i ùka o te tohua niutavavā me ta ù paka hāmani Facebook « Te Èo » (a pata inei !)

 

Patuìa e / Rédigé par Jacques Iakopo Pelleau

 

Comments est propulsé par CComment