.... oia hoì o Chantal Aka, Vanessa Hikutini, Marie-Antoinette Kautai, Yolande Peetau, Stella Teikitutoua, Anne-Marie Tamarii, Lise Tamarii me José Pennont, to âtou tumu hakako i haatià mai ia ù i te hakaìte atu i hua mou haapeipeiìa kaikai ènana.
Te hakapeipeiìa kaikai n°1 : te menē nunu kōèhi hakaènana
Te tau memau no te hana :
Mou poo kiko menē : e vakavaka, e puha mua me te kiko. E tahi kiro me te hope.
Te aniani, 120 karamu. Te rai : e hā kōpū. E ùa àu roriē. E toù èhi.
Te paatai me te pepa. Te kari (vaana e to òe makimaki).
Pēhea te hanaìa :
*- E kotikoti te inaì hakapoopoo, e tuku i òto o te hue paapaa.
*- E paatai hakahei te kava me te nunu ; ia pupuhi, e hakamaeka i te ahi me te tiaki tihe i te mitiìa o te vai.
*- E heka i te èhi, e òoi no te koàka mai i te kōèhi.
*- E kotia i te aniani me te rai, me te tuku i òto o te hue, mei te kōèhi.
*- E koàka ia koe ia tuku i te roriē me te pepa me te kari vaana e to òe momona.
*- Ia pao, ua nunu, ia pupuhi te kōèhi, ua veà ; a ako aha mea hei te paatai.
*- E kai veàveà me te karahi, a koè à me te mei, meika, taò.
Te hakapeipeiìa kaikai n°2 : te uà nunu pataka hakaènana
Te tau memau no te hana :
E hā uà
E kao kai
E ùa èhi mea kānea i te kōèhi
Te aniani
E tahi hītoro
Te perehī
Te aniani àu
Te paatai
Te pepa
Pēhea te hanaìa :
*- E kotia ma vāveka, ma te òaìa o te ùa. E taki i te kato o te one mei io he upoko atii mei io he koekoe tutae tihe atu io he veò.
*- A heka i te èhi me te òoi no te koàka mai i te kōèhi. U avai i òto o te kooka. A kotikoti hakavaavaa i te aniani, te aniani àu me te perehī ; a tuku i òto o te kooka.
U kāvaì ia âtou paotū, te paatai me te pepa vaana i te mea i heiìa e tātou. U avai io he vahi kamaii.
*- A nunu pataka i te tau ùa. E tuku òmua i te kēkē o te tua o te ùa ; ia veà, ua huì i tītahi kēkē. Ia veà, ua taki, ua tuku io he kooka.
*- A ikia i te mitihaari i ùka iho.
*- E kai veàveà me te kai tupu, a koè à me te karaihi veàveà.
Te hakapeipeiìa kaikai n°3 : te puaka toto hakaènana
Te tau memau no te hana :
Te tau kaiū poo inaì puaka : te vakavaka, te umauma me te koekoe, 1,6kg
kao kai, 1dl
aniani, 120g
èka kina, e tahi kata
rai, e hā kōpū
e tahi rita toto puaka
te paatai me te pepa
Pēhea te hanaìa :
*- E kotikoti hakavaavaa i te inaì paotū me te rai me te aniani me te èka kina.
*- A hakaveàveà i te kao kai i òto o tītahi hue paapaa.
*- A tuku atu i te inaì ; a kavohi meitaì ; umoì e hakaveà oko !
*- A tuku iho i te aniani me te pepa me tītahi hope vai.
*- Ia pupuhi toitoi, a tuku iho i te èka me te hakamoû i te ahi. A paatai vaana e to koe momona.
*- A iiki atu i te toto puaka, e nunu tihe atu i te veàìa.
*- E kai veàveà me te meika nunu vai, te mei, a koè à te karaihi.
Te hakapeipeiìa kaikai n°3 : te toetoe nunu kōèhi
Te tau memau no te hana :
*- E ùa kiro toetoe,
*- E tahi rita kōèhi,
*- Te paatai me te pepa.
Pēhea te hanaìa :
*- E hooi i te tau toetoe.
*- A tuku i òto o te hue paapaa, u paatai hakahei.
*- A tuku me te kōèhi.
*- Ua nunu e ìma tihe ònohuu miniti te òaìa.
*- E kai veàveà me te mei, te karahi (A koè à te kaitupu e koàka mai)
KAIKAI MEITAÌ !
(Mea nui te hakapeipeiìa kaikai a tihe mai ; epō te tiòhi …)